Быгато-а Библиысь валтӥсь зэмлыкъёс милемыз малы ке вылезлы дышетыны?

1. Кызьы Библиысь валтӥсь зэмлыкъёс улонмес воштӥзы?

БИБЛИЫСЬ валтӥсь зэмлыкъёс улонмес воштӥзы. Кылсярысь, куке ми тодӥмы, Инмарлэн нимыз — Иегова шуыса, ми со доры матэгес кариськыны тыршимы (Ис. 42:8, ВД). Озьы ик ми туж буйгатскимы, куке тодӥмы, матысь кулэм адямиосмы уг курадӟо шуыса (Екк. 9:10). Нош куке ми валамы, музъем райлы пӧрмоз шуыса, ми азьпал улон сярысь мултэс сюлмаськемысь дугдӥмы. Малы ке шуоно табере ми оскиськомы, 70—80 ар гинэ ум улэ, нош пырак уломы шуыса (Пс. 36:29; 89:10).

2. Кызьы кылъёс, кудъёсыз гожтэмын 2 Пётрлэн 1:12, 13, возьмато, Библиысь валтӥсь зэмлыкъёс вылын малпаськон юн осконэн христианъёслы но пайда вайыны быгатэ шуыса?

² Милемлы котьку дунъяно Библиысь валтӥсь зэмлыкъёсты. Малпаське: кыкетӥ гожтэтсэ Пётр христианъёслы гожтӥз, соос «зэмос зэмлыкын... юнматэмын ке но» вал ини. (Лыдӟе 2 Пётрлэсь 1:12, 13.) Но Пётр тодэ вал, дыр ортчыса, кенешын ӧрекчи дышетӥсьёс но кескич адямиос кылдозы шуыса, кудъёсыз агайёслэсь осконзэс лябӟытыны тыршозы (2 Пётр 2:1—3). Пётрлэн агайёсты но сузэръёсты юнматэмез потэ вал, соос со адямиослы медаз сётске шуыса. Соин ик Пётр соослы тодазы вайытӥз зэмлыкъёсты, кудъёссэ соос тодо вал ини. Соос вылын малпаськон агайёслы но сузэръёслы юрттысал пумозяз ик Иеговалы оскымон луыны.

3. Малы вань христианъёслы малпаськоно Библиысь валтӥсь зэмлыкъёс вылын? Вералэ пример.

³ Тӥ Библиысь валтӥсь зэмлыкъёсын кемалась тодмо ке но ини, со уг возьматы, соос тӥледыз малы ке вылезлы дышетыны уг быгато шуыса. Эскеромы тае пример вылын. Мар луоз, одӥг кадь емышъёсты сётӥд ке пӧраськисьлы, кудӥз кемалась ужа ини, но пӧраськисьлы, кудӥз али гинэ ужаны кутскиз? Пӧраськись, кудӥз кемалась ужа ини, со емышъёслэсь пӧртэм но ческыт сиён пӧраны быгатоз. Тае ик вераны луэ Иеговалэн ужась-тыршисьёсыз сярысь но. Соос, кинъёс Иеговалы кемалась ужало-тыршо ини, но соос, кинъёс али гинэ Библиез дышетыны кутскизы, Библиысь валтӥсь зэмлыкъёс шоры пӧртэм сямен учко. Оло нош, пылатӥськемды дырысен тӥляд югдурды воштӥськиз ини яке тӥ организациын пӧртэм ужъёсты быдэсъяды ини. Тӥ малпаськиды ке Библиысь валтӥсь зэмлыкъёс вылын, соку валалоды, дыр, кызьы соосты уже кутыны луэ али кылдэм югдурады. Ойдолэ эскеромы Библиысь куинь валтӥсь зэмлыкъёсты но тодомы, кыӵе соос пайда вайыны быгато юн осконэн христианъёслы.

ИЕГОВА — КЫЛДЫТӤСЬ

4. Кызьы воштӥськиз милям улонмы, куке ми тодӥмы, Иегова — Кылдытӥсь шуыса?

