Адӟем каре оскымон кылчинъёслэсь

1, 2. а) Маин ми пӧртэм кылчинъёслэсь? б) Мар огкадез милям вань кылчинъёсын?

ИЕГОВА милемыз ӧтиз бадӟым но огкылысь улӥсь семьяяз. Со пӧлы пыро быдэс дунне вылысь туж пӧртэм агайёс но сузэръёс, озьы ик трос миллион оскымон кылчинъёс (Дан. 7:9, 10). Кылчинъёс сярысь малпаськыкумы, милям нырысь ик тодамы лыктэ, вылды, макем соос милесьтым пӧртэм. Кылсярысь, кылчинъёс адямиослэсь трослы азьлогес кылдытэмын вал (Иов 38:4, 7). Соос милесьтым трослы кужмогес. Сьӧлыко адямилы син азяз пуктыны ик секыт, макем соос святоесь но шонерлыкоесь (Лука 9:26).

² Озьы ке но милям кылчинъёсын трос огкадез вань. Кылсярысь, милям но, кылчинъёслэн но бырйыны эрикмы вань, озьы ик ми Иеговалэсь сямъёссэ адӟем карыны быгатӥськомы. Кылчинъёслэн кадь ик, милям котькудмылэн ниммы вань, ми ваньмы туж пӧртэмесь но котькудмылы Иегова кыӵе ке но уж сётӥз. Со сяна, кылчинъёс сямен, ми Иеговалы йыбыртъяны мылкыдын кылдытэмын (1 Пётр 1:12).

3. Малы милям дышетскеммы луэ оскымон кылчинъёслэсь?

³ Озьыен, милям кылчинъёсын трос огкадез вань. Соин ик ми соослэсь дышетскыны быгатӥськомы. Ойдолэ эскеромы, кызьы оскымон кылчинъёс зӥбыт-востэм сямзэс, адямиосты яратэмзэс, юн луэмзэс возьмато но кызьы соос тыршо, кенеш чылкыт мед луоз шуыса. Озьы ик ми тодомы, кызьы милям соослэсь адӟем кареммы луэ.

КЫЛЧИНЪЁС ЗӤБЫТ-ВОСТЭМЕСЬ

4. а) Кытысь адӟиське кылчинъёслэн зӥбыт-востэм луэмзы? б) Малы кылчинъёс зӥбыт-востэмесь? (Псалтирь 88:8).

⁴ Кылчинъёс зӥбыт-востэмесь. Туж визьмоесь, кужмоесь но визьлыкоесь луыса но, соос Иеговалэсь кылзӥсько (Пс. 102:20). Иеговаен сётэм ужъёсты быдэсъякузы, соос ноку уг ушъясько но адямиослэсь кужмогес луэменызы уг вылтӥясько. Кылчинъёс шумпотыса Иеговалэсь эриксэ быдэсъяло но уг сюлмасько, нимзэс нокин уз тоды шуыса (Ул.-выл. 32:24, 29; 4 Экс. 19:35)a. Асьсэды данъям интые, соос котьку но Иеговаез данъяло. Малы кылчинъёс сокем зӥбыт-востэмесь? Малы ке шуоно соос Инмарез ярато но сое мур гажало. (Лыдӟе Псалтирез 88:8).

5. Кызьы одӥг кылчин зӥбыт-востэм луэмзэ возьматӥз, куке апостол Иоанн ассэ шонертэм возиз? (Озьы ик учке суредэз.)

⁵ Эскеромы одӥг учырез, кудӥз туж умой возьматэ кылчинъёслэсь зӥбыт-востэм луэмзэс. Асьме вакытысь 96-тӥ ар котырын кылчин, кудӥзлэсь нимзэ ми ум тодӥське, апостол Иоаннлы паймымон адӟон возьматӥз (Усьт. 1:1). Мар кариз Иоанн? Кылчин азе уськытскыса, со солы йыбырттыны турттӥз. Кылчин Иоаннлы соку ик шуиз: «Эн, тазьы эн лэсьты; мон тонэн ӵош, тынад агай-вынъёсыныд ӵош... ужась луисько. Инмарлы йыбыртты!» (Усьт. 19:10). Та кылъёс возьмато, кылчин туж зӥбыт-востэм вал шуыса. Ассэ данъям интые, со соку ик Иеговаез данъяз. Иоанн азьын но кылчин ӧз вылтӥяськы. Иоаннэн ӵошатыса, со Иеговалы кемалась ужа-тырше вал ини но солэсь трослы кужмогес вал. Озьы ке но кылчин шуиз, со апостол кадь ик ужась луэ шуыса. Иоанн ассэ шонертэм возиз ке но, кылчин сое ӧз куареты. Со арлыдо апостолэн лякытэн вераськиз, малы ке шуоно валаз, дыр, Иоаннлэн сюлмыз пачылмемын вал шуыса.

