Малы ми тау кариськомы Иеговалы сьӧлыкъёсмес простить каремез понна?

1, 2. Малы милемыз ӵошатыны луэ егит пиосмуртэн, кудӥз сярысь нырысетӥ абзацын вераське?

ПУКТЭ син азяды егит пиосмуртэ, кудӥз узыр семьяын будӥз. Шудтэм учыре сюрыса, анай-атаез куло. Со туж куректыса улэ. Со сяна, егит пиосмурт тодэ, анай-атаез ваньбурзэс тус-тас кариллям, эшшо трос пунэмаськиллям на шуыса. Соос, кинъёслэсь анай-атаез пунэмаськиллям, коньдонзэс берыктыны куро, но егит пиосмурт быдэс улон даураз но сое берыктыны уз быгаты.

² Милемыз ӵошатыны луэ та егит пиосмуртэн. Адам но Ева, кинъёс бордысь вань адямиос потӥзы, сьӧлыктэмесь вал но чебер райын улӥзы (Ул.-выл. 1:27; 2:7—9). Соос быгато вал пырак дауръёс ӵоже шумпотыса улыны. Но соос сьӧлыказы. Соин ик соос ӧз быгатэ ини райын пырак улыны. Мар соос кельтӥзы асьсэлэн нылпиоссылы? Библия валэктэ: «Одӥг адями [Адам] пыр дунне вылэ сьӧлык пыриз, нош сьӧлык пыр кулон лыктӥз, соин сэрен кулон вань адямиос доры вуиз, малы ке шуоно вань адямиос сьӧлыказы» (Рим. 5:12). Адамлэсь милемлы выжиз кулонэ вуттӥсь сьӧлык. Сое ӵошатыны луэ бадӟым пунэм тыронэн, кудзэ ми пӧлысь нокин но берыктыны уг быгаты (Пс. 48:9, 10).

3. Малы сьӧлыкъёсмес ӵошатыны луэ пунэм тыронъёсын?

³ Иисус сьӧлыкъёсмес ӵошатӥз пунэм тыронъёсын (Матф. 6:12; Лука 11:4). Куке ми сьӧлыкаськомы, ми Иеговалэсь пунэмаськиськомы кадь. Со милемыз курыны быгатэ пунэм тыронмес берыктыны. Ӧм ке берыктэ, ми кулыса гинэ сьӧлыкъёсмылэсь мозмытскыны быгатомы (Рим. 6:7, ВД; 6:23).

4. а) Быгато-а адямиос асьсэос берыктыны сое, мае ыштӥзы Адам но Ева? (Псалтирь 48:8—10). б) Мае возьматэ «сьӧлык» кыл Библиын? (Учке «Сьӧлык» рамкаез.)

⁴ Луэ-а берыктыны сое, мае ыштӥзы Адам но Ева? Ми асьмеос номыр карыны ум быгатӥське. (Лыдӟе Псалтирез 48:8—10.) Иеговатэк, пудо сямен, ми кулысалмы но выльысь улыны ӧм быгатысалмы (Екк. 3:19; 2 Пётр 2:12).

5. Кызьы инмысь Атаймы милемлы юрттӥз берыктыны пунэм тыронмес, кудӥз милемлы Адамлэсь выжиз? (Учке суредэз.)

⁵ Тодамы ваёмы егит пиосмуртэ, кудӥз сярысь статьялэн кутсконаз вераськиз. Кызьы со ассэ шӧдысал, одӥг узыр адями со интые солэсь пунэм тыронъёссэ берыктыны ӵектысал ке? Егит пиосмурт туж тау карысал! Ӵапак озьы ик яратӥсь Атаймы, Иегова, малпаз милемыз мозмытыны пунэм тыронмылэсь — Адамлэсь выжем сьӧлыклэсь. Иисус валэктӥз, малы Иегова милемлы сыӵе кузьым лэсьтӥз: «Инмар сокем дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса» (Иоанн 3:16). Со сяна, та кузьым милемлы луонлык сётэ Иеговалэн матысь эшъёсыз луыны.

6. Мае ми эскеромы та статьяын но малы?

