Мон умой адямиослэсь адӟем кари, но Иегова монэ бакель кариз

Мон вордӥськи Квебек ёросысь Квебек карын, кытын тросэз улӥсьёс француз кылын верасько. Мынам атае но анае, Луи но Зелия, туж яратӥзы монэ но сюлмаськизы мон сярысь. Атае возьдаськись вал но лыдӟиськыны яратӥз. Нош мон гожъяськыны яратӥ но журналист луыны малпасько вал.

Куке мыным 12 арес вал, ми доры лыктӥзы атаеным ӵош ужась Родольф Суси но солэн эшез. Соос Иеговалэн Адӟись-Ивортӥсьёсыз вал. Мон Адӟись-Ивортӥсьёс сярысь ӧжыт тодӥ но ноку ӧй тунсыкъяськы со сярысь, малы соос оско. Монэ туж паймытӥз, кызьы соос валамон но тупен-тупен, Библиез уже кутыса, юанъёсмылы валэктонъёс сётъязы. Анай-атаелы но со туж кельшиз, но ми Библиез дышетыны соглаш кариськимы.

Мон католической школаын дышетски но куддыръя ӵош дышетскисьёсылы вералляй со сярысь, мае тодӥ Библиез дышетон дыръя. Собере та вераськонъёс сярысь дышетӥсьёс но тодӥзы. Соос священникъёс вал. Библиез уже кутыса, мынам кылъёсы шонертэм луо шуыса возьматон интые, одӥгез соос пӧлысь быдэс класс азьын монэ бугыръяськись шуыса нимаз! Священникъёслэн пумитъяськемзы сэрен мон туж сюлмаськи ке но, мон адӟыны быгатӥ, черклэн дышетонъёсыз, кудъёсызлы милемыз школаын дышетӥзы, Библиен соглаш ӧй вал шуыса. Мон валай: мыным татысь кошкыны кулэ. Собере, анай-атаеным вераськыса, мукет школае дышетскыны кошки.

КЫЗЬЫ МОН УЖАН-ТЫРШОНЭЗ ЯРАТӤ

Мон Библиез дышетыны азьланьтӥ, нош осконэ туж каллен будӥз, малы ке шуоно мон кышкай коркась корка ветлыса тодытыны. Католической черклэн люкетыны тыршемез туж шӧдӥськиз, но со тодытон ужмылы лек пумитъяськиз. Квебек карысь Морис Дюплесси, политика удысысь кивалтӥсь, черкен матысь кусып возиз. Солэн юрттэменыз, адямиос Адӟись-Ивортӥсьёсты мыскыллязы но соос вылэ урдскылӥзы. Со дыре, тодытон уже пыриськон понна, зэмзэ ик кышкасьтэм луоно вал.

Кышканме вормыны мыным юрттӥз Джон Рей, кудӥз Галаад школалэсь укмысэтӥ классэ быдтӥз. Джон тодытон уже быгатыса пыриськиз, со вал зӥбыт-востэм адями, но солы вазиськыны капчи вал. Монэ тупатон понна, со шер меӵак вералляз,— солэн ужъёсыз кылъёсызлэсь тросгес веразы. Джон агайлы француз кылын вераськыны секыт вал, соин ик со монэ ужан-тыршонэ пыриськыны ӵем ӧтьылӥз, но мон солы кылзэ волятыны юрттылӥ. Джон агаен ортчытэм дыр юрттӥз мыным ужпум кутыны Иеговалэн Адӟись-Ивортӥсез луыны. 1951-тӥ арын, 26-тӥ куартолэзе, Адӟись-Ивортӥсьёсын нырысетӥзэ пумиськеме дырысен дас ар ортчыса, мон пылатӥськи.

Квебекысь пичи кенешамы тросэз пионеръёс вал. Соослэн ужам-тыршемзы мынэсьтым но мылкыдме ӝутӥз пионер луыны. Со дыре ми тодытӥмы публикациостэк, Библиен гинэ, соин ик милемлы сое быгатыса уже кутоно вал. Зэмлыкез утён понна, мон тырши Библиез умойгес тодыны но тупась кылбуръёсты шедьтыны. Нош тросэз Библиысь кылбуръёсты гинэ но лыдӟыны пумит луизы, сое черк поттыны лэзиз шуыса гожтэмез ӧй вал ке.

