«Азьланяз но... ог-огдэс юнматэ»

1. Мар карыны мылкыдмес ӝутэ 1 Фессалоникаослы 5:11?

ТӤЛЯД кенешты куке но Эксэйлык юртэз пуктон яке тупатъян ужъёсы пыриськылӥз-а? Пыриськылӥз ке, выль Эксэйлык юртын нырысетӥ пумиськонэз тӥ ноку уд вунэтэ, дыр. Тӥляд Иеговалы тау каремды туж потэ вал. Нырысетӥ кырӟанэз кырӟакуды, тӥляд пушты тыриз но синвуды потӥз, дыр. Чебересь Эксэйлык юртъёсмы Иеговаез данъяло. Нош эшшо но бадӟым дан Иеговалы мукет уж вае. Огшоры пуктӥськонлэсь та уж трослы кулэгес. Милемлы юнматыны кулэ соосты, кинъёс Эксэйлык юртэ лыкто. Со сярысь гожтӥз апостол Павел та статьялы валтӥсь кылбурын, 1 Фессалоникаослы 5:11 (лыдӟе). Грек кылэз, кудӥз та кылбурын берыктэмын «юнматэ» шуыса, озьы ик берыктыны луэ «пуктэ» шуыса. Соин ик, мукетъёсты юнматыса, ми пыриськиськомы туж кулэ уже — духовной пуктӥськонэ.

2. Мае ми эскеромы та статьяын?

² Апостол Павел туж умой возьматӥз, кызьы мукетъёсызлэсь мылкыдзэс ӝутоно но соосты юнматоно. Со туж быгатэ вал адямиосты валаны. Та статьяын ми эскеромы, кызьы со вын-агайёслы но сузэр-апайёслы юрттӥз: 1) шуг-секытъёссы пыр потыны, 2) ог-огенызы тупаса улыны но 3) Иеговалы осконзэс юнматыны. Ойдолэ эскеромы, кызьы ми но, Павел сямен, быгатӥськомы вын-агайёслэсь но сузэр-апайёслэсь мылкыдзэс ӝутыны но соосты юнматыны (1 Кор. 11:1).

ПАВЕЛ АГАЙЁСЛЫ НО СУЗЭРЪЁСЛЫ ЮРТТӤЗ ШУГ-СЕКЫТЪЁССЫ ПЫР ПОТЫНЫ

3. Кыӵе инты аслаз улоназ Павел висъяз ужлы но ужан-тыршонлы?

³ Павел туж яратӥз аслэсьтыз вын-агайёссэ но сузэр-апайёссэ. Со ачиз трос шуг-секытъёс пыр потӥз. Соин ик со жаляз но валаз соосты, кинъёс шуг-секытъёсын пумиськылӥзы. Огпол Павел коньдонтэк кылиз. Аслаз но эшъёсызлэн ваньмыз кулэез мед луоз шуыса, солы ужано луиз (Ап. уж. 20:34). Коринфе вуэмез бере нырысь со ужаз Акилаен но Прискиллаен, малы ке шуоно соослэн огкадь ужзы вал — соос палаткаос лэсьтӥзы. Но котькуд кӧснуналэ Павел еврей но грек калыкъёсысь адямиослы тодытӥз. Нош берлогес, куке Сӥла но Тимофей вуизы, со эшшо но ӟырдыт мылкыдын тодытыны кутскиз (Ап. уж. 18:2—5). Павел ноку ӧз вунэты, Иеговалы ужан-тыршон улоназ нырысетӥ интыын шуыса. Со ачиз но тыршыса ужаз бере, со быгатӥз вын-агайёслы но сузэр-апайёслы пайдаё визь-кенешъёс сётъяны. Павел валаз, соослы капчи ӧй вал шуыса. Озьы ик со валаз, соослы семьяоссы сярысь сюлмаськоно вал шуыса. Но со тодазы вайытӥз, «ӟечсэ бырйыны быгатӥсесь» мед луозы, яке Иеговалы ужан-тыршонэз нырысетӥ интые мед пуктозы, шуыса (Флп. 1:10).

4. Кызьы Павел но Тимофей вын-агайёслы юрттӥзы уйылон-уллянъёс пыр потыны?

