Лыдӟисьёслэн юанъёссы

Пыро-а «духлэн емышез» пӧлы укмыс сямъёс гинэ, кудъёсыз сярысь вераське Галатъёслы 5:22, 23?

Та кылбуръёсын вераське: «Духлэн таӵе емышез: яратон, шумпотон, тупаса улон, чидась луон, лякытлык, гажась-жалясь луон, ог-огедлы оскиськымон луон, зӥбыт-востэм луон, возиськыны быгатон». Но со уг возьматы, святой дух та укмыс сямъёсты гинэ будэтыны юрттэ шуыса.

Висъялэ саклыктэс, мар гожтӥз апостол Павел та кылбуръёс азьын: «Лулмугорлэн сьӧлыко ужъёсыз тодмоесь, тани соос: азыса-калгыса улон, юрӟым, кырсь ужъёс лэсьтон; сульдэръёслы-идолъёслы йыбыртъян, веднаськон, тушмонъяськыса улон, керетонъёс, вожъяськон, вожпоттон, даллашонъёс-ченгешонъёс, тупатэк улон, ӧрекчи дышетонъёс, синазькыль карон, адями виён, юыса улон, визьтэмъяськон-укылтэмъяськон но мукет та выллем лек ужъёс» (Гал. 5:19—21). Озьыен, «лулмугорлэн сьӧлыко ужъёсыз» пӧлы, кудъёсыз сярысь вераз Павел, пыризы мукет но сьӧлыкъёс, кылсярысь, соосыз, кудъёсыз пусъемын Колоссыослы 3:5. Сое ик вераны луэ укмыс сямъёс сярысь но, кудъёсыз гожтэмын Галатъёслы 5:22, 23. Тае лыдэ басьтыса, йылпумъян лэсьтыны луоз: Павел ӧз тыршы вераны вань сямъёс сярысь, кудъёссэ будэтыны луэ святой духлы луыса.

Озьы ик Павел Тимофейлэсь мылкыдзэ ӝутӥз будэтыны куать туж умой сямъёсты: шонерлыкез, Инмарлэсь кышканэз, осконэз, яратонэз, чиданэз, зӥбыт-востэм луонэз (1 Тим. 6:11). Соос пӧлысь ньыльзэ гинэ (осконэз, яратонэз, чиданэз но зӥбыт-востэм луонэз) Павел «духлэн емышез» пӧлы пыртӥз. Зэм но, Тимофейлы святой духлэн юрттэмез кулэ вал, мукет сямъёсты но будэтон понна, кудъёсыз сярысь солы Павел вераз: шонерлыкез но Инмарлэсь кышканэз. (Ӵошатэ Колоссыослы 3:12; 2 Пётр 1:5—7).

Озьыен, Галатъёслы 5:22, 23 гожтэмын ӧвӧл вань сямъёс сярысь, кудъёссэ христианъёслы будэтыны кулэ. Инмарлэн духез юрттэ милемлы будэтыны укмыс сямъёсты, кудъёсыз «духлэн емышез» пӧлы пыро. Но вань на трос мукет сямъёс, кудъёссэ милемлы будэтыны кулэ, быдэ вуэм христианъёс луон понна но «выль адями» луон понна, «уго сое Инмар, Аслыз укшатыса, шонерлык, зэмлык, дун-сьӧлыктэм улон понна кылдытӥз» (Еф. 4:24).