Кызьы кенеш юрттэ пылатӥськонлы дасяськыны соослы, кинъёс Библиез дышето

1, 2. Кин юрттыны быгатэ солы, кин Библиез дышетэ, Инмарен кусыпъёссэ будэтыны но пылатӥськыны ужпум кутыны?

«КУКЕ монэн Библиез дышетӥзы, мыным туж кельше вал мае ке выльзэ тодыны»,— вера Эми сузэр, кудӥз Фиджи шаерын улэ. «Мон валасько вал, со зэмлык шуыса, нош вын-агайёсын но сузэр-апайёсын дырме ортчытъяса гинэ, мон улонме воштыны кутски но собере пылатӥськи». Эмилэн кылъёсыз кулэ луись малпанэз пусъё: кенешысь вын-агайёс но сузэр-апайёс юрттӥзы ке солы, кин Библиез дышетэ, соку со Инмарен кусыпъёссэ ӝоггес юнматоз.

² Котькуд ивортӥсь кенешез юнматыны быгатэ (Еф. 4:16). Вануату шаерысь Лэйлани нимо сузэр, кудӥз пионер луыса ужа-тырше, шуэ: «Верало: „Нылпиез быдэс гурт будэтэ“. Мон малпасько, тае ик вераны луэ соос сярысь но, кинъёс Библиез дышето. Ӵем дыръя зэмлык сюрес вылэ султыны адямилы быдэс кенеш юрттэ». Нылпиез будэтон понна, тыршо анай-атайёс, матысь ӵыжы-выжыос, семьялэн эшъёсыз но дышетӥсьёс. Соос дышето сое но юртто солы кулэ луись ужпумъёсты быдэстыны. Ӵапак озьы ик кенешысь ивортӥсьёс но дышетскисьлы быгато визь-кенеш сётыны, солэсь мылкыдзэ ӝутыны но умой адӟем карон возьматыны. Соос дышетскисьлы юрттыны быгато Инмарен кусыпъёссэ юнматыны но пылатӥськыны ужпум кутыны (Мад. 15:22).

3. Малы дышето тӥледыз Аналэн, Доринлэн но Лэйланилэн кылъёссы?

³ Малы ивортӥсьлы, кудӥз кинэн ке Библиез дышетэ, вын-агайёслэсь но сузэр-апайёслэсь юрттэмзэс палэнтоно ӧвӧл? Тани мар вера Молдоваысь Ана сузэр, кудӥз нимысьтыз пионер луыса ужа-тырше: «Дышетскись Иеговаен кусыпъёссэ мед юнматоз шуыса, туж тыршоно. Огнад сое лэсьтыны нокызьы уд быгаты». Соин соглаш Дорин агай, кудӥз Молдоваын ик нимысьтыз пионер луыса ужа-тырше: «Ӵем дыръя вын-агайёс но сузэр-апайёс верало сое, мар дышетскисьлэн сюлмаз ик пыре. Нош мынам йырам сыӵе малпан ноку но ӧй лыктысал». Нош тани мар вера Лэйлани сузэр: «Агайёс но сузэръёс дышетскисьлы яратэмзэс но сюлмаськемзэс возьмато ке, со дышетскисьлы валаны юрттэ, ми зэм но Иеговалэн калыкез луиськомы шуыса» (Иоанн 13:35).

4. Мае ми эскеромы та статьяын?

⁴ Но тӥляд юанды кылдэ, дыр: «Кызьы мон юрттыны быгатӥсько солы, кин Библиез дышетэ, Инмарен кусыпъёссэ юнматыны, соин мукет ивортӥсь дышетэ ке?» Ойдолэ эскеромы, мар ми карыны быгатӥськомы, куке милемыз агай яке сузэр Библия дышетоназ ӧте но куке дышетскись кенешлэн пумиськонъёсаз ветлыны кутске? Озьы ик ми тодомы, кызьы тӧроос дышетскисьлы юрттыны быгато осконзэ юнматыны но пылатӥськонлы дасяськыны.

БИБЛИЯ ДЫШЕТОНЫН

5. Мар тӥледлы кароно, агай яке сузэр тӥледыз Библия дышетоназ ӧтиз ке?

⁵ Дышетскись Инмарлэсь Кылзэ мед валалоз шуыса, кыл кутэ ивортӥсь, кудӥз соин Библиез дышетэ. Со тӥледыз дышетоназ ӧтиз ке, тӥ солы юрттыны кулэ (Екк. 4:9, 10). Нош кызьы тӥ юрттыны быгатӥськоды?