⁴ Тани мар луиз Фессалоника карын. Выль кенеш кылдэм бере ик алигес пылатӥськемъёс уйылон-уллянъёсын пумиськизы. Куке лек адямиос Павелэз но Сӥлаез ӧз шедьтэ, соос «куд-ог агай-вынъёсты городлэн кузёйыръёсыз доры» нуизы. Адямиос кесяськизы: «Соос кесарьлэн косонъёсызлы пумит мыно» (Ап. уж. 17:6, 7). Малпалэ гинэ, макем кышкамын вал выль дышетскисьёс. Соослы пумит быдэс кар ӝутскиз. Иеговалы ужаны-тыршыны мылкыдзы но куашканы быгатэ вал. Но озьы медам луы шуыса, Павел мар ке но кариз. Солы но Сӥлалы карысь кошконо луиз ке но, соос тыршизы выль кенеш сярысь сюлмаськыны. Павел Фессалоника карын улӥсьёслы тодазы вайытӥз: «Ми тӥ доры асьмелэсь агай-вынмес Тимофеез ыстӥмы... Со тӥледыз мед юнматоз, оскондэс мед кужмоятоз шуыса, сое ыстӥмы» (1 Фес. 3:2, 3). Тимофей Листраын вордӥськемын вал бере, со ачиз но уйылон-уллянъёсын пумиськылӥз. Со адӟиз, кызьы Павел со карысь вын-агайёсты юнматъяз. Тимофей тодӥз на, кызьы Иегова Павеллы юрттылӥз. Соин ик Тимофей выль вын-агайёсты но сузэр-апайёсты оскытыны быгатэ вал, соослы но Иегова юрттоз но ваньмыз умой луоз шуыса (Ап. уж. 14:8, 19—22; Евр. 12:2).

5. Кызьы одӥг тӧро Брайант агайлы юрттӥз?

⁵ Кызьы эшшо Павел вын-агайёсты но сузэр-апайёсты юнматъяз? Куке соос Варнаваен Листрае, Иконияе но Антиохияе вуылӥзы, соос котькуд кенешын тӧроосты пуктылӥзы (Ап. уж. 14:21—23). Та пиосмуртъёс кенешлы бадӟым юрттэт вал. Туннэ но тӧроос вын-агайёсты но сузэр-апайёсты юнматъяло. Тани мар вера Брайант агай: «15 арес дыръям атае ми дорысь кошкиз, нош анайме кенешысь поттӥзы. Мон малпай, мон нокинлы кулэ ӧвӧл ни шуыса». Мар юрттӥз Брайантлы со секыт дыре? Со азьланьтэ: «Тони, милям тӧромы, пумиськонъёсын но мукет дыре мыным саклыксэ висъялляз. Со вералляз соос сярысь, кинъёс, мынам кадь ик шуг-секытъёсын пумиськизы ке но, шумпотонзэс ӧз ыштэ. Тони возьматӥз мыным Псалтирез 26:10. Озьы ик со ӵем вералляз Езекия сярысь, кудӥзлэн атаез умой адӟем карон ӧз возьматы. Озьы ке но со Иеговалы оскымон ужаз-тыршиз». Кыӵе пайда вайиз Брайантлы тӧролэн юрттэмез? «Тонилэн юрттэмезлы луыса мон кутски вань дырме сётыса ужаны-тыршыны. Та ужан-тыршон мыным котьмалэсь бадӟым шумпотон вае!» Тӧроос, висъялэ саклыктэс соослы, кинъёслы, Брайантлы кадь ик, юрттыны но «ӟеч кыл» вераны кулэ (Мад. 12:25).

6. Кызьы Павел вын-агайёсты но сузэр-апайёсты юнматылӥз, Инмарлэн оскымон ужась-тыршисьёсыз сярысь вераса?

⁶ Павел вын-агайёслы но сузэр-апайёслы гожтӥз Иеговалэн оскымон ужась-тыршисьёсыз сярысь — «пилем мында адӟисьёс-ивортӥсьёс» сярысь. Иеговалэн юрттэменыз соос бадӟым шуг-секытъёс пыр потӥзы (Евр. 12:1). Павел тодӥз, Иеговалэн оскымон ужась-тыршисьёсыз сярысь кылыса, вын-агайёс но сузэр-апайёс юнматскозы шуыса. Со сяна, сыӵе учыръёс соослы юрттысалзы «улэп Инмарлэн городэз» шоры учкыса улыны (Евр. 12:22). Сыӵе учыръёс милемлы но пайда ваё. Кылсярысь, куке ми лыдӟиськомы, кызьы Иегова юрттӥз Гедеонлы, Вараклы, Давидлы, Самуиллы но мукетъёсызлы, милемлы но кужым пыре (Евр. 11:32—35). Озьы ик малпаське Иеговалэн асьме дыре улӥсь ужась-тыршисьёсыз сярысь. Валтӥсь кивалтонние ӵем вуыло гожтэтъёс соослэсь, кинъёс туала ужась-тыршисьёс сярысь лыдӟыса юнматскизы.

