ЭСКЕРОН ПОННА СТАТЬЯ 28
Инмарлэн Эксэйлыкез кивалтэ ини!
«Дуннелэн эксэйлыкез Кузё-Инмармылэн но Солэн Христосэзлэн Эксэйлыкез луиз» (УСЬТ. 11:15).
22-ТӤ КЫРӞАН Мед лыктоз Эксэйлыкед!
ТА СТАТЬЯЫНa
1. Кыӵе милям осконмы вань но малы ми солы оскиськомы?
ДУННЕЫСЬ югдурез адӟыса, капчи-а тӥледлы оскыны, азьланяз ваньмыз умой луоз шуыса? Адямиос эшшо но лек луизы. Соос асьсэды гинэ ярато. Семьяос люкисько. Тросэз кивалтӥсьёслы уг оско. Но ӵапак таӵе югдур милемыз оскытэ, ӝоген ваньмыз умой пала воштӥськоз шуыса. Малы ми талы оскиськомы? Таӵе югдур возьматэ, «берпум аръёс» сярысь азьпалзэ ивортон быдэсме шуыса (2 Тим. 3:1—5). Ваньзэ тае адӟыса, тросэз соглаш кариськозы, дыр, та азьпалзэ ивортон асьме нуналъёсы быдэсме шуыса. Нош со возьматэ, Иисус Христос Инмарлэн Эксэйлыказ эксэй луиз шуыса. Та Инмарлэн Эксэйлыкез сярысь одӥгез гинэ азьпалзэ ивортон. Куке ми эскеромы, кыӵе эшшо азьпалзэ ивортонъёс быдэсмизы на берпум аръёсы, ми осконмес юнматомы.
Усьтӥськонысь но Данииллэн книгаысьтыз азьпалзэ ивортонъёс быдэс суредлэн пичи люкетъёсыз кадь, кудъёсыз валаны юртто, кыӵе дыре ми улӥськомы, Иеговалэн синмыныз учкыса. (Учке 2-тӥ абзацез.)
2. Мае ми эскеромы та статьяын но малы? (Учке вылбамысь суредэз.)
2 Та статьяын ми эскеромы азьпалзэ ивортонъёсты, кудъёсыз юртто валаны: 1) ку Эксэйлык кивалтыны кутскиз, 2) Иисус Христос инмысен кивалтэ ини но 3) кызьы Эксэйлыклэн тушмонъёсыз быдтэмын луозы. Та азьпалзэ ивортонъёс быдэс суредлэн пичи люкетъёсыз кадь. Соос валаны юртто, кыӵе дыре ми улӥськомы, Иеговалэн синмыныз учкыса.
КЫЗЬЫ ВАЛАНО, КУ ИНМАРЛЭН ЭКСЭЙЛЫКЕЗ КИВАЛТЫНЫ КУТСКИЗ
3. Мае возьматэ азьпалзэ ивортон, кудӥз гожтэмын Данииллэн 7:13, 14?
3 Азьпалзэ ивортон, кудӥз гожтэмын Данииллэн 7:13, 14, возьматэ, Иисус Христос Инмарлэн Эксэйлыказ эксэй луыны туж умой тупа шуыса. «Вань калыкъёс» солы шумпотыса ужалозы-тыршозы. Иисус та Эксэйлыкын котьку но кивалтоз. Данииллэн книгаысьтыз мукет азьпалзэ ивортонын вераськиз: Иисус кивалтыны кутскоз «сизьым дыр вапумъёс» ортчем бере. Луэ-а валаны, ку та азьпалзэ ивортон быдэсмыны кулэ вал?
4. Валэктэ, кызьы Данииллэн 4:7—14 валаны юрттэ, кыӵе арын Христос эксэй луиз. (Озьы ик учке сноскаез.)
