«Кузё-Инмарез утчасьёс нокыӵе но ӟечлыклы ёрмыса уг уло»

1. Кыӵе секыт югдуре сюриз Давид?

УЛОНЗЭ утён понна, Давид пегӟоно луэ. Саул, Израильлэн кужмо эксэез, сое виыны малпа. Давидлэн сиёнэз ӧвӧл. Со Номва каре лыктэ но священниклэсь вить сукыри нянь куре (1 Экс. 21:1, 3). Берлогес Давид но солэн адямиосыз пещерае пегӟо (1 Экс. 22:1). Кызьы Давид сыӵе секыт югдуре сюриз?

2. Малы вераны луоз, Саул кышкыт сюрес вылэ султӥз шуыса? (1 Эксэйлыкъёслэн 23:16, 17).

² Тросэз адямиос Давидэз яратӥзы но басьтэм вормонъёсыз понна сое данъязы. Та понна Саул Давидлы вожъяськыса улӥз. Со сяна, Саул тодӥз, Иеговалы ярамон уг луы ни но со интые Иегова Давидэз эксэе пуктыны малпаз шуыса. (Лыдӟе 1 Эксэйлыкъёслэсь 23:16, 17.) Куке Саул кивалтӥз, солы юрттӥзы трос ожгарчиосыз но со пала кариськись адямиос. Соин ик Давидлы, улонзэ утён понна, пегӟоно луиз. Зэм-а Саул малпаз, Инмарлы люкетыны быгатоз шуыса Давидэз Израильын эксэе пуктыны? (Ис. 55:11). Та сярысь Библия номыр уг вера. Но ми тодӥськомы: Саул кышкыт сюрес вылэ султӥз. Инмарлы пумит мынӥсь адями ноку уз вормы!

3. Кызьы Давид учкиз шуг-секытъёсыз шоры?

³ Давид зӥбыт-востэм адями вал. Израильын эксэй луыны Давид ачиз ужпум ӧз куты, Иегова сое бырйиз (1 Экс. 16:1, 12, 13). Нош Саул Давидэз тушмонэн лыдъяз. Озьы ке но Давид шуг-секытъёсыз понна Иеговаез янгыше ӧз уськыты. Со ӧз ӝожтӥськы, куке солэн сиёнэз ӧжыт вал но куке со пещераостӥ пегаса ветлоно луиз. Со сяна, ӵапак пещераын пегӟыса улыкуз, Давид Иеговаез данъясь чебер кырӟан малпаз, вылды. Со кырӟанысь одӥг чур статьямылэн валтӥсь кылбурез луэ: «Кузё-Инмарез утчасьёс нокыӵе но ӟечлыклы ёрмыса уг уло» (Пс. 33:11).

4. Кыӵе юанъёсты ми эскеромы но малы со кулэ?

⁴ Асьме нуналъёсы но Иеговалэн тросэз ужась-тыршисьёсыз секыт югдуре сюрылӥзыb. Нош COVID-19 пандемия югдурез эшшо но секытгес кариз. «Бадӟым куректон» матэктэмъя улонамы шуг-секытъёс эшшо но тросгес луозы (Матф. 24:21). Ваньзэ тае лыдэ басьтыса, ойдолэ эскеромы ньыль юанъёсты: 1) кызьы Давид ас вылаз шӧдӥз, «Кузё-Инмарез утчасьёс нокыӵе но ӟечлыклы ёрмыса уг уло» шуыса? 2) Малы дышетсконо шумпотыны солы, мармы милям вань? 3) Малы оскыны луэ, Иегова ми сярысь одно ик сюлмаськоз шуыса? 4) Кызьы ми али ик ини вуоно шуг-секытъёслы дасяськыны быгатӥськомы?