⁴ «Ваньзэ пуктӥсь-лэсьтӥсь луэ — Инмар» (Евр. 3:4). Ми тодӥськомы, музъемез но со вылысь вань улэп макеосты визьмо но Ваньмызлэсь Кужмо Кылдытӥсь кылдытӥз шуыса. Со милемыз кылдытӥз но ми сярысь ваньзэ тодэ. Со сяна, со милемыз яратэ но тодэ, мар милемлы кулэ, шудо луон понна. Та огшоры зэмлык, Иегова ваньзэ кылдытӥз шуыса, улонмес быдэсак воштӥз но валаны юрттӥз, малы ми улӥськомы.

5. Мар милемлы юрттоз зӥбыт-востэмесь луыны? (Исаия 45:9—12).

⁵ Ми тодамы возиськомы ке, Иегова — Кылдытӥсь шуыса, со милемлы юрттоз зӥбыт-востэмесь луыны. Кылсярысь, куке Иов аслыз укыр трос саклык висъяз но возьматыны турттӥз, со Инмарлэсь шонерлыкогес шуыса, Иегова солы кӧня ке юанъёс сётӥз (Иов 38:1—4). Соос Иовлы тодаз вайытӥзы, Иегова — Ваньмызлэсь Кужмо Кылдытӥсь но со котьку ваньзэ шонер лэсьтэ шуыса. Нокин уг быгаты малпаны, со Инмарлэсь визьлыкогес шуыса. Та адӟиське Исаия пророклэн кылъёсысьтыз: «Горд сюй лэсьтӥсьлы шуоз-а: „Мар тон кариськод?“». (Лыдӟе Исаиялэсь 45:9—12.)

6. Ку милемлы тужгес но малпаськоно, макем визьлыко но быдӟым Кылдытӥсь? (Озьы ик учке суредъёсты.)

⁶ Со, кин Иеговалы кемалась ужа-тырше ини, Иеговалы но солэн Кылызлы оскиськем интые, кутскыны быгатэ ас вылаз оскиськыны (Иов 37:23, 24). Нош мар луоз, со малпаськиз ке, макем визьлыко но быдӟым Иегова? (Ис. 40:22; 55:8, 9). Валтӥсь зэмлык, Иегова ваньзэ кылдытӥз шуыса, солы юрттоз зӥбыт-востэм луыны. Со валаз ке, милесьтым малпанъёсмес Инмарлэн малпанъёсыныз ӵошатыны ик уг луы шуыса, соку со ас вылаз уз оскиськы.

7. Мар юрттӥз Рахела сузэрлы организацилэн выль кивалтэтэзлэсь кылзӥськыны?

⁷ Тани Словениысь Рахе́ла сузэрлэн учырез. Куке со малпаськиз, Иегова — Кылдытӥсь шуыса, солы капчигес луиз организациын лэсьтэм воштӥськонъёс шоры шонер учкыны. Со вера: «Куддыръя мыным секыт соглаш кариськыны агайёслэн кутэм ужпумъёсынызы. Кылсярысь, мон учки 2023-тӥ арын поттэм Кивалтӥсь кенешлэсь 8-тӥ вазиськонзэ. Озьы ке но мон туж пайми, куке сцена вылысь тушо агаез нырысьсэ адӟи. Соин ик мон Иеговалы вӧсяськи, со мыным та воштӥськонлы дышыны мед юрттоз шуыса». Рахела валаз, Иегова, инлэн но музъемлэн Кылдытӥсез, котькинлэсь умой тодэ шуыса, кызьы но кытчы нуоно аслэсьтыз организацизэ. Тӥледлы но секыт ке соглаш кариськыны выль валанэн яке выль кивалтэтэн, дыр висъялэ но зӥбыт-востэмен малпаське, макем визьлыко но кужмо милям Кылдытӥсьмы (Рим. 11:33—36).

МАЛЫ ИНМАР ШУГ-СЕКЫТЪЁСТЫ УГ БЫДТЫ

8. Кыӵе ми пайда басьтӥськомы, тодӥськомы ке, малы Инмар шуг-секытъёсты уг быдты?