4 Лыдӟе Данииллэсь 4:7—14. «Сизьым дыр вапумъёс» кыстӥсько 2 520 ар. Та дыр кутскиз асьме вакытлэсь азьло 607-тӥ арын, куке Вавилон калык Инмарен пуктэм берпуметӥ эксэез погыртӥз. Нош йылпумъяськиз 1914-тӥ арын, куке Иегова аслаз Эксэйлыказ Иисусэз эксэе пуктӥз (Иез. 21:25—27)b.
5. Малы валаны кулэ «сизьым дыр вапумъёс» сярысь азьпалзэ ивортонэз?
5 Малы та азьпалзэ ивортонэз валаны кулэ? «Сизьым дыр вапумъёс» сярысь азьпалзэ ивортон оскытэ милемыз, Иегова вань кылсётонъёссэ дырыз дыръя быдэстэ шуыса. Иегова аслэсьтыз Эксэйлыксэ тупатэм дыре кылдытӥз бере, со лэсьтоз ваньзэ, мукет азьпалзэ ивортонъёс но дырыз дыръя мед быдэсмозы шуыса. Милям юн оскеммы луэ: Иеговалэн нуналыз уз ӝега (Авв. 2:3).
КЫТЫСЬ МИ ТОДӤСЬКОМЫ, ХРИСТОС ИНМАРЛЭН ЭКСЭЙЛЫКАЗ КИВАЛТЭ ИНИ ШУЫСА
6. а) Дунне вылысь кыӵе югдур возьматэ, Христос инмын кивалтыны кутскиз шуыса? б) Кызьы Усьтӥськон 6:2—8 возьматэ, дунне вылын секыт югдур луоз шуыса?
6 Музъем вылын ужан-тыршонэзлэн пумаз Иисус вераз музъем вылысь югдур сярысь, кудӥз валаны юрттысал, ку со инмын кивалтыны кутскоз. Кылсярысь, Иисус вераз ожмаськонъёс, сютэм аръёс но музъем зурканъёс сярысь. Озьы ик со вераз, пӧртэм интыосын урод черъёс луозы шуыса. Тае возьматэ COVID-19 пандемия но. Дунне вылысь таӵе югдур валаны юрттэ, ку Христос Инмарлэн Эксэйлыказ эксэй луиз (Матф. 24:3, 7; Лука 21:7, 10, 11). Со сяна, кулэмез но инме ӝутскемез бере ог 60 ар ортчыса, Иисус апостол Иоаннлы адӟытон сётӥз. Та адӟытон возьматӥз, Иисуслэн веранъёсыз быдэсмыны кулэ шуыса. (Лыдӟе Усьтӥськонэз 6:2—8.) Ваньмыз та быдэсмыны кутскиз 1914-тӥ арын, куке Иисус эксэй луиз.
7. Малы Иисуслэн эксэй луэмез бере музъем вылын югдур эшшо но секытгес луиз?
7 Малы, куке Иисус Инмарлэн Эксэйлыказ кивалтыны кутскиз, музъем вылын югдур эшшо но секытгес луиз? Усьтӥськонын 6:2 вераське, Иисус эксэй луэмез бере ик Шайтанэн но солэн периосыныз ожмаськыны кутскиз шуыса. Нош Усьтӥськонысь 12-тӥ люкетын вераське, Шайтан но солэн периосыз музъем вылэ сэрпалтэмын вал шуыса. Соин ик Шайтан туж вожез потыса улэ но адямиосты курадӟытэ (Усьт. 12:7—12).
Урод иворъёс милемыз уг шумпотто ке но, Библиысь азьпалзэ ивортонъёслэн быдэсмемзы оскытэ милемыз, Инмарлэн Эксэйлыкез кивалтэ ини шуыса (Учке 8-тӥ абзацез.)
8. Малы валаны кулэ, Эксэйлык сярысь азьпалзэ ивортонъёс асьме нуналъёсы быдэсмо шуыса?
