Дышетске малпаськыны Иегова но Иисус сямен

1, 2. а) Мар пыре Инмарез яратон пӧлы? б) Кызьы Иисус возьматӥз, Иеговаез вань визьмыныз яратэ шуыса?

«ИНМАРДЭ Кузё-Инмарез вань сюлмыныд, вань лулыныд, вань кужмыныд, вань визьмыныд яраты» (Лука 10:27). Иисус вераз, Моисейлэн законысьтыз та курон-косон самой кулэез шуыса. Солэн верамезъя, милемлы Иеговаез вань сюлмынымы яратоно. Отысь мылпотонъёсмы но шӧдонъёсмы пото. Озьы ик милемлы Иеговалы оскымон луоно но солы вань кужымез сётоно. Со сяна, Иеговаез вань визьмынымы яратоно. Ми ноку быдэсак ум валалэ, кызьы малпаське Иегова. Но ми быгатомы сое умойгес валаны, «Христослэсь визьзэ» эскеримы ке (1 Кор. 2:16). Малы ке шуоно Иисус ӵапак Иегова сямен малпаське.

² Иисус Иеговаез вань визьмыныз яратӥз. Со тодэ вал, мае возьма солэсь Инмар. Солэн юн мылкыдыз вал солэн эрикезъя улыны. Иисус уг кышка вал, соин сэрен солы курадӟоно луоз шуыса. Иисус котьку тодаз возиз, Атайзэ шумпоттон — улоназ валтӥсез шуыса. Соин ик Иисус котьку тыршиз Атайзэ шумпоттыны.

3. Малы дышетскиз Пётр, Иисусэн дырзэ ортчытъяса, но мар карыны со ӧтиз христианъёсты? (1 Пётр 4:1).

³ Пётр но мукет апостолъёс Иисусэн трос дырзэс ортчытъязы. Соос быгатӥзы ас синмынызы адӟыны, кызьы со малпаське, но солэсь адӟем карыны. Нырысетӥ гожтэтаз Пётр христианъёсты ӧте Христосэз тодазы вайылыны но солэсь адӟем карыны. (Лыдӟе 1 Пётрлэсь 4:1.) Та кылъёсты гожтыкуз, Пётр вераз ожгарчиос сярысь, кудъёсыз, ожмаськонлы дась луон понна, вань ожмаськон тӥрлыксэс дӥсязы. Ӵапак озьы ик христианъёс, кудъёсыз Иисус сямен малпаськыны дышетско, тыршозы лэсьтыны ваньзэ, мае быгато, сьӧлыко мылпотонъёсынызы но Шайтанлэн дуннееныз нюръяськон понна (2 Кор. 10:3—5; Еф. 6:12).

4. Мае ми эскеромы та статьяын?

⁴ Та статьяын ми эскеромы, кызьы малпаськиз Иисус. Со милемлы юрттоз: 1) дышетскыны Иегова сямен малпаськыны, 2) зӥбыт-востэмесь луыны но 3) сэзь визьмын улыны.

ДЫШЕТСКЕ МАЛПАСЬКЫНЫ ИЕГОВА СЯМЕН

5. Вералэ, кыӵе учырын Пётр югдур шоры Иегова сямен ӧз учкы.

⁵ Эскеромы одӥг учырез, куке Пётр югдур шоры Иегова сямен ӧз учкы. Иисус апостолъёсызлы вераз, солы Иерусалиме мыноно шуыса, кытын сое кутозы, курадӟытозы но виёзы (Матф. 16:21). Пётр тодэ вал, Иисус — со Мессия шуыса, кудӥз Инмарлэсь калыксэ утёз. Соин ик солы туж секыт вал оскыны, Иегова аслэсьтыз Пизэ виыны лэзёз шуыса (Матф. 16:16). Соин сэрен Пётр Иисусэз палэнэ ӧтиз но солы шуиз: «Кузё-Инмаре, жаля Астэ! Та Тонэн медаз луы!» (Матф. 16:22). Пётр но Иисус пӧртэм сямен малпаськизы. Малы? Иисус югдур шоры Иегова сямен учкиз, нош Пётр — ӧз.