«НОМЫРЛЫ НО ӞУДЫСА МОН УГ УЛЫ»

5, 6. Кызьы 22-тӥ Псалом валаны юрттэ, мае возьматэ «Кузё-Инмарез утчасьёс нокыӵе но ӟечлыклы ёрмыса уг уло» шуыса веран?

⁵ Мар сярысь вераз Давид таӵе кылъёсын: «Кузё-Инмарез утчасьёс нокыӵе но ӟечлыклы ёрмыса уг уло»? Тае валаны юрттоз 22-тӥ Псалом. (Лыдӟе Псалтирез 22:1—6.) Давид кутске сое таӵе кылъёсын: «Кузё-Инмаре — мынам Возьмасе; номырлы но ӟудыса мон уг улы». Еврей кылын «номырлы но ӟудыса мон уг улы» шуыса веран тупа Псалтирьысь 33:11 кылъёслы. 22-тӥ Псаломын вераське со сярысь, мар зэмзэ ик дуно луэ,— Иеговалэн бакель каронъёсыз сярысь. Та бакель каронъёсты Иегова сётӥз Давидлы, кудӥз сое аслаз Возьмасеныз лыдъяз. Давид вера, Иегова сое «шонерлыко сюрес кузя» валтэ шуыса, озьы ик умой но урод дыръёсы солы юрттэ шуыса. Давид валаз, Иеговалы ужан-тыршон — со «удалтэм турыно возь вылын» шутэтскон гинэ ӧвӧл шуыса. Куддыръя «кулон вужерлэн нёжалтӥз» мыноно луоз, яке улонын шуг-секытъёс но луозы. Нош кин ке но сое тушмонэн но лыдъялоз. Но Давид Иеговаез Возьмасеныз лыдъяз бере, со вераз: «Уг кышка».

⁶ Нырысетӥ юанмы таӵе вал: кызьы Давид ас вылаз шӧдӥз, «Кузё-Инмарез утчасьёс нокыӵе но ӟечлыклы ёрмыса уг уло» шуыса? Тани солы валэктон: Давидлэн ваньмыз вал, Иеговаен матысь кусыпъёс возён понна. Шудо улон понна, солы трос ваньбур кулэ ӧй вал. Давидлы тырмыт вал со, мае солы сётӥз Инмар. Самой кулэен Давид лыдъяз Иеговалэсь бакель каремзэ но утемзэ.

7. Кыӵе секыт югдуре сюризы нырысетӥ даурын Иудеяын улӥсь христианъёс? (Лука 21:20—24).

⁷ Давидлэн кылъёсысьтыз адӟиське: саклыкмес висъяно солы, кызьы ми ваньбур шоры учкиськомы. Номыр умойтэмез ӧвӧл, милям ваньбурмы вань шуыса. Но малпаськоно, улонамы со валтӥсез ӧз луы-а шуыса. Тае валаны кулэ вал нырысетӥ даурын Иудеяын улӥсь христианъёслы. (Лыдӟе Лукалэсь 21:20—24.) Иисус азьло ик вераз, Иерусалим солдатъёсын котыртэмын луоз шуыса. Соку соослы гурезьёсы пегӟоно луоз. Озьы соос улонзэс утьысалзы. Но со понна соослы троссэ кельто луиз. Кӧня ке аръёс талэсь азьло «Возьмаськон башняын» гожтэмын вал: «Соос бусыоссэс но улон интыоссэс кельтӥзы, коркаосысьтызы ваньбурзэс но ӧз басьтэ. Соос юн оскизы, Иегова соосты утёз но соос сярысь сюлмаськоз шуыса. Инмарлы йыбыртъянэз соос ваньмызлэсь кулэен лыдъязы»c.

8. Малы ми дышетскыны быгатӥськомы Иудеяысь христианъёслэсь?