⁶ Кыӵе пайда вае милемлы дун тырон? Тае валан понна, ойдолэ эскеромы, мар вераське Библиын кусыпъёсты тупатон, дун-чылкыт карон, дун тырон, мозмытон но шонере поттон сярысь. Та милемлы юрттоз эшшо но зол дунъяны сое, мар Иегова лэсьтӥз, сьӧлыкъёсмес простить карон понна.

УЖПУМ: КУСЫПЪЁСТЫ ТУПАТОН

7. а) Мае ыштӥзы Адам но Ева, пырак улыны луонлыкез сяна? б) Кызьы Адамлэн но Евалэн кылзӥськымтэзы нылпиоссы вылын шӧдӥськиз но мар милемлы ваньмылы карыны кулэ? (Римъёслы 5:10, 11).

⁷ Адам но Ева пырак улыны луонлыксэс ыштӥзы. Со сяна, соос Атаенызы, Иеговаен, кусыпъёссэс сӧризы. Адам но Ева Инмарлэн нылпиосыз вал (Лука 3:38). Но кылзӥськымтэзы бере соос Иеговалэн тушмонъёсыз луизы, соин ик со соосты семьяысьтыз улляз. Сьӧлыкамзы асьсэлы но, вань нылпиоссылы но, озьы ик милемлы но, туж урод бервылъёс вайиз (Ул.-выл. 3:23, 24; 4:1). Соин ик милемлы Инмарен кусыпъёсмес тупатыны кулэ. (Лыдӟе Римъёслы 5:10, 11.) Одӥг книгаын вераське, грек кыл, кудӥз берыктӥське «кусыпъёсты тупатыны» шуыса, возьматэ «тушмон луэмысь дугдыны но эш луыны». Паймоно кадь, милемын кусыпъёсты тупатон понна, Иегова ачиз нырысетӥ вамыш лэсьтӥз. Кыӵе амал со шедьтӥз?

АМАЛ: ДУН-ЧЫЛКЫТ КАРОН

8. Мар со сыӵе дун-чылкыт карон?

⁸ Сьӧлыко адямиосын кусыпъёсты тупатон понна, Иегова малпаз соосты дун-чылкыт карыны. Со понна берыктоно вал сое, мар ыштэмын вал,— сыӵе ик дунын мае ке сётоно вал. Соку гинэ адямиос Иеговаен тупаса улыны быгатысалзы (Рим. 3:25).

9. Кыӵе куронъёс пуктӥз Иегова израиль калык азьын, сьӧлыкъёссэс простить карон понна?

⁹ Мар кариз Иегова, израиль калыклэн соин умой кусыпъёсыз мед луозы шуыса? Со куд-ог куронъёс пуктӥз. Арлы быдэ Израильын Чылкытатӥськон-сузяськон нунал пусйиськиз. Со нуналэ быдӟым священник пудо-животъёсты курбонэ вайылӥз. Сыӵе курбонъёс адямиосты сьӧлыкъёссылэсь быдэсак мозмытыны уг быгато вал, малы ке шуоно адямилэн улонэз но пудолэн улонэз одӥг кадь уг дунъяськы. Но израиль калык ӧпкеле вал ке но Иеговалэн куронъёсызъя курбонъёс вайылэ вал ке, со соосты простить карылӥз (Евр. 10:1—4). Со сяна, сыӵе курбонъёс калыклы валаны юртто вал, соос сьӧлыкоесь шуыса, озьы ик сьӧлыкъёссылэсь быдэсак но пыраклы мозмытскон понна, соослы мар ке но мукетыз кулэ шуыса.

10. Мар кариз Иегова, вань адямиослэсь сьӧлыкъёссэс простить карон понна?

¹⁰ Мар кариз Иегова, вань адямиослэсь сьӧлыкъёссэс простить карон понна? Со музъем вылэ яратоно Пизэ ыстӥз, кудӥз «тросэзлэсь сьӧлыкъёссэс быдтон понна Ассэ одӥг пол курбонлы сётӥз» (Евр. 9:28). Иисус «аслэсьтыз лулзэ сётыса, троссэ сьӧлыкъёслэсь мозмытыны лыктӥз». Озьы со дун тыриз (Матф. 20:28). Мар со сыӵе дун тырон?