КЫЗЬЫ ПАВЕЛ АГАЙЁСЛЫ НО СУЗЭРЪЁСЛЫ ЮРТТӤЗ ОГ-ОГЕНЫЗЫ ТУПАСА УЛЫНЫ

7. Кыӵе пайда милемлы вае Павеллэн визь-кенешез, кудӥз гожтэмын Римъёслы 14:19—21?

⁷ Ми вын-агайёсмес но сузэр-апайёсмес юнматомы, кылъёсынымы но ужъёсынымы кенешлы тупаса улыны юрттӥмы ке. Ми кинэн ке пӧртэм сямен малпаськиськомы ке но, ог-огмылэсь палэнсконо ӧвӧл. Библиысь возетъёс уг тӥясько ке, асьмелэсь малпанъёсмес кужмысь ӵектоно ӧвӧл. Эскеромы тае одӥг учыр вылын. Нырысетӥ даурын Римысь кенешын еврейёс но, еврей луисьтэм христианъёс но вал. Куке Моисейлэн законэзъя улоно ӧй вал ини, Иегова ӧз куры сиён сярысь куронъёсты быдэсъяны (Марк 7:19). Со дырысен еврей луись куд-ог христианъёс малпазы, табере котькыӵе сиёнэз сиыны яра шуыса. Нош со дыре ик еврей луись мукет христианъёс озьы ӧз малпалэ. Соин ик кенешын тупамтэос кылдӥзы. Павел христианъёслэсь мылкыдзэс ӝутӥз ог-огенызы тупаса улыны. Со гожтӥз: «Тынад братэд медаз канжаськы яке визь сынаськонэ медаз сюры, яке медаз катьтэммы шуиськод ке, соку, эсьмаса, сӥль сиытэк, вина юытэк, номыр сыӵе-таӵезэ лэсьтытэк улод». (Лыдӟе Римъёслы 14:19—21.) Тае вераса, Павел вын-агайёсызлы валаны юрттӥз, споръяськонъёс лябъёслы но, быдэс кенешлы но изъян ваё шуыса. Павел ачиз но тупатскыны дась вал, соин сэрен нокин медаз канжаськы шуыса (1 Кор. 9:19—22). Ми но быгатӥськомы мукетъёсты юнматыны но ог-огенымы тупаса улыны. Соку, куке котькудӥз ачиз быръён лэсьтыны быгатэ, ми асьмелэсь малпанъёсмес кужмысь ум ӵектӥське.

8. Кызьы ассэ возиз Павел, кенешын тупаса улон медаз сӧриськы шуыса?

⁸ Павел тупаса улыны тыршиз соосын но, кинъёс туж кулэ юанъёс пумысен со кадь ӧз малпаське. Кылсярысь, куд-огъёсыз алигес пылатӥськем еврей луисьтэм христианъёсты вандӥськыны косӥзы. Соос озьы лэсьтӥзы, вылды, еврейёс соосты медаз пыкылэ шуыса (Гал. 6:12). Павел таин соглаш ӧй вал. Но со аслэсьтыз малпанзэ кужмысь ӧз ӵекты. Со интые, со зӥбыт-востэмен вазиськиз Иерусалимысь апостолъёслы но тӧроослы (Ап. уж. 15:1, 2). Солы луыса кенеш азьланяз но шумпотыса но тупаса улӥз (Ап. уж. 15:30, 31).

9. Кызьы ми Павеллэсь адӟем карыны быгатӥськомы?

⁹ Тыршеммы шоры учкытэк, тупамтэос кылдо ке, умой луоз тӧроослэсь кивалтэт утчаны. Соосты Иегова кенеш сярысь сюлмаськыны пуктӥз. Ӵем дыръя Библия вылэ пыкиськем визь-кенеш шедьтыны луэ публикациосысь, кудъёссэ Инмарлэн организациез поттэ. Ми асьмелэсь малпанмес кужмысь ӧм ӵектэ ке, нош кивалтэтлэсь кылзӥськимы ке, соку кенеш тупаса улоз.

10. Мар эшшо кариз на Павел, кенеш тупаса мед улоз шуыса?

¹⁰ Со сяна, кенеш тупаса мед улоз шуыса, Павел вын-агайёслэн но сузэр-апайёслэн тырмымтэоссылы саклыксэ ӧз висъя. Со интые, со саклыксэ висъяз умой сямъёссылы. Кылсярысь, Римъёслы гожтэтэзлэн пумаз Павел трос христианъёсты нимзыя вера но соос сярысь кӧня ке ӟеч кылъёс гожтэ. Кызьы милям апостол Павеллэсь адӟем кареммы луэ? Возьдаськоно ӧвӧл вын-агайёслэн но сузэр-апайёслэн умой сямъёссы сярысь вераны. Ог-огмес ушъямы но ог-огмылы ӟеч кылъёс верамы ке, кенеш тупаса улоз.

