Кызьы секыт дыръя каньыл сюлмын улоно

1. Мар со сыӵе Инмарлэн каньыллыкез но малы милемлы со туж кулэ? (Филиппыослы 4:6, 7).

ИНМАРЛЭН каньыллыкез — со каньыл сюлмын улон, кудзэ сётэ инмысь Атаенымы матысь эшъяськон. Та дуннеысь адямиос уг валало, мар со сыӵе Инмарлэн каньыллыкез. Нош куке со милям сюлмамы вань, ми номырлэсь ум кышкаське. (Лыдӟе Филиппыослы 4:6, 7.) Милям вань умой эшъёсмы, кудъёсыз Иеговаез ярато. Озьы ик ми «тупаса улонлэн Инмареныз» эшъяськиськомы (1 Фес. 5:23). Куке ми инмысь Атаймес тодӥськомы, солы оскиськомы но солэсь кылзӥськиськомы, Инмарлэн каньыллыкез, туж секыт дыръя но, кышканмес вормыны юрттоз.

2. Малы ми оскиськомы, каньыл сюлмын улыны луэ шуыса?

² Луэ-а каньыл сюлмын улыны туж секыт дыръёсы но, кылсярысь, висёнъёс вӧлмыку, инкуазь шимучыръёс, бугыръяськонъёс яке уйылон-уллянъёс дыръя? Та выллем шуг-секытъёс дыръя ми кышканы быгатомы. Озьы ке но Иисус аслаз дышетскисьёсызлы вераз: «Тӥляд сюлэмды ӝоже медаз усьы, медаз но курда» (Иоанн 14:27). Ми шумпотӥськомы, агайёсмы но сузэръёсмы Иисуслэн визь-кенешезлэсь кылзӥсько шуыса. Иеговалэн юрттэменыз туж секыт дыръёсы но соос каньыл сюлмын уло.

КЫЗЬЫ КАНЬЫЛ СЮЛМЫН УЛОНО, ВИСЁНЪЁС ВӦЛМЫКУ

3. Кыӵе бервылъёсы вуттыны быгато секыт висёнъёс?

³ Секыт висёнъёс улонмес быдэсак воштыны быгато. Малпаськомы, кыӵе бервылъёсы вуттӥз COVID-19 пандемия. Одӥг эскеронъя, юам адямиос пӧлысь ӝыныез веразы, соослы умме усьыны секыт вал шуыса. Пандемия дыръя тросэз сюлмаськыны кутскизы, депрессиен курадӟизы, тросгес вина юыны кутскизы, наркотикъёсын выризы, семьяын эриктэман будӥз, озьы ик асьсэды виыны малпасьёс тросгес луизы. Тӥ палан но кыӵе ке висён вӧлмиз ке, мар карыны быгатӥськоды, кышканлы сётскытэк но каньыл сюлмын улон понна?

4. Малы Иисуслэн берпум нуналъёс сярысь азьпалзэ ивортонэз милемлы каньыл сюлмын улыны юрттэ?

⁴ Иисус азьло ик вераз, берпум нуналъёсы «интыен-интыен... урод черъёс» луозы шуыса (Лука 21:11). Кызьы та малпан каньыл сюлмын улыны юрттэ? Ми ум паймиське, отын яке татын пӧртэм висёнъёс вӧлмо шуыса. Ми валаськомы: ваньмыз мынэ озьы, кызьы Иисус вераз вал. Соин ик милям юн мылкыдмы вань кылзӥськыны Иисуслэсь, кудӥз берпум дыре улӥсьёслы вераз: «Эн кышкатске» (Матф. 24:6).

5. а) Кызьы кылъёс, кудъёсыз гожтэмын Филиппыослы 4:8, 9, юрттозы милемлы валаны, мар сярысь вӧсяськоно, висёнъёс вӧлмыку? б) Кызьы одӥг сузэрлы юрттӥзы Библилэн аудиогожтэмъёсыз но малы со тӥледыз дышетэ?

