Кивалтӥсь кенешлэсь гожтэт

Дуно вын-агайёс но сузэр-апайёс!

Одӥг пол Исаия пророк вераз: «Кузё-Инмаре... милесьтым вань ужъёсмес Тон Ачид тупатӥськод» (Ис. 26:12). Исаия зӥбыт-востэм вал, но со вала вал, Иуда эксэйлык азинлыко, малы ке шуоно Иегова солы юрттэ вал но сое бакель каре вал. Малпаськыса со сярысь, кыӵе азинсконъёс лэсьтӥз Инмарлэн организациез ортчем ужан-тыршон арын, ми но Исаиялэн кадь малпанэ вуиськомы. Иегова зэмзэ но «паймымон ужъёс лэсьтэ, сыӵеосыз музъем вылын... ӧй на вал» (Пот. 34:10). Ойдолэ тодамы ваёмы куд-ог бакель каронъёсты, кудъёссэ со милемлы жалятэк кузьмаз.

Милям нимлыко сайтмы номырин ӵошатонтэм пайда вае. Али со 600-лэсь тросгес кылъёсы берыктэмын. Сайтысь лыдӟыны но скачать карыны луэ публикациосты 750-лэсь тросгес кылъёсын. Тани одӥг учыр, кудӥз возьматэ, милям сайтмы туж пайдаё тӥрлык луэ шуыса, кудӥз юрттэ ӟеч иворез кылзӥськись адямиослы вераны. Мукет религиосысь адямиослэсь пӧяськись луэмзэс адӟыса, одӥг семьялэн религилы осконэз быриз. Кузпалъёс зэмлыкез утчакузы милесьтым сайтмес шедьтӥзы. Соос сайтамы ӵем пыраны кутскизы, публикациосысьтымы статьяосты лыдӟон понна но видеороликъёсты учкон понна. Со сяна, соос «Котькуд нунал Библиез эскериськомы» брошюраез скачать каризы но кык быдэ вуымтэ нылпиосынызы котькуд нунал отысь нуналлы гожтэм кылбурез лыдӟыны но сое эскерыны кутскизы. Одӥг ӵукна, нуналлы гожтэм кылбурез лыдӟыкузы, ӧсазы Иеговалэн Адӟись-Ивортӥсьёсыз йыгаськизы. Адӟись-Ивортӥсьёс тодӥзы, сайтлы луыса та семья улонысьтыз троссэ воштӥз ини шуыса. Соос татуировкаоссэс но пирсингзэс октӥзы, обросъёссэс-сульдэръёссэс куязы, озьы ик соос та дуннеын вӧлмем праздникъёсы уг пырисько ни но христианъёслы учкыны ярасьтэм фильмъёсты уг учко ни. Ваньзэ тае соос каризы Адӟись-Ивортӥсьёсын тодматскемзылэсь азьло! Та гожтэтэз гожтыку кузпалъёс но одӥгез пиналзы ивортӥсьёс вал ини, со сяна, кыкез ик кузпалъёс пылатӥськыны дасясько вал.

Трос умой кылъёс верало на эшшо одӥг воштӥськон сярысь — милям интернет-телевиденимы сярысь. Али толэзьлы быдэ потӥсь программа 70-лэсь тросгес кылъёсын потэ, нош вуонояз со эшшо тросгес кылъёсы берыктэмын луоз на. Тросэз семьяос та программаез семьяен йыбырттон ортчытыкузы учко. Тани мар вераз одӥг вын-агай: «Иеговалэн организациез ноку но та быдӟа ӧй вал на; организация будэмъя ми асьмеды валтӥсь кивалтоннилы эшшо но матынгес шӧдӥськомы!»

Конгрессъёс Иеговалэн калыкез понна туж дуно луо. 2015-тӥ ужан-тыршон арын пӧртэм интыосын улосысь конгрессъёс ортчизы, кудъёсызлэн программаязы 42 видеоролик но суредъёс пыртэмын вал. Программалэн котькуд люкетэз кутскылӥз юри конгресслы дасям куать крезьгуръёс пӧлысь одӥгеныз. Одӥг вын-агай, кудӥз Иеговалы трос аръёс ужа-тырше ини, программа сярысь тазьы вераз: «Шӧдске вал, конгрессэ лыктэмъёслэн одӥг минутлы но интыысьтызы кошкемзы уг поты вал, программаысь номырзэ но медаз кельтэ шуыса». Нош одӥг сузэр, кудӥз миссионер луыса ужа-тырше, вераз: «Видеороликъёслы луыса мынам зэмлыклы но Эксэйлыклы осконэ эшшо но юнмаз».

Кылем арын Иеговалэн бакель каременыз выльёсыз Эксэйлык кырӟанъёс гожтэмын вал. Одӥг кузпалъёс гожтӥзы: «Куке ми выль кырӟанъёсты кылзӥськомы, Иегова милемыз ӟыгыртэ кадь потэ. Шуг-секытъёсын пумиськыкумы, соос трос пол милемыз буйгатылӥзы». Конгрессын ми тросгес тодӥмы со сярысь, кызьы вын-агайёс но сузэр-апайёс Возьмаськон башнялэн оркестраз но хораз ужало-тыршо. Соос туж чебер крезьгур кылдыто, кудӥз милемыз шумпоттэ но Иеговаез данъя!

Тӥляд кенешты литератураен тележкаосын тодытэ-а? Та тодытон амал зэмзэ но бакель карон вал. Та амаллы луыса куд-ог адямиос, кудъёсыз уло ӝужыт коркаосын но асьсэлэн коркаосазы, кытчы мурт адямиос пырыны уг быгато, нырысьсэ кыло ӟеч иворез; мукетъёсыз, озьы ик Адӟись-Ивортӥсьёс но, кудъёсыз тодытон уже пыриськемысь дугдӥзы, кулэ луись духовной юрттэт басьто. 2015-тӥ арын толшоре Лымшор Кореяын литератураен тележка доры одӥг пиосмурт лыктӥз. Со вераз, кемалась ик ӧвӧл со Инмарлы осконэн герӟаськем юанъёс вылын мур малпаськыны кутскиз шуыса. Соин Библиез дышетыны кутскизы. Со арын ик тулыспалэ со нырысетӥзэ ветлӥз кенешлэн пумиськоназ, южтолэзе со тамак кыскемысь дугдӥз, нош оштолэзе Лымшор Кореяысь филиалэ ветлӥз. Али со пиосмурт Инмарен кусыпъёссэ юнматонын азинлыкъёс лэсьтэ. Трос учыръёс пӧлысь, кудъёсыз сярысь дунневыл валтӥсь кивалтонниын тодмо луиз, таиз одӥгез гинэ.

Ми вӧсяськиськомы, конгрессын сётэм публикация Иегова доры берытскыны мылкыдзэс мед ӝутоз шуыса соослэсь, кинъёс азьло солы ужазы-тыршизы. Ми ваньдэс ӧтиськомы: Иегова кадь ик сюлмысь пумиталэ соосты, кинъёслэн берытскемзы потэ Иеговалэн организацияз (Иез. 34:16).

Зэмзэ но, кылем ужан-тыршон арын Иегова аслэсьтыз калыксэ туж бакель кариз. Мар милемыз возьма азьпалан? Ойдолэ кӧня ке возьмаломы но тодомы. Оске, Кивалтӥсь кенешысь вын-агайёс тӥледыз ваньдэс ярато но ӵемысь тӥ понна вӧсясько шуыса.

Тӥляд вын-агайёсты,

Иеговалэн Адӟись-Ивортӥсьёсызлэн Кивалтӥсь кенешсы