Лыдӟисьёслэн юанъёссы

Мемфивосфей но Мимфивосфей, кудъёсыз сярысь вераське 2 Эксэйлыкъёслэн 21:7—9, со кык пӧртэм пиосмуртъёс яке татын вераське одӥг адями сярысь?

Зэм но, та нимъёс ог-огзылы туж тупало. Со сяна, Библилэн куд-ог берыктэмъёсаз татын одӥг кадь нимъёс гожтэмын. Сак лыдӟытэк, малпан кылдыны быгатэ, та кылбуръёсын одӥг адями сярысь вераськон мынэ шуыса. Но татын вераське кык пӧртэм пиосмуртъёс сярысь. Озьы ик та учыр милемыз тросэзлы дышетыны быгатэ.

Израильысь Саул эксэйлэн сизьым пиосыз но кык нылъёсыз вал. Ионафан нырысетӥез пиез вал. Берлогес Рицпалэсь Сауллэн Мимфивосфей пиез вордӥськиз. Ионафан аслаз пиезлы Мемфивосфей ним понӥз. Озьыен, Сауллэн Мимфивосфей нимо пиез но Мемфивосфей нимо внукез вал.

Огпол Саул эксэй Гаваон карын улӥсьёсты быдтыны малпаз. Соку трос адямиос виемын вал. Инмарлэн син азяз со шонертэм вал. Малы ке шуоно солэсь азьвыл, Иисус Навин улон нуналъёсы, израиль калыклэн кивалтӥсь йыръёсыз Гаваон калыкен вераськизы тупаса улыны (Иис. Н. 9:3—27).

Саул эксэй кивалтыку но, Гаваон калыкен тупаса улыны кулэ вал. Но та шоры учкытэк, Саул та калыкез быдтыны турттӥз. Саулэз но солэсь семьязэ Иегова «вир кисьтыны яратӥсь» адямиосын лыдъяз (2 Экс. 21:1). Берлогес Израильын Давид кивалтыны кутскиз. Со тодӥз, куке Саул Гаваон калыкез быдтыны турттӥз, Иегова израиль калыклэсь палэнскиз шуыса. Соин ик Давид Гаваон калык пӧлысь кылемъёссэ юаз: «Тӥ понна мон мар лэсьтыны кулэ азьвыл тӥледлы лэсьтэм шонертэм ужез тупатон понна?» Соос Давидлэсь коньдон ӧз куре. Со интые, соос веразы: «Милемыз виылӥсь, Израильлэн одӥг люкетаз но кельтытэк милемыз быдтыны малпась муртэ — солэн выжыысьтыз сизьым муртэ — сёт милемлы, соосты ми... ошомы». Давид куронзэс быдэстӥз (2 Экс. 21:2—6; Лыд. 35:30, 31).

Со дырлы Саул но Ионафан ожмаськонын быремын вал ини. Нош Ионафанлэн пиез, Мемфивосфей, кудӥз пичи дыръяз чут луиз, улэп на вал. Но Гаваонын улӥсьёсты быдтыку, Мемфивосфей отчы ӧз пыриськы. Солэсь азьвыл Давид но Ионафан эшъяськон сярысь тупанкыл кутӥзы. Та тупанкыл герӟаськемын вал Ионафанлэн нылпиосыныз но, озьы ик Мемфивосфей пиеныз но (1 Экс. 18:1; 20:42). Соин ик 2 Эксэйлыкъёслэн 21:7 тазьы гожтэмын: «[Давид] эксэй жаляз Сауллэсь Ионафан пиезлэсь Мемфивосфей пизэ Кузё-Инмарлэн нимыныз Давидэн но Сауллэн Ионафан пиез куспын кыл сётэм понна».

Озьы ке но Давид Гаваонын улӥсьёслэсь куронзэс быдэстыны быгатӥз. Со сётӥз соослы Сауллэсь кык пиоссэ, кудъёсыз пӧлын Мимфивосфей пиез но вал, но Сауллэсь вить внукъёссэ (2 Экс. 21:8, 9). Собере израиль калык Гаваонын вир кисьтэмез понна янгыш ӧй вал ини.

Та учыр милемыз малы ке но дышетыны быгатэ. Инмарлэн законаз тазьы гожтэмын: «Нылпиосты... атайёслэн урод ужъёссы понна виыны уг яра» (К. Зак. 24:16). Сауллэн пиосыз но внукъёсыз янгыш ӧй луысалзы ке, соосты казнить карон Иеговалэн син азяз шонертэм луысал. Озьы ик та законын гожтэмын: «Котькудзэ но йыруж лэсьтӥсь муртэ йыружез понна виыны кулэ». Соин ик валаны луэ, сизьым пиосмуртъёс но, кудъёсыз виыны сётэмын вал, Гаваонын вир кисьтон понна янгыш вал шуыса. Озьыен, соос асьсэлэн йыружзы понна виымын вал.

Та учырысь адӟиське, тазьы малпано ӧвӧл шуыса: «Мон янгыш ӧвӧл, малы ке шуоно та ужез солэн косэмезъя лэсьтӥ». Котькуд ужмы понна ми асьмеос кыл кутӥськомы. Ойдолэ ум вунэтэ таӵе визьмо кылъёсты: «Пыдыныд лёгиськон сюресэд сярысь малпа, вань сюресъёсыд юнэсь мед луозы. Бурпала но, паллян пала но эн кожылы; уродлэсь-леклэсь пыддэ палэнты» (Мад. 4:24—27; Еф. 5:15).