⁵ Висёнъёс вӧлмыку, туж капчи сюлмаськонъёслы но кышканлы сётскыны. Озьы ик луиз Дейзиb нимо сузэрен но. COVID-19 пандемия дыръя солэн кык матысь ӵыжы-выжыез но эмъясез кулӥзы. Соин ик со кышказ, солы аслыз но, арлыдо анаезлы но висён палалоз шуыса. Со сюлмаськиз, пандемияен сэрен ужзэ ыштоз, сиён-юон басьтыны но улон интыез понна тырыны коньдонэз уз тырмы шуыса. Солэн сюлмыз сокем секыт вал, со изьыны но ӧз быгаты. Но Дейзи выльысь каньыл сюлмын улыны быгатӥз. Мар солы юрттӥз? Со Иеговаез куриз юрттыны солы буйгатскыны но умоез сярысь малпаськыны. (Лыдӟе Филиппыослы 4:8, 9.) Со кылзӥз, кызьы Иегова соин «вераське», Библилэсь аудиогожтэмъёссэ кылзыса. Дейзи вера: «Лыдӟисьёслэн лякытэсь куараоссы юрттӥзы мыным сюлмаськонъёсме палэнтыны но тодам вайытӥзы, Иегова монэ туж яратэ шуыса» (Пс. 93:19).

6. Кызьы тӥледлы юрттозы ас поннады Библиез эскерон но кенешлэн пумиськонъёсыз?

⁶ Куддыръя, кыӵе ке висён вӧлмыку, уг луы ини лэсьтыны сое, мае ми азьвыл лэсьтыны быгатӥськомы вал. Но эн лэзе талы люкетыны тӥледлы ас поннады Библиез эскерыны но кенешлэн пумиськонъёсаз ветлыны. Публикациосысьтымы учыръёс но сайтысьтымы видео тодады вайытозы, кызьы агайёс но сузэръёс, тӥляд выллем шуг-секытъёссы шоры учкытэк, Инмарлы оскымон кылё (1 Пётр 5:9). Кенешлэн пумиськонъёсаз тӥ Библиысь умой малпанъёсты кылоды. Соос юрттозы тӥледлы мукетъёсызлэсь мылкыдзэс ӝутыны но асьтэлы юнматскыны (Рим. 1:11, 12). Малпаське, кызьы Иегова юрттылӥз ужась-тыршисьёсызлы, куке соос висизы, кышказы яке шӧдӥзы, огназы кылизы шуыса. Та оскондэс юнматоз, Иегова тӥледлы но юрттоз шуыса.

7. Малы тӥ дышетскыны быгатӥськоды Иоаннлэсь?

⁷ Вын-агайёсын но сузэр-апайёсын тросгес дырдэс ортчытъялэ. Куддыръя, кыӵе ке висён вӧлмыку, милемлы мукетъёсызлэсь, озьы ик вын-агайёсмылэсь но сузэр-апайёсмылэсь, палэнынгес возиськыны кулэ. Сыӵе дыре ми шӧдӥськомы, дыр, сое ик, мае шӧдӥз апостол Иоанн. Солэн туж потэ вал Гай эшеныз адӟиськемез (3 Иоанн 13, 14). Но Иоанн валаз, соку адӟиськыны уг луы вал шуыса. Соин ик со лэсьтӥз сое, мае лэсьтэмез луэ вал,— Гайлы гожтэт гожтӥз. Тӥляд вын-агайёсын но сузэр-апайёсын адӟиськемды уг луы ке, соослы телефон пыр яке интернет пыр жингыртэ яке кӧня ке кылъёс гожтэ. Огъя оскисьёсынымы кусып возьыса, милемлы капчигес каньыл сюлмын но кышкатэк улыны. Кыӵе ке муген сэрен тӥ туж сюлмаськиськоды ке, тӧроослы вазиське но соослэсь юрттэмзэс эн палэнтэ (Ис. 32:1, 2).

КЫЗЬЫ КАНЬЫЛ СЮЛМЫН УЛОНО ШИМУЧЫР ДЫРЪЯ

8. Кызьы шимучыр люкетыны быгатэ каньыл сюлмын улыны?

⁸ Тӥ ву тудӟонэн, музъемзурканэн яке пожарен пумиськиды ке, кема дыр ӵоже тӥ туж сюлмаськыса улоды на, дыр. Нош шимучыр дыръя матысь адямидэс яке улэм-вылэмдэс ыштӥды ке, тӥ кайгыриськоды, мар карыны ик уд тодӥське яке вожды но потэ, дыр. Таӵе шӧдонъёс уг возьмато, тӥ ваньбурлы укыр трос саклык висъяськоды яке тӥляд осконды ляб шуыса. Тӥ туж бадӟым шуг-секытъёс пыр потӥды. Тӥ мае ке малпатэк верады ке, тӥледыз тросэз валалозы (Иов 1:11). Озьы ке но ваньмыз пыр потыса но, тӥ быгатӥськоды каньыл сюлмын улыны. Кызьы?