1952-тӥ арын мон Симона Патриез кышно басьтӥ, со вал мынам кенешысьтым оскымон христиан сузэр. Ми Монреаль каре улыны мынӥмы, но, кышнояськеммы бере ар ортчыса, милям Лиза нимо туж мусо нылмы вордӥськиз. Сюанмы азьынгес мон пионер луыса ужан-тыршонме кельтӥ ке но, ми Симонаен тыршимы огшоры улыны, кенешмылэн ужъёсаз тросгес пыриськон понна.

Дас ар ортчыса, мон нош ик умой-умой малпаськыны кутски тодытон уже тросгес пыриськон сярысь. 1962-тӥ арын, куке мон Канадаысь Вефильын одӥг толэзь ӵоже дышетски Эксэйлыклы ужан-тыршон школаын, кудаз тӧроос ӧтемын вал, мон улӥ одӥг комнатаын Камилль Уэллетт агаен ӵош. Камилль ӟырдыт мылкыдын тодытон уже пыриськиз, солэн но, мынам кадь ик, семьяез вал ке но. Со монэ туж паймытӥз. Со аръёсы Квебек карысь христианъёс пӧлысь, кудъёсызлэн нылпиоссы вал, туж ӧжытэз пионер луыса ужазы-тыршизы. Нош Камилльлэн вань дырзэ сётыса ужамез-тыршемез потӥз. Дышетсконмы ӵоже со мылкыдме ӝутылӥз аслам югдуре сярысь малпаськыны. Кӧня ке толэзьёс ортчыса, мон валай, нош ик пионер луыса ужаны-тыршыны быгатӥсько шуыса. Куд-огъёсыз кутэм ужпуме шоры умоен ӧз учке, нош мон оски, Иегова мыным юрттоз шуыса.

КВЕБЕКЫН НИМЫСЬТЫЗ ПИОНЕРЪЁС ЛУЫСА УЖАСЬКОМЫ-ТЫРШИСЬКОМЫ

1964-тӥ арын ми Симонаен Квебекын, вордӥськем карамы, нимысьтыз пионеръёс луыса ужаны-тыршыны кутскимы, но ми отын кӧня ке аръёс ӵоже тодытӥмы. Со дыре тодытыны капчигес луиз, озьы ке но ми уйылон-уллянъёсын пумиськылӥмы на.

Одӥг пол, субботае, монэ арестовать каризы Сент-Мариын, Квебек вӧзысь пичи карын. Монэ полицие нуизы но пытсэтэ пуктӥзы, малы ке шуоно тодытон понна мыным нимысьтыз лэзён сётэмын ӧй вал. Берлогес монэ вайизы лек тусъем судья доры, кудӥзлэн Байяржон фамилиез вал. Со юаз, кин монэ судын утёз. Мон верай, Глен Хауa шуыса. «Ой, медаз! Со гинэ медаз луы вал!» — алекъяськыса кеськиз судья. Глен Хау тодмо адвокат вал, кудӥз Иеговалэсь Адӟись-Ивортӥсьёссэ быгатыса утьылӥз. Ӝоген мыным веразы, монэ янгыше уг уськыто ини шуыса.

Квебекын тодытон ужмылы пумитъяськемзы сэрен, пумиськонъёсты ортчытон понна тупась инты шедьтыны секыт вал. Пичи кенешмы шедьтыны быгатӥз вуж гараж гинэ, кудӥз ӧз эстӥськы. Кезьыт толъёсы сое кызьы ке но шунтон понна, вын-агайёс уже кутӥзы вӧйын ужась радиаторез. Пумиськон кутскытозь кӧня ке часъёслы азьлогес соос ӵемысь со котыре люкаськылӥзы но ог-огзылы юнматӥсь учыръёс вераллязы.