11. Кызьы кусыпъёсмес тупатоно, валамтэос кылдо ке?

¹¹ Куддыръя юн осконэн христианъёс но пӧртэм сямен малпаськыны яке споръяськыны быгато. Ӵапак озьы ик луиз Павелэн но матысь эшеныз Варнаваен. Соос чылкак пӧртэм сямен малпаськизы со сярысь, басьтоно-а сьӧразы Маркез. Соин сэрен соос туж зол керетӥзы но «ог-огзылэсь люкиськоно луизы» (Ап. уж. 15:37—39). Озьы ке но Павел, Варнава но Марк кусыпъёссэс тупатыны быгатӥзы. Озьы соос возьматӥзы, кенешын тупаса но огкылысь улонэз утьыны тыршо шуыса. Берлогес Павел аслаз гожтэтъёсаз Варнава но Марк сярысь умоен гожъяз (1 Кор. 9:6; Кол. 4:10). Милемлы но вын-агайёсынымы но сузэр-апайёсынымы кусыпъёсмес тупатыны тыршоно но нырысь ик умой сямъёссылы саклыкмес висъяно. Соку ми тупаса но огкылысь уломы.

ПАВЕЛ АГАЙЁСЛЭСЬ НО СУЗЭРЪЁСЛЭСЬ ОСКОНЗЭС ЮНМАТЫЛӤЗ

12. Кыӵе шуг-секытъёсын пумиськыло вын-агайёсмы но сузэр-апайёсмы?

¹² Ми вын-агайёслэсь но сузэр-апайёслэсь мылкыдзэс ӝутомы, осконзэс юнматыны юрттӥмы ке. Кылсярысь, куд-огъёссэ ӵыжы-выжыоссы, ӵош ужасьёссы яке ӵош дышетскисьёссы мыскылляло. Кинлэн ке но секыт висёнэз вань. Кинлэн ке но сюлмаськонъёсыз трос. Нош куд-огъёсыз кемалась Иеговалы ужало-тыршо ини но туж возьмало, ку та дунне быдтэмын луоз. Сыӵе учыръёсы оскон лябӟыны быгатэ. Но таӵе ик шуг-секытъёсын нырысетӥ даурысь христианъёс но пумиськылӥзы. Кызьы Павел вын-агайёссэ но сузэр-апайёссэ юнматылӥз?

13. Кызьы Павел христианъёслы юрттӥз мукетъёсыз азьын осконзэс утьыны?

¹³ Павел агайёслэсь но сузэръёслэсь осконзэс юнматылӥз, Священной Гожтэмез кутыса. Тани одӥг учыр. Еврей луисьтэм христианъёслэн ӵыжы-выжыоссы соослэсь осконзэс тэрганы быгато вал, иудей осконэн ӵошатыса, со сокем умой ӧвӧл шуыса. Вын-агайёс пумит веранъёссылы мар вераны уг тодо вал, вылды. Соин ик Еврейёслы гожтэтысь малпанъёс соослы бадӟым пайда вайизы (Евр. 1:5, 6; 2:2, 3; 9:24, 25). Табере соос тодӥзы, мар верано, сыӵе адямиосын вераськыкузы. Ми но быгатӥськомы вын-агайёсмылы но сузэр-апайёсмылы юрттыны публикациосмес уже кутыны, адямиосын вераськыкузы, осконзэс утьыны мед быгатозы шуыса. Нош кызьы егитъёслы юрттоно, куке соосты школаын серем каро кылдытонлы оскемзы понна? Быгатӥськоды-а тӥ соосын ӵош шедьтыны малпанъёсты, кудъёсыз соослы школаын юрттозы? Кылсярысь, уже кутэ «Улон кылдытэмын-а вал?» но «Улонлэн кылдэмез. Вить юанъёс, кудъёсызлы валэктонъёс шедьтоно» брошюраосты (ӟуч).

14. Павел трос тодытӥз но дышетӥз ке но, мар эшшо со кариз на?

