Лыдӟисьёслэн юанъёссы

Мар ӝужда вал Соломон храмлэн пырон азяз ватсаса пуктэм люкетэз?

Храмлэн пырон азяз ватсаса пуктэм люкетэз вал. Со пыр Святое пыразы. Англи кылын «Выль дунне» берыктэмлэн поттэмъёсаз, кудъёсыз 2023-тӥ арлэсь азьвыл печатламын вал, вераське: «Корка азьысь бӧльмыезлэн [яке храмлэн пырон азяз ватсаса пуктэм люкетэзлэн] кузьдалаез храмлэн пасьталаеныз огкадь — кызь гырпум, нош ӝуждалаез сю кызь гырпум» (2 Пар. 3:4). Библилэн мукет берыктэмъёсаз но озьы ик гожтэмын — «сю кызь гырпум». Со озьы ке, ватсаса пуктэм люкет 53 метр ӝужда вал!

Нош, 2023-тӥ арысен кутскыса, «Выль дунне» берыктэмлэн поттэмъёсаз вераське, Соломон храмлэн пырон азяз ватсаса пуктэм люкетэзлэн «ӝуждалаез кызь гырпум»a вал шуыса (яке ог 9 метр). Тани куд-ог мугъёс, малы сыӵе воштӥськон лэсьтэмын вал.

3 Эксэйлыкъёслэн 6:3 ватсаса пуктэм люкетлэн ӝуждалаез сярысь уг вераськы. Иеремия, кудӥз Эксэйлыкъёслэсь книгаоссэс гожтӥз, та кылбурын вера ватсаса пуктэм люкетлэн кузьдалаез но пасьталаез сярысь, нош ӝуждалаез сярысь уг вера. Вуоно люкетаз со пыр-поч вера храмлэн пӧртэм люкетъёсыз сярысь, кылсярысь, ыргонлэсь ӵыжатыса лэсьтэм зарезь, дас пуктэтъёс, яке тележкаос, но кык ыргон юбо сярысь, кудъёсыз ватсаса пуктэм люкет азьын сылӥзы (3 Экс. 7:15—37). Ватсаса пуктэм люкет зэмзэ ик 50 метрлэсь ӝужытгес вал ке, малы Иеремия со сярысь ӧз вера? Сю аръёс ортчыса но, история удысысь еврей тодосчиос ӧз вералэ, ватсаса пуктэм люкет Соломонлэн храмезлэсь ӝужытгес вал шуыса.

Ватсаса пуктэм люкет 120 гырпум ӝужда луысал ке, солэн борддоръёсыз куашкасалзы, вылды. Вашкала дыръя излэсь но кирпичлэсь лэсьтэм туж бадӟым пуктӥськемъёслэн туж паськыт инъетсы вал, нош вылӥяз соос сюбеггес луо вал. Кылсярысь, озьы пуктэмын вал Египетысь храмлэн капкаосыз. Но Соломонлэн храмез мукет сямен пуктэмын вал. Тодосчиос малпало, солэн борддоръёсыз 6 гырпумлэсь (яке 2,7 метрлэсь) паськытгес ӧй вал шуыса. Те́одор Бу́синк, архитектура удысысь тодосчи, тани мар вера: «Лыдэ басьтоно ке, мар пасьта вал ватсаса пуктэм люкетлэн борддоръёсыз, со 120 гырпум ӝужда луыны уг быгаты вал».

Копиосты гожъясь, 3 Эксэйлыкъёслэн 3:4 гожтыкуз, янгыш лэсьтыны быгатэ вал. Куд-ог вашкала манускриптъёсын та кылбурын гожтэмын «120». Нош мукет оскымон манускриптъёсын, кылсярысь, Александрийской кодексын (малпало, со асьме вакытысь V даурын гожтэмын вал шуыса) но Амвросианской кодексын (малпало, со асьме вакытысь VI даурын гожтэмын вал шуыса), та кылбурын гожтэмын «20 гырпум». Быгатэ вал-а копиосты гожъясь янгышаны но «120» гожтыны? Еврей кылын «120» гожтӥське «сю но кызь» шуыса, нош «20 гырпум» — «гырпум кызь». Со кылын «сю» но «гырпум» кылъёс ог-огзылы туж кельшо. Соин ик копиосты гожъясь «гырпум кызь» интые быгатэ вал гожтыны «сю но кызь».

Ми тыршиськомы пыр-поч валаны но шонер суреданы Соломонлэсь храмзэ. Но ми понна валтӥсез — со храм быдӟым духовной храмез возьматэ вал шуыса. Ми туж тау кариськомы Иеговалы, солы та храмын йыбыртъяны быгатӥськомы шуыса! (Евр. 9:11—14; Усьт. 3:12; 7:9—17).