Юрттэ дышетскисьёслы ужпум кутыны Иеговалы ужаны-тыршыны

1, 2. а) Мар люкетыны быгатэ дышетскисьлы Иеговалэн Адӟись-Ивортӥсез луыны? б) Мае ми эскеромы та статьяын?

ТОДАДЫ вае дырез, куке тӥ Библиез дышетӥды. Соку ик-а тӥ ужпум кутӥды Иеговалэн Адӟись-Ивортӥсез луыны яке тӥледлы мар ке но люкетӥз? Оло нош, тӥ кышкады, семьяды, эшъёсты яке ӵош ужасьёсты тӥледын кусып воземысь дугдозы шуыса. Яке тӥ малпады, Библиысь куронъёсъя улыны уд быгатэ шуыса. Озьы ке, соку тӥ валаськоды соосты, кинъёс али Библиез дышето, но Иеговалэн Адӟись-Ивортӥсез луыны уг дӥсьто.

² Иисус тодэ вал, сыӵе кышканъёс люкетыны быгато шуыса ужпум кутыны Иеговалы ужаны-тыршыны (Матф. 13:20—22). Соку но, куке адямиос кыӵе ке мугъёсын сэрен со сьӧры мыныны уг дӥсьто вал, Иисус соосты номырлы ярантэм адямиосын ӧз лыдъя. Иисус соослы юрттӥз: 1) валаны, мар соослы люкетэ ужпум кутыны Иеговалы ужаны-тыршыны, 2) Иеговаез эшшо но зол яратыны, 3) Иеговалы ужан-тыршонэз нырысетӥ интые пуктыны но 4) пумитъяськонъёсты чиданы. Иисус туж умой дышетӥсь вал. Милям солэсь адӟем кареммы потэ. Соин ик ойдолэ учкомы, кызьы, «Пумтэм вапумъёс ӵоже шумпотыса улэ!» книгаез кутыса, ми быгатӥськомы дышетскисьлы юрттыны Иегова пала кариськыны.

ЮРТТЭ ДЫШЕТСКИСЬЛЫ ВАЛАНЫ, МАР СОЛЫ ЛЮКЕТЭ УЖПУМ КУТЫНЫ ИЕГОВАЛЫ УЖАНЫ-ТЫРШЫНЫ

3. Мар люкетыны быгатэ вал Никодимлы Иисуслэн дышетскисез луыны?

³ Никодим иудейёслэн кузёйырзы вал. Иисуслэн ужан-тыршонэзлэн кутсконысеныз ӝыны ар гинэ ортчиз ке но, Никодим валаз ини, со адямиез Инмар ыстӥз шуыса (Иоанн 3:1, 2). Озьы ке но иудейёслэсь кышкаменыз со малпаз Иисусэн лушкемен пумиськыны (Иоанн 7:13; 12:42). Мар ке но Никодимлы люкетэ вал Иисуслэн дышетскисез луыны. Оло нош, со кышка вал, соин сэрен трос ыштоз шуыса, кылсярысь, кивалтэтсэ но коньдонзэa.

4. Кызьы Иисус Никодимлы валаны юрттӥз, мае солэсь возьма Инмар?

⁴ Никодим Моисейлэсь законзэ тодэ вал ке но, со уг вала вал, мае Иегова возьма солэсь. Кызьы Иисус солы юрттӥз? Иисус Никодимлы дырзэ висъяны дась вал, соин ик со соин пумиськиз. Иисус Никодимлы валамон валэктӥз, мар солы кароно, дышетскисез луон понна: солы сьӧлыкъёсыз понна ӧпкелёно, вуын пылатӥськоно но уж вылын Инмар Пилы оскемзэ возьматоно (Иоанн 3:5, 14—21).

5. Кызьы дышетскисьлы валаны юрттоно, мар солы люкетэ ужпум кутыны Иеговалы ужаны-тыршыны?

