Иегова адӟе котькуд синкылидэ

1, 2. Кыӵе мугъёсын сэрен ми бӧрдыны быгатӥськомы?

КОТЬКУДМЫЛЭН одӥг пол ке но бӧрдэмез вань. Куддыръя ми шумпотыса бӧрдӥськомы. Кылсярысь, куке нылпи вордӥське. Яке ми пумиськимы эшенымы, кудзэ туж кемалась ӧм адӟе. Нош куддыръя, умой учырез тодамы вайыса гинэ но, милям синвуосмы пото.

² Но ӵемгес ми бӧрдӥськомы, куке милемлы туж секыт. Кылсярысь, куке милемыз кин ке но туж вӧсь кариз. Яке ми секыт висеменымы сэрен бӧрдӥськомы. Озьы ик ми бӧрдытэк ум чидаське, куке матысь адямиосмы куло. Сыӵе дыре милям сыӵе ик шӧдонъёсмы кылдо, кыӵе шӧдонъёсыз вал Иеремиялэн, куке вавилон калык Иерусалимез куашкатӥз. Со вераз: «Ӧръяськыса кошкись вуос кадь синвуэ бызе... Синвуэ кисьтӥське, уг дугды» (Бӧрд. 3:48, 49).

3. Мар шӧдэ Иегова, куке солэн ужась-тыршисьёсыз куректо? (Исаия 63:9).

³ Иегова туж умой тодэ, кӧня пол ми бӧрдӥмы, куке милемлы секыт яке вӧсь вал. Библия милемыз оскытэ, Иегова тодэ, кыӵе куректонэз ми чидано луиськомы, но юрттэт куреммес кылэ шуыса (Пс. 33:16). Иегова милемыз аслэсьтыз нылпиоссэ кадь яратэ. Соин ик, куке ми бӧрдӥськомы, сюлворыса вӧсяськеммес кылзэм сяна но куректэммес адӟем сяна, солэн но сюлмыз чигиське. Со котьку дась милемлы юрттыны. (Лыдӟе Исаиялэсь 63:9.)

4. Инмарлэн кыӵе ужась-тыршисьёсыз сярысь ми вераськомы но мае ми тодомы Иегова сярысь?

⁴ Аслаз Кылыз пыр Иегова милемлы вера, мае со шӧдэ, куке солэн ужась-тыршисьёсыз бӧрдо, но кызьы со соослы юрттэ. Ми тодомы, кыӵе шуг-секытъёсын пумиськизы Анна, Давид но Езекия. Малы соос бӧрдӥзы но кызьы Иегова соосты буйгатӥз? Озьы ик ми тодомы, кызьы Иегова милемыз буйгатэ, куке милям матысь адямимы кулэ, куке милемыз кин ке но вӧсь каре яке куке, ми малпамъя, умоезлы нокыӵе оскон ӧвӧл ни.

МИ БӦРДӤСЬКОМЫ, КУКЕ МАТЫСЬ АДЯМИМЫ КУЛЭ

5. Кыӵе шуг-секытъёсын пумиськиз Анна но кызьы со ассэ шӧдэ вал?

⁵ Анналэн бӧрдон понна трос мугъёсыз вал. Картэзлэн вал эшшо одӥг кышноез — Феннана, кудӥз Аннаез адӟемпотостэм каре вал. Таин сэрен гинэ но Анналы туж вӧсь вал. Со сяна, Феннаналэн нылпиосыз вал, нош Анналэн ӧй вал (1 Экс. 1:1, 2). Со понна Феннана Аннаез ялан мыскыл карыса но ултӥяса возиз. Кызьы тӥ асьтэды шӧдысалды сыӵе учырын? Библиын вераське, Анна «лулыныз-сюлмыныз ӝожомыса» улӥз, «соин ик бӧрдэ, уг но сиськы вал» (1 Экс. 1:6, 7, 10).

6. Мар юрттӥз Анналы буйгатскыны?

⁶ Мар юрттӥз Анналы буйгатскыны? Со мынӥз скинияе. Скиниялэн азбараз пырон азьын, вылды, Анна «Кузё-Инмар азьын вӧсяськиз, туж бӧрдӥз». Со туж куриз Иеговаез солэсь куректэмзэ адӟыны но солы юрттыны (1 Экс. 1:10б, 11). Анна Иеговалы сюлэмзэ усьтӥз. Анналэсь синвуоссэ адӟыса, Иеговалэн сюлмыз туж вӧсь луэ вал.

7. Мар воштӥськиз, куке Анна аслаз шуг-секытъёсыз сярысь Иеговалы вераз?

