Ми туж яратӥськомы Иеговаез, милесьтым Атаймес

1, 2. Малы но кызьы Иегова милемыз семьяяз пыртӥз?

ИЕГОВА ӧтиз милемыз ужась-тыршисьёсызлэн семьязы пӧлы пырыны. Кыӵе паймымон ӧтён! Та семьяе пыро соос, кинъёс улонзэс Инмарлы сӥзизы но осконзэс возьмато мозмытӥсь курбонлы, кудзэ солэн Пиез сётӥз. Милям семьямы шудо. Ми шумпотӥськомы, малы ке шуоно тодӥськомы, малы улӥськомы, но ми возьмаськомы дырез, куке пырак улыны быгатомы — инмын яке музъем вылын.

² Иегова милемлы луонлык сётӥз семьяез пӧлы пырыны, малы ке шуоно со милемыз туж яратэ. Но со понна Инмар бадӟым дун тыриз (Иоанн 3:16). Ми «дуно дун тырыса мозмытэмын-басьтэмын» (1 Кор. 6:20). Дун тыронлы луыса ми Иеговаен матысь эшъёс луыны быгатӥськомы. Милемлы бадӟым дан сётэмын — быдэс дуннелэн Кузёезлы ми Атай шуыса вазиськыны быгатӥськомы. Но, кызьы гожтэмын вал азьвыл статьяын, Иегова — ваньмызлэсь умой Атай.

3. Кыӵе юанъёсмы милям кылдыны быгато? (Озьы ик учке «Адӟе-а монэ Иегова?» рамкаез.)

³ Милям, псаломъёсты гожъясьлэн кадь ик, юанмы кылдэ, дыр: «Мыным вань ӟеч лэсьтэмъёсыз понна Кузё-Инмарлы маин берыктом?» (Пс. 115:3). Зэмзэ вераса, ми Инмарлы номырин берыктыны ум быгатӥське. Нош яратон, кудзэ со милемлы возьматэ, мылкыдмес ӝутэ сое но яратыны. Апостол Иоанн гожтӥз: «Инмарез яратоме, уго Со азьлогес асьмеды яратӥз» (1 Иоанн 4:19). Кызьы ми инмысь Атаймылы возьматыны быгатомы, сое яратӥськомы шуыса?

УТЕ ИНМАРЕН МАТЫСЬ КУСЫПЪЁСТЭС

4. Иаковлэсь 4:8 лыдэ басьтыса, малы милемлы тыршоно Иеговаен матысь кусыпъёс возьыны?

⁴ Иеговалэн потэ, милям соин матысь кусыпъёсмы мед луозы но ми соин мед вераськомы шуыса. (Лыдӟе Иаковлэсь 4:8.) Со мылкыдмес ӝутэ ялан вӧсяськыны, но со котьку дась милемыз кылзыны (Рим. 12:12). Милемыз кылзон понна, со котьку дыр шедьтэ но ноку жадемын уг луы. Нош ми быгатӥськомы Иеговаез кылзыны, Библиез но сое валаны юрттӥсь публикациосмес лыдӟыса. Со сяна, ми сое кылзӥськомы, христиан пумиськонъёсын сак луыса. Кызьы анай-атайёслы нылпиосынызы ялан вераськон матысь кусыпъёс возьыны юрттэ, озьы ик Иеговаен ялан вераськон юрттэ милемлы соин матысь эшъёс луыны.

5. Кызьы ми вӧсяськонъёсмес умоятыны быгатӥськомы?

⁵ Малпаське, макем матысь кусыпъёсты тӥляд Инмарен. Иеговалэн потэ, вӧсяськыкумы ми солы сюлэммес мед усьтомы шуыса (Пс. 61:9). Соин ик умой луысал аслэсьтыд юаны: «Маин ӵошатыны луоз вӧсяськонъёсме: дась кылъёсын открыткаен яке ас киын гожтэм гожтэтэн, кудаз сюлмысь шӧдонъёс сярысь вераське?» Тӥ зэмзэ но туж яратӥськоды Иеговаез, но тӥляд потэ, соин матысь кусыпъёсты мед луозы шуыса. Нош со понна Инмарен ялан вераськыны кулэ. Усьтэ солы сюлэмдэс. Вералэ солы шумпотонъёстэс но кайгыронъёстэс. Оске, тӥ солэсь котьку но юрттэт курыны быгатӥськоды шуыса.

6. Мар милемлы кароно, Инмарен матысь кусыпъёсмес утён понна?

⁶ Инмысь Атаен матысь кусыпъёсмес утён понна, ми солы котьку но тау карыны кулэ. Ми соглаш псаломъёсты гожъясен, кудӥз вераз: «Тон ми понна трос лэсьтӥд, Кузё-Инмаре, Инмаре мынам, со паймымон ужъёсыдъя, малпанъёсыдъя кин Тыныд укшасез вань! Мынам тодытэме, вераме потэ вал соос сярысь, нош соос лыдъянлэн сьӧраз потэмын» (Пс. 39:6). Милям Иеговалы тау карон мылкыдмы гинэ ӧвӧл, нош озьы ик ми сое кылъёсын но ужъёсын возьматӥськомы. Таин ми асьме нуналъёсы улӥсь тросэз адямиослэсь пӧртэм луиськомы. Ми улӥськомы адямиос пӧлын, кудъёсыз уг дунъяло сое, мае Инмар соос понна лэсьтэ. Берпуметӥ аръёслэн одӥгез тодметсы — со тау карисьтэм луон (2 Тим. 3:1, 2). Ойдолэ ноку ум сётске сыӵе мылкыдлы!

