«Инмар кылэз быдэсъяса улэ»

1, 2. Малы Инмарлэн ужась-тыршисьёсыз — шудо адямиос? (Иаков 1:22—25).

ИЕГОВАЛЭН но солэн Пиезлэн потэ, ми шудоесь мед луомы шуыса. Псалтирьын 118:2 гожтэмын: «Шудоесь Солэсь курон-косонъёссэ утисьёс, вань сюлмынызы Сое утчасьёс». Иисус но шуиз: «Шудоесь Инмарлэсь кылзэ кылзӥсьёс, сое быдэсъясьёс» (Лука 11:28).

² Иеговалэн калыкез — шудо калык. Малы? Со понна трос мугъёс вань. Соос пӧлысь одӥгез — ми котькуд нунал Библиез лыдӟиськомы но тодэммес улонамы пыртыны тыршиськомы. (Лыдӟе Иаковлэсь 1:22—25.)

3. Кыӵе ми пайда басьтомы, Библиысь визь-кенешъёсты улонамы пыртӥмы ке?

³ Куке ми «Инмар кылэз быдэсъяса» улӥськомы, со быдэс улонмылы пайда вае. Кылсярысь, ми тодӥськомы, озьы Иеговаез шумпоттӥськомы шуыса. Соин ик ми асьмеос но шумпотӥськомы (Екк. 12:13). Озьы ик, куке ми Библиысь визь-кенешъёсты улонамы пыртӥськомы, милям семьяенымы но кенешысь эшъёсынымы кусыпъёсмы юнмало. Тӥ тае ас вылады шӧдӥды ини, луоз. Со сяна, ми палэнскиськомы трос шуг-секытъёслэсь, кудъёсыныз пумисько соос, кинъёс Инмарлэн законъёсызъя уг уло. Мы соглаш Давид эксэен. Тани мар со вераз Иеговалэн законъёсыз, курон-косонъёсыз но кутэм ужпумъёсыз сярысь: «Соосты быдэсъям понна быдӟым луоз медэз-кузьымез» (Пс. 18:8—12).

4. Малы Инмарлэн Кылызъя улыны котьку ик капчи ӧвӧл?

⁴ Инмарлэн Кылызъя улон понна, сое лыдӟыны но эскерыны кулэ. Но со понна дыр шедьтыны котьку ик капчи ӧвӧл. Соин ик ойдолэ эскеромы, мар милемлы юрттоз котькуд нунал Библиез лыдӟыны, со вылын малпаськыны но сое улонамы пыртыны.

ДЫР ШЕДЬТЭ ИНМАРЛЭСЬ КЫЛЗЭ ЛЫДӞЫНЫ

5. Кыӵе ужъёссы вань христианъёслэн?

⁵ Иеговалэн калыкезлэн трос ужъёсыз вань. Кылсярысь, ми пӧлысь тросэз ужало, асьсэлэн но семьяоссылэн ваньмыз кулэез мед луоз шуыса (1 Тим. 5:8). Озьы ик тросэз висись яке арлыдо ӵыжы-выжыоссылы юрттӥсько. Со сяна, милемлы асьмелэн тазалыкмы сярысь сюлмаськоно, нош со понна но дыр кулэ. Эшшо ваньмылэн кенешын ужъёсмы вань. Соос пӧлысь валтӥсез — ӟеч иворез тодытон уж. Кызьы, та ужъёс шоры учкытэк, дыр шедьтоно Библиез лыдӟыны, со вылын малпаськыны но сое улонамы пыртыны?

6. Мар юрттоз Библиез котькуд нунал лыдӟыны? (Озьы ик учке суредэз.)

⁶ Филиппыослы 1:10 вераське, ми котьку но «ӟечсэ бырйыны быгатӥсесь» мед луомы шуыса. Библиез лыдӟон — одӥгез ӟеч уж. Шудо адями сярысь нырысетӥ псаломын гожтэмын: «Кузё-Инмарлэн законэз бордын солэн вань мылкыдыз, Солэсь законзэ со уй но, нунал но дышетэ!» (Пс. 1:1, 2). Татысь адӟиське, Библиез лыдӟон понна тырмыт дыр висъяны кулэ шуыса. Нунал куспын кыӵе дыре Библиез лыдӟоно? Ми ваньмы пӧртэмесь, соин ик котькудӥз пӧртэм дыре лыдӟыны быгатэ. Валтӥсез — ми сое котькуд нунал лэсьтыны мед быгатомы шуыса. Виктор агай вера: «Мыным кельше Библиез ӵукна лыдӟыны. Мон вазь султылыны уг яратӥськы ке но, ӵукна мыным номыр уг люкеты но мон быгатӥсько сак лыдӟиськыны». Нош ку тӥледлы кельше лыдӟиськыны? Юалэ асьтэлэсь: «Библиез лыдӟон понна кыӵе дыр тупа мыным?»

ЛЫДӞЕМДЫ ВЫЛЫН МАЛПАСЬКЕ

7, 8. Малы куддыръя лыдӟеммы пайда уг вайы? Вералэ пример.