⁷ Илий, быдӟым священник, Аннаез оскытӥз, Иегова вӧсяськонэзлы ответ сётоз шуыса. Кызьы ассэ собере шӧдӥз Анна? Библиын гожтэмын: «Со отысь кошкиз; сиськиз, азьло кадь ымнырыз ӝож тусъем ӧй ни вал» (1 Экс. 1:17, 18). Анналэн югдурез воштӥськемын ӧй вал на ке но, со буйгатскиз. Сюлмаськонзэ со Иегова кие сётӥз. Нош Иегова Аннаез кылзӥз, сое валаз, берлогес бакель кариз но, Анналэн нылпиосыз вордӥськизы (1 Экс. 1:19, 20; 2:21).

8, 9. Малы кулэ пумиськонъёсамы ветлыны? (Еврейёслы 10:24, 25). (Озьы ик учке суредэз.)

⁸ Малы ми дышетскиськомы. Оло нош, матысь адямиед яке эшед кулэмен, али тон куректыса но ялан бӧрдыса улӥськод. Тынад огнад улэмед потэ ке, со валамон. Но тодамы ваёмы, мар кариз Анна. Со скинияе мынӥз. Отын Иегова сое буйгатӥз. Соин ик, тыныд туж секыт ке но, пумиськонэ мын. (Лыдӟе Еврейёслы 10:24, 25.) Отын Иегова тонэ буйгатоз но юнматоз. Пумиськонъёсамы ми Библиысь кылбуръёсты кылӥськомы. Соос вылын малпаськыса, ми секыт малпанъёсмес вунэтӥськомы. Озьы Иегова милемлы юрттэ умоез сярысь малпаськыны. Соку, югдурмы ӧз воштӥськы на ке но, милемлы капчигес луэ.

⁹ Озьы ик пумиськонъёсамы ми агайёсынымы но сузэръёсынымы дырмес ортчытъяськомы. Соос милемыз ярато. Соос вӧзын милемлы умойгес луэ (1 Фес. 5:11, 14). Тани мар вераз одӥг нимысьтыз пионер, кудӥзлэн кышноез кулӥз: «Мон солэсь туж мӧзмисько. Соин ик куддыръя бӧрдэмысь дугдэме ик уг луы. Сыӵе дыре мыным кулэ огнам луыны. Но пумиськонъёсмы мыным туж юртто. Агайёслэн но сузэръёслэн валэктонъёссы но ӟеч кылъёссы сюлэмме веськато. Пумиськон азьын мон кытчы пырон инты ик уг шедьтӥськы ке но, пумиськон бере мынам сюлмы каньыл луэ». Зэм но, пумиськонъёсын Иегова милемлы агайёс но сузэръёс пыр юрттэ.

10. Кызьы ми Анналэсь адӟем карыны быгатӥськомы, куке куректыса улӥськомы?

¹⁰ Мар кариз на Анна, Иеговалэсь буйгатскон басьтон понна? Со вераз солы ваньзэ, маин сэрен куректыса улӥз. Тыныд но вань сюлмаськонъёстэ Иегова кие сётоно (1 Пётр 5:7). Малы ке шуоно ми тодӥськомы, со милемыз одно ик кылзоз но юрттоз шуыса. Тани мар вера одӥг сузэрмы, кудӥзлэсь картсэ виизы: «Мон малпасько вал, сюлмы воксё чигиськиз но ноку уз бурмы ни шуыса. Мон Иеговалы вӧсяськисько вал. Инмысь яратӥсь Атае монэ котьку буйгатылӥз. Куддыръя мон тупась кылъёс но ӧй шедьтылы, но Иегова монэ котьку валаз. Куке мынам кужыме быре вал, мон Иеговалэсь каньыллык курисько вал. Со мыным котьку ответ сётылӥз. Солэн юрттэменыз мон азьлань мыныны быгатӥ». Куке ми бӧрдӥськомы но сюлэммес Иеговалы усьтӥськомы, со милемыз туж умой вала но милемын ӵош бӧрдэ. Шуг-секыт ӧз быры на ке но, Иегова сюлэмез капчиятоз но буйгатскыны юрттоз (Пс. 93:19; Флп. 4:6, 7). Оскымон но юн луэммы понна со милемыз бакель кароз (Евр. 11:6).

МИ БӦРДӤСЬКОМЫ, КУКЕ МИЛЕМЫЗ ВӦСЬ КАРО

11. Кыӵе шуг-секытъёсын пумиськиз Давид но кызьы со ассэ шӧдӥз?

