Мар кароно, шумпотыса улон понна?

1. Мае возьматэ шумпотыса улон но мае со уг возьматы?

ШУДО-А тӥ адями? Шудо адями Иеговалы тау каре ваньмыз умоез понна, маиз солэн вань, соин ик со шумпотыса но каньыл сюлмын улэ. Солэн маиз ке но ӧвӧл ке, со ӝоже уг усьы но вожзэ уг потты. Со дыре ик уг луы вераны, шумпотыса улӥсь адями ас азяз нокыӵе ужпумъёс уг пукты ни шуыса. Кылсярысь, Библия христианъёсты ӧте Иеговалы тросгес ужаны-тыршыны (Рим. 12:1; 1 Тим. 3:1). Но шумпотыса улӥсь адями, солы организациын соку ик дано ужъёс уг оско ке, кизэ уг лэзьы.

2. Мар луыны быгатэ, адями уг шумпоты ке солы, маиз солэн вань?

² Соос, кинъёс уг шумпото солы, марзы соослэн вань, куддыръя кутско урод ужпумъёс кутылыны. Кӧттырмостэмъёс уй но нунал ужаны быгато, басьтон понна сое, мар соослы туж ик кулэ ӧвӧл. Жаляса верано луэ, куд-ог христианъёс лушкаськыны но кутскизы. Оло нош, соос тазьы малпаськизы: «Та мынам луыны кулэ», «Мыным али та туж кулэ» яке «Мон та коньдонэз берлогес берыкто». Но котькыӵе лушкаськон Инмарлэсь нимзэ сапта (Мад. 30:9, ВД). Нош куд-огъёсызлэн организациын кыӵе ке ужъёсты быдэсъямзы туж потэ вал ке но, соослы со ужъёсты ӧз оске. Соин ик соос кизэс лэзизы но Иеговаез кельтӥзы (Гал. 6:9). Малы куд-огъёсыз асьсэды озьы возьыны кутскизы? Оло нош, дыр ортчыса, соос дунъямысь дугдӥзы сое, марзы соослэн вань.

3. Малы милемыз дышето кылъёс, кудъёсыз гожтэмын Филиппыослы 4:11, 12?

³ Апостол Павел вераз: «Мон уго дышемын ни, маи вань, соин тыр луыны». (Лыдӟе Филиппыослы 4:11, 12.) Та кылъёсты гожтыкуз, Павел одӥг коркан жильыетын пукиз. Адӟиське, сыӵе югдурын но Павел шумпотонзэ ӧз ышты шуыса. Со тодэ вал, мар кароно, шумпотыса улон понна. Озьыен, кыӵе гинэ югдурмы милям медаз луы, ми но шумпотыса улыны быгатӥськомы. Но малпано ӧвӧл, со ас понназ пӧрмоз шуыса. Милемлы дышетсконо шумпотыса улыны. Ойдолэ тодомы, мар со понна кароно.

ТАУ КАРИСЕСЬ ЛУЭ

4. Кызьы тау карись луон юрттэ милемлы шудо луыны? (1 Фессалоникаослы 5:18).

⁴ Ӵем дыръя тау карись адями шудо. (Лыдӟе 1 Фессалоникаослы 5:18.) Кылсярысь, ми тау кариськомы ке, милям ваньмыз кулэез вань шуыса, ми мултэс ум сюлмаське, вылды, со понна, мармы милям ӧвӧл, милям сое туж басьтэммы потэ ке но. Ми дунъяськомы ке ужъёсты, кудъёссэ милемлы Иегова оске, соку малпаськомы, мар милям кареммы луэ, со ужъёсты эшшо но умой быдэстон понна, но ум малпаське, мар кароно, милемлы ӝоггес мукет ужъёсты мед оскозы шуыса. Иегова тодэ, макем кулэ тау карись луыны. Соин ик Библия пыр со милесьтым мылкыдмес ӝутэ вӧсяськыкумы солы тау шуыны. Ми тау карисесь ке, соку милям «Инмарлэн каньыллыкез» луоз, кудӥз «котькыӵе визьлэсь но вылӥын» (Флп. 4:6, 7).

