11-тӥ люкет
Али кылдытӥське выль дуннелэн инъетэз
1, 2. Мар луэ асьмелэн син азямы, но кызьы быдэсме Библиысь азьпалзэ ивортыса верам?
ОЗЬЫ ик паймымон, али, Шайтанлэн вуж дуннеез бырыку, Инмарлэн выль дуннеезлэн инъетэз кылдытӥське. Асьмелэн син азямы ик Инмар вань калыкъёс пӧлысь адямиосты люка но соослэсь выль дуннеысь калыклы инъет кылдытэ, кудӥз ӝоген керетонъёсын тырмем туала дуннеез воштоз. Библиын, 2 Петрлэн гожтэтаз 3:13, со выль калык «выль музъем» шуыса нимаське.
2 Библиын азьпалзэ ивортыса верамын: «Берпуметӥ аръёсы [со дыре, ку асьмеос улӥськомы]... трос калыкъёс лыктыса шуозы: „Ойдолэ, Кузё-Инмарлэн гурезяз тубоме [солэн зэмос йыбырттонэз]... Аслаз сюресъёсызлы Со асьмеды дышетоз, соку асьмеос Солэн сюрестӥз ветломы“» (Исаия 2:2, 3).
3. а) Кин пӧлын быдэсме Исаия книгаысь азьпалзэ ивортыса верам? б) Мар со сярысь вера Библилэн берпуметӥ книгаез?
3 Со азьпалзэ ивортыса верам али быдэсме соос пӧлын, кин Инмарлэсь кылзӥське но «солэн сюресъёстӥз» ветлэ. Со тупаса улонэз яратӥсь калыккуспо дэменлык сярысь Библилэн берпуметӥ книгаяз «туж-туж трос калык... вань выжыос, калыкъёс, пӧртэм кылын вераськисьёс, улыос-бечеос пӧлысь», быдэс дуннеысь зэмос вынлык шуыса верамын, кудӥз огазеяськыса Инмарлы йыбырттэ. Библия озьы ик вера: «Та адямиос туж бадӟым курадӟон-куректон пыр потэмын». Со возьматэ, соос, та лек система бырыку, улэп кылёзы шуыса (Усьтӥськон 7:9, 14; Матфей 24:9).
Зэмос калыккуспо вынлык
4, 5. Малы луыса кылдӥз Иеговалэн Адӟись-Ивортӥсьёсызлэн калыккуспо вынлыксы?
4 Трос миллион Иеговалэн Адӟись-Ивортӥсьёсыз сюлмысь тыршо Инмарлэн куронъёсызъя улыны. Соослэн пырак улонлы осконзы — со Инмарлэн выль дуннеез. Нуналысь нуналэ Инмарлэн катъёсызъя улыса, соос Инмарлэн кивалтон амалэзлы али но выль дуннеын тэрытскыны дась луэмзэс возьмато. Котькытын, асьсэлэн пӧртэм йӧскалык яке раса пӧлысь луэмзы шоры учкытэк, соос одӥг курон-косонъёслэсь кылзӥськыса уло, кудъёссэ Инмар аслаз Кылаз сётӥз. Тӥни малы соос — зэмос калыккуспо вынлык, Инмарен кылдытэм быдэс дуннеысь выль дэменлык (Исаия 54:13; Матфей 22:37, 38; Иоанн 15:9, 14).
5 Иеговалэн Адӟись-Ивортӥсьёсыз номырин ӵошатонтэм быдэс дуннеысь вынлык понна асьсэлы дан уг басьто. Соос валало, сыӵе вынлык кылдӥз, Инмарлэн аслэсьтыз кужмо духсэ адямиослы сётэменыз, кудъёсыз солэн катъёсызъя уло (Апостолъёслэн ужъёссы 5:29, 32; Галатияын улӥсьёслы 5:22, 23). Со — Инмарлэн ужез. Иисуслэн верамезъя, «адямиос мае лэсьтыны уг быгато, Инмарлэн ваньзэ лэсьтэмез луэ» (Лука 18:27). Соин ик Инмар, кудӥз быгатӥз быдэс дуннеез юн кылдытыны, озьы ик быгатоз выль дуннеын юн дэменлык кылдытыны.