7. Мае милесьтым возьма Иегова но малы?

⁷ Кызьы анай-атайёслэн потэ, нылпиоссы керетытэк но эшъяськыса мед улозы шуыса, озьы ик Иеговалэн но потэ, вань нылпиосыз ог-огенызы тупаса мед улозы шуыса. Ог-огмес яратыса, ми возьматӥськомы, зэмос христианъёс луиськомы шуыса (Иоанн 13:35). Милям шӧдонъёсмы псаломъёсты гожъясьлэн кадь ик. Со вераз: «Макем ӟеч, макем умой агай-вынъёслы валче улыны!» (Пс. 132:1). Ми вын-агайёсмес но сузэр-апайёсмес яратӥськомы ке, озьы Иеговалы возьматӥськомы, сое но яратӥськомы шуыса (1 Иоанн 4:20). Ми туж шумпотӥськомы, милям семьяямы вын-агайёс но сузэр-апайёс ог-огзылы лякыт но гажась-жалясь луэмзэс возьмато шуыса! (Еф. 4:32).

КЫЛЗӤСЬКЫСА МИ ЯРАТОНМЕС ВОЗЬМАТӤСЬКОМЫ

8. 1 Иоаннлэсь 5:3 лыдэ басьтоно ке, кыӵе валтӥсь муг, малы ми Иеговалэсь кылзӥськиськомы?

⁸ Иеговалэн потэ, нылпиос анай-атайёссылэсь мед кылзӥськозы но ми солэсь мед кылзӥськомы шуыса (Еф. 6:1). Ми солэсь кылзӥськыны кулэ, малы ке шуоно со милям Кылдытӥсьмы, Улон сётӥсьмы но котькинлэсь визьлыко Атаймы луэ. Нош валтӥсь муг, малы ми Иеговалэсь кылзӥськиськомы,— ми сое яратӥськомы. (Лыдӟе 1 Иоаннлэсь 5:3.) Иеговаез кылзӥськон понна милям трос мугъёсмы вань ке но, кылзӥськыны со кужмысь уг косы. Иегова милемлы бырйыны эрик кузьмаз, но со шумпотэ, куке ми кылзӥськиськомы, сое яратэменымы.

9, 10. Малы Инмарлэсь курон-косонъёссэ тодыны но соосъя улыны кулэ?

⁹ Анай-атайёслэн потэ, нылпиоссылы номыр но кышкытлык медаз вайы шуыса. Соин ик нылпиоссэс утён понна, соос куд-ог курон-косонъёс пукто. Та курон-косонъёсты быдэсъяса, нылпиос возьмато, анай-атайёссэс ярато но гажало шуыса. Инмысь Атаймылэсь курон-косонъёссэ тодыны но соосъя улыны трослы кулэгес луэ. Озьы ми Иеговалы возьматӥськомы, сое яратӥськомы но гажаськомы шуыса. Со сяна, со милемлы асьмелы пайда вае (Ис. 48:17, 18). Нош соос, кинъёс Иеговаез но солэсь курон-косонъёссэ палэнто, асьсэлы ик уродгес каро (Гал. 6:7, 8).

¹⁰ Ми, Иеговаез шумпоттыса, улӥськомы ке, соку утиськомы солэсь, мар урод сямен шӧдӥськыны быгатэ тазалыкмы, мылкыдмы но Инмарен кусыпъёсмы вылын. Иегова тодэ, мар ми понна тужгес но умой луоз. Тани мар вера Америкалэн Огазеяськем Штатъёсысьтыз Орора нимо сузэр: «Мон быдэсак оскисько: Иеговалэсь кылзӥськид ке, тынад луоз тужгес но умой улонэд». Та кылъёслы пумит номыр уд вера. Малпаське, кыӵе трос пайда вае тӥледлы Иеговалэсь кылзӥськон.

11. Кызьы милемлы вӧсяськонъёс юртто?

¹¹ Вӧсяськонъёс юртто милемлы Инмарлэсь кылзӥськыны соку но, куке со капчи ӧвӧл. Куддыръя милемлы Иеговалэсь кылзӥськыны секыт, малы ке шуоно ми сьӧлыкоесь, озьы ке но ми котьку но тыршыны кулэ солэсь кылзӥськыса улыны. Псаломъёсты гожъясь Инмарлэсь сюлворыса куриз: «Визьма монэ, закондэ быдэсъяса мед улысал, вань сюлмыным сое мон мед утьысал» (Пс. 118:34). Тани мар вера Дениз сузэр, кудӥз пионер луыса ужа-тырше: «Куке мыным Иеговалэн кыӵе ке законэзлэсь кылзӥськыны секыт, мон вӧсяськисько, шонер лэсьтыны мынам кужыме мед луоз шуыса». Ми быдэсак оскыны быгатӥськомы, сыӵе куронъёсмес Иегова одно ик быдэстоз шуыса (Лука 11:9—13).