⁸ Со, мар луиз нырысетӥ даурысь христианъёсын, милемлы но туж бадӟым пайда вайыны быгатэ. Со ик «Возьмаськон башняын» таӵе йылпумъян лэсьтэмын вал: «Ми но эскеремын луомы, вылды, кызьы ваньбур шоры учкиськомы: ми понна валтӥсез ваньбур яке утиськон, кудзэ Инмар оскымон луэммы понна сётэ? Оло нош, та дуннелы пум вуыку, ми бадӟым шуг-секытъёсын но ыштонъёсын пумиськомы. Нырысетӥ даурысь христианъёс сямен, кудъёсыз Иудеяысь пегӟоно луизы, милемлы но дась луоно котьмае кельтыны».

9. Кызьы милемыз юнмато апостол Павеллэн кылъёсыз, кудъёсыз гожтэмын Еврейёслы 13:5, 6?

⁹ Пуктэ син азяды, макем секыт вал со христианъёслы ваньзэ кадь кельтыны но выль интылы дышыны. Соос ӧз оскысалзы ке, Иегова соос сярысь сюлмаськоз шуыса, соослэн номыр ӧй пӧрмысал. Но Иегова соосты юрттэттэк ӧз кельты. Вить ар солэсь азьло, куке рим ожгарчиос Иерусалимез котыртӥзы, апостол Павел пыр Инмар Иудеяысь христианъёслы пайдаё визь-кенеш сётӥз: «Коньдонэз яратӥсесь эн луэ, марды вань, соин кӧтты мед тыроз. Уго Ачиз Инмармы шуиз: „Уг кельты тонэ, уг кушты тонэ“, соин ик асьмеос кышкатэк вераськомы: „Уг кышка, Кузё-Инмар мон палан: адями мыным мар кароз?“» (Евр. 13:5, 6). Соослы, кинъёс Павеллэн кылъёсызлэсь кылзӥськизы, капчигес вал выль интыын огшоры улонлы дышыны. Соос юн оскизы, Иегова соослы ваньзэ кулэзэ сётоз шуыса. Павеллэн кылъёсыз милесьтым но осконмес юнмато, Иегова милемлы улон понна ваньзэ кулэзэ сётоз шуыса.

«СОИН ТЫР ЛУОМЕ»

10. Павеллэн верамезъя, мар кароно, азинлыко луон понна?

¹⁰ Павел Тимофейлы но, милемлы но таӵе визь-кенеш сётӥз: «Сиёнмы вань ке, дӥськутмы вань ке, соин тыр луоме» (1 Тим. 6:8). Татын вераськон уг мыны, нянь но ву гинэ сиёно, начар коркан улоно но ялан одӥг дӥськутэн ветлоно шуыса. Павел та сярысь ӧз вера. Валтӥсез — тыр луоно, яке шумпотоно солы, мармы вань. Павел талы ачиз но дышетскиз, милемлы но сыӵе визь-кенеш сётӥз (Флп. 4:12). Павеллэн верамезъя, соку ми азинлыко луомы. Кӧня гинэ ваньбурмы милям медам луы, Инмарен эшъяськон ваньмызлэсь дуно луэ (Авв. 3:17, 18).

11. Малы милемыз дышетыны быгато Моисейлэн израиль калыклы верам кылъёсыз?

¹¹ Улон понна кулэез шоры ми но Иегова пӧртэм сямен учкыны быгатӥськомы. Малпаське со сярысь, мар вераз Моисей израиль калыклы луоё кыр дуннеетӥ 40 ар ӵоже ветлэмзы бере: «Инмаред Кузё-Инмар киыныд ужано вань ужъёстэ бакель кариз, та быдӟым луоё кыр дуннеетӥ ветлыкуды, Со тӥледлы юрттӥськиз; тани ньыльдон ар ӵоже ини Инмаред Кузё-Инмар тӥледыз уг кельты, номырлы но ёрмыса-ӟудыса уд улӥське» (К. Зак. 2:7). Вань та дыр ӵоже Иегова израиль калыкез маннаен сюдӥз, нош дӥськутсы, кудӥныз соос Египетысь потӥзы, ӧз пӧсьтылы (К. Зак 8:3, 4). Израиль калыкысь куд-огъёсызлы сиёнзы но дӥськутсы ӧжыт потэ вал ке но, Моисей пусйиз, соос номырлы но ёрмыса-ӟудыса ӧз улэ шуыса. Иегова шумпотоз, ми тыр луимы ке соин, мармы вань. Озьы ик Инмар шумпотоз, ми тау каримы ке вань кузьымъёсыз понна, соос пичиесь ке но луизы.

