Кызьы Иегова вӧсяськонъёсмылы ответ сётэ

1, 2. Кыӵе юан кылдыны быгатэ вӧсяськонъёсмы пумысен?

КЫЛДЫЛӤЗ-А тӥляд куке но таӵе юанды: «Иегова вӧсяськонъёсылы ответ сётэ-а?» Тросэзлэн вын-агайёсмылэн но сузэр-апайёсмылэн таӵе юанзы кылдылӥз, тужгес но шуг-секытъёсын пумиськыкузы. Секыт югдуре сюрыса, туж ик капчи ӧвӧл адӟыны, кызьы Иегова вӧсяськонъёсмылы ответ сётэ.

² Ойдолэ эскеромы, малы ми оскыны быгатӥськомы, Иегова ужась-тыршисьёсызлэн вӧсяськонъёссылы ответ сётэ шуыса (1 Иоанн 5:15). Озьы ик ми эскеромы таӵе юанъёсты: малы куддыръя малпан кылдэ, Иегова вӧсяськонъёсмылы ответ уг сёты шуыса? Кызьы Иегова туннэ вӧсяськонъёслы ответ сётэ?

КУДДЫРЪЯ ИЕГОВА ОТВЕТ УГ СЁТЫ ОЗЬЫ, КЫЗЬЫ МИ ВОЗЬМАСЬКОМЫ

3. Малы Иеговалэн потэ, ми солы мед вӧсяськомы шуыса?

³ Библия оскытэ, Иегова милемыз яратэ но дунъя шуыса (Агг. 2:7; 1 Иоанн 4:10). Тӥни малы Инмар милемыз ӧте солы вӧсяськыны но солэсь юрттэтсэ курыны (1 Пётр 5:6, 7). Иеговалэн милемлы юрттэмез потэ, ми соин эшъяськыны но шуг-секытъёсмы пыр потыны мед быгатомы шуыса.

4. Кытысь ми тодӥськомы, Иегова ужась-тыршисьёсызлэн вӧсяськонъёссылы ответ сётэ шуыса? (Озьы ик учке суредэз.)

⁴ Библиын трос пол гожтэмын, Иегова ужась-тыршисьёсызлэн вӧсяськонъёссылы ответ сётылӥз шуыса. Быгатӥськоды-а тӥ кыӵе ке учырез тодады вайыны? Оло нош, тӥ малпады Давид эксэй сярысь. Солэн трос тушмонъёсыз вал. Соин ик со Иеговалэсь юрттэтсэ ӵем курылӥз. Огпол со Инмарез туж куриз: «Кузё-Инмаре! Кыл вӧсяськемме, Тон зэмлыко, санэ пон вӧсяськемме, Тон дорын шонерлык, кыл монэ» (Пс. 142:1). Иегова Давидлэн вӧсяськонъёсызлы ответ сётылӥз но сое утьылӥз (1 Экс. 19:10, 18—20; 2 Экс. 5:17—25). Давид юн осконэн вераны быгатэ вал: «Ваньмызлы вӧсяськисьёслы... Кузё-Инмар матын улэ» (Пс. 144:18). Ми но талы оскыны быгатӥськомы.

5. Котьку-а Иегова ужась-тыршисьёсызлэн вӧсяськонъёссылы ответ сётылӥз озьы, кызьы соос возьмазы? Вералэ пример. (Озьы ик учке суредэз.)

⁵ Куддыръя Иегова ответ уг сёты озьы, кызьы ми возьмаськомы. Кылсярысь, апостол Павел Инмарез куриз сое мозмытыны мугораз бышкалскем «шилэсь». Павел та сярысь куинь пол куриз. Иегова вӧсяськонэзлы ответ сётӥз-а? Сётӥз. Но Павеллэн куремезъя ӧз луы. Иегова солэсь шуг-секытсэ ӧз быдты. Со интые, Инмар апостоллы кужым сётӥз азьланяз но оскымон ужаны-тыршыны (2 Кор. 12:7—10).

6. Малы куддыръя малпан кылдэ, Иегова вӧсяськонъёсмылы ответ уг сёты шуыса?

⁶ Туннэ но куддыръя Иегова вӧсяськонъёсмылы ответ уг сёты озьы, кызьы ми возьмаськомы. Но ми юн оскыны быгатӥськомы: Иегова туж умой тодэ, кызьы милемлы юрттоно. Со сяна, Инмар, «мае куриськомы яке мар сярысь малпаськом-сюлмаськиськом, бадӟымлэсь но бадӟымгес ӟечлык сётыны быгатэ» (Еф. 3:20). Соин ик куддыръя со мукет сямен но мукет дыре ответ сётылэ.