6. Кызьы тӥ уже кутыны быгатӥськоды Мадёнъёсысь 20:18 возетэз, куке тӥледыз Библия дышетонэ ӧтё?

⁶ Дасяське Библия дышетонлы. Нырысетӥез, куре ивортӥсез, кудӥз дышетонэз ортчытэ, кӧня ке вераны тӥледлы дышетскись сярысь. (Лыдӟе Мадёнъёсты 20:18.) Кылсярысь, тӥ юаны быгатӥськоды: кинэн тӥ дышетоды? Мае тӥ эскероды? Малы тынад дышетэмед потэ дышетскисьтэ та дышетон дыръя? Мар сярысь верано, нош мар сярысь вераны кулэ ӧвӧл? Кызьы мон дышетскисьлэсь мылкыдзэ ӝутыны быгатӥсько осконзэ юнматыны? Валамон, ивортӥсь, кудӥз дышетонэз ортчытэ, дышетскисез сярысь тӥледлы ваньзэ уз вера, нош вералоз сое гинэ, мар юрттоз тӥледлы та дышетонлы дасяськыны. Озьы ик лэсьтэ Джой нимо сузэр но, кудӥз миссионер луыса ужа-тырше, куке агайёсты но сузэръёсты Библия дышетоназ ӧте. Со вера: «Та юанъёсты эскерон юрттэ ивортӥсьёслы, кудъёсыз монэн ӵош дышетонам мыно, дышетскисьме валаны но малпаны, мар вераны кулэ».

7. Малы умой дасяськоно, тӥледыз дышетонэ ӧтизы ке?

⁷ Тӥледыз дышетонэ ӧтизы ке, умой луысал эскероно люкетэз лыдӟыны (Езд. 7:10). Дорин агай, кудӥз сярысь вераськиз ини, шуэ: «Мон шумпотӥсько, куке агай яке сузэр, кудзэ мон дышетонэ ӧти, умой дасяське. Соку со мыным туж юрттэ». Дышетскись но адӟоз, дыр, тӥ кыкнады но умой дасяськиды шуыса, тӥ солы умой адӟем карон возьматоды. Тӥ уд ке вуиське дышетоно материалэз пыр-поч эскерыны, соку дыр шедьтэ уроклэн яке люкетлэн валтӥсь малпанъёсыныз тодматскыны.

8. Мар кароно, вӧсяськемды дышетскисьлэн сюлмаз ик мед пыроз шуыса?

⁸ Вӧсяськон — Библия дышетонлэн кулэ луись люкетэз. Соин ик азьло ик малпаське, мар тӥ вералоды, тӥледыз вӧсяськыны куризы ке. Соку вӧсяськемды дышетскисьлэн сюлмаз ик пыроз (Пс. 140:2). Япониысь Ханаэ сузэр али ке но тодэ на, кызьы вӧсяськиз одӥг сузэр, кудӥз со доры куддыръя дышетонэ лыктылӥз. Со вера: «Мон валай, Иегова со сузэрлы матысь эш вал шуыса. Мынам потэ вал, мынам но Инмарен сыӵе ик кусыпъёсы мед луозы шуыса. Нош куке со вӧсяськыкуз мынэсьтым нимме вералляз, мон шӧдӥ, монэ ярато шуыса».

9. Мар кароно, Библия дышетонэз ортчытӥсьлы юрттон понна, Иаковлэсь 1:19 лыдэ басьтыса?

⁹ Юрттэ солы, кин Библия дышетонэз ортчытэ. Нигериысь Омамуйови сузэр, кудӥз нимысьтыз пионер луыса ужа-тырше, вера: «Умой эш дышетон дыръя сак кылзэ. Со трос уг вера, малы ке шуоно вала, со дышетонэз уг ортчыты шуыса». Но кызьы валано, ку но мае вераны кулэ? (Мад. 25:11). Сак кылзэ сое, кин дышетонэз ортчытэ, озьы ик дышетскисез но. (Лыдӟе Иаковлэсь 1:19.) Соку кулэ дыръяз тӥ юрттыны дась луоды. Зэм но, мае ке верамлэсь азьло нырысь малпаськыны кулэ. Кылсярысь, тӥ укыр трос уд вералэ, дышетонэз ортчытӥсьлэн кыл куспаз уд пыре яке мукет вераськонэ уд выже. Но тӥ быгатӥськоды вакчи малпан, пример вераны яке юан сётыны, дышетскисьлы мае ке валэктон понна. Куддыръя тӥляд малпанды кылдэ, дыр, дышетонын тӥ туж ик трос пайда уд вайиське шуыса. Но тӥ дышетскисез ушъяды ке но соин сюлмысь тунсыкъяськиды ке, соку юрттоды солы осконзэ юнматыны.