6. Кытысь адӟиське, Иисус Иегова сямен малпаськиз шуыса?

⁶ Иисус котьку но инмысь Атаез кадь малпаськиз. Со Пётрлы шуиз: «Кошкы Мон дорысь, шайтан! Тон Монэ сьӧлыке пыртӥсь, тон Инмарлы яраноез сярысь уд малпаськы ук, адямилы яраноез сярысь тон малпаськод» (Матф. 16:23). Иисус тодэ вал, Иеговалэсь эриксэ быдэстон понна, солы курадӟоно но кулоно луоз шуыса. Соин ик Иисус Пётрлэсь визь-кенешсэ юн мылкыдын палэнтӥз, Пётр солы умойзэ гинэ сӥзе вал ке но. Малы дышетскиз Пётр та учырын? Валано, кызьы малпаське Иегова, но со кадь малпаськоно. Милемлы но солы дышетскыны кулэ.

7. Кызьы Пётр берлогес возьматӥз, Инмар сямен малпаськыны дышетскемез потэ шуыса? (Учке суредэз.)

⁷ Берлогес Пётр возьматӥз, Иегова кадь малпаськыны дышетскемез потэ шуыса. Куке Инмар ужпум кутӥз, еврей луисьтэм адямиос солэн калыкез пӧлы пырозы шуыса, Инмар Пётрез Корнилийлы тодытыны ыстӥз. Огшоры дыръя еврейёс мукет калыкъёсысь адямиосын кусып уг возё вал. Соин ик, Инмарлэсь ужзэ быдэстон понна, Пётрлы мукет сямен малпаськоно вал. Куке Пётр валаз, кызьы Иегова учке еврей луисьтэм адямиос шоры, со но соос шоры озьы ик учкыны кутскиз. Солы луыса Пётр «пумитъяськытэк» мынӥз отчы, кытчы сое ыстӥз Инмар (Ап. уж. 10:28, 29). Со Корнилийлы но солэн семьяезлы тодытӥз но, соос пылатӥськизы. Еврей луисьтэм адямиос пӧлысь соос вал нырысетӥосыз, кинъёс христианъёс луизы (Ап. уж. 10:21—23, 34, 35, 44—48).

8. Кызьы милям возьматэммы луэ, ми Иегова сямен малпаськиськомы шуыса? (1 Пётр 3:8).

⁸ Аръёс ортчыса, Пётр агайёслы но сузэръёслы гожтӥз: «Одӥг малпанэн... улэлэ». (Лыдӟе 1 Пётрлэсь 3:8.) Ми одӥг малпанэн уломы, ми пӧлысь котькудӥз Инмар сямен малпаськыны дышетскиз ке. Нош кызьы Инмар малпаське, тодыны луэ Библиысь. Кыӵе учыръёсын одӥг малпанэн улыны кулэ? Кылсярысь, Иисус дышетскисьёссэ ӧтиз Эксэйлыкез улонамы нырысетӥ интые пуктыны (Матф. 6:33). Шуом, кенешады кин ке но, вань дырзэ сётыса, ужаны-тыршыны кутске. Солы «Жаля Астэ!» шуэм интые, сое ушъяно но солы юрттоно.

ЗӤБЫТ-ВОСТЭМЕСЬ ЛУЭ

9, 10. Кызьы Иисус туж зӥбыт-востэм луэмзэ возьматӥз?

⁹ Кулон азяз ӝытэ Иисус Пётрез но мукет апостолъёсты зӥбыт-востэмесь луыны дышетӥз. Со вал берпуметӥзэ ваньзы ӵош ӝытсэ сиськыкузы. Кӧня ке час солэсь азьвыл Иисус Пётрез но Иоаннэз куриз ваньзэ дасяны. Соос куноослэсь пыдзэс миськон понна но ваньзэ дасязы, вылды. Нош кин быдэстоз сыӵе дано луисьтэм ужез?