⁷ Туннэ туж трос информация, но ваньмыз йырамы уг кыльы. Вал-а тӥляд таӵе учырды: тӥ мае ке лыдӟиды, нош, одӥг-кык нунал ортчыса, тӥ номыре уд тодӥське ини? Та ваньмылы тодмо. Жаляса верано луэ, таӵе ик учыр кылдыны быгатэ Библиез лыдӟонэн но. Шуом, тӥ ужпум пуктӥды котькуд нунал Библиысь кӧня ке люкет лыдӟыны. Со туж умой! Ваньмылы кулэ ужпумъёс пуктылыны но соосты быдэстылыны (1 Кор. 9:26). Но Инмарлэсь Кылзэ лыдӟон — со кутсконэз гинэ. Библиез лыдӟон тросгес пайда мед ваёз шуыса, лыдӟиськем сяна, эшшо мар ке но кароно на.

⁸ Малпаське таӵе пример вылын. Будосъёслы ву кулэ, кылсярысь, зор. Но вакчи дыр куспын укыр трос зориз ке, умой музъем нюр интылы пӧрмоз. Сомында ву будосъёслы нокыӵе пайда уз вайы ни. Дыр кулэ, ву музъеме мед пыӵалоз шуыса. Ӵапак озьы ик ми но Библиез дыртыса лыдӟимы ке, соку лыдӟеммес валаны, тодамы возьыны но улонамы пыртыны ум быгатэ (Иак. 1:24).

9. Мар кароно, тӥ Библиез дыртыса лыдӟиськоды ке?

⁹ Вань-а тӥляд Библиез дыртыса лыдӟемды? Вань ке, соку мар кароно? Тырше калленгес лыдӟыны но лыдӟемды вылын малпаськыны. Кинэ ке но кышкатэ «малпаськыны» кыл. Но зэмзэ вераса, со секыт ӧвӧл — дугдэ но лыдӟемды вылын малпаське. Сое лэсьтыны луэ лыдӟемдыя яке лыдӟиськемдылэн пумаз. Оло нош, тӥляд Библиез лыдӟон понна тросгес дыр висъямды потоз, лыдӟемды вылын малпаськыны мед вуоды шуыса. Дырды ӧвӧл ке, тӥ быгатӥськоды ӧжытгес лыдӟиськыны но малпаськыны. Виктор вера: «Мон пичиен лыдӟиськисько, нуналлы быдэ одӥг люкетлэсь тросгес уг лыдӟиськы. Мон Библиез ӵукна лыдӟисько бере, мон быдэс нунал лыдӟеме вылын малпаськыны быгатӥсько». Кыӵе гинэ амал тӥ медад быръе, валтӥсез — лыдӟиськыны но вуыны малпаськыны (Пс. 118:97; учке «Малпаськон понна юанъёс» рамкаез).

10. Мар юрттоз Библиысь лыдӟеммес улонамы пыртыны? Вералэ пример (1 Фессалоникаослы 5:17, 18).

¹⁰ Озьыен, тӥ валады, ку но кӧня лыдӟиськоно. Табере лыдӟемдэс улонады пыртоно. Кыӵе ке люкетэз лыдӟемды бере малпаське: «Кызьы та юрттоз мыным али яке азьланяз?» Шуом, тӥ лыдӟиськоды 1 Фессалоникаослы 5:17, 18 (лыдӟе). Тӥ дугдӥськоды но малпаськоды: «Макем ӵем но вань сюлмысьтым-а мон вӧсяськисько?» Собере тӥ тодады вайиськоды, мар понна Иеговалы тау шуэмды потэ, но, кылсярысь, Инмарлэн куинь кузьымъёсыз понна солы тау шуиськоды. Кӧня ке минут куспын малпаськыса, тӥ валады, кыӵе визь-кенеш сётэ Библия, но сое улонады пыртӥды. Нош малпалэ гинэ, макем бадӟым пайда тӥ басьтоды, котькуд нунал Библиез малпаськыса лыдӟиды ке! Тӥляд умойгес но умойгес пӧрмоз Инмарлэн Кылызъя улыны. Нош мар кароно, тӥ валады ке, туж трос удысъёсын тупатскыны кулэ шуыса?

БЫДЭСТЫНЫ ЛУЫМОН УЖПУМЪЁС ПУКТЭ

11. Малы куддыръя тӥляд киды ик лэзиськыны быгатэ? Вералэ пример.

¹¹ Куке тӥ Библиез лыдӟиськоды но валаськоды, мае тӥледлы тупатыны кулэ, тӥляд киды ик лэзиськыны быгатэ. Шуом, туннэ тӥ Библиысь лыдӟиды, адямиосты ултӥяны уг яра шуыса (Иак. 2:1—8). Тӥ валаськоды, со, кызьы тӥ асьтэды мукетъёсыныз возиськоды, кӧня ке тупатыны кулэ шуыса. Со туж умой ужпум! Ӵуказеяз тӥ лыдӟиськоды, чаклано шуыса, мае ми вераськомы (Иак. 3:1—12). Тӥ таин соглаш кариськиськоды но валаськоды, верам кылъёсты котьку ик ӟечесь но лякытэсь ӧвӧл шуыса. Тӥ та удысын но тупатскыны тыршиськоды. Ӵуказе улыса тӥ лыдӟиськоды, та дуннеен эшъяськоно ӧвӧл шуыса (Иак. 4:4—12). Тӥ валаськоды, тӥледлы шутэтскон амалъёсты чакласькысагес быръёно шуыса. Нош ньылетӥ нуналаз тӥ малпаськоды, ваньзэ тае тупатыны туж секыт шуыса.