9. Кызьы Иисус дасяз милемыз шимучыръёслы?

⁹ Эн вунэтэ, мае азьпалзэ тодытыса вераз Иисус. Та дуннеысь куд-ог адямиос малпало, соосын номыр уродэз уз луы шуыса. Нош ми валаськомы, шимучыръёс эшшо но тросгес луозы но соос пӧлысь куд-огъёсыныз ми но пумиськомы шуыса. Иисус дышетскисьёсызлы вераз, пум вуэмлэсь азьло «музъем кужмо зуркалоз» но шимучыръёс луозы шуыса (Лука 21:11). Солэн верамезъя, законлы пумит улӥсьёс тросгес луозы (Матф. 24:12). Тае ми ас синъёсынымы адӟиськомы. Ми ялан кылӥськомы йыружъёс, лек ужъёс но терактъёс сярысь. Иисус ноку ӧз вера, Иеговалы пумит мынӥсь адямиос гинэ шимучыръёсын пумиськозы шуыса. Зэмзэ вераса, Иеговалэн тросэз ужась-тыршисьёсыз шимучыръёсын сэрен курадӟо (Ис. 57:1; 2 Кор. 11:25). Иегова милемыз вань шугадӟонъёслэсь уз утьы ке но, вылды, со милемлы каньыл сюлмын улыны юрттэ.

10. Малы вераны луоз, шимучырлы дасяськыса, ми осконмес возьматӥськомы шуыса? (Мадёнъёс 22:3).

¹⁰ Милемлы капчигес луоз шимучыр дыръя каньыл сюлмын улыны, ми солы азьло ик дасяськимы ке. Возьматоз-а дасяськеммы, ми Иеговалы ум оскиське шуыса? Уз. Зэмзэ вераса, ми азьло ик дасяськимы ке, со возьматоз оскеммес, Инмар ми сярысь сюлмаськоз шуыса. Малы озьы вераны луоз? Инмарлэн Кылыз визь-кенеш сётэ азьло ик дасяськыны шимучырлы, кудӥз ми палан луыны быгатэ. (Лыдӟе Мадёнъёсты 22:3.) Журналъёс, кенешлэн пумиськонъёсыз но дырыз дыръя верам ялонъёс пыр Инмарлэн организациез мылкыдмес ӝутэ шимучыръёслы дасяськыныc. Оскиськомы-а ми Иеговалы? Оскиськомы ке, соку шимучырлэсь вуэмзэ ум возьмалэ, со интые, визь-кенешлэсь али ик кылзӥськомы.

11. Малы дышетэ тӥледыз Маргрет сузэрлэн учырез?

¹¹ Тани Маргрет сузэрлэн учырез. Нюлэсъёс ӝуаку, кивалтӥсьёс ваньзэс кошкыны косӥзы. Адямиос карысь огдыре потыны тыршизы бере, сюресъёс вылын туж трос машинаос вал. Котькытчы сьӧд ӵын вӧлдӥськиз. Кыӵе ке но дыре Маргрет машинаысьтыз нокытчы потыны ӧз быгаты. Но азьло ик дасяськемезлы луыса со утиськыны быгатӥз. Солэн сумкаяз карта вал, соин ик со мукет сюрес шедьтӥз. Маргрет валаз, таӵе учыр кылдыны быгатэ шуыса. Соин ик со та сюресэз азьло ик эскериз. Дасяськон солэсь улонзэ утиз.

12. Малы ми кивалтӥсьёслэсь но тӧроослэсь кылзӥськиськомы?

