Дышетэ нылпиостэс Иегова сярысь, кылдытэмъёсызлы саклыксэс висъяса

1. Мар каремзы потэ анай-атайёслэн нылпиоссы понна?

ДУНО анай-атайёс, ми тодӥськомы, тӥляд туж потэ нылпиостылы юрттэмды Иеговаен тодматскыны но сое яратыны. Но Инмарез адӟыны уг луы. Соин ик кызьы тӥ нылпиостылы юрттыны быгатӥськоды валаны, Иегова зэм но вань но солы матэ кариськыны луэ шуыса? (Иак. 4:8).

2. Кызьы анай-атайёс нылпиоссэс тодматыны быгато Иеговалэн сямъёсыныз?

² Нылпиос Иеговалы матэгес мед кариськозы шуыса, соосын Библиез дышетыны кулэ (2 Тим. 3:14—17). Но Библиын вераське мукет амал сярысь но. Мадёнъёсын книгаын одӥг атай пиеныз Иеговалэн кылдытэмъёсыз сярысь вераське (Мад. 3:19—21). Атай пизэ куре тодаз возьыны Инмарлэсь сямъёссэ, кудъёссэ кылдытэмъёсысьтыз адӟыны луэ. Ми эскеромы куд-ог малпанъёсты, кызьы анай-атайёс нылпиоссылэсь саклыксэс кылдытэмъёслы висъяны быгато, соосты Иеговаен тодматон понна.

КЫЗЬЫ НЫЛПИОСТЫ ДЫШЕТОНО, КЫЛДЫТЭМЪЁСЛЫ САКЛЫКСЭС ВИСЪЯСА?

3. Мар карыны анай-атайёс нылпиоссылы юрттыны кулэ?

³ Библиын верамъя, «дуннеез кылдытэм дырысен туннэ нуналозь Солэсь ужъёссэ чакласа-эскерыса адӟыны луэ синмын адӟыны луонтэм макеоссэ» (Рим. 1:20). Анай-атайёс, тӥледлы кельше, дыр, нылпиосыныды ӵош кыре потаны. Соку нылпиостылы юрттэ Иеговалэн кылдытэмъёсысьтыз солэсь сямъёссэ адӟыны. Тӥледлы юрттоз Иисуслэн примерез.

4. Кызьы Иисус мукетъёссэ дышетӥз, Инмарлэн кылдытэмъёсызлы саклыксэс висъяса? (Лука 12:24, 27—30).

⁴ Кызьы Иисус мукетъёссэ дышетӥз, Инмарлэн кылдытэмъёсызлы саклыксэс висъяса? Огпол Иисус дышетскисьёссэ куриз кырныжъёс но лилия сяськаос шоры учкыны. (Лыдӟе Лукалэсь 12:24, 27—30.) Иисус быгатэ вал мукет пудо-животъёс но будосъёс сярысь вераны. Но Иисус вераз соосыз сярысь, кудъёсыз кылзӥсьёсызлы тодмо вал. Дышетскисьёс инбамын лобась кырныжъёсты но бусыын сяськаяськись лилияосты адӟизы, луоз. Пуктэ син азяды, кызьы Иисус соос шоры киыныз возьматэ. Нош мар со кариз та кылдытэмъёс сярысь верамез бере? Иисус дышетскисьёсызлы Атаезлэн шырыт но ӟечлыко луэмез сярысь вераз. Инмар кырныжъёс но лилияос сярысь сюлмаське бере, со аслэсьтыз ужась-тыршисьёссэ но сюдоз но дӥсялоз.

5. Кыӵе кылдытэмлы анай-атайёс нылпиоссылэсь саклыксэс висъяны быгато, Иегова сярысь веран понна?

⁵ Анай-атайёс, кызьы тӥ Иисуслэсь адӟем карыны быгатӥськоды, нылпиостэс дышетыкуды? Кылсярысь, нылпидылы вералэ, кыӵе пудо-живот яке будос тӥледлы кельше. Валэктэ, Иеговалэсь кыӵе сямзэ адӟыны луэ, та кылдытэм шоры учкыса. Собере нылпидылэсь юалэ, кыӵе пудо-живот яке сяська солы кельше. Куке тӥ нылпиеныды вераськиськоды со сярысь, мар солы кельше, Иегова сярысь веракуды, со тӥледыз сакгес кылзоз, дыр.

6. Малы дышетскыны луэ Кристоферлэн анаезлэсь?