⁸ Малы Инмар шуг-секытъёсты уг быдты? Та юанлы валэктон шедьтытэк, куд-огъёсызлэн Инмарлы вожзы потэ яке соос малпало, со воксё ӧвӧл шуыса (Мад. 19:3). Но ми тодӥськомы, Инмар адямиосты уг курадӟыты шуыса. Ми курадӟиськомы но кулӥськомы, малы ке шуоно ми сьӧлыкоесь. Озьы ик ми тодӥськомы: Иегова та дырозь та лек дуннеез ӧз быдты, малы ке шуоно со чиданзэ возьматэ. Талы луыса трос миллион адямиос быгато Иеговаен эшъяськыны но ас синмынызы адӟыны, кызьы со вань шуг-секытъёсты быдтоз (2 Пётр 3:9, 15). Та зэмлыкъёс милемыз буйгато но Инмарен кусыпъёсмес юнмато.

9. Кыӵе учыръёсын тужгес но малпаськоно, малы Иегова шуг-секытъёсты уг быдты?

⁹ Ми валаськомы, чидасесь луоно но возьмано шуыса, ку Иегова вань шуг-секытъёсты быдтоз. Озьы ке но, куке матысь адямиосмы куло яке кин ке но милемын яке семьяенымы ассэ шонерлыктэм возе, ми паймиськомы, вылды, малы Иегова та дырозь курадӟонъёсты уг быдты (Авв. 1:2, 3). Сыӵе дыре малпаськоно, малы Иегова ужась-тыршисьёссэ шуг-секытъёссылэсь уг мозмыты (Пс. 33:20)a. Озьы ик малпаськоно азьпал улон сярысь, куке Инмар ваньзэ уродзэ быдтоз.

10. Мар буйгатэ Энн сузэрез, кудӥзлэн анаез кулӥз?

¹⁰ Ми тодӥськомы ке, малы Иегова шуг-секытъёсты уг быдты, милемлы капчигес луоз, куректонъёсын пумиськыку. Энн сузэр, кудӥз Индийской океанысь Майо́тта шормуӵын улэ, вера: «Кӧня ке ар талэсь азьвыл мынам анае кулӥз. Соку мыным туж секыт вал. Но мон ялан аслым тодам вайытылӥ, Иегова янгыш ӧвӧл шуыса. Солэн потэ адямиослэсь курадӟонъёссэс быдтэмез. Со кылзэ сётэ матысь кулэм адямиосмес улӟытыны. Та зэмлыкъёс сярысь малпаськыкум, мынам сюлмы каньыл луэ».

11. Малы милям мылкыдмы ӝутске тодытыны, ми валаськомы ке, малы Иегова шуг-секытъёсты уг быдты?

¹¹ Ми валаськомы ке, малы Иегова шуг-секытъёсты уг быдты, милям мылкыдмы ӝутске тодытыны. Пётр аслаз гожтэтаз валэктэ: Иегова чиданзэ возьматэ, малы ке шуоно солэн потэ, адямиос мед ӧпкелёзы но мед утиськозы шуыса. Собере Пётр гожтӥз, мар кароно христианъёслы: «Ваньмыз та тазьы куашкаса быроно ке, макем дун-чылкыт, Инмарлэсь кышкаса, шонер улыны кулэ тӥ» (2 Пётр 3:11). Одӥгез уж, кудӥз возьматоз, ми шонер улӥськомы шуыса,— тодытон уже пыриськон. Атаймы сямен, ми адямиосты яратӥськомы. Милям потэ, соос Инмарлэн выль дуннеяз мед улозы шуыса. Иегова тӥ палан улӥсь адямиослы чиданзэ возьматэ но соослы луонлык сётэ солэн ужась-тыршисьёсыз луыны. Малпалэ гинэ: тӥ Иеговалы юрттӥськоды, пум вуытозь тросгес адямиос соин тодматскыны мед быгатозы шуыса! (1 Кор. 3:9).