6. Малы туннэ Иеговалэн Адӟись-Ивортӥсьёсызлэсь вынлыксэс паймымон ужен ниманы луоз?
6 Озьыен, Инмарлэсь выль дуннеын кивалтон амалзэ адӟыны луэ ини отысь, мар со лэсьтэ выль дуннелэн али пуктӥськись инъетаз. Но со, кыӵе уж лэсьтэ со аслаз Адӟись-Ивортӥсьёсыз понна, туннэ нуналэ паймымон уж луэ. Малы? Малы ке шуоно со Иеговалэн Адӟись-Ивортӥсьёсызлэсь быдэс дуннеысь зэмос вынлык кылдытӥз, кудӥз ноку но йӧскалык, раса но религия пумысен потэм керетонъёсын сӧремын уз луы. Со дыре, куке Адӟись-Ивортӥсьёслэн лыдзы трос миллион луэ, но соос 235-лэсь уногес шаеръёсын уло, соос ог-огенызы люкыны луонтэм кусыпъёсын герӟаськемын, одӥг быдэс кадь. Со быдэс дунне вылысь номырин ӵошатыны луонтэм вынлык асьме нуналъёсы паймымон уж луэ — Инмарлэн ужез (Исаия 43:10, 11, 21; Апостолъёслэн ужъёссы 10:34, 35; Галатияын улӥсьёслы 3:28).
Инмарлэсь калыксэ тодман
7. Кызьы, Иисуслэн кылъёсызъя, солэн пытьытӥз зэмос мынӥсьёсты тодмалозы?
7 Кызьы эшшо тодыны луоз, кыӵе адямиосты Инмар выль дуннеезлы инъет карыса кутэ? Кылсярысь, кин Иисуслэсь Иоаннын 13:34, 35 гожтэм кылъёссэ быдэстэ? Со вераз: «Тӥледлы выль курон-косон сётӥсько: огдэс огды яратэ; кызьы Мон тӥледыз яратӥ, озьы ик тӥ но огдэс огды мед яратоды. Куспады яратонды луиз ке, тӥ Мынам дышетскисьёсы шуыса тӥледыз ваньмыз тодмалозы». Иеговалэн Адӟись-Ивортӥсьёсыз Иисуслэн кылъёсызлы оско но соосъя уло. Кызьы Инмарлэн Кылыз дышетэ, соос огзэс огзы «сюлмысь яратыса» уло (1 Пётр 4:8). Соос «яратонэн» дӥсяськемын-шобырскемын, «со дун-шектэм луонлэн шорсюлмыз луэ» (Колоссын улӥсьёслы 3:14). Озьыен, «клей», кудӥз быдэс дуннеын соосты огъя, со — агай-вынъёслэн ог-огзэс яратэмзы.
8. Кызьы эшшо, 1 Иоаннын 3:10—12 верамъя, Инмарлэсь калыксэ тодманы луоз?
8 Озьы ик 1 Иоаннын 3:10—12 вераське: «Инмарлэсь нылпиоссэ но дьяволлэсьсэ нылпиосты тазьы тодманы луоно: котькудӥз шонертэм уж лэсьтӥсь мурт, агай-вынъёссэ яратӥсьтэм мурт — Инмарлэсь ӧвӧл. Кутсконысеныз ик тӥ таӵе веранэз кылӥды: огмес огмы мед яратомы. Каин кадь ум улэ. Со шайтанлэсь вал, аслэсьтыз вынзэ вииз». Соин ик Инмарлэн калыкез, быдэс дуннеысь вынлык луыса, лек ужъёсы уг пыриськы.
Мукетыз висъясь тодмет
9, 10. а) Кыӵе ужъя Инмарлэсь ужась-тыршисьёссэ берпум нуналъёсы тодманы луоз? б) Кызьы Иеговалэн Адӟись-Ивортӥсьёсыз Матфейын 24:14 верам кылъёсты быдэсто?
