Малы милемыз дышето Инмарлэн оскымон ужась-тыршисьёсызлэн берпум кылъёссы

1. Малы умой луоз арлыдоослэсь дышетскыны?

УЖПУМ кутыкумы, милемлы кин ке но умой визь-кенеш сётэ ке, ми солы тау шуиськомы. Сыӵе визь-кенеш сётыны быгато тӧроос, озьы ик юн осконэн мукет агайёс но сузэръёс. Соос милесьтым арлыдогес ке но, со уг возьматы, соослэн визь-кенешсы туэ юрттыны уг быгаты шуыса. Иеговалэн потэ, ми арлыдоослэсь мед дышетскомы шуыса, малы ке шуоно улонзы куспын соос трос визьлык люказы (Иов 12:12).

2. Мае ми эскеромы та статьяын?

² Вашкала дыръя Иегова аслаз калыкезлы юрттылӥз но солы кивалтэт сётылӥз оскымон арлыдо пиосмуртъёс пыр. Соос пӧлын вал Моисей, Давид но апостол Иоанн. Со пиосмуртъёс пӧртэм дыре улӥзы. Соослэн пӧртэм югдуръёссы вал. Соос пӧлысь котькудӥз улонэзлэн пумаз вуоно выжылы умой визь-кенешъёс сётӥз. Со пиосмуртъёс пусйизы, макем кулэ Инмарлэсь кылзӥськыны. Иегова соослэсь кылъёссэс Библие пыртӥз. Ваньмылы — егитъёслы но, арлыдоослы но — умой луоз соослэн визь-кенешъёссы вылын малпаськыны (Рим. 15:4; 2 Тим. 3:16). Та статьяын ми эскеромы со пиосмуртъёслэсь берпум кылъёссэс но тодомы, малы соос милемыз дышето.

«КЕМА МЕД УЛОД»

3. Мае ми тодӥськомы Моисей сярысь?

³ Моисей вань улытозяз Иеговалы оскымон ужаз-тыршиз. Со вал пророк, судья, ожгарчиослэн кивалтӥсьсы но историк. Улонэз куспын со туж тросэзлы дышетскиз. Моисей израиль калыкез Египетысь поттӥз но ас синмыныз Иеговалэсь трос паймымон ужъёссэ адӟиз. Инмар солэсь мылкыдзэ ӝутӥз гожтыны Библиысь нырысетӥ вить книгаосты но 89-тӥ псаломез. Озьы ик со гожтӥз, луоз, 90-тӥ псаломез но Иов книгаез.

4. Кинэ Моисей юнматӥз но малы?

⁴ Кулэмез азьынгес, 120 арес дыръяз, Моисей быдэс израиль калыкез ӧтиз но солы тодаз вайытӥз, мар со понна лэсьтӥз Иегова. Куке Инмар соос азьын паймымон ужъёс лэсьтӥз но египет калыкез кылкутытӥз, куд-огъёсыз пичиесь на вал но быдэ вуэмын ӧй вал на (Пот. 7:3, 4). Соос адӟизы, кызьы Горд Кам зарезьлэн вуосыз вайяськизы, но зарезьлэн кӧс пыдэстӥз потӥзы. Собере Иегова египет ожгарчиосты быдтӥз (Пот. 14:29—31). Луоё кыр дуннеын Инмар израиль калык сярысь сюлмаськиз но сое утьылӥз (К. Зак. 8:3, 4). Сӥзем музъемлэн пырон азяз сылыкузы, Моисейлэн соосты берпуметӥзэ юнматэмез потэ валa.

5. Кыӵе кылъёс вераз Моисей израиль калыклы кулэмезлэсь азьло? (Кыкетӥ Закон 30:19, 20).