¹² Милемлы но, мукетъёсызлы но номыр кышкытлык медаз вайы шуыса, кивалтӥсьёс курыны быгато дорысьтымы потатэк улыны, ваньзэ кельтыса кошкыны яке мукет кивалтэт сётыны. Куд-огъёсызлы ваньбурзы сокем дуно потэ, соос кивалтӥсьёслэсь мылзы потытэк кылзӥсько яке куронъёсты быдэстыны уг дырто. Нош кызьы асьсэды возё христианъёс? Библия милемыз ӧте: «Кузё-Инмар понна, адямиослэн пуктэм котькудӥзлы кузёзылы тэрытскыса улэлэ: эксэйлы-а — вылӥ кивалтонэз киулаз возисьлы, кивалтӥсьёслы-а — кудъёсыз йыруж лэсьтӥсьёсты вӧсь карыны ысто» (1 Пётр 2:13, 14). Милемыз утён понна, Инмарлэн организациез но кивалтэт сётэ. Милемлы ялан тодамы вайыто азьло ик вераны тӧроослы, кызьы милемын герӟаськыны луоз, шимучыр кылдыку. Нош тӥ та кивалтэтлэсь кылзӥськиды-а? Озьы ик милемлы вераны быгато дорысьтымы потатэк улыны яке, ваньзэ кельтыса, кытчы ке кошкыны. Озьы ик милемлы валэктыны быгато, кытысь гуманитарной юрттэт басьтоно яке кызьы но ку мукетъёсызлы юрттоно. Ми ӧм ке кылзӥське, ми асьмеос яке тӧроос улонзэс но ыштыны быгато. Эн вунэтэ: соос ми сярысь сюлмасько (Евр. 13:17). Маргрет вера: «Тӧроослэсь но организацимылэсь кылзӥськыса гинэ, мон улэп кыли».

13. Мар юрттэ тросэзлы христианъёслы шумпотыса но каньыл сюлмын улыны, соос улон интыоссэс кельтоно луизы ке но?

¹³ Тросэз вын-агайёс но сузэр-апайёс, кудъёсыз инкуазь шимучыръёсын, ожмаськонъёсын яке бугыръяськонъёсын сэрен улон интыоссэс кельтоно луизы, тыршизы выль югдуръёслы дышыны но соку ик ужан-тыршонэн герӟаськем ужъёс борды басьтӥськыны. Нырысетӥ даурысь христианъёс сямен ик, кудъёсыз уйылон-уллянъёсын сэрен пӧртэм интыосы пазьгиськизы, туннэ но агайёс, сузэръёс ӟеч иворез тодытэмысь уг дугдо (Ап. уж. 8:4). Ужан-тыршон юрттэ соослы, шуг-секытъёссылы интые, Эксэйлыклы саклыксэс висъяны. Соин ик соос шумпотонзэс уг ышто но каньыл сюлмын улыны быгато.

КЫЗЬЫ КАНЬЫЛ СЮЛМЫН УЛОНО УЙЫЛОН-УЛЛЯНЪЁС ДЫРЪЯ

14. Кызьы уйылон-уллянъёс люкетыны быгато каньыл сюлмын улыны?

¹⁴ Уйылон-уллянъёс дыръя ми ыштыны быгатӥськомы сое, мар огшоры дыръя юрттэ вал милемлы каньыл сюлмын улыны. Ми шумпотӥськомы ог-огенымы адӟиськыны, тодытыны но дышем сяммыя улыны, пытсэтэ сюронлэсь кышкатэк. Нош куке милям тае лэсьтэммы уг луы ини, ми сюлмаськонъёслы но кышканлы сётскыны быгатӥськомы. Таӵе шӧдонъёс валамон, озьы ке но чакласькыны кулэ. Иисус азьло ик вераз, уйылон-уллянъёсын сэрен куд-огъёсыз осконзэс ыштыны быгатозы шуыса (Иоанн 16:1, 2). Мар кароно, уйылон-уллянъёс дыръя каньыл сюлмын улон понна?

15. Малы уйылон-уллянъёслэсь кышкано ӧвӧл? (Иоанн 15:20; 16:33).