ЮРТТЭ МУКЕТЪЁСЫЗЛЫ АТАЙМЕС ЯРАТЫНЫ

12. Мар милемлы кароно, Ефесъёслы 5:1 лыдэ басьтыса?

¹² Лыдӟе Ефесъёслы 5:1. Иеговалэн «яратоно нылпиосыз» луыса, ми вань кужмысьтымы тыршиськомы солэсь адӟем карыса улыны. Солэсь адӟем карыса, ми мукетъёсызлы яратонмес, ӟеч сяммес возьматӥськомы но соослэсь янгышъёссэс простить карыны тыршиськомы. Асьмеды умой воземмы Иегова сярысь тросгес тодыны мылкыдзэс ӝутыны быгатэ соослэсь, кинъёс Инмарлы ужатэк-тыршытэк уло (1 Пётр 2:12). Христианъёслы, кудъёсызлэн нылпиоссы вань, асьсэды соосын возёно озьы ик, кызьы Иегова ассэ милемын возе. Соку нылпиослэн но мылкыдзы кылдоз, вылды, яратӥсь Атаенымы эшъяськыны.

13. Мар юрттоз милемлы кышкасьтэм луыны?

¹³ Ӵем дыръя нылпи атаеныз данъяське но шумпотыса со сярысь мукетъёсызлы вера. Озьы ик ми но данъяськиськомы инмысь Атаенымы, Иеговаен, но милям потэ, мукетъёсыз но со сярысь мед тодозы шуыса. Милям сюлэммы тырмемын Давидлэн кадь ик шӧдонъёсын. Со гожтӥз: «Кузё-Инмарен мынам лулы данъяськоз» (Пс. 33:3). Нош мар кароно, ми востэмесь но возьдаськисесь ке? Кызьы ми кышкасьтэмесь луыны быгатомы? Ми сокем ум кышкалэ, куке малпаломы со сярысь, макем ми Иеговаез шумпоттомы но кызьы воштӥськоз улонзы соослэн, кинъёслы ми со сярысь вераломы. Иегова юрттоз милемлы кышкасьтэм луыны. Со юрттӥз кышкасьтэм луыны нырысетӥ даурысь вын-агайёсмылы — озьы ик со юрттоз милемлы но (1 Фес. 2:2).

14. Вералэ куд-ог мугъёсты, малы милемлы тодытыны но дышетскисьёсты дасяны кулэ.

¹⁴ Иегова адямиослэн вылтуссы шоры уг учкы, но со шумпотэ, куке ми но адямиослы яратонмес возьматӥськомы, кыӵе калыкысь гинэ соос медаз луэ (Ап. уж. 10:34, 35). Одӥгез тужгес но умой амал, кызьы мукетъёсызлы яратонмес возьматыны луэ,— соослы ӟеч ивор вераны (Матф. 28:19, 20). Кыӵе емышъёс со вайыны быгатэ? Соос, кинъёс ивормес кылзо, улонзэс умой пала воштыны но пырак улонэ нуись сюрес вылэ султыны быгатозы (1 Тим. 4:16).

ЯРАТЭ АТАЙМЕС НО ШУДО ЛУЭ

15, 16. Кыӵе мугъёсмы милям вань шудо луыны?

¹⁵ Иегова — яратӥсь Атай, но солэн потэ, семьяяз ваньмыз шудоесь мед луозы шуыса (Ис. 65:14). Ми шуг-секытъёсын пумиськыны быгатӥськомы ке но, милям вань трос мугъёсмы шумпотыса улыны. Кылсярысь, ми юн оскиськомы, инмысь Атаймы милемыз туж яратэ шуыса. Инмарлэн Кылысьтыз, Библиысь, ми шонер тодон-валан басьтӥськомы (Иер. 15:16). Озьы ик ми шумпотӥськомы номырин ӵошатонтэм семьяын луыны, кудаз ваньзы Иеговаез, солэсь вылӥ эсэпъёссэ но ог-огзэс ярато (Пс. 105:4, 5).

¹⁶ Ми шудо луыны быгатӥськомы, малы ке шуоно оскиськомы, азьпал улонмы эшшо но умойгес луоз шуыса. Ми тодӥськомы: ӝоген Иегова вань урод адямиосты быдтоз но Эксэйлыкезлэн кивалтэмез улсын музъем райлы пӧрмоз. Со сяна, милям паймымон осконмы вань, кулэмъёс улӟытэмын луозы но матысь адямиосынызы адӟиськозы шуыса (Иоанн 5:28, 29). Кыӵе трос шумпотон со ваёз! Нош тужгес но кулэез: ми быдэсак оскиськомы, вань кылдытэмъёс музъем вылын но, инмын но яратӥсь Атаймылы оскымон луозы но сое данъялозы шуыса, малы ке шуоно Иегова данэз басьтыны ярамон луэ.