Шумпотоно адӟыны, кыӵе емышъёс вайиз тодытон ужмы со аръёс куспын. 1960-тӥ аръёсы Квебек карын, озьы ик Кот-Нор улосын но Гаспе мукожын кӧня ке гинэ пичи кенешъёс вал. Нош туннэ отын кык теократической ёросъёс, но вын-агайёс пумиськыло чебер Эксэйлык юртъёсын.

МЫНЫСА-ВЕТЛЫСА УЖАН-ТЫРШОНЭ ПЫРИСЬКОН

1970-тӥ арын милемлы Симонаен ӵектӥзы ёросэз чаклась луыса ужаны-тыршыны, нош 1973-тӥ арын — улосэз чаклась луыса. Со аръёсы мон тросэзлы дышетски быгатӥсь вын-агайёслэсь, кылсярысь, Лорье Сомюрb но Дейвид Сплэйнc агайёслэсь (соос кыкназы но мыныса-ветлыса ужан-тыршонэ пыриськизы). Котькуд конгресс бере ми Дэйвидэн ог-огмылы верамы малпанъёсмес со сярысь, кызьы эшшо но быгатыса дышетыны луэ. Тодӥсько на, одӥг пол Дэйвид мыным шуиз: «Леонс, мыным кельшиз тынад берпуметӥ речед. Тынад туж умой пӧрмиз! Нош отын сокем трос малпанъёс верамын вал, мыным куинь речьлы но тырмысал!» Ӵем дыръя речьёсам мон укыр трос малпанъёс вералляй. Мыным дышетсконо вал ӧжытгес кылъёсын валэктыса вераны.

Квебекысь вын-агайёс но сузэр-апайёс монэ умой тодӥзы, но, куке мон соослэн ёросазы вуылӥ, ӵем дыръя соослэн монэным ӵош ужамзы-тыршемзы потэ вал. Мыным туж кельше вал соосын тодытыны, соин сэрен ёросэз чакласьлы мон ӧжыт дырме висъялляй, нош улосэз чакласьлэн ужпумез — ёросэз чакласьлэсь мылкыдзэ ӝутыны. Одӥг пол ёросэз чаклась мыным лякытэн тодам вайытӥз: «Туж умой, тон сокем трос дырдэ вын-агайёслы висъяськод шуыса, нош эн вунэты: та мынам арняе. Мынэсьтым но мылкыдме ӝутыны кулэ!» Та умой визь-кенеш юрттӥз мыным валтӥсезлы саклыкме висъяны.

1976-тӥ арын луиз со, мае мон ноку ӧй возьма. Мынам дуно кышное Симона секыт висьыны кутскиз но кулӥз. Мон туж дунъяй, со Иеговаез яратӥз но, ассэ жалятэк, солы ужаз-тыршиз шуыса. Со мынам туж умой эше но ӵош ужась-тыршисе вал. Ужан-тыршонэ трос пыриськемелы луыса мон быгатӥ та шуг-секыт пыр потыны, но мон Иеговалы тау карисько, мыным яратыса юрттэмез понна. Берлогес мон Кэролин Эллиоттэз кышно басьтӥ. Со ӟырдыт мылкыдо но англи кылын вераськись пионер вал, кудӥз Квебеке лыктӥз, тодытон уже пыриськон понна. Кэролин туж яратэ адямиосын вераськыны но соослы саклык висъяны, тужгес но возьдаськисьёсызлы но соослы, кинъёс асьсэды огназы кылемын шуыса шӧдо. Мыныса-ветлыса ужан-тыршонын мон понна со зэмос юрттӥсь луиз.

ВУНОНТЭМ АР

1978-тӥ арын, толшоре, монэ куризы Квебекын Пионеръёсты дышетӥсь нырысетӥ школаез ортчытыны. Мон туж сюлмаськи, малы ке шуоно со вал нырысетӥез школа, кудзэ монэ ортчытыны куризы, озьы ик дышетскисьёс понна но со выль вал. Шумпотыса верано луэ, нырысетӥ классын дышетскизы трос быгатӥсь пионеръёс, но мон дышетӥсь вал ке но, ачим соослэсь тросэзлы дышетски!