9 Инмарлэсь ужась-тыршисьёссэ мукет сямен но тодманы луэ на. Дунне бырон сярысь азьпалзэ ивортыса, Иисус вераз тросэз сярысь, мар возьматыны кулэ вал берпум нуналъёслэсь вуэмзэс. (Учкы 9-тӥ люкетэз.) Со азьпалзэ веран пӧлы пырись одӥгез люкетэз сярысь Матфейын 24:14 вераське: «Вань калыкъёс мед тодозы шуыса, Эксэйлыклэн та Евангелиез быдэс дунне вылын тодытэмын луоз; собере пум вуоз».
10 Адӟиськомы-а ми та азьпалзэ верамлэсь быдэсмемзэ? Бен. 1914-тӥ арысен, куке кутскизы берпум нуналъёс, Иеговалэн Адӟись-Ивортӥсьёсыз Инмарлэн Эксэйлыкез сярысь ӟеч иворез быдэс дуннеын верало озьы, кызьы Иисус возьматӥз, коркась корка ветлыса (Матфей 10:7, 12; Апостолъёслэн ужъёссы 20:20). Трос миллион Адӟись-Ивортӥсьёс вань шаеръёсын адямиос доры ветло, соосын выль дунне сярысь вераськон понна. Иеговалэн Адӟись-Ивортӥсьёсыз Инмар Эксэйлык сярысь туж трос литература печатлало но вӧлмыто. Солы луыса, тон кие но та брошюра вуиз. Тодӥськод-а тон эшшо кинэ ке, кин, коркась корка ветлыса, быдэс дуннеын тодытон ужез нуэ? Нош Маркын 13:10 гожтэмын, пумыз вуэмлэсь «азьвыл», тодытон но дышетон уж ортчытэмын луыны кулэ шуыса.
Кыкетӥ ӝутэм юанлы валэктон
11. Мае возьмато на Иеговалэн Адӟись-Ивортӥсьёсыз, Инмарлэн кивалтэмезлэсь кылзӥськыса?
11 Инмарлэн катъёсызлэсь но возетъёсызлэсь кылзӥськеменызы, Иеговалэн Адӟись-Ивортӥсьёсыз возьмато, Шайтан пӧяз, куке вераз, адямиос шуг-секытъёсын пумиськыса, Инмарлы оскымон кыльыны уз быгатэ шуыса. Озьы соос кыкетӥ ӝутэм юанлы, кудӥз адямиослэн дун-чылкыт луэменызы герӟаськемын, валэктон сёто (Иов 2:1—5). Пӧртэм йӧскалык пӧлысь трос миллион адямиослэсь дэменлык кылдытыса, Адӟись-Ивортӥсьёс, одӥг быдэс кадь, Инмарлэн кивалтэмезлы оскымон луэмзэс возьмато. Шайтанлэн зӥбемез но асьсэлэн тырбыдэстэм луэмзы шоры учкытэк, Инмарлэн кивалтэтэз сярысь ӝутэм юанын соос Инмар палан луэмзэс возьмато.
12. Кинъёслэн осконзылы адӟем каро Адӟись-Ивортӥсьёс?
12 Туннэ трос миллион Иеговалэн Адӟись-Ивортӥсьёсыз азьланьто со ужез, кудзэ азьвыл нуизы Инмарлы оскымон кылем адӟись-ивортӥсьёс. Соос пӧлын, куд-огзэ гинэ верано ке, Авель, Ной, Иов, Авраам, Сарра, Исаак, Иаков, Девора, Руфь, Давид но Даниил вал (Еврейёслы, 11-тӥ люкет). Кызьы вера Библия, соос — «пилем мында адӟисьёс-ивортӥсьёс» (Еврейёслы 12:1). Соос но мукетъёсыз, Иисуслэсь дышетскисьёссэ лыдэ басьтыса, Инмар азьын дун-чылкыт кылизы. Ачиз Иисус но туж умой пример возьматӥз, котьма ласянь дун-чылкыт кыльыса.