8 Малы та азьпалзэ ивортонъёсты валаны кулэ? Дуннеысь югдур но адямиослэн урод ужъёссы возьмато, Иисус кивалтыны кутскиз шуыса. Милемлы туж уг кельшы, адямиос асьсэды уродгес но уродгес возё шуыса. Но соослэн урод ужъёссы возьмато, Библиысь азьпалзэ ивортонъёс быдэсмо шуыса. Инмарлэн Эксэйлыкез кивалтэ ини! (Пс. 36:1). Армагеддон матэктэмъя, дуннеысь югдур эшшо но секытгес луоз, дыр (Марк 13:8; 2 Тим. 3:13). Но ми туж тау кариськомы инмысь Атаймылы, малы ке шуоно со милемлы валэктэ, малы дуннеын югдур сокем секыт.
КЫЗЬЫ ИНМАРЛЭН ЭКСЭЙЛЫКЕЗЛЭН ТУШМОНЪЁСЫЗ БЫДТЭМЫН ЛУОЗЫ
9. Мае ми тодӥськомы берпуметӥ дунневыл держава сярысь, Данииллэсь 2:28, 31—35 лыдӟыса, но кызьы со кылдӥз?
9 Лыдӟе Данииллэсь 2:28, 31—35. Ми адӟиськомы, кызьы быдэсме та азьпалзэ ивортон. «Инмар... Навуходоносор эксэйлы усьтӥз, мар луоз берпуметӥ нуналъёсы», Христос кивалтыны кутскем бере. Иисуслэн луозы тушмонъёсыз. Соос пӧлысь одӥгез — берпуметӥез дунневыл держава, кудӥз сярысь Библиын азьло ик гожтэмын вал. Азьпалзэ ивортонын сое возьмато «кортлэсь, горд сюйлэсь лэсьтэм» пыдъёс. Та дунневыл держава кивалтэ ини. Со Великобританилэн но Огазеяськем Штатъёслэн огазеяськонзы, яке Англо-Американской дунневыл держава. Со кылдӥз Нырысетӥ дунневыл ож дыръя, куке та шаеръёс валче ужаны кутскизы. Навуходоносор эксэйлэн уйвӧтэз возьматэ, маин пӧртэм вал та огазеяськон мукет дунневыл державаослэсь. Ойдолэ эскеромы кык пӧртэмлыксэ.
10. а) Кызьы Данииллэн книгаысьтыз азьпалзэ ивортон быдэсме Великобританилэн но Огазеяськем Штатъёслэн огазеяськонзы вылын? б) Малэсь милемлы палэнсконо? (Учке «Сак луэ: горд сюй!» рамкаез.)
10 Нырысетӥез, азьвыл дунневыл державаосын ӵошатыса, Великобританилэсь но Огазеяськем Штатъёслэсь огазеяськонзэс корт гинэ уг возьматы. Сое возьматэ корт но горд сюй. Горд сюен ӵошатӥсько огшоры адямиос (Дан. 2:43). Огшоры адямиос быръёнъёсы пырисько, пӧртэм огазеяськонъёсты кылдыто, бугыръясько, правооссэс утьыны тыршо. Соин сэрен та дунневыл держава лябӟе но вань кужмысьтыз кивалтыны уг быгаты.
11. Кызьы Англо-Американской дунневыл державалэн кивалтэмез возьматэ, ми берпум нуналъёсы улӥськомы шуыса?
11 Кыкетӥез, Англо-Американской дунневыл державаез возьмато бадӟым сульдэрлэн пыдъёсыз. Соин ик со берпуметӥез дунневыл держава, кудӥз сярысь Библиын вераське. Со бере нокыӵе адями кивалтэтъёс уз луэ ини. Инмарлэн Эксэйлыкез сое но мукет кивалтэтъёсты син куспын Армагеддонын быдтоз (Усьт. 16:13, 14, 16; 19:19, 20)c.
12. Кызьы эшшо Данииллэн азьпалзэ ивортонэз возьматэ на, ми берпум нуналъёсы улӥськомы шуыса? Малы со милемыз буйгатэ но вуоноезлы оскон сётэ?
