Иеговалэн калыкез шонерлыкез яратэ

1. Кыӵе шуг-секытэн пумиськиз Иосиф но кызьы со ассэ возиз?

ИОСИФ, Иаковлэн пиез, бадӟым шуг-секытэн пумиськиз. Одӥг кышномурт шуиз солы: «Кӧл монэн». Со вал Потифар кузёезлэн кышноез. Иосиф соглаш ӧз кариськы. Кин ке но паймоз, дыр: мар солы юрттӥз юн луыны? Потифар дораз ӧй вал. Иосиф ляльчи вал. Нош Потифарлэн кышноез Иосифлэсь улонзэ чидантэм секыт карыны быгатэ вал. Озьы ке но Иосиф солэн ӵектонъёсызлы соглаш ӧз кариськылы. Малы? Со шуиз: «Таӵе уродлэсь но урод ужез лэсьтыны, Инмар азьын сьӧлыканы быгатӥсько шат?» (Ул.-выл. 39:7—12).

2. Кытысь Иосиф тодӥз, азон-калгонэз Инмар сьӧлыкен лыдъя шуыса?

² Кытысь Иосиф тодӥз, азон-калгонэз Инмар урод ужен лыдъя шуыса? Моисейлэн законаз валамон гожтэмын вал: «Азон-калгон сьӧлыке эн пыры» (Пот. 20:14). Но та закон потытозь 200 ар ортчыны кулэ вал на. Озьы ке но Иосиф Иеговаез умой тодӥз, соин ик со валаз, кызьы Инмар азон-калгон шоры учке. Кылсярысь, Иосиф тодӥз, Иеговалэн малпамезъя, кык адями кузпалъяськыны кулэ шуыса — одӥг пиосмурт но одӥг кышномурт. Озьы ик Иосиф кылӥз, кызьы Иегова кык пол утиз пересь песянайзэ, Сарраез, куке мукет пиосмуртъёс сое асьсэлы карыны малпазы. Та выллем учырын ик Иегова утиз Исааклэсь кышнозэ, Ревеккаез (Ул.-выл. 2:24; 12:14—20; 20:2—7; 26:6—11). Та учыръёс вылын малпаськыса, Иосиф валаз, мае Иегова шонерен, нош мае шонертэмен лыдъя. Иеговаез яратон Иосифлы юрттӥз солэсь шонерлыко куронъёссэ яратыны но соослэсь кылзӥськыны.

3. Мае ми эскеромы?

³ Яратӥськоды-а тӥ шонерлыкез? Ми оскиськомы, яратӥськоды шуыса. Но ми сьӧлыкоесь, соин ик ӧм ке чаклаське, умоез но уродэз шоры та дунне сямен учкыны кутскомы (Ис. 5:20; Рим. 12:2). Соин ик ойдолэ эскеромы, мар со сыӵе шонерлык но малы сое яратыны кулэ. Собере эскеромы куинь вамышъёсты, кудъёсыз юрттозы милемлы Иеговалэсь куронъёссэ эшшо но золгес яратыны.

МАР СО СЫӴЕ ШОНЕРЛЫК?

4. Кызьы тросэз син азязы пукто шонерлыко адямиез?

⁴ Кызьы тӥ син азяды пуктӥськоды шонерлыко адямиез? Куд-огъёсызлэн малпамзыя, со укыр шонер улэ, адямиосты тэрга, ассэ мукетъёсызлэсь умойгес шуыса лыдъя. Но Инмарлы таӵе сямъёс уг кельшо. Иисус судъяз со дыре улӥсь религиозной кивалтӥсьёсты, кудъёсыз шонерлык пумысен асьсэлэсь куронъёссэс пуктылӥзы (Екк. 7:16; Лука 16:15). Адями, кудӥз шонерлык шоры Иегова сямен учке, ассэ мукетъёсызлэсь умойгес шуыса ноку уз лыдъя.

5. Библия верамъя, мар со сыӵе шонерлык? Валэктэ.