⁵ Дышетскись Библиез умой тодэ ке но, оло нош, со уг вала, мар солы люкетэ ужпум кутыны Иеговалы ужаны-тыршыны. Кылсярысь, солэн трос дырыз ужлы кошке яке ӵыжы-выжыосызлэн уг поты, со Адӟись-Ивортӥсь мед луоз шуыса, соин ик соос солы люкето. Дась луэ дышетскисеныды дырдэс ортчытъяны. Сое куное ӧте яке кыре ӵош поталэ. Соку солы капчигес луоз сюлэмзэ усьтыны но шуг-секытъёсыз сярысь вераны. Дышетскисьлы валаны юрттэ, мае солы тупатоно, но тодаз вайытэ, со сое, тӥледыз шумпоттон понна, уг лэсьты, нош, Иеговаез шумпоттон понна, лэсьтэ шуыса.

6. Кызьы дышетскисьлы юрттоно улоназ пыртыны Библиысь басьтэм тодон-валанзэ? (1 Коринфъёслы 16:13).

⁶ Дышетскись оске ке, Иегова солы ассэ шонер возьыны юрттоз шуыса, солэн кужымез луоз басьтэм тодон-валанзэ улоназ пыртыны. (Лыдӟе 1 Коринфъёслы 16:13.) Нош мар кароно тӥледлы? Тӥледыз ӵошатыны луэ школаысь дышетӥсен. Умой дышетӥсь материалэз валэктэ. Со сяна, со дышетскисьсэ чидаса оскытэ, солэн ваньмыз пӧрмоз шуыса. Ӵапак озьы ик милям но умой дышетӥсьёс луэммы потэ. Ми адямиослы Библиысь зэмлыкъёсты валэктӥськомы. Со сяна, ми соосты оскытӥськомы, Инмарлэн юрттэменыз, соос солэн куронъёсызъя улыны быгатозы шуыса. Мар кароно, сыӵе дышетӥсь луон понна?

ЮРТТЭ ДЫШЕТСКИСЬЛЫ ИЕГОВАЕЗ ЭШШО НО ЗОЛ ЯРАТЫНЫ

7. Кызьы Иисус кылзӥсьёсызлы юрттӥз Иеговаез эшшо но зол яратыны?

⁷ Иисус тодэ вал, дышетскисьёсыз Инмарез яратӥзы ке, соослэн Библиысь басьтэм тодон-валанзэс улоназы пыртыны ӟырдыт мылкыдзы луоз шуыса. Ӵем дыръя со вералляз примеръёсты, кудъёсыз дышетскисьёсызлы юрттӥзы инмысь Атайзэс эшшо но зол яратыны. Кылсярысь, Иисус Иеговаез ӵошатӥз адямиен, кудӥз нылпиосызлы ӟеч кузьымъёс лэсьтэ (Матф. 7:9—11). Оло нош, Иисуслэн куд-ог кылзӥсьёсызлэн яратӥсь атайзы ноку ӧй вал. Соин ик малпалэ гинэ, мар соос шӧдӥзы, куке Иисус гажась-жалясь атай сярысь мадён вераз. Со атай шумпотыса пумитаз пизэ, кудӥз шонер сюрес вылысь кожиз вал, но берен дораз бертӥз. Иисус адямиослы валаны юрттэ вал, макем гажа-жаля Иегова музъем вылысь нылпиоссэ (Лука 15:20—24).

8. Кызьы дышетскисьлы юрттоно Иеговаез эшшо но зол яратыны?

⁸ Кызьы тӥ дышетскисьлы юрттыны быгатӥськоды Иеговаез эшшо но зол яратыны? Котькуд тупась учыре соин вераське Инмарлэн паймымон сямъёсыз сярысь. Котькуд дышетонды дыръя солы валаны юрттэ, кызьы эскериськись материал возьматэ, Иегова милемыз яратэ шуыса. Шуом, тӥ дун тырон сярысь вераськиськоды. Дышетскисьты мед валалоз, Иегова вань адямиос понна но, со понна но дун тыриз шуыса (Рим. 5:8; 1 Иоанн 4:10). Куке дышетскись валалоз, макем юн яратэ сое Иегова, со Иеговаез эшшо но зол яратоз (Гал. 2:20).