12 Малы та азьпалзэ ивортонэз валаны кулэ? Данииллэн азьпалзэ ивортоназ вань на эшшо одӥг малпан, кудӥз возьматэ, ми берпум нуналъёсы улӥськомы шуыса. 2 500 ар талэсь азьло Даниил вераз, Вавилон бере эшшо ньыль дунневыл державаос луозы на шуыса, кудъёсызлэн кивалтэмзы улсын Инмарлэн калыкез улоз. Англо-Американской дунневыл держава соос пӧлысь берпуметӥез. Та малпан милемыз буйгатэ но оскытэ, ӝоген Инмарлэн Эксэйлыкез адямиослэсь кивалтэтъёссэс быдтоз но быдэс дуннеын ачиз кивалтыны кутскоз шуыса (Дан. 2:44).
13. Кин со «тямысэтӥез эксэй» но «дас эксэйёс», кудъёсыз сярысь гожтэмын Усьтӥськонын 17:9—12, но кызьы быдэсме та азьпалзэ ивортон?
13 Лыдӟе Усьтӥськонэз 17:9—12. Нырысетӥ дунневыл ож туж бадӟым куашкатонъёс вайиз. Солы луыса быдэсмиз Библиысь берпум нуналъёс сярысь эшшо одӥгез азьпалзэ ивортон. Кивалтӥсьёслэн потэ вал быдэс дунне вылэ тупаса улон ваемзы. Соин ик 1920-тӥ арын толшоре кылдытэмын вал Нациослэн Лигазы. Нош 1945-тӥ арын коньывуонэ сое воштӥз Огазеяськем Нациослэн Организацизы. Та организация «тямысэтӥез эксэй» луэ, но со дунневыл держава ӧвӧл. Солэн кужымез вань, малы ке шуоно солы юрттӥсько кивалтэтъёс, кудъёсыз Библиын «дас эксэйёс» шуыса нимасько.
14, 15. а) Мар вераське «Быдӟым Вавилон» сярысь Усьтӥськонын 17:3—5? б) Мар каро тросэз адямиос, кудъёсыз зэмос луисьтэм религие пырисько вал?
14 Лыдӟе Усьтӥськонэз 17:3—5. Инмарлэн адӟытоназ апостол Иоанн адӟиз азыса-калгыса улӥсь кышномуртэз, «Быдӟым Вавилонэз», кудӥз зэмос луисьтэм религилэсь дунневыл империзэ возьматэ. Кызьы быдэсме та азьпалзэ ивортон? Зэмос луисьтэм религия трос дауръёс ӵоже кивалтӥсьёсын ӵош ужа но соосты бакель каре. Но ӝоген Иегова кивалтӥсьёслэн сюлмазы «Аслэсьтыз эриксэ... быдэстон мылкыд» поноз. Кытчы со вуттоз? Та кивалтэтъёс, «дас эксэйёс», зэмос луисьтэм религия вылэ урдскозы но сое быдтозы (Усьт. 17:1, 2, 16, 17).
15 Кытысь ми тодӥськомы, Быдӟым Вавилон ӝоген быдтэмын луоз шуыса? Тае валан понна, тодамы ваёмы, мар луиз вашкала дыръя. Вавилон кар Евфрат шурысь вуосын котыртэмын вал. Нош Усьтӥськон книгаын Быдӟым Вавилон пала кариськисьёс ӵошатӥсько шуръёсын, кудъёсыз сое утё (Усьт. 17:15). Озьы ик отын вераське, та вуос куасьмозы шуыса, яке тросэз адямиос зэмос луисьтэм религия пала уз кариське ини (Усьт. 16:12). Та азьпалзэ ивортон туннэ быдэсме, малы ке шуоно адямиос юанъёссылы валэктонъёс уг шедьто но зэмос луисьтэм религиысь пото.
16. Малы валаны кулэ азьпалзэ ивортонъёсты, кудъёсаз вераське ООН-эз кылдытон но Быдӟым Вавилонэз быдтон сярысь?