6. Кызьы милям адӟем кареммы луэ кылчинъёслэсь зӥбыт-востэм луэмзэс?

⁶ Кызьы ми быгатӥськомы, кылчинъёс сямен, зӥбыт-востэмесь луыны? Милемлы но мылысь-кыдысь Иеговалы ужано-тыршоно, со дыре ик ушъяськоно но данъяськоно ӧвӧл (1 Кор. 4:7). Озьы ик ми мукетъёсызлэсь кемагес ужаськомы-тыршиськомы ке яке милемлы нимысьтыз ужъёс оскемын ке, асьмеды мукетъёсызлэсь вылӥе пуктоно ӧвӧл. Со интые эшшо но зӥбыт-востэмесь луоно (Лука 9:48). Кылчинъёс сямен, милям мукетъёсызлы ужаммы-тыршеммы потэ, нош вылтӥяськеммы уг поты.

7. Кызьы ми быгатӥськомы зӥбыт-востэм луэммес возьматыны, куке кинэ ке тупатоно яке кинлы ке визь-кенеш сётоно?

⁷ Озьы ик милемлы зӥбыт-востэмесь луоно, куке огъя оскисьмес яке нылпимес тупатыны кулэ яке солы визь-кенеш сётыны кулэ. Кылчин сямен, кудӥз Иоаннэз яратыса тупатӥз, ми шонерак но лякытэн вераськомы. Асьмеды мукетъёсызлэсь вылӥе ӧм пуктэ ке, соку, Библия вылэ пыкиськыса, гажаса-жаляса визь-кенеш сётомы (Кол. 4:6).

КЫЛЧИНЪЁС АДЯМИОСТЫ ЯРАТО

8. а) Кытысь адӟиське, кылчинъёс адямиосты ярато шуыса? (Лука 15:10). б) Кызьы кылчинъёс милемлы юртто тодытыны? (Озьы ик учке суредэз.)

⁸ Кылчинъёс адямиос шоры вылтӥяськыса уг учко. Соос адямиос сярысь туж сюлмасько но соосты ярато. Кылчинъёс туж шумпото, куке сьӧлыко адями ӧпкеле — куке Иеговалэн ышем ыжез со доры берытске яке кин ке но улонзэ воштэ но зэмлыкъя улыны кутске. (Лыдӟе Лукалэсь 15:10.) Озьы ик кылчинъёс милемлы юртто адямиослы Эксэйлык сярысь иворез вераны (Усьт. 14:6). Соос асьсэос адямиослы уг тодыто ке но, соос милемыз вуттыны быгато адями доры, кудӥзлэн Иеговаен тодматскемез потэ. Уг луы вераны, котькуд учырын милемыз адямиос доры кылчинъёс вуттӥзы шуыса. Малы ке шуоно Инмар быгатэ адямиослы юрттыны но милемыз соос доры вуттыны мукет амалъёсын но, кылсярысь, святой духсэ кутыса (Ап. уж. 16:6, 7). Озьы ке но ми оскыны быгатӥськомы, тодытыкумы милемын кылчинъёс луозы шуыса, малы ке шуоно соослы уж сётэмын милемлы юрттӥськыны. (Учке «Инмар вӧсяськемзылы ответ сётӥз» рамкаезb.)

9. Кызьы ми быгатӥськомы, кылчинъёс сямен, адямиослы яратэммес возьматыны?