10. Кызьы асьтэ сярысь верамды дышетскисьлы юрттыны быгатэ?

¹⁰ Вералэ асьтэос сярысь. Тупась учыре тӥ дышетскисьлы вакчияк вераны быгатӥськоды, кызьы зэмлыкен тодматскиды, кызьы кыӵе ке шуг-секыт пыр потӥды яке кызьы тӥледлы Иегова юрттылӥз (Пс. 77:4, 7). Оло нош, дышетскисьлы ӵапак тае тодыны кулэ. Тӥляд верамды быгатэ дышетскисьлэсь осконзэ юнматыны, шуг-секытсэ сэрттыны-пертчыны яке быгатэ мылкыдзэ ӝутыны Инмарен кусыпъёссэ юнматыны но пылатӥськыны (1 Пётр 5:9). Бразилиысь Габриел агай, кудӥз али пионер луыса ужа-тырше, тодаз вае, мар солы юрттӥз, куке соин Библиез дышетӥзы. Со вера: «Куке агайёс мыным асьсэос сярысь верало вал, мон валай: Иегова вань шуг-секытъёсме адӟе. Вын-агайёс шуг-секытъёссы пыр потыны быгатӥзы бере, мон но быгато».

КЕНЕШЛЭН ПУМИСЬКОНЪЁСАЗ

11, 12. Малы милемлы кенешлэн пумиськонъёсаз дышетскисьёсты шумпотыса пумитано?

¹¹ Инмарен матысь кусыпъёс будэтон понна но пылатӥськон понна, дышетскисьлы кенешлэсь пумиськонъёссэ кельтылоно ӧвӧл (Евр. 10:24, 25). Куке со нырысетӥзэ пумиськонэ лыктоз, ми пӧлысь котькудӥз мар ке но карыны быгатэ, со азьланяз но Эксэйлык юртэ мед ветлоз шуыса. Нош мар ми карыны быгатӥськомы?

¹² Дышетскисез шумпотыса пумиталэ (Рим. 15:7). Дышетскись шӧдӥз ке, солы шумпото шуыса, соку со азьланяз но кенешлэн пумиськонъёсаз ветлоз, дыр. Со ассэ умой мед шӧдоз шуыса, ӟечбуръяське соин, озьы ик мукет вын-агайёсын но сузэр-апайёсын тодматэ. Эн малпалэ, та адями сярысь сюлмаськыны кулэ шуыса со ивортӥсь, кудӥз соин Библиез дышетэ, малы ке шуоно солэн Эксэйлык юртын мукет ужъёсыз но луыны быгато яке со пумиськонэ ӧз вуы на. Дышетскисез сак кылзэ но солы саклыктэс висъялэ. Кызьы ваньмыз та дышетскись вылын шӧдӥськыны быгатэ? Эскеромы Дмитрий агайлэсь учырзэ, кудӥз кӧня ке аръёс талэсь азьло гинэ пылатӥськиз, нош али кенешлы юрттӥсь луыса ужа-тырше. Со тодаз вае, кызьы нырысетӥзэ пумиськонэ лыктӥз. Со вера: «Одӥг агай адӟиз, кызьы мон Эксэйлык юрт дорын сюлмаськыса сылӥсько. Со монэ Эксэйлык юртэ пыртӥз но, тросэз монэн ӟечбуръяськыны кутскизы. Мон туж шумпотӥ. Мынам потэ вал, пумиськонъёс котькуд нунал мед ортчозы шуыса. Мон шӧдӥ сое, мае талэсь азьвыл ноку ӧй шӧды вал».

13. Кызьы тӥляд ужъёсты дышетскисьёс вылын шӧдӥськыны быгато?

¹³ Умой адӟем карон возьматэ. Тӥляд ужъёсты дышетскисьлы валаны юрттозы, со зэмлыкез шедьтӥз шуыса (Матф. 5:16). Виталий, кудӥз али Молдоваын пионер луыса ужа-тырше, вера: «Мон чаклай, кызьы асьсэды возё вын-агайёс но сузэр-апайёс, кызьы соос уло, кызьы малпасько. Соку мон валай: ӵапак озьы асьсэды возьыны кулэ соос, кинъёс Инмарен эшъясько».