9. Мар Майкллэсь мылкыдзэ ӝутӥз улонзэ воштыны но Иеговалэн ужась-тыршисез луыны?

⁹ Тани Индонезиысь Майкл агайлэн учырез. Со Адӟись-Ивортӥсьёслэн семьяязы будӥз ке но, ачиз ӧз пылатӥськы. 18 арес дыръяз Майкл, ужан понна, кунгож сьӧры кошкиз. Берлогес со берытскиз, кышно басьтӥз но нош ик ужаны кошкиз. Со дыр куспын кышноез но нылыз Библиез дышетыны кутскизы. Анаез кулэм бере Майкл бертыны малпаз, атаез сярысь сюлмаськон понна. Соку со но дышетыны соглаш кариськиз. «Пумтэм вапумъёс ӵоже шумпотыса улэ!» книгаысь 27-тӥ урокез эскерыкуз, солэн сюлмаз ик пыризы «Мургес эскере» люкетысь малпанъёс. Майкл син азяз пуктӥз, макем вӧсь вал Иеговалы Пиезлэсь курадӟемзэ адӟыны. Со сярысь малпаськыкуз, со бӧрдыны ик кутскиз. Куке Майкл валаз, макем юн ярато сое Иегова но Иисус, солэн сюлмыз тау каронэн пачылмиз. Со улонзэ воштӥз но пылатӥськиз.

ЮРТТЭ ДЫШЕТСКИСЬЛЫ ИЕГОВАЛЫ УЖАН-ТЫРШОНЭЗ НЫРЫСЕТӤ ИНТЫЕ ПУКТЫНЫ

10. Кызьы Иисус дышетскисьёсызлы юрттӥз Иеговалы ужан-тыршонэз улоназы нырысетӥ интые пуктыны? (Лука 5:5—11). (Озьы ик учке суредэз.)

¹⁰ Нырысетӥ даурын Иисуслэн куд-ог дышетскисьёсыз соку ик валазы, со Мессия шуыса, кудӥз сярысь азьло ик верамын вал. Нош соослы ӟеч иворез мылысь-кыдысь тодытоно шуыса, соос соку ик ӧз валалэ. Кылсярысь, Пётр но Андрей кӧня ке дыр ӵоже ини Иисуслэн дышетскисьёсыз но, чорыгасьёс но вал. Нош Иисус соослы ӵектӥз чорыган ужзэс кельтыны но со сьӧры мыныны (Матф. 4:18, 19). Пётр, Андрей, Иаков но Иоанн чорыгаса коньдон потто вал (Марк 1:16—20). Куке Пётр но Андрей «калтонъёссэс куштӥзы», семьяоссэс сюдон-вордон понна, соос мукет амал шедьтӥзы, вылды. Мар та пиосмуртъёслэсь мылкыдзэс ӝутӥз, коньдон поттон интые, Иеговалы ужан-тыршонэз нырысетӥ интые пуктыны? Лукалэсь ӟеч иворын вераське, Иисус соос понна паймымон уж лэсьтӥз шуыса. Сое адӟыса, соослэн Инмарлы осконзы юнмаз. Соос валазы, Иеговаез нырысетӥ интые пуктӥзы ке, со соос сярысь котьку сюлмаськоз шуыса. (Лыдӟе Лукалэсь 5:5—11.)

11. Мар сярысь ми дышетскисьлы вераны быгатӥськомы, осконзэ юнматон понна?