¹¹ Давидлэн но бӧрдон понна мугъёсыз вал. Тросэз сое адӟемпотостэм каризы. Со сяна, адямиос, кудъёсызлы со оске вал, сое кельтӥзы (1 Экс. 19:10, 11; 2 Экс. 15:10—14, 30). Улонэзлэн секыт вакытаз со гожтӥз: «Лулӟылыса мон жади ни: уйлы быдэ кӧлон интыме коттӥсько, синкылиен валесме миськисько». Малы Давидлы сокем секыт вал? Со валэктӥз: «Тушмонъёсыным сэрен» (Пс. 6:7, 8). Адямиос Давидэз сокем вӧсь каризы, со ялан бӧрдыса улӥз.

12. Мар гожтӥз Давид Иегова сярысь Псалтирьын 55:9?

¹² Давидлэн трос куректонъёсыз вал ке но, со юн оскиз, Иегова сое яратэ шуыса. Одӥг пол со шуиз: «Кузё-Инмар бӧрдэм куараме кылӥз» (Пс. 6:9). Нош Псалтирьын 55:9 (лыдӟе) Давид Иегова сярысь паймымон кылъёс вераз. Соосты лыдӟыса, валаны луэ, макем юн яратэ но сюлмаське Иегова аслаз ужась-тыршисьёсыз сярысь. Давид гожтӥз, Инмар солэсь синкылиоссэ тусьтыяз понэ но книгаяз гожтэ шуыса. Давид юн оскиз, Иегова куректэмзэ адӟе но со сярысь уз вунэты шуыса. Инмар тодэ вал, маин пумиськоно луиз Давид но кызьы со ассэ соку шӧдӥз.

13. Мар сярысь тодамы возёно, милемыз кин ке но туж вӧсь кариз ке? (Озьы ик учке суредэз.)

¹³ Малы ми дышетскиськомы. Оло нош, али тон туж куректыса улӥськод, малы ке шуоно адями, кудӥзлы тон быдэсак оскиськод вал, тонэ туж вӧсь кариз. Оло нош, тон кинэн ке пумиськылӥд яке кузпалъяськемын вал, нош али огнад кылид. Яке матысь адямиед Иеговалы ужамысь-тыршемысь дугдӥз. Тани мар вераз одӥг агай, куке кышноез азон-калгон сьӧлыке пыриз но сое кельтӥз: «Та мыным осконтэм потэ вал. Мон асме номырлы ярантэм адямиен лыдъяй. Мынам туж воже потэ вал, мыным туж ӝож вал». Тонэ кин ке туж вӧсь кариз ке, эн вунэты, Иегова тонэ ноку уз кельты шуыса. Агай вераз: «Мон валай, адямиос тонэ вӧсь карыны быгато шуыса, нош Иегова — уг. Со милям изгурезьмы. Мар гинэ медам луы, со котьку милемын. Оскымон адямиоссэ со ноку уз кельты» (Пс. 36:28). Эн вунэты: Иегова кадь юн яратыны одӥг адями но уг быгаты. Мар гинэ тонэн медам луы, тон Иеговалы азьло сямен дуно потӥськод (Рим. 8:38, 39). Тодад возь: кызьы гинэ адямиос асьсэды медаз возе, инмысь Атаед тонэ котьку яратоз.

14. Кызьы милемыз оскытэ Псалтирь 33:19?

¹⁴ Милемыз кин ке но вӧсь кариз ке, милемыз буйгатыны быгато Давидлэн мукет кылъёсыз но, кудъёсыз гожтэмын Псалтирьын 33:19 (лыдӟе). Одӥг книгаын вераське, «сюлмынызы чигиськыса улӥсьёс» — со соос, вылды, «кинъёс азьпал улонлэсь номыр умойзэ уг возьмало». Кызьы Иегова юрттэ сыӵе адямиослы? Инмар соослы «матын улэ». Иегова — яратӥсь атай яке анай кадь, кудӥз бӧрдӥсь нылпизэ кияз басьтэ но бордаз ӝиптэ. Куке милемыз кин ке но вӧсь кариз но ми соин сэрен куректыса улӥськомы, Иегова вӧсь луэммес шӧдэ но милемлы юрттыны дыртэ. Куке милям сюлэммы чигиськемын но ми асьмеды номырлы ярасьтэм адямиосын лыдъяськомы, Иегова милемыз буйгатэ. Милемлы али капчигес мед луоз шуыса, Инмар тодамы вайытэ, макем трос умоез милемыз азьпалан возьма (Ис. 65:17).

МИ БӦРДӤСЬКОМЫ, КУКЕ АЗЬЛАНЕЗЛЭСЬ НОМЫР УМОЙЗЭ УМ ВОЗЬМАСЬКЕ

15. Малы Езекия туж зол бӧрдыны кутскиз?