¹⁵ Библиын гожтэмын: «Ваньзэс Иисус Христос бордын шонерлыко улыны кутскисьёсты улляса-ӝикатыса возьыны кутскозы» (2 Тим. 3:12). Андрей агайлы секыт вал валаны, табере соослэн шаеразы кивалтӥсьёс Иеговалэн Адӟись-Ивортӥсьёсызлы ужзэс нуыны уг лэзё ни шуыса. Со малпаз: «Милям шаерамы Адӟись-Ивортӥсьёс туж трос — ваньзэс пытсэтэ уз пуктэ ук!» Но та солы буйгатскыны ӧз юртты. Со ялан сюлмаськыса улӥз. Нош мукет агайёс быдэсак Иеговалы оскиськизы. Соос ӧз малпалэ, соосты пытсэтэ уз пуктэ шуыса. Соос дась вал пытсэтэ сюрыны. Андреен ӵошатоно ке, тазьы малпаськыса, соос ӧжытгес сюлмаськизы. Соин ик Андрей малпаз пытсэтэ сюрон шоры та агайёс кадь учкыны но ваньзэ Инмар кие сётыны. Ӝоген солэн сюлмыз каньыл луиз. Югдур ӧз воштӥськы ке но, со быгатӥз нош ик шумпотыса улыны. Та милемлы но юрттыны быгатэ. Иисуслэн верамезъя, уйылон-уллянъёсын пумиськыса но, ми быгатӥськомы Иеговалы оскымон кыльыны. (Лыдӟе Иоаннлэсь 15:20; 16:33.)

16. Кыӵе кивалтэтлэсь милемлы кылзӥськоно уйылон-уллянъёс дыръя?

¹⁶ Куке кивалтӥсьёс ужмес нуыны уг лэзё яке туж люкето, филиал яке тӧроос милемлы кивалтэт сётыны быгато. Кивалтэт сётӥське, милемыз утён понна, озьы ик ми азьланяз но духовной сиён басьтыны но ас югдурамы тодытыны мед быгатомы шуыса. Тӥ уд ке но валаське, малы сыӵе кивалтэт сётӥське, тырше солэсь кылзӥськыны (Иак. 3:17). Ноку но эн вералэ вын-агайёс но сузэр-апайёс сярысь, озьы ик кенешлэн ужъёсыз сярысь соослы, кинъёс сое тодыны кулэ ӧвӧл (Екк. 3:7).

17. Кызьы ми апостолъёслэсь адӟем карыны быгатӥськомы?

¹⁷ Инмарлэн ужась-тыршисьёсызлы Иисус сярысь тодытыны уж сётэмын,— та одӥгез валтӥсь муг, малы Шайтан соосын ожмаське (Усьт. 12:17). Шайтан но солэн дуннеез тӥледыз кышкатыны тыршо ке но, эн сётске. Уйылон-уллянъёс шоры учкытэк, ми тодытӥськомы но дышетскисьёсты дасяськомы ке, соку шумпотомы но каньыл сюлмын уломы. Нырысетӥ даурын кивалтӥсьёс апостолъёслы тодытыны ӧз лэзе. Озьы ке но апостолъёс Инмарлэсь кылзӥськизы. Та пиосмуртъёс тодытэмысь ӧз дугдэ, соин ик бадӟым шумпотон басьтӥзы (Ап. уж. 5:27—29, 41, 42). Милемлы кивалтӥсьёс ужмес нуыны люкето ке, тодытыкумы туж чакласькыны кулэ (Матф. 10:16). Но ойдолэ лэсьтомы ваньзэ, мае быгатӥськомы. Соку ми каньыл сюлмын уломы, малы ке шуоно ми Иеговаез шумпоттӥськомы но адямиосты утись иворез вӧлмытӥськомы.

«КАНЬЫЛЛЫК ВАЙИСЬ ИНМАР ТӤЛЕДЫН ВАЛЧЕ ЛУОЗ»

18. Мае милемлы тодамы возёно?

¹⁸ Туж куриськомы тӥледыз, тодады возе: туж секыт дыръя но ми быгатӥськомы каньыл сюлмын улыны. Соку вунэтоно ӧвӧл, милемлы Инмарлэн каньыллыкез кулэ шуыса. Сое Иегова гинэ сётыны быгатэ. Висёнъёс вӧлмыку, шимучыръёс яке уйылон-уллянъёс дыръя Инмарлы оскиське. Солэн организациезлэсь эн палэнске. Син азяды пуктэ, кыӵе умой улон милемыз азьланяз возьма. Соку «каньыллык вайись Инмар тӥледын валче луоз» (Флп. 4:9). Вуоно статьяын ми эскеромы, мар карыны быгатӥськомы, агайёсмы но сузэръёсмы, кудъёсыз шуг-секытъёсын пумиськыло, каньыл сюлмын улыны мед быгатозы шуыса.