¹⁴ Ӟеч ужъёсыныз Павел мукетъёсызлэсь мылкыдзэс ӝутӥз яратонзэс уж вылын возьматыны (Евр. 10:24). Ассэ жалятэк, со вын-агайёслы но сузэр-апайёслы юрттӥз. Куке Иудеяын «туж секыт сютэм ар» вал, Павел отын улӥсьёслы юрттыны тыршиз (Ап. уж. 11:27—30). Павел трос тодытӥз но дышетӥз ке но, со котьку но тыршиз юнматыны соосты, кинъёслы юрттэт кулэ вал (Гал. 2:10). Солэн юрттэмез вын-агайёсты но сузэр-апайёсты оскытӥз, Иегова соос сярысь котьку сюлмаськоз шуыса. Туннэ но ми быгатӥськомы вын-агайёслэсь но сузэр-апайёслэсь осконзэс юнматыны. Кылсярысь, милям юрттэммы луэ инкуазь шимучыре сюремъёслы, дырмес но кужыммес жалятэк сётыса. Со сяна, ми быгатӥськомы быдэс дунне вылын ортчытӥськись ужлы коньдонэн ялан юрттӥськыны. Тазьы яке мукет сямен юрттыса, ми огъя оскисьёсмылэсь осконзэс юнматомы, Иегова соосты ноку уз кельты шуыса.

15, 16. Кызьы учконо соос шоры, кинъёслэн осконзы лябӟиз?

¹⁵ Павел юрттыны тыршиз соослы, кинъёслэн осконзы лябӟиз. Со соослы гажан-жалянзэ возьматъяз, соосын лякытэн но умоез сярысь вераськиз (Евр. 6:9; 10:39). Кылсярысь, Еврейёслы гожтэтаз Павел «ми» но «асьмеос» шуыса вера. Озьы со возьматӥз, сётэм визь-кенешъёсыз солы но пайдаё луозы шуыса (Евр. 2:1, 3). Ми но юнматыны тыршиськомы соосты, кинъёслэн осконзы лябӟиз. Ми юаськомы, кызьы соос уло, кыӵе соослы юрттэт кулэ. Озьы ми возьматӥськомы, соосты яратӥськомы шуыса. Со сяна, небыт куараен вераськыса, ми соосты буйгатыны быгатомы.

¹⁶ Павел вын-агайёсты но сузэр-апайёсты оскытӥз, Иегова ӟеч ужъёссэс адӟе шуыса (Евр. 10:32—34). Ми но озьы ик карыны быгатӥськомы. Вын-агайёслэсь но сузэр-апайёслэсь юалэ, кызьы соос зэмлыкен тодматскизы. Куре соосты тодазы вайыны, кызьы соос Иеговалэсь юрттэмзэ шӧдӥзы. Соку тӥ соосты оскытыны быгатоды, Иегова тыршемзэс но яратэмзэс уг вунэты но соосты ноку уз кельты шуыса (Евр. 6:10; 13:5, 6). Таӵе вераськонъёс вын-агайёслэсь но сузэр-апайёслэсь мылкыдзэс ӝутозы азьланяз но Иеговалы ужаны-тыршыны.

«АЗЬЛАНЯЗ НО... ОГ-ОГДЭС ЮНМАТЭ»

17. Мае милемлы эшшо но умойгес карыны тыршоно?

¹⁷ Пуктӥськисьёс быгатонлыкъёссэс умоятыны тыршо. Ми но тыршиськомы эшшо но умойгес ог-огмылы юрттӥськыны. Юрттэ вын-агайёстылы но сузэр-апайёстылы шуг-секытъёссы пыр потыны. Со понна вералэ соослы Иеговалэн оскымон ужась-тыршисьёсыз сярысь. Тырше тупаса улыны, мукетъёсызлэн умой сямъёссылы саклыктэс висъяса. Тупаса улонэз утьыны тырше, куке сое мар ке но сӧрыны быгатэ. Кусыпъёстэс тупатэ, куке валамтэос кылдо. Вын-агайёслэсь но сузэр-апайёслэсь осконзэс юнматэ, соосын Библиысь зэмлыкъёсты эскерыса, уж вылын юрттыса но лябӟем осконэн христианъёсты юнматыса.

18. Мар карыны мылкыддэс ӝутӥз та статья?

¹⁸ Эксэйлык юртэз пуктыку, ваньзы шумпото. Ми но шумпотомы, духовной пуктӥськонэ пыриськимы ке — вын-агайёслэсь но сузэр-апайёслэсь осконзэс юнматӥмы ке. Котькыӵе пуктэм юрт куке но куашка, нош тыршеммылэн пайдаез ноку уз быры. Соин ик «азьланяз но ог-огдылэсь мылкыддэс ӝутэ, ог-огдэс юнматэ»! (1 Фес. 5:11).