7. Малы куддыръя мукетыз сярысь вӧсяськоно? Вералэ пример.

⁷ Иеговалэсь эриксэ умойгес валаса, куддыръя ми адӟиськомы, мукетыз сярысь вӧсяськоно шуыса. Тани Мартин Пётцингер агайлэн учырез. Кышнояськемез бере ӝоген нацистъёс сое концлагере келязы. Нырысь агай Иеговаез куриз сое мозмытыны, со кышноез сярысь сюлмаськыны но тодытыны мед быгатоз шуыса. Кык арня ортчыса, агай адӟиз, Иегова сое ӧз мозмыты шуыса. Соин ик со тазьы вӧсяськыны кутскиз: «Иегова, возьматы мыным, мае тон мынэсьтым возьмаськод». Собере со малпаськиз, мае чидано луо лагерьын мукет агайёс. Тросэз сюлмаськизы кышнооссы но нылпиоссы понна. Соку Пётцингер агай вӧсяськиз: «Иегова, тау тыныд выль уже понна. Юртты мыным агайёсме юнматыны но соослэсь мылкыдзэс ӝутыны». Укмыс ар ӵоже лагерьёсын пукыкуз, Мартин Пётцингер та ужез быдэсъяз!

8. Мар сярысь тодамы возёно вӧсяськыкумы?

⁸ Тодамы возёно: Иеговалэн вань эрикез, кудзэ со пуктэм дыре быдэстоз. Аслаз эрикезъя Инмар быдтоз шуг-секытъёсты, кудъёсыз милемыз курадӟытыса возё. Соос пӧлын инкуазь шимучыръёс, висёнъёс но кулон. Аслэсьтыз эриксэ Иегова Эксэйлыкез пыр быдэстоз (Дан. 2:44; Усьт. 21:3, 4). Нош со дыр вуытозь, Инмар Шайтанлы та дуннеен кивалтыны лэзе (Иоанн 12:31; Усьт. 12:9)b. Иегова али ик ини шуг-секытъёсмес сэрттысал-пертчысал ке, соку малпан кылдысал, Шайтан умой кивалтыны быгатэ шуыса. Соин ик милемлы возьмано, ку Иегова аслэсьтыз кылсётонъёссэ быдэстоз. Но та уг возьматы, Иегова милемлы уг юртты шуыса. Ойдолэ эскеромы, кыӵе амалъёсын со милемлы юрттыны быгатэ.

КЫЗЬЫ ИЕГОВА ТУННЭ ВӦСЯСЬКОНЪЁСМЫЛЫ ОТВЕТ СЁТЭ

9. Кызьы Иегова милемлы юрттыны быгатэ ужпум кутыны? Вералэ пример.

⁹ Со милемлы визьлык сётэ. Иегова кылзэ сётэ милемлы визьлык сётыны, ми умой ужпум мед кутомы шуыса. Ку милемлы тужгес но Инмарлэн визьлыкез кулэ? Куке ми кутӥськомы туж кулэ луись ужпумъёсты, кылсярысь, малпаськомы кузпалъяськоно-а, ӧвӧл-а (Иак. 1:5). Ойдолэ эскеромы Мария нимо бызьымтэ сузэрмылэсь учырзэc. Со пионер луыса ужаз-тыршиз. Сыӵе улон солы кельшиз. Но огпол со тодматскиз одӥг агаен. Сузэрмы вера: «Ми матэгес но матэгес эшъяськимы, ог-огмылы кельшыны кутскимы. Мон валай, мыным ужпум кутоно луоз шуыса. Та сярысь мон туж кема но вань сюлмысьтым вӧсяськи. Мыным Иеговалэн кивалтэтэз кулэ вал. Но со дыре ик мон валасько вал, мыным аслым ужпум кутоно луоз шуыса». Мария адӟиз, Иегова вӧсяськонэзлы ответ сётӥз шуыса. Мар юрттӥз солы Инмарлэсь ответсэ адӟыны? Публикациосмес кутыса, Мария эскерон ортчытӥз но шедьтӥз статьяосты, кудъёсыз юрттӥзы солы югдурзэ умой-умой валаны. Озьы ик со кылзӥськиз визь-кенешлэсь, кудзэ солы сётӥз Адӟись-Ивортӥсь луись анаез. Та визь-кенеш Мариялы юрттӥз аслэсьтыз шӧдонъёссэ валаны но визьмо ужпум кутыны.