¹¹ Иисус кадь, ми паймымон ужъёс лэсьтыны ум быгатӥське. Но ми дышетскисьлы вераны быгатӥськомы, кызьы Иегова сюлмаське соос сярысь, кинъёс сое нырысетӥ интые пукто. Кылсярысь, тодады вае, кызьы Иегова тӥледлы юрттылӥз, куке тӥ кенешлэн пумиськонъёсаз ветлыны кутскиды. Оло нош, тӥледлы уж дорысьтыды кузёеныды вераськоно но солы валэктоно луиз, со дыре, куке пумиськонъёс ортчо, тӥ ужаны уд быгатэ шуыса. Дышетскисьлы вералэ, кызьы Иегова тӥледыз бакель кариз, куке тӥ ужан-тыршонэз нырысетӥ интые пуктӥды, но кызьы со оскондэс юнматӥз.

12. а) Малы дышетонамы пӧртэм агайёсты но сузэръёсты ӧтьылоно? б) Кызьы эшшо дышетскисьлы юрттоно Иеговаез нырысетӥ интые пуктыны? Вералэ пример.

¹² Озьы ик умой луоз, дышетскисьты мукет агайёслэсь но сузэръёслэсь учыръёссэс тодӥз ке. Соин ик дышетонады пӧртэм агайёсты но сузэръёсты ӧтьылэ. Мед соос вералозы, кызьы Библиез дышетыны кутскизы но мар соослы юрттӥз Иеговалы ужан-тыршонэз улоназы нырысетӥ интые пуктыны. Со сяна, «Пумтэм вапумъёс ӵоже шумпотыса улэ!» книгаез эскерыкуды, дышетскисеныды ӵош учке «Мургес эскере» люкетысь видеороликъёсты. Кулэ ке, «Тросгес тодэ» люкетысь но видеороликъёсты учке. Кылсярысь, 37-тӥ урокез эскерыкуды, учке «Иегова ваньзэ кулэзэ сётоз» видеороликез. Дышетскисьлы валаны юрттэ, со Иеговаез нырысетӥ интые пуктӥз ке, Инмар со сярысь сюлмаськоз шуыса.

ЮРТТЭ ДЫШЕТСКИСЬЛЫ ПУМИТЪЯСЬКОНЪЁСТЫ ЧИДАНЫ

13. Кызьы Иисус дышетскисьёссэ пумитъяськонъёслы дасяз?

¹³ Иисус дышетскисьёсызлы кӧня ке пол вералляз, адямиос соослы пумитъяськозы шуыса, семьязы гинэ но (Матф. 5:11; 10:22, 36). Кулонэз азьынгес Иисус дышетскисьёсызлы вераз, соос пӧлысь куд-огъёссэ виёзы шуыса (Матф. 24:9; Иоанн 15:20; 16:2). Иисус мылкыдзэс ӝутӥз ужакузы-тыршыкузы асьсэды визьмо возьыны. Кылсярысь, со шуиз, осконзы сярысь нокинэн споръяськоно ӧвӧл шуыса. Озьы ик Иисус дышетскисьёссэ куриз чакланы, мае соос верало но лэсьто. Ваньмыз та соослы юрттысал азьланяз но тодытыны.

14. Кызьы дышетскисьлы юрттоно пумитъяськонъёслы дасяськыны? (2 Тимофейлы 3:12).

¹⁴ Кызьы дышетскисьлы юрттоно пумитъяськонъёслы дасяськыны? Вералэ, мар солы ӵош ужасьёсыз, эшъёсыз яке ӵыжы-выжыосыз вераны быгато, тодӥзы ке, со Библиез дышетэ шуыса. (Лыдӟе 2 Тимофейлы 3:12.) Ӵош ужасьёсыз выль осконэз понна сое серем карыны быгато. Нош мукетъёсыз, матысь ӵыжы-выжыосыз но, со понна сое тэрганы быгато. Умой луоз, пумитъяськонъёс сярысь ми дышетскисьлы вазьгес верамы ке. Соку дышетскись соослы уз паймы но тодоз, мар вераны яке карыны, соос кутскыку.

15. Мар дышетскисьлы юрттоз ӵыжы-выжыосызлэсь пумитъяськемзэс чиданы?