⁶ Анай-атайёс нылпиоссылы юрттыны тыршо, кыӵе ке пудо-животэз яке будосэз чакласа, Иегова сярысь мае ке выльзэ тодыны. Тае лэсьтэмзылэсь азьло анай-атайёслы та пудо-живот яке будос сярысь мур эскерон ортчытоно-а? Одно ик кулэ ӧвӧл. Иисус пыр-поч ӧз вера, мае сиё кырныжъёс яке кызьы будо лилияос. Куддыръя нылпиослы кельше инкуазь сярысь мур тодон-валан басьтыны. Но ӵем дыръя, соослы мае ке валэктон понна, огшоры малпан яке юан гинэ но тырмыт. Тани кызьы тодаз вае пичи дырзэ Кри́стофер агай: «Анаймы быгатэ вал, огшоры кылъёс вераса, ми котырысь Инмарлэн кылдытэмъёсыз понна тау карон мылкыдмес ӝутыны. Кылсярысь, гурезьёсты адӟыкумы, со вера вал: „Кыӵе чебересь гурезьёс! Иегова соосты туж паймымон кылдытэм, озьы-а?“ Нош куке ми вал океан дорын, со вера вал: „Учке та кужмо тулкымъёс шоры! Инмар туж кужмо, озьы ук?“». Кристофер азьланьтэ: «Анаймылэн огшоры кылъёсыз милемыз туж малпаськыто вал».

7. Кызьы нылпиосты дышетоно Инмарлэн кылдытэмъёсыз сярысь малпаськыны?

⁷ Нылпиостылэн будэмзыя дышетэ соосты кылдытэмъёс сярысь малпаськыны но Иеговалэсь сямъёссэ адӟыны. Кылсярысь, Инмарлэсь кыӵе ке кылдытэмзэ бырйыса но со вылын малпаськыса, нылпидылэсь юалэ: «Мае тон тодӥд Иегова сярысь?» Нылпидылэн верамез тӥледыз паймытыны быгатоз (Матф. 21:16).

КУ НО КЫТЫН ДЫШЕТОНО НЫЛПИОСТЫ, КЫЛДЫТЭМЪЁСЛЫ САКЛЫКСЭС ВИСЪЯСА?

8. Мар карыны быгато вал Израильысь анай-атайёс, нылпиосынызы ӵош сюрес кузя мыныкузы?

⁸ Израильысь анай-атайёслы нылпиоссэс дышетоно вал Иеговалэн курон-косонъёсызлы доразы но, «сюрес кузя» мыныкузы но (К. Зак. 11:19). Израильын сюресъёс гуртъёс пыр ортчо вал. Та сюресъёс кузя мыныку, адӟыны луэ вал пӧртэм пудо-животъёсты, тылобурдоосты но сяськаосты. Сюрес кузя мыныкузы, анай-атайёс нылпиосынызы Иеговалэн кылдытэмъёсыз сярысь вераськыны быгато вал. Тӥляд, дуно атайёс но анайёс, та выллем ик луонлыкъёсты вань, дыр. Ойдолэ эскеромы, мар каро куд-ог анай-атайёс.

9. Малы тӥ дышетскиськоды Пуниталэсь но Катялэсь?

⁹ Пуни́та сузэр, кудӥз Индиысь бадӟым карын улэ, вера: «Гуртэ ӵыжы-выжыосмы доры ветлыкумы, ми тыршиськомы нылпиосмылэсь саклыксэс висъяны Иеговалэн кылдытэмъёсызлы. Мон малпамъя, кар сьӧры потыса, нылпиослы капчигес кылдытэмъёсты адӟыны но соос сярысь малпаськыны». Анай-атайёс, нылпиосты ноку уз вунэтэ, дыр, кызьы тӥ соосын ӵош чебер интыын шутэтскиды. Молдоваысь Катя вера: «Пичи дырысьтым тужгес но яркыт тодэ ваёнъёсы герӟаськемын соин, кызьы ми анай-атаеным кар сьӧры поталлямы. Соос пичи дырысеным ик дышетӥзы монэ Иеговалэсь кылдытэмъёссэ чакланы но солэсь сямъёссэ адӟыны. Та понна мон соослы туж тау карисько».

10. Мар карыны быгато анай-атайёс, нылпиосынызы ӵош кар сьӧры потыны секыт ке? (Учке «Анай-атайёслы юрттэт» рамкаез.)