10. Кызьы Иегова ужась-тыршисьёсызлы юрттэ, 2 Коринфъёслы 4:7 лыдэ басьтоно ке? Вералэ пример. (Озьы ик учке суредэз.)

¹⁰ Со милемлы шуг-секытъёсты чиданы кужым сётэ. Иегова апостол Павелэз ӧз кельты бере, со милемлы но шуг-секытъёсты чиданы юрттоз. (Лыдӟе 2 Коринфъёслы 4:7.) Тани кызьы Иегова юрттӥз Бе́нджамин нимо агайлы. Егит дыръяз трос аръёс ӵоже со но солэн семьяез Африкаын беженецъёслэн лагерьёсазы улӥзы. Агай вера: «Мон ялан Иеговалы вӧсяськи но кужым кури солэсь кылзӥськыса улыны. Иегова вӧсяськонъёсылы ответ сётӥз. Со юрттӥз мыным каньыл сюлмын улыны но кышкатэк тодытыны. Озьы ик со сётӥз мыным Библия вылэ пыкиськыса гожтэм публикациосты, кудъёсыз мыным юрттӥзы юн осконэн улыны». Бенджамин азьланьтэ: «Мон лыдӟи, кыӵе шуг-секытъёс пыр вын-агайёс но сузэр-апайёс потылӥзы но кызьы Иегова соослы ваньзэ чиданы юрттӥз. Та мыным кужым сётӥз Инмарлы оскымон кыльыны».

11, 12. Кызьы Иегова вӧсяськонмылы ответ сётыны быгатэ огъя оскисьёсмы пыр? (Озьы ик учке суредэз.)

¹¹ Со милемлы вын-агайёс но сузэр-апайёс пыр юрттэ. Кулон азяз уе Иисус ӟырдыт вӧсяськиз. Мар сярысь со Иеговаез куриз? Иисуслэн уг поты вал, сое Инмарез сантэмасез кадь янгыше мед уськытозы шуыса. Но Иегова сое талэсь ӧз мозмыты. Кызьы со аслаз Пиезлы юрттӥз? Сое юнматон понна, Иегова ыстӥз кылчинэз, Иисуслэн вынъёсыз пӧлысь одӥгзэ (Лука 22:42, 43). Туннэ но Иегова огъя оскисьёсмылэсь мылкыдзэс ӝутыны быгатэ ми доры пырыны яке милемлы жингыртыны. Соин ик котькудмылы тыршоно вын-агайёсмылы но сузэр-апайёсмылы «ӟеч кыл» вераны (Мад. 12:25).

¹² Тани мар луиз Ми́риам сузэрен, картэзлэн кулэмез бере кӧня ке арня ортчыса. Со дораз огназ вал, бӧрдыса улӥз, нокызьы буйгатскыны ӧз быгаты но киосыз воксё лэзиськемын вал ини. Солы кинэн ке но вераськоно вал. Сузэр вера: «Воксё катьтэммыса, мон нокинлы жингыртыны ӧй быгаты. Мон Иеговалы гинэ вӧсяськыса улӥ. Ӵапак соку телефонэ жингыртӥз. Со вал тӧро, семьямылэн матысь эшез». Та агай но солэн кышноез туж буйгатӥзы Мириам сузэрез. Сузэр валаз: Иегова та агайлэсь мылкыдзэ ӝутӥз солы жингыртыны.

13. Вералэ пример, кызьы Иегова вӧсяськонъёслы ответ сётэ соос пыр, кинъёс солы уг йыбыртъяло.

¹³ Со милемлы юрттыны быгатэ адямиос пыр, кудъёсыз солэн ужась-тыршисьёсыз уг луо (Мад. 21:1). Кылсярысь, Иегова мылкыдзэ ӝутӥз Артаксеркс эксэйлэсь Неемияез лэзьыны Иерусалиме берытскыны но сое тупатыны (Неем. 2:3—6). Туннэ но Инмар милемлы юрттыны быгатэ соос пыр, кинъёс солы уг йыбыртъяло.

14. Маин тӥледлы кельшиз Су Цин сузэрлэн учырез? (Озьы ик учке суредэз.)