16 Малы та азьпалзэ ивортонэз валаны кулэ? ООН-эз кылдытон но адямиослэн зэмос луисьтэм религиез кельтэмзы возьматэ, ми берпум нуналъёсы улӥськомы шуыса. Зэмос луисьтэм религиысь туж трос адямиос потӥзы ке но, со мукет муген быдтэмын луоз. Кызьы ми вераськимы ини, Иегова «дас эксэйёслэсь», яке пӧртэм кивалтэтъёслэсь, кудъёсыз ООН-лы юрттӥсько, мылкыдзэс ӝутоз «Аслэсьтыз эриксэ» быдэстыны. Соос Быдӟым Вавилонэз малпамтэ шорысь быдтозы. Соин сэрен трос шуг-секытъёс кылдозы, вылды (Усьт. 18:8—10)d. Но Инмарлэн калыкез шумпотыны быгатэ. Малы ке шуоно Иеговалэн тушмонэз пыраклы быдтэмын луоз но ӝоген ми та лек дуннелэсь мозмытэмын луомы! (Лука 21:28).
ОСКЕ, ВУОНОЯЗ ИЕГОВА КАЛЫКСЭ УТЁЗ ШУЫСА
17, 18. а) Мар кароно, азьланяз но осконмес юнматон понна? б) Мае ми эскеромы вуонояз статьяын?
17 Даниил вераз, «тодон будоз» шуыса. Со озьы ик вань, малы ке шуоно ми асьме дыр сярысь азьпалзэ ивортонъёсты валаськомы (Дан. 12:4, 9, 10). Соос пыр-поч быдэсмо, соин ик ми Иеговаез но солэсь Кылзэ эшшо но мургес гажаськомы (Ис. 46:10; 55:11). Ойдолэ азьланяз но осконмес юнматомы, Библиез эскерыса но мукетъёсты Иеговаен тодматыса! Инмар утёз соосты, кинъёс со вылэ быдэсак оскисько, но соослы «тупаса улон» сётоз (Ис. 26:3).
18 Вуонояз статьяын ми эскеромы азьпалзэ ивортонъёсты со сярысь, кыӵе ужез быдэстэ христиан кенеш та дуннелэн берпум нуналъёсаз. Ми адӟомы: та азьпалзэ ивортонъёс но возьмато, ми берпум нуналъёсы улӥськомы шуыса. Озьы ик ми тодомы, Иисус, кивалтӥсь Эксэймы, Инмарлэсь калыксэ валтэ шуыса.
61-ТӤ КЫРӞАН Вперёд, Свидетели!
a Ми туж паймымон дыре улӥськомы. Кызьы гожтэмын вал Библиысь куд-ог азьпалзэ ивортонъёсын, Инмарлэн Эксэйлыкез кивалтэ ини. Та статьяын ми эскеромы со азьпалзэ ивортонъёс пӧлысь куд-огъёссэ. Со Иеговалы осконмес юнматоз но юрттоз мултэс сюлмаськытэк но Иеговалы оскыса улыны али но, вуонояз но.
b Учке «Пумтэм вапумъёс ӵоже шумпотыса улэ!» книгаысь 32-тӥ урокысь 4-тӥ пунктэз. Озьы ик учке jw.org сайтысь «Инмарлэн Эксэйлыкез кивалтыны кутскиз 1914-тӥ арын» видеороликез.
c Данииллэн азьпалзэ ивортонэз сярысь тросгес тодыны луэ 2012-тӥ арын 15-тӥ инвожо понна поттэм «Возьмаськон башняысь» таӵе статьяосысь: «Иегова открывает, „что вскоре должно произойти“» но «Вопросы читателей».
d Со сярысь, мар ӝоген луоз, тросгес тодыны луэ «Инмарлэн Эксэйлыкез кивалтэ!» книгаысь, 21-тӥ люкетысь (ӟуч).