⁵ Шонерлык — со туж чебер сям. Огшоры кылъёсын верано ке, шонерлыко адями лэсьтэ сое, мае Иегова шонерен лыдъя. Библиын кылъёс, кудъёсыз «шонерлык» шуыса берыктӥсько, возьмато адямиез, кудӥз улэ вылӥ эсэпъёсъя — Инмарлэн эсэпъёсызъя. Кылсярысь, вузкарисьёсты Иегова пӧяськыны ӧз лэзьы. Со шуиз: «Гираед тынад шонер мертась мед луоз» (К. Зак. 25:15). Вашкала еврей кылэз, кудӥз татын «шонер» шуыса берыктэмын, озьы ик берыктыны луэ «шонерлыко» но «пӧяськисьтэм» шуыса. Соин ик христиан муртлэн Иегова Инмарлэн син азяз шонерлыко луэмез потэ ке, уж дораз но, мукет удысъёсын но солы пӧяськыны уг яра. Озьы ик адямилы, кудӥз шонерлыкез яратэ, туж уг кельшы, куке адямиос мукетъёссэ пӧяло, ултӥяло. Шонерлыко адями «котьмар ласянь... [Иеговалы] тэрытскыса» улэ (Кол. 1:10). Мае ке лэсьтэмезлэсь азьло со малпаське, кызьы со шоры учкоз Иегова.

6. Малы ми оскиськомы, Иеговалэн куронъёсыз шонересь шуыса? (Исаия 55:8, 9).

⁶ Иегова бордысь шонерлык потэ. Соин ик Библиын гожтэмын: «Престолэдлэн инъетэз — шонер суд, шонер улон» (Пс. 88:15). Иегова Кылдытӥсь бере, солэн гинэ правоез вань вераны, мар умой, нош мар урод луэ. Ми сьӧлыкоесь, соин ик котьку ик ум валаське, мар шонер, нош мар шонертэм луэ. Нош Иегова дун-шектэм. Соин ик со котьку тодэ, мар умой, нош мар урод луэ (Мад. 14:12; лыдӟе Исаиялэсь 55:8, 9). Но ми Инмарлы укшатыса кылдытэмын бере, ми быгатӥськомы солэн шонерлыко куронъёсызъя улыны (Ул.-выл. 1:27). Сыӵе улон милемлы туж кельше! Атаймес яратон милесьтым мылкыдмес ӝутэ, эшшо но тыршыса, солэсь адӟем карыны (Еф. 5:1).

7. Кыӵе пайда милемлы ваё пӧртэм удысъёсысь куронъёс? Вералэ примеръёс.

⁷ Инмарлэн куронъёсызлэсь кылзӥськон милемлы пайда гинэ вае. Малы озьы вераны луоз? Кылсярысь, мар луысал, котькуд пуктӥськись ас тодэмезъя пуктӥськысал ке яке котькуд эмъясь ас тодэмезъя адямиосты эмъясал ке? Малпаны ик кышкыт, мар соку луыны быгатысал. Татысь адӟиське, куронъёс милемыз утё шуыса. Ӵапак озьы ик Инмарлэн ӟечез но уродэз пумысен куронъёсыз милемыз утё.

8. Кызьы бакель каремын луозы соос, кинъёс шонерлыкез ярато?

⁸ Иегова бакель каре соосты, кинъёс тыршо куронъёсызлэсь кылзӥськыны. Со кылзэ сётэ: «Шонер улӥсьёс музъем басьтозы но со вылын пумтэм вапумъёс улозы» (Пс. 36:29). Малпалэ гинэ: куке вань адямиос Инмарлэсь кылзӥськыса улозы, музъем вылын огкылысь, тупаса но шудо улон луоз! Иеговалэн потэ, ми ӵапак озьы мед уломы шуыса. Милям вань трос мугъёсмы шонерлыкез яратыны. Нош мар юрттоз милемлы сое эшшо но золгес яратыны? Ойдолэ эскеромы куинь вамышъёсты.

ИЕГОВАЛЭСЬ КУРОНЪЁССЭ ЭШШО НО ЗОЛГЕС ЯРАТЭ

9. Мар юрттоз милемлы шонерлыкез яратыны?

⁹ Нырысетӥ вамыш. Яратэ сое, кин ӟечез но уродэз пумысен куронъёсты пуктӥз. Шонерлыкез яратон понна, эшшо но золгес яратоно сое, кин ӟечез но уродэз пумысен куронъёсты пуктӥз. Ми Иеговаез эшшо но золгес яратӥмы ке, соку мылкыдмы ӝутскоз солэн шонерлыко законъёсызъя но возетъёсызъя улыны. Адам но Ева Иеговаез яратысалзы ке, котьку но солэсь кылзӥськысалзы (Ул.-выл. 3:1—6, 16—19).

10. Мар юрттӥз Авраамлы Иеговаез эшшо но умойгес валаны?