¹⁰ Апостолъёс туж паймизы, дыр, куке Иисус «дӥсянзэ кылиз но, ӵушкон басьтыса, куссэ думиз. Собере мисьтӥськонэ ву лэзиз но дышетскисьёсызлэсь пыдъёссэс миськыны... кутскиз» (Иоанн 13:4, 5). Озьы Иисус туж зӥбыт-востэм луэмзэ возьматӥз, малы ке шуоно огшоры дыръя сыӵе ужез ляльчиос быдэсъяло вал. Со понна трос дыр кулэ луиз ке но, Иисус вань апостолъёсызлы пыдзэс миськиз, Искариот Иудалы но, кудӥз берлогес сое вузаны малпа вал. Собере Иисус чидаса валэктӥз: «Тодӥськоды-а, мар Мон тӥледлы лэсьтӥ? Тӥ Монэ Дышетӥсь, Кузё-Инмар шуыса нимаськоды,— шонер вераськоды, зэмзэ но, Мон со. Озьыен, Мон, Кузё-Инмар, Дышетӥсь, тӥлесьтыд пыддэс миськи ке, тӥ но ог-огдылэсь пыддэс миськыны кулэ» (Иоанн 13:12—14).

11. Кытысь адӟиське, Пётр зӥбыт-востэм луиз шуыса? (1 Пётр 5:5). (Озьы ик учке суредэз.)

¹¹ Пётр дышетскиз зӥбыт-востэм луыны. Куке Иисус инме ӝутскемын вал ини, Пётр вордӥськем дырысеныз чут муртэ бурмытӥз (Ап. уж. 1:8, 9; 3:2, 6—8). Со паймымон ужез учкыны трос адямиос лыктӥзы (Ап. уж. 3:11). Кызьы ассэ возиз Пётр? Со вакытэ тросэз нимо дано луыны тыршо вал. Нош Пётр данъяськиз-а? Со Иеговалы но Иисуслы вань саклыксэ висъяз. Со вала вал, адямиез бурмытэм понна соосты данъяно шуыса. Соин ик Пётр шуиз: «Кузё-Инмарлэн нимызлы оскон пыр та мурт но, кудзэ тӥ али адӟиськоды, тодӥськоды, юнмаз» (Ап. уж. 3:12—16). Берлогес Пётр христианъёслы гожтӥз, зӥбыт-востэм улоно шуыса. Нырысь ик Библиысь та интыын гожтэмын вал кылъёс, кудъёсыз возьмато зӥбыт-востэм луонэн дӥсяськоно шуыса. Со тодамы вайытэ, кызьы Иисус, ӵушкон басьтыса, куссэ думиз но апостолъёсызлэсь пыдзэс миськиз. (Лыдӟе 1 Пётрлэсь 5:5.)

12. Кызьы ми зӥбыт-востэм сяммес будэтыны быгатӥськомы?

¹² Пётр сямен, ми но быгатӥськомы зӥбыт-востэмесь луыны. Эн вунэтэ: зэмзэ ик зӥбыт-востэм луон понна, шонер кылъёс вераны гинэ тырмыт ӧвӧл. Зӥбыт-востэм луон пӧлы, кудӥз сярысь гожъяз Пётр, пыре со, кызьы ми малпаськиськомы асьмеос но мукетъёсыз сярысь. Ми мукетъёсызлы ӟеч ужъёс лэсьтӥськомы, малы ке шуоно Иеговаез но адямиосты яратӥськомы. Ми соосты ум лэсьтӥське, адямиос азьын данъяськон понна. Мукетъёсыз ӟеч ужъёсмес уг адӟо ке но, ми зӥбыт-востэмесь луимы ке, Иеговалы но вын-агайёслы ужан-тыршон милемлы шумпотон ваёз (Матф. 6:1—4).

«СЭЗЬ ВИЗЬМЫН... УЛЭ»

13. Мар кароно, сэзь визьмын улон понна?

¹³ Кытысь адӟиськоз, христиан мурт сэзь визьмын улэ шуыса? (1 Пётр 4:7). Сыӵе адями ужпум кутэмезлэсь азьло лыдэ басьтэ, мар малпа со сярысь Инмар. Иеговаен кусыпъёссэ со улоназ нырысетӥ интые пуктэ. Со ачиз сярысь укыр трос уг малпа но вала, ваньзэ уг тоды шуыса. Со сяна, со ӵем вӧсяське. Озьы со возьматэ, Инмар вылэ оскиське но котьку солэсь кивалтэтсэ утча шуысаa.

