ХРИСТИАН УЛОН
«Павеллэн мылкыдыз капчи луиз. Со Инмарлы тау кариз»
Куке Римысь христианъёс тодӥзы, соос доры Павел лыктоз шуыса, куд-ог вын-агайёс сое пумитаны потӥзы. Сое пумитан понна, вын-агайёс 60 иськемлэсь тросгес ортчизы. Кызьы соослэн яратонзы Павел вылын шӧдӥськиз? Библиын гожтэмын: «Соосты адӟыса, Павеллэн мылкыдыз капчи луиз. Со Инмарлы тау кариз» (Ап 28:15). Ӵем дыръя Павел кенешъёсты юнматылӥз, нош та учырын солы аслыз юрттэт кулэ вал, малы ке шуоно со жильыетын пукиз (2Кр 13:10).
Туннэ ёросэз чакласьёс кенешъёсы лыктыло, вын-агайёслэсь но сузэр-апайёслэсь осконзэс юнматыса. Инмарлэн мукет ужась-тыршисьёсыз кадь ик, куддыръя соослэн мылкыдзы усе, соос жадё но мар ке но понна сюлмаськыны быгато. Куке ёросэз чаклась но солэн кышноез кенешады лыктозы, кызьы тон соослэсь мылкыдзэс ӝутыны быгатысалыд, тӥ огдэс огды юнматыны мед быгатоды шуыса? (Рм 1:11, 12).
Тодытонлы сӥзем пумиськонъёсы ветлы. Ёросэз чаклась туж шумпотэ, куке адӟе, макем тыршо ивортӥсьёс вань пумиськонъёсы ветлыны (1Фс 1:2, 3; 2:20). Быгатысалыд-а тон юрттӥсь пионер луыса ужаны-тыршыны толэзе, куке со кенешады лыктэ? Тон быгатысалыд соин яке солэн кышноеныз тодытыны яке кудзэс ке но Библиез дышетонад ӧтьыны. Соослы туж кельше пӧртэм ивортӥсьёсын ветлыны, выльёсыныз но, соосын но, кинъёс малпало, тодытыны туж ик уг быгато шуыса.
Куно карись лу. Быгатысалыд-а тон ёросэз чакласьлы но кышноезлы кӧлон инты ӵектыны яке соосты сюдыны? Озьы тон соосты яратэмдэ возьматод. Но со понна тыныд кема дасяськоно но трос пӧраськоно уз луы (Лк 10:38—42).
Ёросэз чакласьлэсь визь-кенешъёссэ уже кут. Ёросэз чаклась яратыса милемлы адӟыны юрттэ, кызьы Иеговалы ужан-тыршонэз умоятыны луэ. Куддыръя со чурыт визь-кенеш сётоно луэ (1Кр 5:1—5). Со шумпотэ, куке ми солэсь кылзӥськыны дась (Евр 13:17).
Тау кар. Ёросэз чакласьлы но кышноезлы вера, кыӵе пайда вайиз тыныд соослэн лыктэмзы. Тон быгатӥськод со сярысь соослы вераны яке вакчияк гожтэт гожтыны (Кл 3:15).