¹⁰ Нош мар карыны луэ, кар сьӧры потыны уг луы ке? Индиысь Амо́л агай вера: «Вордӥськем интыосам анай-атайёс трос ужано луо. Нош кар сьӧры потон понна, трос коньдон кулэ. Озьы ке но пичи паркын яке балконын но Иеговалэсь кылдытэмъёссэ адӟыны но солэн сямъёсыз сярысь вераськыны луэ». Котырады сак учкыса, тӥ но шедьтоды Иеговалэсь трос кылдытэмъёссэ, кудъёссэ нылпиостылы возьматыны луэ (Пс. 103:24). Отын вань, дыр, тылобурдоос, нымы-кибыос, будосъёс но мукетыз. Германиысь Карина вера: «Пичи дыръям анаеным кыре потакумы, со котьку но саклыкме висъя вал чебер сяськаослы, малы ке шуоно соосты яратэ». Озьы ик Иеговалэн организациез анай-атайёслы сётэ пӧртэм видео но статьяосты. Анай-атайёс, тӥ соосты уже кутӥськоды-а? Кыӵе гинэ югдурды медам луы, тӥ быгатӥськоды нылпиостэс дышетыны Инмарлэсь кылдытэмъёссэ чакланы. Нош табере ойдолэ эскеромы Иеговалэсь куд-ог сямъёссэ, кудъёсызлы нылпиостылэсь саклыксэс висъяны луэ.

ИНМАРЛЭСЬ СИНМЫН АДӞЫНЫ ЛУОНТЭМ СЯМЪЁССЭ АДӞЫНЫ ЛУЭ

11. Кызьы анай-атайёс нылпиоссылы юрттыны быгато Иеговалэсь яратонзэ адӟыны?

¹¹ Нылпиосты Иеговалэсь яратонзэ мед адӟозы шуыса, тӥ соослэсь саклыксэс висъяны быгатӥськоды, кызьы пудо-животъёс пиоссэс яратыса утялто (Матф. 23:37). Озьы ик тӥляд нылпиостылэсь саклыксэс висъямды луэ солы, макем трос но пӧртэмесь Иеговалэн кылдытэмъёсыз. Карина, кудӥз сярысь вераськиз ини, вера: «Анаеным кыре потакумы, со ӵектэ вал дугдыны но сяськаос шоры учкыны. Со мылкыдме ӝутэ вал малпаськыны, маин котькуд сяська пӧртэм луэ но кызьы со Иеговалэсь яратонзэ возьматэ. Аръёс ортчыса но, мон сяськаосты сак чакласько. Монэ туж паймытэ, макем соос трос но чебересь. Азьло сямен ик соос тодам вайыто, Иегова милемыз туж яратэ шуыса».

12. Кызьы анай-атайёс нылпиоссылы юрттыны быгато Инмарлэсь визьлыксэ адӟыны? (Псалтирь 138:14). (Озьы ик учке суредэз.)

¹² Юрттэ нылпиостылы Инмарлэсь визьлыксэ адӟыны. Иегова милесьтым трослы визьлыкогес (Рим. 11:33). Тае валан понна, тазьы шуыны луэ: «Учкы пилемъёс шоры. Соос пушкын трос ву вань. Озьы ке но соос инбамтӥ туж капчи уяло!» (Иов 38:36, 37). Озьы ик нылпиослэсь саклыксэс висъяны луэ, макем паймымон кылдытэмын милям мугормы. (Лыдӟе Псалтирез 138:14.) Тани мар вера Владимир: «Огпол пимы велосипедысьтыз усиз но пыдессэ вӧсь кариз. Кӧня ке нунал ортчыса, вӧсь луэмез бурмиз. Ми кышноеным валэктӥмы солы, Иегова милемыз кылдытӥз озьы, яраосмы асьсэос мед бурмозы шуыса. Ми валэктӥмы, адямиослэн кылдытэм макеоссы озьы тупатскыны уг быгато шуыса. Кылсярысь, аварие сюрем машина ачиз ассэ уз тупаты. Та учыр пимылы валаны юрттӥз, Иегова туж визьлыко шуыса».

13. Кызьы анай-атайёс нылпиоссылы юрттыны быгато Инмарлэсь кужымзэ адӟыны? (Исаия 40:26).

¹³ Иегова милемыз куре инбам шоры учкыны но малпаськыны, кызьы со бадӟым кужыменыз вань кизилиосты ас интыязы возе. (Лыдӟе Исаиялэсь 40:26.) Тӥ но нылпиосыныды быгатӥськоды инбам шоры учкыны но вераськыны со сярысь, мае соос адӟо. Тайвань шаерысь Тинти́н нимо сузэр пичи дырыз сярысь тазьы тодаз вае: «Огпол ми анаеным походэ мынӥмы. Кар сьӧры потыса, ми кизилиё инбам шоры учкимы. Со вакытэ ӵош дышетскисьёсы монэ ултӥяса возизы. Соин ик мон сюлмаськи, Иеговалы оскымон ужаны-тыршыны уг быгаты шуыса. Анае мылкыдме ӝутӥз малпаськыны, макем бадӟым кужым кулэ вал Иеговалы кизилиосты кылдытыны. Анае оскытӥз монэ: та кужыменыз ик Иегова мыным но юрттоз вань шуг-секытъёсме чиданы. Кизилиосты чакласа, мынам мылкыды ӝутскиз Иеговаез эшшо но умойгес тодыны но солы ужаны-тыршыны».