12. Библиез лыдӟыса, тӥ адӟиськоды ке, трос удысъёсын тупатсконо шуыса, малы мылкыдды куашканы кулэ ӧвӧл? (Озьы ик учке сноскаез.)

¹² Тӥ валаськоды ке, тӥледлы трос удысъёсын тупатскыны кулэ шуыса, мылкыдды медаз куашка. Со возьматэ, тӥляд умой сюлэмды шуыса. Куке тӥ Библиез лыдӟиськоды но валаны тыршиськоды, мар кароно тупатскон понна, со возьматэ, тӥ зӥбыт-востэм адями шуысаa. Озьы ик эн вунэтэ: «выль адями» луон понна, ялан тыршыны кулэ (Кол. 3:10). Мар кароно, азьланяз но Инмарлэн Кылызъя улон понна?

13. Кыӵе амалэз кутыны луэ, лыдӟеммес улонамы пыртон понна? (Озьы ик учке суредэз.)

¹³ Лыдӟемды пӧлысь ваньзэ соку ик улонады пыртыны эн тырше. Одӥг-кык ужпум гинэ пуктэ (Мад. 11:2). Таӵе амалэз кутыса утчалэ: гожтэ, кыӵе ужпумъёс пуктэмды потэ, собере одӥг-кыксэ быръе, нош кылемзэ берлолы кельтэ. Мар бордысен кутскыны луэ?

14. Кыӵе ужпумысен кутскыны луэ?

¹⁴ Кутскыны луэ самой капчи ужпумысен яке самой секыт ужпумысен. Собере эскерон ортчытэ, «Возьмаськон башнялэн публикациосызлэн индекссэс» яке «Иеговалэн Адӟись-Ивортӥсьёсызлэн публикациоссыя эскерыны юрттэтэз» (ӟуч) кутыса. Ужпумдэс быдэстон понна, вӧсяське но Иеговалэсь мылкыд но кужым куре (Флп. 2:13). Собере тодэмдэс улонады пыртэ. Куке тӥ адӟоды, ужпумдэс быдэстыны быгатӥды шуыса, тӥляд мылкыдды ӝутскоз, вылды, мукетсэ быдэстыны. Кылсярысь, куке тӥ адӟоды, кыӵе ке удысын воштӥськыны яке кыӵе ке сямдэс умоятыны быгатӥды шуыса, тӥляд мылкыдды ӝутскоз мукет воштӥськонъёс лэсьтыны. Со сяна, соос капчигес сётӥськозы ини, вылды.

МЕД ИНМАРЛЭН КЫЛЫЗ ТӤ ПУШКЫН УЛОЗ НО ӞЕЧ УЖ ЛЭСЬТОЗ

15. Маин пӧртэм Иеговалэн ужась-тыршисьёсыз мукет адямиослэсь, кудъёсыз Библиез лыдӟо? (1 Фессалоникаослы 2:13).

¹⁵ Куд-ог адямиос туж данъясько, Библиез трос пол лыдӟизы ини шуыса. Но оско-а соос солы, малы дышетэ Библия? Улоназы пырто-а соос солэсь визь-кенешъёссэ? Жаляса верано луэ, ӵем дыръя уг. Но Иеговалэн ужась-тыршисьёсыз Инмарлэн Кылыз шоры мукет сямен учко. Нырысетӥ даурысь христианъёс сямен, ми сое «Инмар кылэз кадь» кабыл басьтӥмы. Ми туж тыршиськомы солэсь визь-кенешъёссэ улонамы пыртыны. (Лыдӟе 1 Фессалоникаослы 2:13.)

16. Мар милемлы юрттоз Инмарлэн Кылызъя улыны?

¹⁶ Зэм, Инмарлэсь Кылзэ лыдӟыны но соя улыны котьку ик капчи ӧвӧл. Куддыръя милемлы секыт дыр шедьтыны лыдӟиськон понна. Оло, ми дыртыса лыдӟиськиськомы но малпанзэ ум валаське. Яке милям кимы ик лэзиське, куке валаськомы, макем трос удысъёсын воштӥськыны кулэ. Кыӵе гинэ шуг-секытъёсын ми медам пумиське, Иеговаен милям ваньмыз пӧрмоз. Ойдолэ солэсь юрттэтсэ ум палэнтэ, кылэммес ум вунэтэ но солэн Кылызъя уломы. Библиез лыдӟыса но сое улонамы пыртыса, ми шудоесь луомы (Иак. 1:25).