Тодӥськоды-а тӥ?

Малы Иегова израиль калыклы лэзиз кыр дыдыкъёсты но, гурт дыдыкъёсты но курбонлы вайыны?

МОИСЕЙЛЭН законэзъя Иеговалы курбонлы вайыны луэ вал кыр дыдыкъёсты но, гурт дыдыкъёсты но. Инмарлэн Кылаз курбонъёс сярысь вераськыку, та кык тылобурдоос котьку но ӵош верамын луо. Соос пӧлысь котькудзэс курбонлы вайыны луэ вал (Лев. 1:14; 12:8; 14:30). Та огшоры малпан ке но, со израиль калыклы бадӟым пайда вайиз. Малы? Одӥгез муг — кыр дыдыкъёсты котьку ик шедьтыны уг луы вал.

Израильын кыр дыдыкъёсты шуныт толэзьёсы гинэ адӟыны луэ вал. Шуркынмон толэзе соос кошкыло шуныт шаеръёсы, нош тулыс берытско (Кырӟ. 2:11, 12; Иер. 8:7). Вашкала дыръёсы толалтэ кыр дыдыкъёсты шедьтыны но курбонлы вайыны секыт вал.

Нош гурт дыдыкъёс Израильысь нокытчы ӧз кошкылэ. Озьы ик адямиос соосты доразы вордылӥзы. (Ӵошатэ Иоаннлэсь 2:14, 16.) Одӥг книгаын верамъя, Палестинаын котькуд карын но гуртын гурт дыдыкъёс вал. Котькуд семьялэн дыдык возён карез яке корка бордаз кыӵе ке пасез вал, кудаз дыдыкъёс улыны быгатӥзыa. (Ӵошатэ Исаиялэсь 60:8.)

Кызьы ми адӟимы, израиль калык курбонлы вайыны быгатӥз сыӵе тылобурдоосты, кудъёссэ шедьтыны луэ вал. Та возьматэ: Иегова — яратӥсь Инмар, со милесьтым лэсьтыны луонтэмзэ ноку но уз куры.