14. Кызьы анай-атайёс нылпиоссылы адӟыны юртто, Иегова — шудо Инмар шуыса?

¹⁴ Иеговалэн кылдытэмъёсыз возьмато, со шудо Инмар шуыса. Тодосчиос валазы, тросэз пудо-животъёс, кылсярысь, тылобурдоос но чорыгъёс, шудыны быгато шуыса (Иов 40:15). Тӥ но тодӥськоды на, дыр, кызьы нылпиосты кыӵе ке пудо-животъёс шоры серекъяса ик учкизы. Соос адӟизы, вылды, кызьы коӵышпи сӥньыс бугор сьӧры бызьылэ яке кызьы кучапиос ӵош шудо. Мукет дыръя, куке нылпиосты кыӵе ке пудо-живот шоры серекъяса ик учкозы, соослы тодазы вайытэ, ми шудо Инмарлы ужаськомы-тыршиськомы шуыса (1 Тим. 1:11).

БЫДЭС СЕМЬЯЕНЫДЫ ИЕГОВАЛЭН КЫЛДЫТЭМЪЁСЫЗЛЫ ШУМПОТЭ

15. Мар юрттоз анай-атайёслы нылпиоссылэсь малпанъёссэс омыръяса поттыны? (Мадёнъёс 20:5). (Озьы ик учке суредэз.)

¹⁵ Куддыръя анай-атайёс адӟо, нылпизылэн мар ке но луиз шуыса. Но со номыр уг вера. Тӥляд но таӵе учырды вал ке, тырше нылпидылэсь малпанъёссэ омыръяса поттыны. (Лыдӟе Мадёнъёсты 20:5.) Куд-ог анай-атайёс валазы: тае капчигес лэсьтыны, нылпиосынызы ӵош кыре потыса. Малы? Малы ке шуоно соку анай-атайёслы но, нылпиоссылы но капчигес ог-огзылы саклыксэс висъяны. Тайвань шаерысь Масахи́ко нимо агай мукет муг сярысь вера: «Куке ми нылпиосынымы ӵош кыре потаськомы — гурезьёсы ветлӥськомы яке ярдуртӥ поръяськомы, нылпиос асьсэды каньылгес шӧдо. Соин ик милемлы капчигес тодыны, мар сярысь соос малпасько». Катя, кудӥз сярысь гожтэмын вал ини, вера: «Школае бере ми анаеным ӵош ӵем дыръя чебер парке ветлӥськомы вал. Отын, шыпыт интыын, мыным капчигес вал вераны, мар луиз школаын яке мар монэ сюлмаськытэ».

16. Кызьы семьяос ӵош шутэтскыны быгато Иеговалэн кылдытэмъёсыз пӧлын?

¹⁶ Семьяос быгато ӵош шутэтскыны, кыре потыса, Иеговалэн кылдытэмъёсыз пӧлын. Та семьяосты юнматэ. Библиын вераське, «серекъянлэн аслаз дырыз» но «эктонлэн аслаз дырыз» шуыса (Екк. 3:1, 4). Иегова кылдытӥз трос чебер интыосты, кытын ми яратоно ужъёсынымы вырыны быгатӥськомы. Трос семьяослы кельше нюлэсъёстӥ ветлыны, гурезьёсы тубаны яке зарезьлэн ярдураз шутэтскыны. Нылпиос ярато паркын бызьылыны но шудыны, шурын уяны яке пудо-животъёсты чакланы. Семьяослэн вань трос луонлыкъёссы, кыре потыса, дырзэс ӵош ортчытыны. Ми туж шумпотӥськомы Иеговалэсь кылдытэмъёссэ чакланы!

17. Малы анай-атайёслы нылпиоссэс дышетоно Иеговалэн кылдытэмъёсызлы шумпотыны?

¹⁷ Выль дуннеын анай-атайёслэн но нылпиоссылэн паймымон луонлыкъёссы луозы Иеговалэсь кылдытэмъёссэ шумпотыса чакланы. Ми пудо-животъёслэсь ум кышкалэ, нош соос милесьтым уз кышкалэ (Ис. 11:6—9). Милям луоз туж трос дырмы чакланы ваньзэ, мае милемлы Иегова кузьмаз (Пс. 21:27). Но, анай-атайёс, выль дуннеез эн возьмалэ — али ик ини нылпиостэс дышетэ Иеговалэн кылдытэмъёсызлы шумпотыны, озьы ик соослы Иегова сярысь вералэ. Соку нылпиосты Давид эксэйлэн кылъёсыныз соглаш кариськозы, дыр. Со вераз: «Туж паймымонэсь Тынад ужъёсыд, Кузё-Инмаре!» (Пс. 103:24).