⁵ Мар вераз Моисей? (Лыдӟе Кыкетӥ Законэз 30:19, 20.) Со израиль калыклы тодаз вайытӥз, сое туж умой кема улон возьма шуыса. Иегова соослы Сӥзем музъемын улон кузьмаз. Отын туж чебер интыос но умой музъем вал! Моисей шуиз: «Тынад киыныд лэсьтымтэ бадӟымесь, умоесь городъёсаз Инмаред Кузё-Инмар тонэ пыртӥз ке, кытын котькыӵе ваньбурен тырмытэм коркаос вань — со ваньбурез тон ӧд люка, изэз кораса лэсьтэм колодчаос вань — со изэз тон ӧд кора, виноградпуд бакчаос, вӧйпу садъёс вань, кудъёссэ тон ӧд мертты, соослэсь емышъёссэс сиёд, кӧттэ тырод» (К. Зак. 6:10, 11).

6. Малы Инмар лэзиз мукет калыкъёслы израиль калыкез киултыны?

⁶ Озьы ик Моисей израиль калыклы вераз, Сӥзем музъемын кема улон понна, солы Иеговалэн курон-косонъёсызлэсь кылзӥськоно шуыса. Моисей калыкез ӧтиз улонэз бырйыны, яке Инмарлы оскымон ужаны-тыршыны. Но израиль калык Иеговалэсь палэнскиз. Соин ик берлогес Инмар лэзиз ассир калыклы, нош берлогес вавилон калыклы израиль калыкез киултыны но пленэ нуыны (4 Экс. 17:6—8, 13, 14; 2 Пар. 36:15—17, 20).

7. Малы милемыз дышето Моисейлэн кылъёсыз? (Озьы ик учке суредъёсты.)

⁷ Малы ми дышетскиськомы? Кылзӥськон улонэз уте. Израиль калык Сӥзем музъемлэн пырон азяз сылэ вал. Нош ми выль дуннее пырон азьын сылӥськомы. Ӝоген ми адӟомы, кызьы быдэс дунне райлы пӧрмоз (Ис. 35:1; Лука 23:43, ВД). Отын Шайтан но периос уз луэ ни (Усьт. 20:2, 3). Зэмос луисьтэм религия нокинэ уз пӧя (Усьт. 17:16). Адямиослэн кивалтэтъёссы нокинэ уз ултӥялэ (Усьт. 19:19, 20). Райын сьӧлыклэсь кышкасьтэмъёс уз луэ ни (Пс. 36:10, 11). Ваньзы Иеговалэн законъёсызлэсь кылзӥськозы, огкылысь улозы, ог-огзэс яратозы но ог-огзылы оскыны быгатозы (Ис. 11:9). Ми туж возьмаськомы со дырез! Ми Иеговалэсь кылзӥськимы ке, соку пырак дауръёс ӵоже райын улыны быгатомы (Пс. 36:29; Иоанн 3:16).

8. Кызьы пырак улыны оскон юрттӥз одӥг миссионерлы? (Иуда 20, 21).

⁸ Пырак улыны оскон милемлы юрттэ, нокыӵе шуг-секытъёс шоры учкытэк, Инмарлы оскымон луыны. (Лыдӟе Иудалэсь 20, 21.) Озьы ик со милемлы юрттэ асьмелэн тырмымтэосынымы нюръяськыны. Ӵапак сыӵе шуг-секытэз вал одӥг агайлэн, кудӥз трос аръёс ини Африкаын миссионер луыса ужа-тырше. Со вера: «Мон валай, пырак улон понна, мыным Иеговалэсь кылзӥськоно шуыса. Та мыным юрттӥз азьланяз но шуг-секытэным нюръяськыны но эшшо но зол вӧсяськыны Иеговалы, солэсь юрттэт курыса. Солэн юрттэменыз мон шуг-секытме ворми».

«КОТЬКЫӴЕ УДЫСЫН ВИЗЬНОДО... ЛУОД»

9. Кыӵе шуг-секытъёсын пумиськылӥз Давид?