14. Кызьы тӥляд примерды дышетскисьлы юрттыны быгатэ азьланяз но осконзэ юнматыны?

¹⁴ Дышетскись мед пылатӥськоз шуыса, солы басьтэм тодон-валанъёссэ улоназ пыртоно. Со котьку ик капчи ӧвӧл. Нош куке со адӟоз, кызьы Библиысь возетъёс тӥледлы юртто, солэн но потоз, дыр, соосты уже кутэмез (1 Кор. 11:1). Тани мар вера Ханаэ сузэр, кудӥз сярысь вераськиз ини: «Вын-агайёс но сузэр-апайёс улӥзы ини со возетъёсъя, кудъёсызъя улыны мон дышетскисько гинэ али вал. Соос шоры учкыса, мон валай, кызьы ог-огмылы юрттоно, яратонмес возьматоно но ог-огмес простить кароно. Соос мукетъёсыз сярысь котьку умоен гинэ веразы. Мынам но мылкыды кылдӥз соос кадь луыны».

15. Малы милемлы умойгес тодматскыны тыршоно дышетскисен, куке со кенешлэн пумиськоназ лыктэ, Мадёнъёсты 27:17 лыдэ басьтыса?

¹⁵ Дышетскисен эшъяське. Куке дышетскись кенешлэн пумиськоназ лыктэ, висъялэ солы саклыктэс, тырше соин тодматскыны, ушъялэ сое воштӥськонъёс понна, кудъёссэ со лэсьтӥз ини (Флп. 2:4). Юалэ, кызьы солэн Библия дышетонэз азьланьтӥське, кызьы солэн семьяез улэ, кызьы ужъёсыз мыно. Но эн сётъялэ сыӵе юанъёс, кудъёсыз сэрен со ассэ умойтэм шӧдоз. Дышетскисьлы саклыктэс висъяса, тӥ солы матэгес луоды. Соин эшъяськыса, тӥ юрттоды солы осконзэ юнматыны но пылатӥськонлы дасяськыны. (Лыдӟе Мадёнъёсты 27:17.) Ханаэ сузэр али пионер луыса ужа-тырше. Тани кызьы со тодаз вае дырез, куке пумиськонъёсы ветлыны кутскиз: «Куке мон кенешысь вын-агайёсын но сузэр-апайёсын эшъяськи, мон туж возьмай котькуд пумиськонэз. Туж жадьыса но мон Эксэйлык юртэ лыктыны тыршисько вал. Мыным кельше вал выль эшъёсыным дырме ортчытъяны. Со юрттӥз мыным эшъяськемысь дугдыны соосын, кинъёс Иеговалэн возетъёсызъя ӧз улэ. Мынам потэ вал Иеговаен, озьы ик вын-агайёсын но сузэр-апайёсын кусыпъёсме юнматэме. Соин ик мон пылатӥськыны ужпум кутӥ».

16. Кызьы тӥ эшшо дышетскисьлы юрттыны быгатӥськоды на, со ассэ кенешын умой мед шӧдоз шуыса?

¹⁶ Дышетскись осконзэ юнматэ ке но воштӥськонъёс лэсьтэ ке, юрттэ солы кенешын ассэ умой шӧдыны. Кылсярысь, сое куное ӧте (Евр. 13:2). Тани мае тодаз вае Молдоваысь Денис, куке соин но кышноеныз Библиез дышетӥзы. Со вера: «Агайёс милемыз кӧня ке пол куное ӧтчазы. Соос вераллязы, кызьы Иегова соослы юрттылӥз. Со милесьтым мылкыдмес ӝутэ вал. Соосын дырмес ортчытъяса, ми валамы, милям зэмзэ ик Иеговалы ужаммы-тыршеммы потэ шуыса. Озьы ик ми валамы, макем паймымон улон милемыз возьма». Нош кызьы юрттоно дышетскисьлы, кудӥз ивортӥсь луиз? Ӵектэ солы тодытон уже ӵош пыриськыны. Бразилиысь Диего агай вера: «Трос агайёс ӵектӥзы мыным тодытон уже ӵош пыриськыны. Ог-огенымы тодматскон понна, та самой умой амал. Куке ми тодытӥмы, мон тросэзлы соослэсь дышетски, озьы ик Иеговалы но Иисуслы матэгес луи».

