Тодӥськоды-а тӥ?

Зэм ик-а Мардохей нимо пиосмурт куке но улӥз?

БИБЛИЫСЬ Есфирь книгаын трос вераське иудей калыкысь Мардохей нимо пиосмурт сярысь. Солэн калыкез куке но вавилон пленэ нуэмын вал. Мардохей Персиысь эксэйлэн юртаз ужаз. Со вал асьме вакытлэсь азьло V даурлэн кутсконаз, «Артаксеркс дыръя». (Туннэ сое Ксеркс I шуыса ӵем дыръя нимало.) Мардохей ивортӥз, эксэез виыны малпало шуыса. Тау карон понна, Артаксеркс эксэй сое вань адямиос азьын данъяз. Берлогес, Аманлэн кулэмез бере, кудӥз Мардохейлэн но быдэс иудей калыклэн тушмонэз вал, эксэй Мардохеез вань кузёослы йыр карыса пуктӥз. Мардохейлы сокем вылӥ инты сётэмын вал бере, со быгатӥз поттыны курон-косон, кудӥз Персиысь вань иудейёсты быдтонлэсь утиз (Есф. 1:1; 2:5, 21—23; 8:1, 2; 9:16).

XX даурлэн кутсконаз история удысысь куд-ог тодосчиос верало вал, Есфирь книгаын гожтэм зэм ӧвӧл но Мардохей нимо пиосмурт ноку ӧй вал шуыса. Но 1941-тӥ арын гудыса утчаськонъёс дыръя шедьтӥзы сое, мар возьматэ, Мардохей зэм ик куке но улӥз шуыса. Мар шедьтэмын вал?

Тодосчиос шедьтӥзы горд сюйлэсь лэсьтэм табличкаез, кудаз Мардука нимо пиосмурт сярысь вераськиз. Сузы карын со кузё вал, выт бичась, вылды. Артур Унгнад, шундыӝужанпал шаеръёслэсь историзэс эскерись тодосчи, гожтӥз, со дыре, «Библиын сяна, та табличка вылын гинэ Мардохей сярысь вераськиз» шуыса.

Унгнад тодосчилэн ужез потэм бере тодосчиос валаны быгатӥзы Персиысь кӧня ке сюрс мукет гожтэмъёсты. Соос пӧлын горд сюйлэсь табличкаос, кудъёссэ шедьтӥзы Персеполь карлэн борддоръёсыз вӧзысь ваньбур возён интылэн куашкам бервылъёсысьтыз. Лыдъяло, соос Ксеркс I кивалтон дыръя гожтэмын вал шуыса. Соос элам кылын гожтэмын вал. Отын Есфирь книгаысь куд-ог нимъёс пумиськылоa.

Персепольысь куд-ог табличкаос вылын Мардука ним но вань. Та пиосмурт, Ксеркс I кивалтыку, Сузыын эксэйлэн юртаз секретарь луыса ужаз. Одӥг гожтэмын вераське, со берыктӥсь вал шуыса. Та тупа солы, мар вераське Библиын Мардохей сярысь. Со Артаксеркс (Ксеркс I) эксэйлэн юртаз ужаз-тыршиз но кык яке тросгес кылъёсын вераськиз. Мардохей Сузыысь «эксэй капка дорын пуке вал» (Есф. 2:19, 21; 3:3). Та капкаос туж бадӟымесь вал. Отын эксэй юртын ужасьёс ужазы.

Туж паймоно кадь, кӧня огкадез вань Персепольын шедьтэм гожтэмъёсысь Мардукалэн но Библиысь Мардохейлэн. Соос кыксы ик одӥг дыре но одӥг интыын улӥзы но огкадь ужез быдэсъязы. Озьыен, гудыса утчаськонъёс дыръя шедьтэмъёс возьматыны быгато, Мардука но Мардохей — со одӥг адями шуыса.