⁹ Давид вал израиль калыклэн эксэез но Иеговалэн оскымон ужась-тыршисез. Озьы ик со вал крезьгурчи, кылбурчи, ожгарчи но пророк. Давид трос шуг-секытъёсын пумиськылӥз. Трос аръёс ӵоже со пегаса улӥз, малы ке шуоно Саул эксэй сое уйылӥз-улляз. Куке Давид ачиз эксэй луиз, солы нош ик пегӟыса улоно луиз, малы ке шуоно Авессалом пиезлэн потэ вал сое виемез но со интые эксэй луэмез. Вань шуг-секытъёсыз шоры но аслаз янгышъёсыз шоры учкытэк, Давид вань улытозяз Инмарлы оскымон вал. Иегова сое нимаз аслаз сюлмызлы кельшись пиосмуртэн. Соин ик милемлы кылзӥськыны кулэ Давидэн сётэм визь-кенешъёслэсь (3 Экс. 15:5; Ап. уж. 13:22).

10. Малы Давид визь-кенеш сётӥз Соломон пиезлы?

¹⁰ Кылсярысь, эскеромы, кыӵе визь-кенеш сётӥз Давид Соломон пиезлы, кудӥз эксэй луыны кулэ вал. Иегова со егит пиосмуртэ бырйиз храм пуктыны, кудаз калык Инмарлы йыбыртъясал (1 Пар. 22:5). Соломонлы туж бадӟым уж быдэстоно вал но быдэс калык сярысь сюлмаськоно вал. Иегова Соломонлы ӧй юрттысал ке, солэн номыр ӧй пӧрмысал. Мар вераз Давид Соломонлы? Ойдолэ учкомы.

11. Кыӵе визь-кенеш сётӥз Давид Соломонлы но кызьы со улӥз, атаезлэн верамезлэсь кылзӥськыкуз? (3 Эксэйлыкъёслэн 2:2, 3). (Озьы ик учке суредъёсты.)

¹¹ Мар вераз Давид? (Лыдӟе 3 Эксэйлыкъёслэсь 2:2, 3.) Давид пиезлы вераз, Иеговалэсь кылзӥськиз ке, со азинлыко луоз шуыса. Зэм но, вуоно аръёсы Соломон туж трос лэсьтӥз (1 Пар. 29:23—25). Со бадӟым храм пуктӥз но Библиысь куд-ог книгаосты гожтӥз. Солэн кылъёсыз Библиысь мукет книгаосын но гожтэмын. Соломонлэн визьлыкез но узырлыкез сярысь мукет шаеръёсын но тодмо луиз (3 Экс. 4:34). Но Соломонлы тодаз возёно вал Давидлэсь кылъёссэ, Иеговалэсь кылзӥськыса гинэ, со азинлыко луоз шуыса. Жаляса верано луэ, берлогес Соломон мукет инмаръёслы йыбыртъяны кутскиз. Иеговалы со ӧз кельшы, соин ик со Соломонлы визьлык сётъямысь дугдӥз. Нош сотэк Соломон шонерлыко кивалтыны ӧз быгаты ни (3 Экс. 11:9, 10; 12:4).

12. Малы милемыз дышето Давидлэн кылъёсыз?

¹² Малы ми дышетскиськомы? Кылзӥськон азинлыко луыны юрттэ (Пс. 1:1—3). Иегова ӧз вера, ми солэсь кылзӥськимы ке, Соломон кадь узыресь но даноесь луомы шуыса. Со вераз, милемлы визьлык сётоз шуыса (Мад. 2:6, 7; Иак. 1:5). Библиысь возетъёс юртто милемлы умой ужпумъёс кутыны ужен, дышетсконэн, шутэтскон амалъёсын но коньдонэн герӟаськем удысъёсын. Инмарлэн визь-кенешъёсызъя улыса, ми соин кусыпъёсмес утёмы но пырак улыны быгатомы (Мад. 2:10, 11). Со сяна, милям оскымон эшъёсмы но шудо семьямы луоз.

13. Мар юрттӥз Кармен сузэрлы зэмзэ ик азинлыко луыны?