МАР СЁТЭМЫН ВАЛ: ДУН ТЫРОН

11. а) Кызьы валано Библиысь дун тырон шуэмез? б) Кыӵе луыны кулэ вал дун тырон?

¹¹ Библиын дун тырон возьматэ дунэз, кудӥз тыремын вал, кинэ ке мозмытон понна яке кусыпъёсты тупатон понна. Дун тырон Иеговалы луонлык сётэ берыктыны сое, мае ыштӥзы Адам но Ева. Нош соос сьӧлыкатэк но пырак улыны быгато вал. Соин ик сётыны кулэ вал сыӵе ик дунын мае ке (1 Тим. 2:6). Озьыен, дун тырыны быгатэ вал быдэ вуэм пиосмурт гинэ, кудӥз: 1) сьӧлыктэм вал, 2) музъем вылын пырак улыны быгатэ вал но 3) ми понна аслэсьтыз улонзэ курбонлы сётыны дась вал. Сыӵе гинэ адямилэн улонэз берыктыны быгатэ вал сое, мае ыштӥз Адам.

12. Малы Иисус дун тырыны быгатӥз?

¹² Эскеромы куинь мугъёсты, малы Иисус дун тырыны быгатӥз. 1) Со тырбыдэс вал, со «нокыӵе но сьӧлык ӧз лэсьты» (1 Пётр 2:22). 2) Соин ик со быгатӥз музъем вылын пырак улыны. 3) Со дась вал кулыны но ми понна аслэсьтыз улонзэ сётыны (Евр. 10:9, 10). Иисус сьӧлыктэм вал бере, солэн улонэз быдэсак тупа вал сьӧлыкамез дырозь Адамлэн улонэзлы (1 Кор. 15:45). Соин ик кулыса, Адамлэн улонэз интые, Иисус аслэсьтыз улонзэ сётыны быгатэ вал (Рим. 5:19). Озьы Иисус «берпуметӥез Адам» луиз. Иисус одӥг пол но пыраклы кулӥз. Соин ик кулэ ӧй вал ини, эшшо одӥг тырбыдэс адями мед лыктоз но мед берыктоз шуыса сое, мае ыштӥз Адам (Евр. 7:27; 10:12).

13. Маин пӧртэм дун-чылкыт карон но дун тырон?

¹³ Озьыен, маин пӧртэм дун-чылкыт карон но дун тырон? Дун-чылкыт карон возьматэ, мар кариз Инмар, адямиосын умой кусыпъёс тупатон понна. Нош дун тырон возьматэ, кыӵе дун тыремын вал, сьӧлыко адямиосты дун-чылкыт карон понна. Кыӵе дун тыремын вал? Иисуслэн дуно вирыз, кудзэ со ми понна кисьтӥз (Еф. 1:7; Евр. 9:14).

ПАЙДА: МОЗМЫТОН НО ШОНЕРЕ ПОТТОН

14. Мае ми эскеромы азьланяз но малы?

¹⁴ Кыӵе милемлы пайда вае дун-чылкыт карон? Та юанлы валэктон шедьтон понна, ойдолэ эскеромы Библиысь кык кылъёсты, кудъёсыз милемлы юрттозы эшшо но зол дунъяны Иеговалэсь простить каремзэ.

15, 16. а) Малэсь милемыз мозмытэ дун тырон? б) Кыӵе тӥляд шӧдонъёсты кылдо, сьӧлыклэсь но кулонлэсь мозмытскон сярысь малпаськыса?

¹⁵ Дун тырон, кудӥз сярысь Библиын вераське, милемыз мозмытэ. Апостол Пётр тае тазьы валэктӥз: «Тӥ тодӥськоды, атайёсты бордысь потэм алекъяськыса улонлэсь сисьмись азвесен яке зарниен тӥ мозмытэмын ӧвӧл шуыса,— тӥ мозмытэмын чик шектэм-сьӧлыктэм, дун-чылкыт ыжпилэн кадь, Христослэн дуно Вирыныз» (1 Пётр 1:18, 19).