Со аре ик, берлогес, Монреаль карысь Олимпийской стадионын нырысетӥез калыккуспо конгресс ортчытӥськиз, кудӥз нимаськиз «Вормись оскон». Квебекын ортчытӥськись конгрессъёс пӧлысь та вал тужгес но бадӟымез, отчы лыктӥзы 80 000-лэсь тросгес адямиос. Мыным сётӥзы уж, кудӥзлы луыса мон трос журналистъёсын конгрессмы сярысь вераськылӥ. Теле- но радио программаосын 20 часлэсь кемагес конгрессмы сярысь вераськизы, но трос сю статьяос потӥзы. Солы луыса адямиослы туж умой тодытэмын вал!

МУКЕТ КЫЛЫН ТОДЫТОН

1996-тӥ арын мынам улонам бадӟым воштӥськон луиз. Пылатӥськем дырысеным ик мон Квебекын француз кылын тодытӥ, нош табере монэ ыстӥзы Торонто карлэн со интыяз, кытын англи кылын верасько. Мон малпай, отын ужаны-тыршыны уг быгаты шуыса, но туж кышкай речьёсты вераны, малы ке шуоно англи кылын умой вераськыны ӧй быгаты. Мыным кулэ вал эшшо но ӵемгес вӧсяськыны, озьы ик эшшо но золгес Иегова вылэ оскиськыны.

Куке мон тодам вайисько Торонтоын кык ар ӵоже ужам-тыршемме, мон юн осконэн вераны быгатӥсько, соос туж умоесь вал шуыса. Кэролин чидаса юрттӥз мыным англи кылын умойгес вераськыны, озьы ик вын-агайёс но монэ туж юнматӥзы. Ӝоген милям трос выль эшъёсмы луизы.

Вирнуналъёсы ёросысь конгрессэн герӟаськем ужъёсы мынам трос вал, нош ӝытъёсы ӵем дыръя мон одӥг час дырме коркась корка ветлыса тодытонлы висъялляй. Кин ке но малпаны быгатысал: «Малы со кулэ — тодытыны шутэтскон нуналъёс азьын, куке трос ужъёс луозы?» Нош ужан-тыршонысь тунсыко вераськонъёс мыным кужым сётылӥзы. Али но, коркась корка ветлыса тодытыкум, мынам мылкыды ик ӝутӥське.

1998-тӥ арын монэ Кэролин кышноеным нимысьтыз пионеръёс луыса Монреаль каре ыстӥзы. Кӧня ке аръёс ӵоже мон радъяй трос калыко интыосын тодытон ужез но журналистъёсын герӟаськылӥ, Иеговалэн Адӟись-Ивортӥсьёсыз сярысь урод малпанъёсты быдтон понна. Али ми Кэролин кышноеным тодытӥськомы мукет шаеръёсысь Канадае алигес лыктэм адямиослы, кудъёсызлэн Библиез умойгес тодэмзы потэ.

Пылатӥськон дырысеным 68 ар ортчиз ини. Со аръёс шоры учкыса, мон адӟисько, Иегова мынэсьтым улонме туж бакель кариз шуыса. Тужгес но бадӟым шумпотон мыным вайиз ужан-тыршонэз яратэме но трос адямиослы зэмлыкез тодыны юрттэме. Мынам Лиза нылы но солэн картэз, нылпиоссэс будэтыса, пионеръёс луыса ужаны-тыршыны кутскизы. Со вань сюлмысьтыз ужа-тырше, но со мыным шумпотон вае. Мон тужгес но тау карисько христиан эшъёсылы, кудъёсыз, умой адӟем карон возьматыса но визьмо визь-кенешъёс сётъяса, юрттӥзы мыным Иеговаен кусыпъёсме юнматыны но пӧртэм амалъёсын солы ужаны-тыршыны. Мон валай: Иеговалэн организациезлэсь ужъёссэ азьланяз но быдэсъян понна, мыным солэн кужмо святой духезлы оскиськоно (Пс. 50:13). Мон ялан Иеговалы тау карисько, со аслэсьтыз нимзэ данъяны мыным бадӟым дан сётӥз шуыса! (Пс. 53:8).