ЮН ОСКЕ, ИЕГОВА ТӤ СЯРЫСЬ СЮЛМАСЬКОЗ ШУЫСА

12. Кытысь ми тодӥськомы, Давид Иегова вылэ оскиськиз шуыса?

¹² Давид юн оскиз: Иегова оскымон луэ соослы, кинъёс сое ярато, но соос сярысь сюлмаське. 33-тӥ Псаломез гожтыкуз, Давид секыт югдуре сюремын вал ке но, осконэзлы луыса со адӟиз, кызьы Иеговалэн кылчинэз «Солэсь кышкасьёс котыре интыяське» (Пс. 33:8). Давид таӵе ӵошатон вераз, вылды, малы ке шуоно со трос ожмаськиз. Со трос пол адӟиз, кызьы ожгарчиос, тушмонъёслэсь кинэ ке утён понна, котыраз интыясько. Давид быгатэ вал ас вылаз оскиськыны: со трос ожмаськонъёс пыр потӥз, быгатыса уже кутӥз из зӥръян арбериез но мечез, озьы ик Иегова солы кылзэ сётӥз сое эксэе пуктыны (1 Экс. 16:13; 24:13). Но Давид Инмар вылэ оскиськиз но тодӥз, «Кузё-Инмарлэн Кылчинэз Солэсь кышкасьёс котыре интыяське но соосты уте» шуыса. Ми ум возьмаське, туннэ Иегова милемыз вань шуг-секытъёслэсь утёз шуыса. Но ми тодӥськомы: соослы, кинъёс Иеговалы оскисько, нокин но тупатыны луонтэм изъян вайыны уз быгаты.

13. Малы, Магог музъемысь Гог урдскыку, адямиос малпалозы, милемыз нокин утьыны уз быгаты шуыса, но малы ми сюлмаськытэк улыны быгатӥськомы? (Учке вылбамысь суредэз.)

¹³ Ӝоген милям осконмы, Иегова милемыз утьыны быгатоз шуыса, пыр-поч эскеремын луоз. Куке Магог музъемысь Гог — калыкъёслэн огазеяськонзы — Инмарлэн калыкез вылэ урдскоз, ми малпаломы, вылды, тушмонъёсмылэсь утиськыны ум быгатэ шуыса. Милемлы Иеговалы быдэсак оскиськоно луоз, со аслэсьтыз ужась-тыршисьёссэ утьыны быгатоз но тае одно ик лэсьтоз шуыса. Тушмонъёсмы малпалозы, милемыз нокин утьыны уз быгаты шуыса (Иез. 38:10—12). Милям ожтӥрлыкмы ӧвӧл. Ми ожмаськыны ум дышетскиське. Соин ик соос малпалозы, милемыз капчиен быдтыны луоз шуыса. Но калыкъёс уг адӟо сое, мае ми юн осконэн адӟиськомы: туж трос кылчинъёсты, кудъёсыз Инмарлэн ужась-тыршисьёсыз котыре интыясько, соосты утён понна. Зэм но, кызьы тушмонъёсмы соосты адӟыны быгатозы? Соослэн юн осконзы ӧвӧл ук! Соос уз ик малпалэ, милемыз инмысь ожгарчиос утёзы шуыса (Усьт. 19:11, 14, 15).