¹⁰ Мар милемлы кароно, Адам но Ева кадь медам янгышалэ шуыса? Азьланяз но Иегова сярысь тодон-валан басьтоно, солэсь сямъёссэ дунъяно но валаны тыршоно, кызьы со малпаське. Соку ми Инмарез эшшо но золгес яратомы. Эскеромы Авраамлэсь учырзэ. Со туж яратӥз Иеговаез. Но куддыръя солы секыт вал валаны, малы Инмар кыӵе ке ужпум кутӥз. Озьы ке но Авраам Инмарен соглаш кариськылӥз. Со Иеговаез эшшо но умойгес тодыны тыршиз. Кылсярысь, куке Инмар Содомез но Гоморраез быдтыны малпаз, Авраам сюлмаськыны кутскиз: «Быдэс музъемлэн Судьяез» сьӧлыкоосты шонерлыкоосын быдтоз-а? Авраамлы та осконтэм вал. Соин ик со зӥбыт-востэмен Иеговалы кӧня ке пол юанъёс сётъяз, нош Инмар чидаса соин вераськиз. Та юрттӥз Авраамлы валаны, Иегова котькуд адямилэсь сюлэмзэ адӟе но янгыштэм адямиез янгыш адямиен ӵош ноку уз быдты шуыса (Ул.-выл. 18:20—32).

11. Кытысь адӟиськиз, Авраам Иеговаез яратӥз но солы оскиз шуыса?

¹¹ Иеговаен Содом но Гоморра сярысь вераськон Авраамлэн сюлмаз ик пыриз. Табере со аслэсьтыз Атайзэ эшшо но золгес яратыны но гажаны кутскиз. Дыр ортчыса, Авраамлэн осконэз эшшо но золгес эскериськиз. Иегова куриз сое яратоно пизэ, Исаакез, курбонлы вайыны. Но соку Авраам Инмарез умойгес тодэ вал ини, соин ик солэсь номыр ӧз юа. Со лэсьтӥз озьы, кызьы Иегова вераз. Иеговалэсь куронзэ быдэстыны дасяськыкуз, Авраамлэн сюлмыз чидантэм вӧсь луиз, дыр. Со малпаськиз, дыр, со сярысь, мае Иегова сярысь тодӥз ини. Со тодӥз, Иегова шонерлыктэм но лек уж ноку уз лэсьты шуыса. Апостол Павеллэн верамезъя, Авраам оскиз, Иегова яратоно пизэ улӟытыны но быгатоз шуыса (Евр. 11:17—19). Малы ке шуоно Иегова кылзэ сётӥз, Исааклэсь бадӟым калык потоз шуыса. Нош соку Исааклэн нылпиосыз ӧй вал на. Авраам Иеговаез яратӥз но быдэсак оскиз, инмысь Атаез котьку но шонерлыко ужъёс лэсьтэ шуыса. Авраамлы туж секыт вал ке но, со Инмарлы оскиз но солэсь кылзӥськиз (Ул.-выл. 22:1—12).

12. Кызьы ми Авраамлэсь адӟем карыны быгатӥськомы? (Псалтирь 72:28).

¹² Кызьы ми Авраамлэсь адӟем карыны быгатӥськомы? Милемлы Иегова сярысь эшшо но тросгес тодон-валан басьтоно. Соку Инмарен кусыпъёсмы юнмалозы но ми сое эшшо но золгес яратомы. (Лыдӟе Псалтирез 72:28.) Со сяна, ми возьытлыкмес дышетомы. Со юрттоз милемлы Инмар сямен малпаськыны (Евр. 5:14). Соку, кин ке шонертэм уж лэсьтыны милесьтым мылкыдмес ӝутӥз ке, ми соглаш ум кариське. Милемлы малпаны ик кышкыт луоз инмысь Атаймес вӧсь карыны но соин кусыпъёсмес сӧрыны. Мар эшшо кароно на, шонерлыкез золгес яратон понна?

13. Мар эшшо кароно на, шонерлыкез яратон понна? (Мадёнъёс 15:9).

¹³ Кыкетӥ вамыш. Нуналысь нуналэ тырше шонерлыкез эшшо но золгес яратыны. Мугорез кыдатон понна, котькуд нунал тыршыны кулэ. Озьы ик Иеговалэсь шонерлыко курон-косонъёссэ яратон понна, котькуд нунал тыршоно. Иегова милесьтым лэсьтыны луонтэмзэ уг возьма (Пс. 102:14). Со оскытэ милемыз, «шонерлыклэн сюрес кузяз мынӥсез» яратэ шуыса. (Лыдӟе Мадёнъёсты 15:9.) Иеговалы ужан-тыршонын ми кыӵе ке ужпум пуктӥмы ке, ми туж тыршомы сое быдэстыны. Ӵапак озьы ик тыршоно шонерлыкез яратыны. Нош Иегова чидаса юрттоз милемлы та сямез эшшо но золгес яратыны (Пс. 83:6, 8).