¹⁴ Су Цин сузэр малпа, Иегова солы эмъясь пыр юрттӥз шуыса. Пиезлэн психической висёнъёсыз вань. Куке пизы шудтэм учыре сюриз, со сярысь сюлмаськон понна, Су Цин сузэрлы но картэзлы ужысьтызы кошконо луиз. Семьязылэн коньдонэн герӟаськем бадӟым шуг-секытъёссы вал. Сузэрмылэн верамезъя, солэн нюръяськыны кужымез ӧй вал ини. Аслаз шӧдонъёсыз сярысь со Иеговалы вераз но солэсь юрттэтсэ куриз. Одӥг эмъясьлэн юрттэмезлы луыса соос кивалтӥсьёслэсь юрттэт басьтӥзы но дунтэм улон инты шедьтӥзы. Собере Су Цин сузэр вераз: «Ми Иеговалэсь юрттэмзэ адӟимы. Зэм но, со вӧсяськонъёсты кылзэ» (Пс. 64:3).

ИЕГОВАЛЭСЬ ОТВЕТЪЁССЭ АДӞЫНЫ НО СООСЫН СОГЛАШ ЛУЫНЫ ОСКОН КУЛЭ

15. Кызьы одӥг сузэр валаз, Иегова вӧсяськонъёсызлы ответ сётӥз шуыса?

¹⁵ Малпано ӧвӧл, Иегова вӧсяськонъёсмылы ответ котьку но паймымон амалэн сётоз шуыса. Озьы ке но солэн ответъёсыз юртто милемлы солы оскымон ужаны-тыршыны. Соин ик Иеговалэсь ответъёссэ адӟыны тырше. Йо́ко нимо сузэр малпаз, Иегова вӧсяськонъёсызлы ответ уг сёты шуыса. Но собере со гожъяны кутскиз, мар сярысь Иеговаез куриз. Кӧня ке дыр ортчыса, со гожъямзэ выльысь учкиз. Мае со валаз? Иегова тросэзлы вӧсяськонъёсызлы ответ сётӥз шуыса, озьы ик соосызлы но, кудъёсыз сярысь со ачиз вунэтӥз ини. Ваньмылы милемлы куддыръя малпаськоно, кызьы Иегова вӧсяськонъёсмылы ответ сётэ (Пс. 65:19, 20).

16. Кызьы ми осконмес возьматыны быгатӥськомы? (Еврейёслы 11:6).

¹⁶ Иеговалы вӧсяськыса гинэ, ми осконмес ум возьматӥське. Ми сое возьматомы соку но, куке соглаш кариськомы Иеговалэн ответъёсыныз, кыӵеесь гинэ соос медам луэ. (Лыдӟе Еврейёслы 11:6.) Кылсярысь, Майк агайлэн но Крисси кышноезлэн Вефильын ужаны-тыршыны ужпумзы вал. Майк вера: «Трос аръёс ӵоже ми заявлениос гожъямы но та ужпуммы сярысь ялан Иеговалы вӧсяськимы. Но милемыз Вефиле ӧз ӧте». Озьы ке но Майк но Крисси оскизы: Иегова котькинлэсь умой тодэ, кытын соослы ужаны-тыршыны кулэ. Соос тыршизы лэсьтыны сое, мае быгатӥзы. Соос пионеръёс луыса ужазы-тыршизы отын, кытын ивортӥсьёс уг тырмо, но организацимылэн пӧртэм пуктӥськон проектъёсаз пыриськизы. Туннэ Майк кышноеныз ӵош ёросэз чаклась луыса ужа-тырше. Со азьланьтэ: «Куддыръя Иегова вӧсяськонъёсмылы ответ ӧз сётылы озьы, кызьы ми возьмамы. Но со ответ сётылӥз. Куддыръя озьы, кызьы ми ӧм но малпалэ».

17, 18. Кыӵе осконмы милям вань? (Псалтирь 85:6, 7.)

¹⁷ Лыдӟе Псалтирез 85:6, 7. Давид юн оскиз, Иегова солэсь вӧсяськонъёссэ кылэ но соослы ответ сётэ шуыса. Талы тӥ но оскыны быгатӥськоды. Та статьяысь примеръёс милемыз оскыто, ваньзэ чидан понна, Иегова милемлы визьлык но кужым одно ик сётоз шуыса. Со милемлы юрттыны быгатэ огъя оскисьёсмы пыр, озьы ик соос пыр но, кинъёс солы уг йыбыртъяло.

¹⁸ Зэм, куддыръя Иегова ответ уг сёты озьы, кызьы ми возьмаськомы. Но ми тодӥськомы, со одно ик ответ сётоз шуыса. Со сётэ сое, мар кулэ, но соку, ку со кулэ. Соин ик азьланяз но Иеговалы вӧсяське. Юн оске: со тӥ сярысь сюлмаськоз али но, выль дуннеын но, кудаз вань ужась-тыршисьёсызлэсь мылкыд каронъёссэс быдэстоз (Пс. 144:16).