¹⁵ Адямилэн ӵыжы-выжыосызлы уг кельшы ке, со Библиез дышетэ шуыса, юрттэ солы малпаськыны, малы соослы уг кельшы. Оло нош, ӵыжы-выжыосыз кышкало, сое пӧяло шуыса. Яке соос малпало, Иеговалэн Адӟись-Ивортӥсьёсыз — урод адямиос шуыса. Иисуслэн ӵыжы-выжыосыз но сое визьзэ ыштэм адямиен лыдъязы (Марк 3:21; Иоанн 7:5). Соин ик дышетскисьтылы юрттэ чидась луыны но ассэ лякытэн возьыны котькинэн, матысь ӵыжы-выжыосыныз но.

16. Мар дышетскисьлы юрттоз осконэз сярысь лякытэн вераськыны?

¹⁶ Дышетскисьлэн ӵыжы-выжыосыз солы Библия сярысь юанъёс сётъяны быгато. Но солы вань тодэмзэ соку ик верано ӧвӧл. Малы ке шуоно мукет дыръя ӵыжы-выжыосызлэн осконэз сярысь вераськемзы уз поты ини. Соин ик дышетскисьтэс дышетэ кӧня ке гинэ малпанъёс вераны (Кол. 4:6). Кылсярысь, со ӵыжы-выжыосызлы jw.org сайтэз возьматыны быгатэ. Соку соос асьсэос бырйыны быгатозы, ку, кӧня но мае лыдӟыны Иеговалэн Адӟись-Ивортӥсьёсыз сярысь.

17. Кызьы дышетскисьлы юрттоно Иеговалэн Адӟись-Ивортӥсьёсыз сярысь юанъёслы валэктонъёс сётъяны? (Озьы ик учке суредэз.)

¹⁷ Милям сайтамы «Иеговалэн Адӟись-Ивортӥсьёсыз сярысь ӵем сётъяськись юанъёс» темая статьяос вань. Соосты кутыса, тӥ дышетскисьлы юрттыны быгатӥськоды ӵыжы-выжыосызлэн яке ӵош ужасьёсызлэн юанъёссылы огшоры валэктонъёс дасяны (2 Тим. 2:24, 25). Озьы ик эн вунэтэ эскерыны «Кин ке но вераны быгатоз» но «Кин ке но юаны быгатоз» рамкаосты, кудъёсыз печатламын «Пумтэм вапумъёс ӵоже шумпотыса улэ!» книгаысь котькуд уроклэн пумаз. Дышетскисьты мед валэктоз, малы со оске. Солэсь мылкыдзэ ӝутэ валэктонъёс ас кылъёсыныз вераны. Кулэ ке, вералэ, мае солы тупатоно. Дырдэс эн жалялэ. Дышетскисьты тӥ вылын мед дышетскоз мукетъёсызлэн юанъёссылы валэктонъёс сётъяны. Соку со соослы умойгес валэктыны быгатоз, малы со оске яке уг оскы.

18. Кызьы дышетскисьлэсь мылкыдзэ ӝутоно кенешен ӵош тодытон уже пыриськыны? (Матфей 10:27).

¹⁸ Иисус дышетскисьёссэ куриз адямиослы ӟеч ивор вераны. (Лыдӟе Матфейлэсь 10:27.) Дышетскись кенешен ӵош тодытыны вазьгес кутскиз ке, со ӝоггес дышоз Иеговалы оскиськыны. Кызьы тӥляд солы юрттэмды луэ сыӵе ужпум пуктыны? Кенешады вуоно тодытон кампания сярысь ялон лэсьтэмын луиз ке, дышетскисьтылэсь мылкыдзэ ӝутэ пылатӥськымтэ ивортӥсь луыны. Валэктэ, малы тросэзлы капчигес кутскыны тодытыны сыӵе кампаниос дыръя. Эшшо одӥгез ужпум, кудзэ дышетскись пуктыны быгатэ,— арня куспысь пумиськонын сцена вылысен дышетскон ужъёс возьматъяны. Та солы юрттоз умойгес валэктыны, малы со оске.