¹⁶ Иисуслэн курбонэз милемыз мозмытыны быгатэ сьӧлыклэсь но кулонлэсь, кудъёсыз милемлы трос куректон ваё (Рим. 5:21). Ми туж тау кариськомы Иеговалы но Иисуслы, Христослэн вирызлы луыса эрико луыны быгатӥськомы шуыса (1 Кор. 15:22).

17, 18. а) Кыӵе ми пайда басьтӥськомы, куке Иегова милемыз шонере поттэ? б) Кыӵе тӥляд шӧдонъёсты кылдо, та сярысь малпаськыса?

¹⁷ Шонере поттыкуз, Иегова милемыз янгыше уг уськыты ини но лэсьтэм сьӧлыкъёсмы понна кыл уг кутыты ини. Со дыре ик Иегова шонерлыко куронъёссэ уг тӥя: тыршеммылы луыса со милемыз шонере уг потты но сьӧлыкъёсмы шоры синзэ уг ворса. Иегова милемыз простить каре соку, куке ми оскиськомы, мар лэсьтӥзы со но Иисус, дун тырон понна (Рим. 3:24; Гал. 2:16).

¹⁸ Кыӵе милемлы пайда вае, куке Иегова милемыз шонере поттэ? Куд-огъёсыз, кинъёс шонере поттэмын, инмын Иисусэн ӵош кивалтыны быръемын, озьы ик соос Инмарлэн нылпиосыз луизы (1 Иоанн 3:1; Тит. 3:7). Иегова соослэсь сьӧлыкъёссэс простить кариз. Со соосты лэсьтэм сьӧлыкъёссы понна янгыше уз уськыты ини. Соин ик соос быгато эксэйёс но священникъёс луыса ужаны-тыршыны (Рим. 8:1, 2, 30). Мукетъёсыз, кинъёс шонере поттэмын, музъем вылын пырак улыны оско но Инмарлэн эшъёсыз луо (Иак. 2:21—23). Соослэсь но сьӧлыкъёссэс Иегова простить кариз. Туж-туж трос адямиослэн, кудъёсыз Армагеддон пыр потозы, ноку кулытэк улыны осконзы вань (Иоанн 11:26). «Шонер улэмъёс» но «шонер улымтэос», кудъёсыз кулӥзы ини, улӟытэмын луозы (Ап. уж. 24:15; Иоанн 5:28, 29). Дыр ортчыса, Иеговалэн музъем вылысь вань кылзӥськись ужась-тыршисьёсыз солэн нылпиосыз луозы (Рим. 8:21). Ми туж возьмаськомы со дырез, куке адямиос нош ик Атаймылэн, Иеговалэн, тырбыдэс нылпиосыз луозы!

19. Мар каризы Иегова но Иисус, югдурмес тупатон понна? (Озьы ик учке «Мар сётэ милемлы Иеговалэн простить каремез?» рамкаез.)

¹⁹ Куке но ми кельшиськомы вал егит пиосмуртлы, кудӥз ваньзэ ыштӥз но кудӥзлы анай-атаезлэсь трос пунэм тыронъёс выжизы. Но Иеговалэн юрттэменыз югдурмы воштӥськиз. Иегова амал шедьтӥз, кызьы сьӧлыкъёсмес простить карыны, нош Иисус ми понна улонзэ сётӥз. Иисус Христослы оскыса, ми мозмытскиськомы сьӧлыклэсь но кулонлэсь, кудъёсыз милемлы Адамлэсь выжизы. Озьы ик Иегова простить каре лэсьтэм сьӧлыкъёсмес, соин ик соос понна со милемыз кыл уг кутыты ини. Нош валтӥсез — табере милям Иеговаен матысь кусыпъёсмы вань.

20. Мае ми эскеромы вуоно статьяын?

²⁰ Куке ми малпаськиськомы со сярысь, мар каризы ми понна Иегова но Иисус, сюлэммы тау каронэн пачылме (2 Кор. 5:15). Соостэк милям нокыӵе осконмы ӧй луысал! Вуоно статьяын ми эскеромы куд-ог яркыт примеръёсты. Соос милемлы валаны юрттозы, куке Иегова милемыз простить каре, милемлы асьмеды янгыше уськытоно ӧвӧл ини шуыса.