5. Мар понна израиль калык Иеговалы тау карыны кулэ вал? (Озьы ик учке суредэз.)

⁵ Тодамы ваёмы, мар луиз израиль калыкен. Соос трос пол Иеговалы ӝожтӥськизы, мӧзмо шуыса сиёнлэсь, кудӥз соослэн Египетын вал (Лыд. 11:4—6). Луоё кыр дуннеын улон капчи ӧй вал ке но, мар соослы юрттыны быгатэ вал шумпотыса улыны? Соослы тау карыса малпаськоно вал со сярысь, мае Иегова соос понна лэсьтӥз ини. Египетын соос ляльчиос вал. Египет калык соосын асьсэды туж лек возиз. Но Иегова египет калык вылэ дас шугадӟонъёс лэзиз но аслэсьтыз калыксэ мозмытӥз. Египетысь кошкыкуз, израиль калык «египет калыклэсь узырлыксэ» сьӧраз нуиз: азвесез, зарниез но дӥськутэз (Пот. 12:35, 36). Куке соос малпазы, Горд зарезь дурын бырозы ини шуыса, Иегова паймымон амалэн вуэз люкиз. Нош луоё кыр дуннеетӥ ветлыкузы, Инмар котькуд нунал соослы манна сётылӥз. Соку малы израиль калык ӝожтӥськыса улӥз? Сиён тырмымтэен ӧвӧл, нош тау карисьтэм луэменызы сэрен.

6. Мар милемлы юрттоз тау карисесь луыны?

⁶ Мар тӥледлы юрттоз тау карисесь луыны? Нырысетӥез, котькуд нунал малпаське улонысьтыды ваньмыз умоез сярысь. Гожъялэ, кызьы Иегова тӥледыз туннэ бакель кариз (Бӧрд. 3:22, 23). Кыкетӥез, тау карондэс возьматэ. Мукетъёсызлы тау шуэ со понна, мае соос тӥледлы лэсьто, озьы ик Иеговалы тау каре (Пс. 74:2). Куинетӥез, тау карись адямиосын эшъяське, соку тӥ но тау карисесь луоды (К. Зак. 1:26—28; 2 Тим. 3:1, 2, 5). Нош эшъяськиды ке соосын, кинъёс ялан ӟургетыса уло, соку тӥ но сыӵеесь ик луоды, вылды. Сюлэм тау каронэн пачылмемын ке, ӟургетонлы но ӝожтӥськонлы инты уз кыльы ни.

7. Мар юрттӥз Ачи сузэрлы нош ик шумпотыса улыны?

⁷ Тани мар вераз Индонезиысь А́чи сузэр: «COVID-19 пандемия дыръя мон асме мукетъёсыныз ӵошатыны кутски. Мыным потэ вал, мынам сярысь, мукетъёсызлэн ваньмыз умойгес шуыса. Соин ик мон шумпотонме ыштӥ» (Гал. 6:4). Мар юрттӥз Ачилы мукет сямен малпаськыны? Со вера: «Мон саклыкме висъяны кутски Иеговалэн кузьымъёсызлы, кудъёссэ со мыным котькуд нунал кузьма вал. Со сяна, мон малпаськи ваньмыз умоез сярысь, маи мынам вань, Инмарлэн организацияз луэменым. Собере мон Иеговалы тау карисько вал. Та мыным юрттӥз зэмзэ ик шудо луыны». Тӥледыз но урод малпанъёс зӥбо ке, лэсьтэ озьы, кызьы Ачи лэсьтӥз.

ЗӤБЫТ-ВОСТЭМЕСЬ ЛУЭ

8. Малы Варух ӝоже усиз?