14. Мар со сыӵе «шонер улонлэн корт дӥсез» но малы со милемлы кулэ?

¹⁴ Иегова лякытэн тодамы вайытэ, шонерлыко улыны секыт ӧвӧл шуыса (1 Иоанн 5:3). Сыӵе улон милемыз котькуд нунал утьыны быгатэ. Тодамы ваёмы Инмарлэсь ожмаськон тӥрлыкъёссэ, кудъёсыз сярысь апостол Павел гожъяз (Еф. 6:14—18). Кудӥз соос пӧлысь христиан муртлэсь сюлэмзэ уте? «Шонер улонлэн корт дӥсез», кудӥз Иеговалэсь шонерлыко куронъёссэ возьматэ. Кызьы корт дӥсь ожгарчилэсь сюлэмзэ утьыны быгатэ, озьы ик Иеговалэн куронъёсыз утьыны быгато тӥлесьтыд сюлэмдэс, малпанъёстэс, шӧдонъёстэс, мылпотонъёстэс. Соин ик, Инмарлэсь ожмаськон тӥрлыкъёссэ дӥсякуды, шонер улонлэсь корт дӥсьсэ но дӥсялэ (Мад. 4:23).

15. Мар кароно, шонер улонлэсь корт дӥсьсэ дӥсян понна?

¹⁵ Мар кароно, «шонер улонлэсь корт дӥсьсэ» дӥсян понна? Со понна, ужпумъёс кутыкуды, Инмарлэсь куронъёссэ лыдэ басьтэ. Куке тӥ малпаськоды мае ке вераны, кыӵе ке кырӟанэз кылзыны, мае ке учкыны яке кыӵе ке книгаез лыдӟыны, нырысь асьтэлэсь юалэ: «Мар мынам сюлмам пыроз? Кельшоз-а со Иеговалы? Умоен уг возьматӥсько-а отын ужъёс, кудъёсыз Иеговалы уг кельшо, кылсярысь, азон-калгон, лек ужъёс, тырмостэм сям, астэ гинэ яратон?» (Флп. 4:8). Ужпумъёс кутыкуды, Иеговалэсь эриксэ лыдэ басьтӥды ке, шонерлыко куронъёс тӥлесьтыд сюлэмдэс утёзы.

16, 17. Кызьы кылъёс, кудъёсыз гожтэмын Исаиялэн 48:18, оскыто милемыз, ми Иеговалэн шонерлыко куронъёсызъя улыны котьку но быгатӥськомы шуыса?

¹⁶ Тӥ куке но малпады-а, Иеговалэн шонерлыко курон-косонъёсызъя котькуд нунал улыны туж секыт шуыса? Соку тодады вае, маин Инмар шонерлыкез ӵошатӥз. Со сярысь гожтэмын Исаиялэн 48:18 (лыдӟе). Иегова кылзэ сётэ, шонерлыкмы «зарезь тулкымъёс кадь» луоз шуыса. Пуктэ син азяды: тӥ сылӥськоды син сузёнтэм зарезь дурын но учкиськоды, кызьы тулкымъёс огез бӧрсьы огез ярдуре пальккасько. Тае адӟыса, тӥ малпалоды-а, соос куке но пальккаськемысь дугдозы шуыса? Уд! Трос сюрс аръёс ӵоже ини тулкымъёс ялан ярдуре пальккасько. Соин ик тӥляд малпанды но уг кылды, соос куке но дугдозы шуыса.

¹⁷ Тӥляд шонерлыкты зарезь тулкымъёс кадь луыны быгатэ. Кызьы тае валано? Инмарлэн шонерлыко возетъёсызъя улыны тӥ котьку быгатӥськоды. Со понна ужпум кутэмдылэсь азьло малпаське, мае возьма тӥлесьтыд Иегова, нош собере гинэ ужпум кутэ. Секыт дыръя но тодады возе, инмысь Атайды котьку но тӥледын артэ шуыса. Со тӥледлы юрттоз нуналысь нуналэ шонерлыко куронъёсызъя улыны (Ис. 40:29—31).