¹⁵ Куке Езекиялы, иудей эксэйлы, 39 арес вал, со тодӥз, солэн эмъяны луонтэм висёнэз вань шуыса. Исаия пророк солы Иеговалэсь иворзэ вераз, та висёнэз сэрен со кулоз шуыса (4 Экс. 20:1). Та кышкыт иворез кылыса, Езекия туж зол бӧрдыны кутскиз. Со вань сюлмысьтыз Иеговалы вӧсяськиз (4 Экс. 20:2, 3).

16. Кыӵе ответ сётӥз Иегова Езекиялэн вӧсяськемезлы?

¹⁶ Езекиялэн вӧсяськемез Иеговалэн сюлмаз ик пыриз, соин ик со лякытэн солы шуиз: «Тынэсьтыд вӧсяськемдэ кылӥ, синвуостэ адӟи. Тани, Мон тонэ бурмыто». Иегова эксэйлы гажан-жалянзэ возьматӥз но Исаия пыр вераз, солы улон нуналъёс ватсалоз но Иерусалимез ассир калыклэсь утёз шуыса (4 Экс. 20:4—6).

17. Кызьы Иегова милемлы юрттэ, куке ми висиськомы? (Псалтирь 40:4). (Озьы ик учке суредэз.)

¹⁷ Малы ми дышетскиськомы. Оло нош, тон но секыт висёнэд сярысь тодӥд. Аслад сюлмаськонъёсыд сярысь Иеговалы вера. Вӧсяськыкуд бӧрдытэк уд чидаськы ке, бӧрды. Инмар тонэ кылзоз. Библия милемыз оскытэ, «гажан-жалянлэн Атаез, котькыӵе буйгатсконлэн Инмарез» милемыз «котькыӵе куректон-кайгуосмы дыръя... буйгатэ» шуыса (2 Кор. 1:3, 4). Ми ум возьмаське, Иегова туннэ ик вань шуг-секытъёсмес быдтоз шуыса. Но со милемлы котьку юрттоз. (Лыдӟе Псалтирьысь 40:4.) Иегова милемлы святой духсэ сётэ, милям кужыммы, визьлыкмы но каньыл сюлэммы мед луоз шуыса (Мад. 18:15; 2 Кор. 4:7). Озьы ик со милемлы оскон сётэ, азьланяз нокин уз висьы шуыса (Ис. 33:24).

18. Кыӵе кылбур тӥледлы тужгес но юрттэ секыт дыръя? (Учке «Библиысь кылбуръёс, кудъёсыз синкылиосмес ӵушыны быгато» рамкаез.)

¹⁸ Иеговалэн кылъёсыз Езекияез буйгатӥзы. Библия пыр Инмар милемыз но буйгатыны быгатэ. Отын гожтэмын трос кылъёс, кудъёсыз секыт дыръя милемлы юрттыны но милемыз буйгатыны быгато (Рим. 15:4). Шундыпуксёнпал Африкаысь одӥг сузэрмы тодӥз, солэн рак шуыса. Соин сэрен со трос бӧрдӥз. Со вера: «Кылъёс, кудъёсыз гожтэмын Исаиялэн 26:3, мыным туж юрттӥзы. Куддыръя кылдо шуг-секытъёс, кудъёсыныз ми номыр карыны ум быгатӥське. Но та кылъёс монэ оскыто, Иегова сюлэмме каньыл кароз но котькыӵе шуг-секытэз чиданы юрттоз шуыса». Нош вань-а тынад Библиысь яратоно кылбуред, кудӥз тонэ юнматэ, куке малпан кылдэ, азьланяз номыр умоез уг возьма ини шуыса?

19. Кыӵе улон милемыз возьма?

¹⁹ Та дуннелэн пумыз матэктэмъя бӧрдон понна мугъёсмы эшшо но трос луозы. Ми тодӥмы, кыӵе шуг-секытъёсын пумиськизы Анна, Давид но Езекия. Озьы ик ми тодӥмы, Иегова ужась-тыршисьёсызлэсь бӧрдэмзэс адӟе но соос понна сюлмаське шуыса. Со котькуд синкылидэ адӟе. Соин ик, шуг-секытэн пумиськыса, соку ик вера сюлмаськонъёсыд сярысь Иеговалы. Агайёслэсь но сузэръёслэсь эн палэнскы, малы ке шуоно соос тонэ ярато. Со сяна, Библиез лыдӟы — отын трос буйгатӥсь кылъёс гожтэмын. Юн луэмед понна Инмар тонэ одно ик бакель кароз. Иегова син улысьтымы вань синкылимес ӵушоз (Усьт. 21:4). Сюлэм вӧсь луэммы понна ми ум бӧрдэ ни — ми шумпотыса гинэ бӧрдомы.