⁹ Кызьы ми быгатӥськомы, кылчинъёс сямен, адямиослы яратэммес возьматыны? Куке ми кылӥськомы, кинэ ке выльысь кенеше пыртӥзы шуыса, кылчинъёс сямен, ми туж шумпотӥськомы. Милям потэ, агай яке сузэр мед шӧдоз, ми сое туж яратӥськомы но шумпотӥськомы, со Иегова доры берытскиз шуыса (Лука 15:4—7; 2 Кор. 2:6—8). Озьы ик ми быгатӥськомы кылчинъёслэсь адӟем карыны, мылысь-кыдысь тодытыса (Екк. 11:6). Кылчинъёс милемлы юртто ӟеч иворез вераны. Нош ми быгатӥськомы агайёслы но сузэръёслы юрттыны. Кылсярысь, быгатӥськоды-а тӥ тодытыны алигес луэм ивортӥсьёсын, арлыдоосын яке соосын, кинъёслэн тазалыксы ляб?

10. Малы ми дышетскиськомы Саралэсь?

¹⁰ Мар кароно, шуг-секытъёсмы сэрен азьвыл мында ужаммы-тыршеммы уг луы ини ке? Соку ми быгатӥськомы шедьтыны выль амалъёс, кылчинъёсын ӵош ужан-тыршон понна. Тодматскомы Индиысь Сараc сузэрен. 20 ар котыр со пионер луыса ужаз-тыршиз, но собере секыт висьыны усиз. Сара ветлыны но, валес вылысьтыз султылыны но уг быгаты вал. Солэн мылкыдыз воксё куашказ. Но агайёслэн но сузэръёслэн юрттэмзылы луыса, озьы ик Библиез ялан лыдӟыса, Саралэн мылкыдыз каллен ӝутскиз. Табере солы воксё мукет сямен ужано-тыршоно луиз. Гожтэтъёс гожъян понна, со пукыны но уг быгаты вал бере, со телефон пыр гинэ тодытӥз. Тунсыкъяськись адямиослы выльысь жингыртыкуз, соос солы веразы тодмооссы сярысь, кудъёсызлэн Библиен тодматскемзы потэ вал. Озьыен, кӧня ке толэзь куспын Сара 70 адямиен Библиез дышетыны кутскиз. Ваньмыныз дышетыны ачиз уг вуы вал бере, куд-огъёсыныз дышетыны со кенешысьтыз агайёсты но сузэръёсты куриз. Тросэз дышетскисьёс али пумиськонъёсы ветло. Малпалэ гинэ, макем шумпото кылчинъёс ужаны-тыршыны Сараен но мукет оскымон христианъёсын ӵош, кудъёсыз мылысь-кыдысь тодытон уже пырисько!

КЫЛЧИНЪЁС ЮНЭСЬ

11. Малы вераны луэ, оскымон кылчинъёс туж юнэсь шуыса?

¹¹ Оскымон кылчинъёс туж юнэсь. Та пумысен соос милемлы умой адӟем карон возьмато. Кӧня ке сюрс аръёс ӵоже ини соос шонерлыктэм но лек ужъёсты адӟо. Соослэн син азязы Шайтан но мукет кылчинъёс, кудъёсыныз ӵош соос куке но Иеговалы ужазы-тыршизы, Инмарлэн тушмонъёсыз луизы (Ул.-выл. 3:1; 6:1, 2; Иуда 6). Библиын вераське, одӥг оскымон кылчин трос нуналъёс кужмо периен ожмаськиз шуыса (Дан. 10:13). Озьы ик кылчинъёс адӟо, адямиосты кылдытэм дырысен туж ик трос адямиос Иегова пала ӧз султэ шуыса. Озьы ке но оскымон кылчинъёс шумпотыса но ӟырдыт мылкыдын Инмарлы ужало-тыршо. Соос тодо, ас дыраз Иегова вань шонерлыктэм ужъёсты быдтоз шуыса.

12. Мар милемлы юрттоз юнэсь луыны?

¹² Кызьы ми быгатӥськомы, кылчинъёс сямен, юнэсь луыны? Кылчинъёс кадь ик, ми трос шонерлыктэм ужъёсты адӟиськомы но оскиськомы, ас дыраз Инмар вань лек ужъёсты быдтоз шуыса. Соин ик ми ӟеч ужъёс лэсьтэмысь ум дугдӥське (Гал. 6:9). Нош Инмар кылзэ сётэ, милемлы ваньзэ чиданы юрттоз шуыса (1 Кор. 10:13). Иеговалы вӧсяськоно но солэсь святой духсэ куроно, ваньзэ мед чидаломы но шумпотонмес медам ыштэ шуыса (Гал. 5:22; Кол. 1:11). Нош мар кароно, тӥледлы али кин ке но пумитъяське ке? Эн кышкалэ но Иеговалы оскиське. Со тӥледлы одно ик юрттоз но тӥледыз юнматоз (Евр. 13:6).