¹³ Мозамбик шаерысь Ка́рмен сузэр малпа вал, вылӥ образованитэк азинлыко луыны уг луы шуыса. Соин ик со университетэ дышетскыны пыриз. Сузэрмы вера: «Мыным кельше вал дышетскыны, но отчы трос дыр но кужым кошке вал. Ми кутскиськомы вал дышетскыны 7 часэ 30 минутэ, нош йылпумъяськомы вал 18 часэ. Пумиськонъёсы вуыны секыт вал. Соин ик Иеговаен кусыпъёсы лябӟыны кутскизы. Мон валай, кык кузёослы ужаны тыршисько шуыса» (Матф. 6:24, сноска). Кармен вӧсяськиз но публикациосмыя эскерон ортчытӥз. Со азьланьтэ: «Тӧроосын но анаеным вераськеме бере мон ужпум кутӥ университетысь кошкыны, пионер луыса ужаны-тыршыны мед быгатом шуыса. Со самой шонер ужпум вал. Мон нокӧня но со сярысь уг жаляськы».

14. Кыӵе валтӥсь малпанэз валэктэмзы потэ вал Моисейлэн но Давидлэн мукет адямиослы?

¹⁴ Моисей но Давид Иеговаез ярато но валало вал, солэсь кылзӥськыны туж кулэ шуыса. Берпум визь-кенешъёс сётыкузы, соос калыкез ӧтизы асьсэлэсь адӟем карыны но Инмарлы оскымон луыны. Озьы ик соос калыкез алӥзы, Иеговалэсь палэнскизы ке, соос Инмарлэн эшъёсыз луыны уз быгатэ ни но со соосты бакель уз кары ни шуыса. Моисейлэн но Давидлэн кылъёссы туннэ но пайда вайыны быгато. Нош сю аръёс ортчыса, Иеговалэн эшшо одӥг ужась-тыршисез возьматӥз, макем кулэ Инмарлы оскымон луыны.

«МОН ПОННА СОЛЭСЬ БАДӞЫМЕЗ ШУМПОТОН ӦВӦЛ»

15. Мае адӟиз апостол Иоанн улонэз куспын?

¹⁵ Иоанн вал Иисус Христослэн матысь эшез но солэн апостолэз (Матф. 10:2; Иоанн 19:26). Со трос тодытӥз Иисус Христосэн ӵош, солэсь паймымон ужъёссэ адӟиз но секыт дыръёсы солы юрттӥськиз. Иоанн адӟиз, кызьы Иисусэз казнить каризы но кызьы со собере улӟиз. Озьы ик Иоанн адӟиз христиан кенешлэсь будэмзэ но ӟеч иворлэсь «ин улын улӥсь вань калыкъёс» пӧлын вӧлмемзэ (Кол. 1:23).

16. Кинэ юнматӥзы Иоаннлэн гожтэтъёсыз азьвыл но кинэ соос юнмато туннэ?

¹⁶ Иоаннлы дан сётэмын вал Библиысь куд-ог книгаосты гожъяны. Улонэзлэн пумаз со гожтӥз «Иисус Христослэсь усьтӥськонзэ» (Усьт. 1:1). Со сяна, со гожтӥз ньыль Евангелиос пӧлысь одӥгзэ но куинь гожтэт. Куинетӥ гожтэтсэ Иоанн гожтӥз Гаий нимо оскымон агайлы, кудзэ со пизэ кадь яратэ вал (3 Иоанн 1). Кенешын вал, дыр, трос мукет христианъёс но, кудъёссэ Иоанн аслэсьтыз нылпиоссэ кадь яратэ вал. Та оскымон арлыдо ужась-тыршисьлэн гожъямез туннэ но Иисуслэсь дышетскисьёссэ юнматэ.

17. Мар бордысь потэ зэмос шумпотон? (3 Иоанн 4).