⁸ Огпол Варух, Иеремия пророклэн секретарез, ӝоже усиз. Солы секыт уж сётэмын вал: солы Иеремияен ӵош тау карисьтэм калыклы кышкыт ивор верано вал. Иеговалэн эрикезлы саклыксэ висъям интые, Варух аслаз мылпотонъёсызлы саклыксэ висъяз. Иеремия пыр Иегова Варухлы шуиз: «Тон аслыд быдӟымзэ куриськод: эн куры» (Иер. 45:3—5). Мукет сямен вераса, Инмар шуиз: «Шумпот солы, маид тынад вань». Варух Иеговалэн визь-кенешезлэсь кылзӥськиз но Инмарен кусыпъёссэ утиз.

9. Малы милемыз дышето кылъёс, кудъёсыз гожтэмын 1 Коринфъёслы 4:6, 7? (Озьы ик учке суредъёсты.)

⁹ Куддыръя христиан мурт малпаны быгатэ, кыӵе ке ужез быдэстон понна, со котькинлэсь умой тупа шуыса. Оло нош, со туж кибашлы, ужась яке Иеговалы кемалась ужа-тырше ини. Но ужез, кудзэ солэн туж быдэсъямез потэ, мукет адямилы сётыны быгато. Мар солы кароно, сыӵе учырын мылкыдыз медаз куашка шуыса? Со малпаськыны быгатэ апостол Павеллэн кылъёсыз вылын, кудъёсыз гожтэмын 1 Коринфъёслы 4:6, 7 (лыдӟе). Милям быгатонлыкъёсмы но милемлы сётэм ужъёс — со Иеговалэн кузьымъёсыз. Соос милемлы сётэмын ӧвӧл мукетъёсызлэсь умойгес луэммы понна. Инмар милемлы соосты сётэ, малы ке шуоно милемыз туж яратэ (Рим. 12:3, 6; Еф. 2:8, 9).

10. Мар милемлы юрттоз зӥбыт-востэмесь луыны?

¹⁰ Мар милемлы юрттоз зӥбыт-востэмесь луыны? Малпаськоно, кыӵе адӟем карон кельтӥз Иисус Христос. Тодамы ваёмы, мар луиз солэн кулон азяз ӝытэ. Иисус тодэ вал ке но, со Инмарлэн Пиез но солы бадӟым кужым сётэмын шуыса, со апостолъёсызлэсь пыдъёссэс миськиз. Иоанн гожтӥз: «Иисус, Атаезлэсь Солы ваньзэ кияз сётэмзэ, Аслэсьтыз Инмар дорысь потэмзэ но Инмар доры кошкемзэ но тодыса, ӝытанысен султӥз... Собере мисьтӥськонэ ву лэзиз но дышетскисьёсызлэсь пыдъёссэс миськыны... кутскиз» (Иоанн 13:3—5). Иисус малпаны быгатэ вал, со апостолъёсызлэсь пыдъёссэс миськыны кулэ ӧвӧл, нош соос солэсь пыдзэ миськыны кулэ шуыса. Но музъем вылын ужакуз-тыршыкуз, со улонэзлы ноку ӧз ӝожтӥськы но ӧз малпа, со Инмарлэн Пиез бере, солэн бадӟым коркаез, трос коньдонэз луыны кулэ но со майбыр улыны кулэ шуыса (Лука 9:58). Иисус зӥбыт-востэм вал. Со шумпотэ вал солы, маиз солэн вань. Та пумысен со милемлы умой адӟем карон возьматӥз (Иоанн 13:15).

11. Кызьы зӥбыт-востэм сям юрттэ Деннис агайлы шумпотыса улыны?