КЫЛЧИНЪЁС ТЫРШО, КЕНЕШ ЧЫЛКЫТ МЕД ЛУОЗ ШУЫСА

13. Кыӵе нимысьтыз уж сётэмын кылчинъёслы та берпум нуналъёсы? (Матфей 13:47—49).

¹³ Та берпум нуналъёсы Иегова кылчинъёслы нимысьтыз уж сётӥз. (Лыдӟе Матфейлэсь 13:47—49.) Быдэс дунне вылын Эксэйлык сярысь иворез трос миллион пӧртэм адямиос кылзо. Кин ке но Иеговалэн куронъёсызъя улыны кутске но христиан мурт луэ, нош кин ке но — уг. Кылчинъёслы уж сётэмын лек адямиосты шонерлыкоосызлэсь люкыны. Мукет сямен вераса, соос чаклало, кенеш чылкыт мед луоз шуыса. Та уг возьматы, кин ке но кыӵе ке муген кенешысь кошке ке, берытскыны уг быгаты ни шуыса. Озьы ик со уг возьматы, кенешын шуг-секытъёс ноку уз луэ шуыса. Но милям оскеммы луэ: кылчинъёс вань кужмысьтызы тыршо, кенеш чылкыт мед луоз шуыса.

14, 15. Кызьы ми быгатӥськомы, кылчинъёс сямен, тыршыны кенешез чылкыт возьыны? (Озьы ик учке суредъёсты.)

¹⁴ Кызьы ми быгатӥськомы, кылчинъёс сямен, тыршыны, кенеш чылкыт мед луоз шуыса? Милям юрттэммы потэ кенешез чылкыт возьыны. Соин ик ми эшъяськиськомы соосын гинэ, кинъёс Иеговаез ярато, но палэнскиськомы ваньмызлэсь, мар соин кусыпъёсмес сӧрыны быгатэ (Пс. 100:3). Озьы ик милям огъя оскисьёсмылы юрттэммы потэ Иеговалы оскымон кыльыны. Кылсярысь, мар ми каромы, тодӥмы ке, агай яке сузэр бадӟым сьӧлык лэсьтӥз шуыса? Ми со адямиез яратӥськомы, соин ик солэсь мылкыдзэ ӝутомы тӧроосын вераськыны. Со ӧз вераськы ке, ми асьмеос соосын вераськомы. Милям потэ, лябӟем агайлы яке сузэрлы ӝоггес мед юрттозы шуыса! (Иак. 5:14, 15).

¹⁵ Жаляса верано луэ, куддыръя соосты, кинъёс бадӟым сьӧлыкъёс лэсьтӥзы, кенешлэсь палэнтоно луэ. Соку ми соосын кусып ум возиське ни. Со юрттэ кенешез чылкыт возьыны (1 Кор. 5:9—13)d. Со сяна, кенешлэсь палэнтэм агаен яке сузэрен кусып ӧм возе ке, ми солы ӟеч уж лэсьтомы. Малы? Малы ке шуоно соку со ӝоггес валалоз, солы Иегова доры берытсконо шуыса. Берытскиз ке, ми Инмарен но кылчинъёсын ӵош шумпотомы (Лука 15:7).

16. Мар пумысен тӥляд кылчинъёслэсь адӟем каремды потэ?

¹⁶ Ми туж тау кариськомы Иеговалы, со милемлы кылчинъёс сярысь вера но соосын ӵош ужаны-тыршыны лэзе шуыса! Ойдолэ, кылчинъёс сямен, зӥбыт-востэмесь луомы, адямиосты яратомы, юнэсь луомы но тыршомы, кенеш чылкыт мед луоз шуыса. Оскымон кылчинъёслэсь адӟем каримы ке, соку пырак дауръёс ӵоже Иеговалэн ужась-тыршисьёсызлэн семьяязы уломы.