МИ «БЕРПУМ АРЪЁСЫ» УЛӤСЬКОМЫ

12. Малы милям осконмы юнма, «берпум аръёс» сярысь азьпалзэ ивортонлэсь быдэсмемзэ адӟыса?

¹² Библиын пыр-поч вераське, кыӵеесь адямиос луозы «берпум аръёсы» (2 Тим. 3:1—5). Котырысьтымы адямиос шоры учкыса, ми валаськомы, та азьпалзэ ивортон быдэсме шуыса. Туннэ адямиос асьсэды уродгес но уродгес возё. Та осконмес юнматэ, Инмарлэн Кылызлы оскыны луэ шуыса (2 Тим. 3:13—15).

13. Мар сярысь аслэсьтыд юаны кулэ? (Лука 12:15—21).

¹³ Ми тодамы возиськомы ке, «берпум аръёсы» улӥськомы шуыса, милемлы капчигес луоз саклыкмес висъяны солы, мар зэмзэ ик кулэ луэ. Иисус та сярысь вераз мадёнын, кудӥз гожтэмын Лукалэсь 12:15—21 (лыдӟе). Малы узыр адями «нодтэм» шуыса нимаське? Трос ваньбурез понна ӧвӧл, нош дырзэ кулэтэмезлы висъямез понна. «Инмар азьын узырлык люкатэк», со аслыз узырлык люка вал. Нош Инмар солы шуиз: «Та уе тынэсьтыд лулдэ басьтозы». Соин ик бадӟым ужпумъёс пуктыны визьмо ӧй вал. Малы милемыз дышетэ та учыр? Ӝоген та дуннелы пум вуоз. Соин ик умой луысал аслэсьтыд юаны: «Кыӵе ужпумъёс мон ас азям пуктӥсько? Висъясько-а мон саклыкме солы, мар зэмзэ ик кулэ луэ? Мар карыны мон нылпиосылэсь мылкыдзэс ӝутӥсько, кыӵе ужпумъёс соослы ас азязы пуктыны юрттӥсько? Кытчы мон быдтӥсько дырме, кужымме но коньдонме: майбыр улонлы яке Инмар азьын узырлык люканлы?»

14. Малы умой луоз малпаськыны, ми «берпум аръёсы» улӥськомы шуыса?

¹⁴ Ми валамы ке, «берпум аръёсы» улӥськомы шуыса, улонмы быдэсак воштӥськыны быгатэ. Ӵапак озьы луиз Ми́ки нимо сузэрен. Со вера: «Мон пудо-животъёсты яратӥсько. Соин ик школаме йылпумъяме бере мынам потэ вал вылӥ образование басьтэме, пудо-животъёсты мургес эскерон понна. Со сяна, мынам потэ вал пионер луэме но ужаме-тыршеме отын, кытын ивортӥсьёс уг тырмо. Но кенешысь юн осконэн эшъёсы мылкыдме ӝутӥзы умой-умой малпаськыны, быгато-а мон духовной ужпумъёсме быдэстыны, вылӥ образование басьтыны тырши ке. Соос тодам вайытӥзы, ӝоген та дунне быдтэмын луоз шуыса. Нош азьланяз рай музъем вылын мон пырак дауръёс ӵоже котькыӵе пудо-животъёсты эскерыны быгато. Соин ик мон ужпум кутӥ, вылӥ образование басьтэм интые, вакчи курсъёс ортчыны. Собере мон шедьтӥ уж, кудӥз мыным юрттэ вал пионер луыса ужаны-тыршыны. Нош берлогес мон кошки Эквадоре, кытын тросгес ивортӥсьёс кулэ вал». Али Мики со шаерын ик тодытэ картэныз ӵош, кудӥз ёросэз чаклась луыса ужа-тырше.

15. Малы мылкыдмы куашканы кулэ ӧвӧл, кин ке но ӟеч иворез соку ик уг кылзы ке? Вералэ пример. (Озьы ик учке суредъёсты.)