¹¹ Нидерландыысь Де́ннис агай тырше Иисуслэсь адӟем карыны но зӥбыт-востэм луыны, со капчи ӧвӧл ке но. Со вера: «Куддыръя мон кутскисько вылтӥяськыны но ӟургетыны, кылсярысь, куке мукетъёсызлы сёто ужъёсты, кудъёссэ мынам быдэсъяме потэ вал. Сыӵе учырын мон соку ик кутскисько зӥбыт-востэм сям сярысь лыдӟиськыны. JW Library^® приложениын мон «зӥбыт-востэм сям» тег кылдытӥ но отчы кылбуръёс люкай. Соин ик мон быгатӥсько ӝог гинэ соосты усьтыны но лыдӟыны. Озьы ик мон телефонам зӥбыт-востэм сям сярысь кӧня ке речьёс скачать кари но соосты ӵем кылзӥськоa. Мон валасько: ваньмыз, мае мон лэсьтӥсько, Иеговаез данъяны кулэ, нош мыным саклык висъяны кулэ ӧвӧл. Милесьтым ужъёсмес Иеговалэн ужъёсыныз ӵошатыны ик уг луы». Тӥледлы уг кельшы ке, кыӵе инты тӥ кенешын басьтӥськоды, тырше эшшо но зӥбыт-востэмесь луыны. Со юрттоз тӥледлы Иеговаен кусыпъёстэс юнматыны но шумпотыса улыны (Иак. 4:6, 8).

МАЛПАСЬКЕ ИЕГОВАЛЭН КЫЛСЁТОНЪЁСЫЗ СЯРЫСЬ

12. Иеговалэн кыӵе кылсётонъёсыз юртто милемлы шумпотыса улыны? (Исаия 65:21—25).

¹² Мар эшшо милемлы юрттэ на шумпотыса улыны? Туж умой азьпал улон сярысь малпаськон, кудзэ сётоз Иегова. Кызьы адӟиське Исаиялэн книгаысьтыз, Инмар вала, али милемлы туж секыт шуыса. Но со кылзэ сётэ вань шуг-секытъёсмес быдтыны. (Лыдӟе Исаиялэсь 65:21—25.) Ми пӧлысь котькудӥз кышкатэк но чебер коркан улоз. Милям тунсыко ужмы, озьы ик трос ческыт но пайдаё сиёнмы луоз. Ми ноку ум кышкалэ ни, милемын яке милям нылпиосынымы мар ке уродэз луоз шуыса (Ис. 32:17, 18; Иез. 34:25). Ми юн оскиськомы: Иегова вань сётэм кылъёссэ быдэстоз.

13. Кызьы азьпал улон сярысь малпаськон юрттэ милемлы шуг-секытъёс пыр потыны?

¹³ Али тужгес но кулэ ӵемгес малпаськыны Инмарлэн кылсётонъёсыз сярысь. Малы? Малы ке шуоно ми берпум нуналъёсы улӥськомы, соин ик улон туж секыт (2 Тим. 3:1). Иегова милемлы котькуд нунал визьлык но кужым сётэ (Пс. 144:14). Со сяна, шуг-секытъёс пыр потыны милемлы юрттэ выль дуннеын улыны оскон. Оло нош, тӥ трос ужаськоды, но коньдонды самой кулэезлы гинэ тырме. Возьматэ-а та, тӥ ялан курадӟыса улоды шуыса? Уг, уг возьматы. Иегова кылзэ сётэ, райын тӥледлы ваньзэ кулэзэ, озьы ик солэсь тросгес но сётоз шуыса (Пс. 9:19; 71:12—14). Оло нош, тӥ котькуд нунал кыӵе ке висёнэн яке депрессиен нюръяськиськоды. Возьматэ-а та, тӥ ялан курадӟоды но ноку уд бурме ни шуыса? Уг, уг возьматы. Инмарлэн выль дуннеяз висёнъёс но кулон уз луэ ни (Усьт. 21:3, 4). Та оскон милемлы али ик ини юрттэ лекъяськытэк но шумпотыса улыны. Оло нош, кин ке но милемын ассэ шонерлыктэм возе, матысь адямимы кулэ яке ми кыӵе ке мукет шугадӟонэн пумиськиськомы. Соку но ми быгатӥськомы шумпотыса но каньыл сюлмын улыны. Малы? Ми тодӥськомы, выль дуннеын Иегова вань шуг-секытъёсмес пыраклы быдтоз шуыса (2 Кор. 4:17, 18).

14. Мар кароно, вуоноезлы осконмес юнматон понна?