18. Малы мукетъёсты асьмелэн куронъёсмыя судить кароно ӧвӧл?

¹⁸ Куинетӥ вамыш. Мукетъёссэ судить эн каре — Иегова судить мед кароз. Ми туж тыршиськомы Иеговалэн шонерлыко куронъёсызъя улыны. Но милемлы уг яра мукетъёсты судить карыны но асьмеды укыр шонер улӥсьёсын лыдъяны. Асьмеды мукетъёсызлэсь вылӥе пуктэм интые но мукетъёсты асьмелэн куронъёсмыя судить карем интые, ойдолэ тодамы возёмы, Иегова «Быдэс музъемлэн Судьяез» шуыса (Ул.-выл. 18:25). Адямиосты судить карыны со милемлы право ӧз сёты. Соин ик Иисус шуиз: «Судить эн каре, тӥледыз но судить уз каре» (Матф. 7:1)b.

19. Кытысь адӟиськиз Иосифлэн валамез, агайёссэ судить карыны Иеговалэн гинэ правоез вань шуыса?

¹⁹ Нош ик тодамы ваёмы Иосифлэсь учырзэ. Со судить ӧз кары соосты но, кинъёс асьсэды соин лек возизы. Солэн агайёсыз со вылэ урдскизы, сое ляльчие вузазы, нош атайзэс оскытӥзы, со кулӥз шуыса. Трос аръёс ортчыса, Иосиф нош ик агайёсыныз пумиськиз. Соку со кужмо кивалтӥсь вал. Соин ик соослы пунэмзэ берыктыны быгатэ вал. Агайёсыз талэсь кышказы, лэсьтэм ужзы понна туж ӧпкелизы ке но. Но Иосиф соосты буйгатӥз: «Эн кышкалэ, мон Инмар ӧвӧл ук» (Ул.-выл. 37:18—20, 27, 28, 31—35; 50:15—21). Иосиф валаз, агайёссэ судить карыны Иеговалэн гинэ правоез вань шуыса.

20, 21. Мар кароно, асьмеды укыр шонер улӥсьёсын медам лыдъялэ шуыса?

²⁰ Иосиф сямен, ми но валаськомы, мукетъёсты судить карыны Иеговалэн гинэ правоез вань шуыса. Кылсярысь, ми ум тодӥське, мар вын-агайёсмылэсь но сузэр-апайёсмылэсь мылкыдзэс ӝутӥз кыӵе ке ужез лэсьтыны. Ми адямилэсь сюлэмзэ ум адӟиське. Иегова гинэ сое адӟе (Мад. 16:2). Инмар котькыӵе калыкъёсысь адямиосты яратэ. Со мылкыдмес ӝутэ: «Сюлэмъёстэс усьтэ» (2 Кор. 6:13). Соин ик ойдолэ вын-агайёсмес но сузэр-апайёсмес яратомы но соосты судить ум каре.

²¹ Озьы ик ми валамы ке, мукетъёсты судить карыны Иеговалэн гинэ правоез вань шуыса, ми Иеговалы оскисьтэм адямиосты но ум судъялэ (1 Тим. 2:3, 4). Кылсярысь, Адӟись-Ивортӥсь луисьтэм ӵыжы-выжыды сярысь тӥ тазьы малпалоды-а: «Солэн зэмлыкен тодматскемез ноку уз поты»? Тазьы малпаса, тӥ возьматысалды, асьтэды укыр шонер адямиен лыдъяськоды шуыса. Иегова вань адямиослы ӧпкельыны луонлык сётэ (Ап. уж. 17:30). Эн вунэтэ: асьмеды укыр шонер улӥсьёсын лыдъямы ке, Иегова ми шоры шонерлыктэм адямиос шоры кадь учкоз.

22. Малы тӥ шонерлыкез яратӥськоды?

²² Инмарлэсь шонерлыко куронъёссэ яратон милемыз шудо каре. Озьы ик со юрттэ милемлы мукетъёсызлэсь мылкыдзэс ӝутыны, соос милемыз но Инмарез эшшо но золгес мед яратозы шуыса. Ойдолэ котьку но шонерлыкез утчаломы (Матф. 5:6). Оске: Иегова тыршемдэс адӟе. Со туж шумпотэ, куке тӥ тыршиськоды шонерлыко улыны. Та дуннеысь адямиос асьсэды туж шонерлыктэм возё ке но, тодады возе: «Кузё-Инмар шонер улӥсьёсты яратэ»! (Пс. 145:8).