АЛИ ИК ИНИ ДАСЯСЬКЕ ВУОНО ШУГ-СЕКЫТЪЁСЛЫ

14. Мар али ик ини кароно, вуоно югдуръёслы дасяськон понна?

¹⁴ Кызьы али ик ини дасяськыны луэ вуоно шуг-секытъёслы? Нырысь ик дышетсконо ваньбур шоры шонер учкыны но валано, куке но ваньзэ кельтоно луоз шуыса. Озьы ик шумпотоно солы, мармы вань, но Иеговаен эшъяськонмес ваньмызлэсь дуноен лыдъяно. Макем умойгес ми Инмарен тодматскиськомы, сокем юнгес милям луоз осконмы, Магог музъемысь Гог урдскыку, со милемыз утьыны быгатоз шуыса.

15. Кыӵе югдуръёсын Давидлэн осконэз юнмаз, Иегова солы котьку но юрттоз шуыса?

¹⁵ Мар эшшо юрттоз на милемлы вуоно шуг-секытъёслы дасяськыны? Давид вераз: «Веръяса утчалэ но адӟоды макем ӟечлыко Кузё-Инмар! Шудо адями, кудӥз Со вылэ оскиське!» (Пс. 33:9). Тае вераз адями, кудӥз ас вылаз шӧдӥз, Иеговалы котьку но оскиськыны луэ шуыса. Кытысь Давид тодӥз, котькыӵе югдурын Иегова солы юрттыны быгатэ шуыса? Егит дыръяз Давид филистим калыкысь Голиафен ожмаськыны потӥз. Та бадӟым мугоро ожгарчилы Давид вераз: «Кузё-Инмар туннэ тонэ мынам киулам сётоз» (1 Экс. 17:46). Берлогес Давид ужаз-тыршиз Саул эксэйлы, кудӥз сое трос пол виыны турттӥз. Но «Кузё-Инмар... [Давид] бордын вал» (1 Экс. 18:12). Егит дыръяз таӵе югдуръёсын пумиськыса, Давидлэн осконэз юнмаз. Со тодӥз, вуоно шуг-секытъёс дыръя но со Иеговалы оскиськыны быгатоз шуыса.

16. Кыӵе учыръёсын адӟыны луэ, макем ӟечлыко Иегова?

¹⁶ Соослы, кинъёс туннэ ик ини Иеговалы оскиськыны дышетско, капчигес луоз вуонояз но солы оскиськыны. Иеговалы быдэсак оскиськоно, куке уж дорысьтымы кузёлэсь куриськиськомы конгрессэ мыныны яке куриськомы сое ужан дырмес воштыны, кенешлэн вань пумиськонъёсаз ветлон понна но тросгес тодытон понна. Нош мар ми каромы, кузёмы милемыз ӧз лэзьы ке но уж дорысьтымы поттӥз ке? Оскомы-а ми, соку но Иегова милемыз уз кельты но улон понна ваньзэ кулэзэ сётоз шуыса? (Евр. 13:5). Та сярысь вераське вын-агайёсын но сузэр-апайёсын, кудъёсыз вань дырзэс сётыса ужало-тыршо. Соос вералозы тӥледлы трос учыръёсты, кызьы Иегова самой кулэ дыръяз соослы юрттылӥз. Иегова тӥледыз ноку уз кельты!

17. Кыӵе кылбур быръемын 2022-тӥ арлы но малы?

¹⁷ Иегова милемын. Соин ик милемлы кышкано ӧвӧл солэсь, мар вуонояз луоз. Иегова улонамы нырысетӥ интыын ке, со милемыз ноку уз кельты. Ми та сярысь медам вунэтэ но али ик ини вуоно шуг-секытъёслы мед дасяськомы шуыса, Кивалтӥсь кенеш 2022-тӥ арлы таӵе кылбур бырйиз: «Кузё-Инмарез утчасьёс нокыӵе но ӟечлыклы ёрмыса уг уло» (Пс. 33:11).