¹⁴ Ми адӟимы, вуоноезлы оскон милемлы шумпотыса улыны юрттэ шуыса. Озьыен, осконмес юнматыны кулэ. Кызьы? Куддыръя, кыдёкысь мае ке адӟон понна, очки кулэ. Нош вуоно раез адӟон понна, син азямы пуктоно, кызьы ми отын улӥськомы. Али тӥ ялан сюлмаськиськоды ке, кызьы коньдон поттыны, семьядэс сюдон-вордон понна, пуктэ син азяды, кызьы тӥ райын улӥськоды, кытын коньдон но, пунэм тыронъёс но, куанер улон но ӧвӧл ни. Нош мар кароно, тӥляд мылкыдды куашка ке, тӥледлы кыӵе ке уж уг сёто шуыса? Пуктэ син азяды, кызьы, сюрс аръёс ортчыса, тӥ тырбыдэсэсь луиды но шумпотыса улӥськоды (1 Тим. 6:19). Оло нош, тӥледлы секыт сюлмаськытэк улыны но вуоно бакель каронъёслы саклыктэс висъяны. Тӥ соос сярысь тросгес малпаськыны тыршиды ке, соку тӥледлы капчигес но капчигес луоз син азяды пуктыны, кызьы тӥ выль дуннеын улӥськоды.

15. Малы тӥ дышетскиды Криста сузэрлэсь?

¹⁵ Тодматскомы Кри́ста сузэрен, Деннислэн кышноеныз, кудӥз сярысь вераськиз ини. Со вера: «Мынам секыт висёнэ вань. Соин ик мон сӧсыръёслы тупатэм коляскаен гинэ ветлӥсько но кылльысагес улӥсько. Мынам ялан мугоры висе. Алигес эмъясе вераз, мыным умойгес уз луы ни шуыса. Мон соку ик малпай: „Луоз! Малы ке шуоно ми эмъясен вуоноез шоры пӧртэм сямен учкиськомы“. Мон азьпал улонлы саклыкме висъясько, со мыным юрттэ каньыл сюлмын улыны. Та дуннеын мон ялан курадӟыса улӥсько ке но, мон тодӥсько, выль дуннеын мон ялан шумпотыса уло шуыса!»

«СОЛЭСЬ КЫШКАСЬЁС ПӦЛЫН НАЧАР УЛОН ӦВӦЛ»

16. Мар сярысь вераз Давид, куке со Иегова сярысь шуиз: «Солэсь кышкасьёс пӧлын начар улон ӧвӧл»?

¹⁶ Ми шумпотыса улӥськомы ке но, со уг возьматы, милям нокыӵе шуг-секытъёсмы ӧвӧл шуыса. Тодамы ваёмы Давид эксэез. Ми тодӥськомы, солэн куинь пиосыз кулӥзы шуыса. Давидэз юнме янгыше уськытӥзы, сое эшъёсыз кельтӥзы, озьы ик трос аръёс ӵоже со пегаса улӥз Саул эксэйлэсь, кудӥзлэн сое виемез потэ вал. Та шуг-секытъёс шоры учкытэк, Давид Иегова сярысь вераз: «Солэсь кышкасьёс пӧлын начар улон ӧвӧл» (Пс. 33:10, 11). Ми но ум малпаське, милям шуг-секытъёсмы уз луэ шуыса. Но ми оскиськомы, Иегова милемлы ваньзэ кулэзэ сётоз шуыса (Пс. 144:16). Инмар милемлы юрттоз котькыӵе шуг-секытъёс пыр потыны, каньыл сюлмын но шумпотыса улыны.

17. Малы дышетсконо шумпотыса улыны?

¹⁷ Иеговалэн потэ, милям ваньмыз умой мед луоз шуыса (Пс. 130:1, 2). Со милемлы валэктэ, мар милемлы кароно, шумпотыса улон понна. Тырше уже кутыны та статьяысь визь-кенешъёсты: тау карисесь, зӥбыт-востэмесь луэ но азьпал улон сярысь малпаське. Соку тӥ вераны быгатоды: «Мон уго дышемын ни, маи вань, соин тыр луыны» (Флп. 4:11).