ТӦРООСЛЭН ЮРТТЭМЗЫ

17. Кызьы тӧроос дышетскисьёслы юрттыны быгато?

¹⁷ Дышетскисьёслы дырдэс висъялэ. Тӧроос, тӥ дышетскисьёсын сюлмысь тунсыкъяськиды ке, со юрттоз соослы осконзэс юнматыны но пылатӥськонлы дасяськыны. Быгатӥськоды-а тӥ дышетскисьёслы дырдэс висъяны, куке соос Эксэйлык юртэ лыкто? Эн вунэтэ, кызьы соослэн нимзы, тужгес но соку, куке соос кенешлэн пумиськонъёсаз валэктонъёс сётъяны кутско. Озьы дышетскисьёс шӧдозы, тӥ соослы саклыктэс висъяськоды шуыса. Умой луоз вераськыны вын-агайёсын но сузэр-апайёсын дышетоназы мыныны, со понна тӥледлы малпам ужъёстэс воштоно луиз ке но. Со дышетскисьёслы туж бадӟым пайда вайыны быгатэ. Нигериысь Джеки сузэр, кудӥз пионер луыса ужа-тырше, вера: «Тросэз дышетскисьёс туж паймо, куке тодо, агай, кудӥныз ӵош мон дышетонэ лыктӥ, тӧро шуыса. Одӥг пиосмурт, кудӥзлэн семьяеныз мон Библиез дышетӥсько, вера: „Мынам черкысьтым пастор огшоры адямиос доры ноку уз лыкты. Со ветлэ узыръёс доры гинэ, соос солы коньдон сёто ке“». Та пиосмурт али кенешлэн пумиськонъёсаз ветлэ.

18. Кызьы тӧроос уже кутыны быгато визь-кенешез, кудӥз гожтэмын Апостолъёслэн ужъёсазы 20:28?

¹⁸ Дышетэ но юнматэ соосты, кинъёс Библия дышетонэз ортчытъяло. Тӧроос, тӥ кыл кутӥськоды, ивортӥсьёс эшшо но быгатыса тодытыны но дышетыны мед быгатозы шуыса. (Лыдӟе Апостолъёслэсь ужъёссэс 20:28.) Кин ке но тӥ азьын Библия дышетонэз ортчытыны возьдаське ке, вералэ солы, тӥ асьтэос дышетонэз ортчытыны быгатӥськоды шуыса. Тани мар вера Джеки сузэр: «Тӧроос ялан тунсыкъясько, кызьы мынам дышетскисьёсы уло. Кудӥзлэн ке дышетскиселэн шуг-секытъёсыз кылдо ке, соос пайдаё визь-кенешъёс сёто». Тӧроос туж трос лэсьтыны быгато дышетонэз ортчытӥсьёслы юрттон понна (1 Фес. 5:11). Джеки азьланьтэ: «Мыным кельше, куке тӧроос монэ юнмато но верало, тыршемме дунъяло шуыса. Мон понна со пӧсь куазен кезьыт ву кадь. Соослэн ушъямзы монэ юнматэ. Соку дышетскисьёсты дасян уж мыным эшшо но тросгес шумпотон вае» (Мад. 25:25).

19. Мар шумпотон вайыны быгатэ ми пӧлысь котькудмылы?

¹⁹ Милям асьмелэн Библия дышетонмы ӧвӧл ке но, ми быгатӥськомы осконзэс юнматыны соослэсь, кинъёсын мукет ивортӥсьёс Библиез дышето. Сыӵе дышетонъёсын ми вын-агайлы яке сузэр-апайлы юрттомы, трос ӧм ке вераське но кулэ дыръяз вакчи гинэ малпанмес верамы ке. Ми быгатӥськомы дышетскисьёсын умойгес тодматскыны, куке соос Эксэйлык юртэ лыкто. Озьы ик быгатӥськомы соослы умой адӟем карон возьматыны. Нош тӧроос быгато дышетскисьёслы дырзэс висъяны, озьы ик дышетыны но ушъяны соосты, кинъёс дышетонъёсты ортчытъяло. Ми туж шумпотӥськомы, куке мар ке но карыны быгатӥськомы, мукетъёсыз Иеговаез мед яратозы но солы ужаны-тыршыны мед кутскозы шуыса.