¹⁵ Мылкыдды медаз куашка, адямиос ӟеч иворез соку ик уг кылзо ке. Соос воштӥськыны быгато. Малпаськомы Иаков сярысь, Иисуслэн выныз сярысь. Со Иисусэн ӵош будӥз, адӟиз, кызьы Иисус паймымон ужъёс лэсьтэ но кызьы со вылын Мессия сярысь азьпалзэ ивортонъёс быдэсмо. Озьы ик Иаков адӟе вал, Иисус — самой умой дышетӥсь шуыса. Озьы ке но Иаков Иисуслэн дышетскисез луиз но ӟырдыт мылкыдын тодытыны кутскиз Иисуслэн улӟемез бере гинэ (Иоанн 7:5; Гал. 2:9)b. Соин ик эн малпалэ, ӵыжы-выжыосты, кудъёсыз али Эксэйлык сярысь иворез уг кылзо, сое ноку уз кылзэ шуыса. Азьланяз но ветлэ соос доры, кинъёс азьвыл тӥледыз ӧз кылзэ. Ми «берпум аръёсы» улӥськомы. Соин ик али туж кулэ тодытыны. Со, мае ми адямиослы али вераломы, берлогес соослэсь улонзэс утьыны быгатэ. Соос милесьтым вераммес бадӟым куректонлэн кутскемез бере гинэ тодазы вайизы ке но, соослэн дырзы луоз на, вылды, шонер ужпум кутыныc.

ДУНЪЯЛЭ СОЕ, МАЕ ИЕГОВА ТОДАМЫ ВАЙЫТЭ

16. Малы умой луоз, ми ваньмы тодамы вайылӥмы ке Библиысь валтӥсь зэмлыкъёсты? (Озьы ик учке «Дышетон понна туж умой тӥрлыкъёс» рамкаез.)

¹⁶ Иеговалэн организациез милемлы трос духовной сиён сётэ. Со пӧлысь тросэз Адӟись-Ивортӥсь луисьтэм адямиослы поттӥське. Кылсярысь, вань адямиослы дасям речь, jw.org сайтысь куд-ог статьяос но видеороликъёс, озьы ик вӧлмытон понна журналъёс. Ми умой тодӥськомы зэмлыкъёсты, кудъёсыз сярысь вераське со публикациосын. Озьы ке но умой луоз, ми соосты тодамы вайылӥмы ке. Соос милемлы юртто эшшо но юн Иеговаез яратыны, эшшо но зол солэн Кылызлы оскыны но эшшо но умой валэктыны Библиысь зэмлыкъёсты мукетъёсызлы (Пс. 18:8).

17. Кыӵе учыръёсын малпаськыны кулэ Библиысь валтӥсь зэмлыкъёс вылын?

¹⁷ Ми, Иеговалэн Адӟись-Ивортӥсьёсыз, шумпотӥськомы, куке Библиысь зэмлыкъёс шонергес валэктӥсько. Но ми азьвыл сямен ик дунъяськомы Библиысь валтӥсь зэмлыкъёсты, кудъёсыз мылкыдмес ӝутӥзы Иегова доры матэгес кариськыны. Организацилэн кивалтэтэз милям малпаммылэсь пӧртэм ке, ми быгатӥськомы зӥбыт-востэмен тодамы вайылыны, организациен кивалтэ шуыса Иегова, Ваньмызлэсь Кужмо но визьлыко Кылдытӥсь. Куке ми асьмеос яке матысь адямиосмы шуг-секытъёсын пумиськыло, милемлы чидасесь луоно но малпаськоно, малы Иегова ваньзэ уродзэ та дырозь ӧз быдты на. Нош куке ми малпаськомы, кызьы уже кутыны дырмес, кужыммес но ваньбурмес, визьмо луысал тодамы вайылыны, ми «берпум аръёсы» улӥськомы но саклыкмес зэмзэ ик кулэ луисезлы висъяно шуыса. Ойдолэ азьланяз но дунъяломы Иеговалэсь тодэ вайытонъёссэ, малы ке шуоно соос милемыз юнмато, милемыз визьлыкогес каро но милемлы юртто Инмармылы оскымон ужаны-тыршыны.