14. Кыӵе учырын Пётр сэзь визьмын улыны ӧз быгаты?

¹⁴ Кулон азяз уе Иисус апостолъёсызлы шуиз: «Та уе ваньды тӥ Мон бордысь куштӥськоды». Нош Пётр шуиз: «Ваньзы но Тынэсьтыд куштӥськизы ке, мон ноку но Тынэсьтыд уг куштӥськы». Берлогес Иисус куд-ог дышетскисьёссэ ӧтиз: «Сак улэ, вӧсяське» (Матф. 26:31, 33, 41). Но Пётр та кылъёслэсь ӧз кылзӥськы. Соин сэрен, вылды, со ӧз дӥсьты вераны, со Иисуслэн дышетскисез шуыса. Пётр Дышетӥсезлэсь куштӥськиз но соин сэрен туж зол бӧрдӥз (Матф. 26:69—75).

15. Кызьы Иисус сэзь визьмын улэмзэ возьматӥз музъем вылын улонэзлэн берпуметӥ уяз?

¹⁵ Иисус тырбыдэс вал ке но, со ас вылаз ӧз оскиськы. Со быдэсак Иегова вылэ оскиськиз но кулон азяз уе трос вӧсяськиз. Соин ик со быгатӥз кышкатэк Инмарлэсь эриксэ быдэстыны (Матф. 26:39, 42, 44; Иоанн 18:4, 5). Пётр ноку ӧз вунэты, луоз, кызьы Иисус музъем вылын улонэзлэн берпуметӥ уяз трос вӧсяськиз.

16. Кытысь адӟиське, Пётр сэзь визьмын улыны кутскиз шуыса? (1 Пётр 4:7).

¹⁶ Дыр ортчыса, Пётр валаз, мае ке лэсьтэмлэсь азьло котьку вӧсяськоно но Иеговалэсь кивалтэтсэ утчано шуыса. Улӟем Иисус Пётрез но мукет апостолъёсты оскытӥз, соослы святой дух сётэмын луоз шуыса, кудӥз соослы тодытыны юрттоз. Нош со дырозь соослы Иерусалимын улоно вал (Лука 24:49; Ап. уж. 1:4, 5). Мар кариз Пётр, со дырез возьмакуз? Со но мукет христианъёс «огкылысь ялан вӧсяськыса улӥзы» (Ап. уж. 1:13, 14). Берлогес Пётр нырысетӥ гожтэтаз агайёсты но сузэръёсты ӧтиз сэзь визьмын улыны но котьку Инмарлы вӧсяськыны. (Лыдӟе 1 Пётрлэсь 4:7.) Адӟиське, табере Пётр Иегова вылэ оскиськиз но кенешез юнматылӥз (Гал. 2:9).

17. Мар милемлы котьку но кароно? (Озьы ик учке суредэз.)

¹⁷ Сэзь визьмын улон понна, милемлы но ӵем вӧсяськоно. Огшоры юанъёсын но ми ас выламы ум оскиськиське, нош Иеговалэсь визь-кенеш куриськомы. Нош секыт ужпум кутэмлэсь азьло ми уката но Инмарлэсь кивалтэтсэ утчаськомы, малы ке шуоно со тодэ, мар милемлы умойгес луоз.

18. Мар милемлы юрттоз умойгес валаны, кызьы малпаське Иегова?

¹⁸ Ми туж шумпотӥськомы, Иеговалэсь сямъёссэ адӟем карыны быгатӥськомы шуыса (Ул.-выл. 1:26). Валамон, ми быдэсак Иегова кадь луыны ум быгатэ (Ис. 55:9). Но, Пётр сямен, ми быгатӥськомы умойгес валаны, кызьы малпаське Иегова. Со понна Иегова сямен малпаськыны дышетсконо, зӥбыт-востэмесь луоно но сэзь визьмын улоно.