ВОЗЬМАТЭ ДЫШЕТСКИСЬЛЫ ОСКЕМДЭС, СОЛЭН ИЕГОВАЕЗ ШУМПОТТЭМЕЗ ПОТЭ ШУЫСА

19. Кызьы Иисус дышетскисьёсызлы оскемзэ возьматӥз, соослэн Иеговаез шумпоттэмзы потэ шуыса, но кызьы ми солэсь адӟем карыны быгатӥськомы?

¹⁹ Инме ӝутскемез азьын Иисус дышетскисьёсызлы шуиз, куке но соос ваньзы ӵош огазьын луозы шуыса. Но соос ӧз валалэ, со соосты инме басьтыны малпа вал шуыса. Озьы ке но Иисус адӟиз, соос со сьӧры мыныны дась шуыса (Иоанн 14:1—5, 8). Со тодэ вал, дыр кулэ шуыса, куд-ог зэмлыкъёсты валан понна, кылсярысь, апостолъёс инмын улозы шуыса (Иоанн 16:12). Милям но дышетскисьёсмылы оскеммес возьматэммы луэ, соослэн Иеговаез шумпоттэмзы потэ шуыса.

20. Кызьы Малавиысь одӥг сузэр оскемзэ возьматӥз, дышетскисезлэн ассэ шонер воземез потэ шуыса?

²⁰ Ми оскиськомы, дышетскисьёсмылэн асьсэды шонер воземзы потэ шуыса. Малавиын Чифу́ндо нимо сузэр «Пумтэм вапумъёс ӵоже шумпотыса улэ!» книгая Библиез дышетыны кутскиз Алина́фе нимо нылмуртэн, кудӥз католической черке ветлэ вал. 14-тӥ урокез эскеремзы бере Чифундо нылмуртлэсь юаз, мар со малпа мудоръёслы йыбыртъян сярысь. Алинафелы со туж ӧз кельшы. Со шуиз: «Со мынам уже!» Чифундо малпаз, ӝоген Алинафе Библиез дышетэмысь дугдоз шуыса. Но сузэрмы чидаса дышетонэз азьланьтӥз но оскиз, дыр ортчыса, Алинафе ваньзэ валалоз шуыса. Кӧня ке толэзь ортчыса, 34-тӥ урокез эскерыкузы, Чифундо 6-тӥ пунктысь юанэз сётӥз: «Кыӵе пайда вайиз ини тӥледлы Библиысь тодэмды но Иегова Инмар сярысь тодэмды?» Чифундо тодаз вае: «Алинафе туж трос вераз! Кылсярысь, со шуиз, Адӟись-Ивортӥсьёс уг лэсьто шуыса номыре, мае Библия шонертэмен лыдъя». Собере ӝоген Алинафе мудоръёслы йыбыртъямысь дугдӥз но пылатӥськиз.

21. Кызьы ми дышетскисьлы юрттыны быгатӥськомы Иегова пала кариськыны?

²¹ Адямилэсь осконзэ Иегова будэтэ ке но, ми солы юрттыны быгатӥськомы Инмарлы матэ кариськыны (1 Кор. 3:7). Инмарлэсь курон-косонъёссэ валэктэм сяна, ми солы юрттӥськомы Иеговаез эшшо но зол яратыны. Озьы ик ми солэсь мылкыдзэ ӝутӥськомы Инмарлы ужан-тыршонэз нырысетӥ интые пуктыны. Со сяна, ми дышетскисез дышетӥськомы Иеговалы оскиськыны но юн оскыны, Инмар солы пумитъяськонъёсты чиданы юрттоз шуыса. Куке ми дышетскисьлы оскеммес возьматӥськомы, солэн Инмарез шумпоттэмез потэ шуыса, та солы кужым сётэ Иегова пала кариськыны.