¹⁷ Мар гожтӥз Иоанн? (Лыдӟе 3 Иоаннлэсь 4.) Иоанн вераз, кыӵе шумпотон вае Инмарлэсь кылзӥськон. Куинетӥ гожтэтсэ гожтэмез бере кылдӥзы адямиос, кудъёсыз зэмос луисьтэм дышетонъёсты вӧлмытӥзы но кенешез люкизы. Но вал соос но, кинъёс азьвыл сямен «зэмлыкез санэ поныса» улӥзы. Соос Иеговалэсь кылзӥськизы но «Солэн курон-косонъёсызъя» улӥзы (2 Иоанн 4, 6). Сыӵе оскымон христианъёс Иоаннэз но Иеговаез шумпоттӥзы (Мад. 27:11).

18. Малы милемыз дышето Иоаннлэн кылъёсыз?

¹⁸ Малы ми дышетскиськомы? Оскымон луон шумпотон вае (1 Иоанн 5:3). Кылсярысь, ми шумпотӥськомы, куке Иеговаез шумпоттӥськомы. Нош со шумпотэ, куке ми визь-сынаськонъёслы ум сётскиське но солэн законъёсызъя улӥськомы (Мад. 23:15). Озьы ик инмысь кылчинъёс но шумпото (Лука 15:10). Со сяна, ми шумпотӥськомы, куке агайёсмы но сузэръёсмы, уйылон-уллянъёс но шуг-секытъёс шоры учкытэк, Инмарлы оскымон кылё (2 Фес. 1:4). Нош куке Шайтанлэн дунеез быдтэмын луоз, ми шумпотомы, Иеговалы оскымон кылимы шуыса.

19. Мар шӧдэ Рейчел сузэр, куке мукетъёсызлы юрттэ Иеговалэн ужась-тыршисьёсыз луыны? (Озьы ик учке суредъёсты.)

¹⁹ Тужгес но ми шумпотӥськомы, адямиослы Иегова сярысь вераны быгатӥськомы шуыса. Ре́йчел сузэр, кудӥз Доминикан Республикаын улэ, туж шумпотэ, адямиослы юрттыны быгатэ шуыса Инмарлэн ужась-тыршисьёсыз луыны. Тани мар со вера аслаз дышетскисьёсыз сярысь: «Кылъёс ик уг шедё вераны, макем мон шумпотӥсько, куке дышетскисьёсы кутско Иеговаез яратыны, солы оскыны но со понна асьсэлэсь улонзэс воштыны. Тае адӟыса, мон валасько, тыршеме юнме ӧй вал шуыса».

КЫЛЗӤСЬКЕ ИНМАРЛЭН ОСКЫМОН УЖАСЬ-ТЫРШИСЬЁСЫЗЛЭН БЕРПУМ КЫЛЪЁССЫЛЭСЬ

20. Мар огкадез милям вань Моисеен, Давидэн но Иоаннэн?

²⁰ Моисей, Давид но Иоанн туж кемалась улӥзы. Соослэн югдуръёссы, милям югдуръёсмы сярысь, туж пӧртэм вал. Озьы ке но милям трос огкадез вань. Соос зэмос Инмарлы йыбыртъязы. Ми но со ик Инмарлы йыбыртъяськомы. Соос Иеговалы вӧсяськизы, со вылэ оскиськизы, солэсь юрттэт но визь-кенеш куризы. Ми но озьы ик лэсьтӥськомы. Иегова кылзӥськемзы понна со пиосмуртъёсты бакель кариз. Ми оскиськомы, Иегова милемыз но бакель кароз шуыса.

21. Мар возьма котькинэ, кин Моисейлэн, Давидлэн но Иоаннлэн берпум кылъёссылэсь кылзӥське?

²¹ Ойдолэ кылзӥськомы та арлыдо пиосмуртъёслэн визь-кенешъёссылэсь но Иеговалэн курон-косонъёсызъя уломы. Соку ми котькыӵе ужъёсамы азинлыкоесь луомы. Ми кема уломы — пырак уломы! (К. Зак. 30:20). Улонмы шумпотонэн тырмемын луоз, малы ке шуоно инмысь Атаймы, ми шоры учкыса, шумпотоз. Со вань кылсётонъёссэ быдэстоз, озьы, кызьы ми ӧм но малпалэ (Еф. 3:20).