13. Кыӵе кылъёсыз Иисуслэн Шайтан сярысь шонер луо?
13 Со возьматэ, Иисуслэн религиозной кивалтӥсьёслы Шайтан сярысь верамез шонер луэ шуыса: «Нош табере Монэ, Инмар бордысь кылэм зэмлыкез тӥледлы верась Адямиез, виыны утчаськоды... Тӥляд атайды дьявол, тӥ асьтэлэн атайдылэсь кулэ каремъёссэ быдэсъяны турттӥськоды. Со кутсконысеныз ик адями виись вал. Со зэмлыкын сылыны ӧз быгаты, уго со бордын зэмлык ӧвӧл. Ӧрекчаськыкуз со аслэсьтыззэ вера, со уго ӧрекчаськись, ӧрекчаськонлэн атаез» (Иоанн 8:40, 44).
Мае быръёд тон?
14. Мар луэ али выль дуннелэн инъетэныз?
14 Иеговалэн Адӟись-Ивортӥсьёсызлэн калыккуспо огазеяськонзы, кудзэ Инмар выль дуннелэн инъетэз карыса кылдытӥз, юнгес но юнгес луэ. Котькуд аре сю сюрс адямиос, эрико луонзэс уже кутыса, кудӥз зэмос тодон-валан вылэ пыкиськемын, Инмарлэсь кивалтэмзэ шонерен лыдъяло. Соос выль дуннеысь калыклэн оглюкетэз луо, Инмарлэн кивалтэтэз сярысь ӝутэм юанын Инмар пала пыро но возьмато, Шайтан пӧяськись луэ шуыса.
15. Кыӵе висъян уж нуэ Иисус асьме нуналъёсы?
15 Инмарлэсь кивалтэтсэ бырйыса, соос Христослэн «бур палаз» султыны тупамон луо, со дыре, куке со «ыжъёсты» «кечъёслэсь» висъя. Берпум нуналъёс сярысь азьпалзэ ивортыса, Иисус вераз: «Соку со азе вань калыкъёс люкаськозы; одӥгъёссэ висъялоз мукетъёсызлэсь, кызьы пудо возьмась висъя ыжъёсты кечъёслэсь. Ыжъёсты аслаз бур палаз кароз, нош кечъёсты — палляназ». Ыжъёс — со зӥбыт адямиос, кудъёсыз Христослэн вынъёсыныз огазеясько но, Инмар кивалтэтлэсь кылзӥськыса, соослы юртто. Кечъёс — со ваменэс адямиос, кудъёсыз Христослэсь вынъёссэ палэнто но Инмар кивалтэтлэсь уг кылзӥсько. Маин со йылпумъяськоз? Иисус шуиз: «Соос [кечъёс] весяклы быдтэмын луозы, нош шонер улӥсьёслы [ыжъёслы] быронтэм улон сётэмын луоз» (Матфей 25:31—46, НМ).
16. Мар карыны кулэ тыныд, вуоно райын улэмед потэ ке?
16 Зэм ик, Инмар сюлмаське асьме сярысь! Ӝоген со музъемез паймымон райлы пӧрмытоз. Потэ-а тынад со райын улэмед? Потэ ке, соку, Инмар сярысь тодыса но басьтэм тодон-валанэдъя улыса, возьматы аслэсьтыд Инмарлэн ужъёсыз понна тау каремдэ. «Утчалэ шедьтыны луоно дыръя Кузё-Инмарез; ӧте сое матын дыръяз. Сьӧлыклэсь кышкасьтэм шонертэм сюрессэ мед кельтоз, законлы пумит улӥсь аслэсьтыз малпанъёссэ мед воштоз, Кузё-Инмар пала мед берыктӥськоз — Со жалялоз сое, милям Инмармы пала мед кариськоз — Со уго туж гажась-жалясь» (Исаия 55:6, 7).
17. Малы дырез ыштыны уг яра, кинлы служить кароно шуыса бырйыку?
17 Дырез ыштыны уг яра. Та вуж системалэн пумыз туж матын ини. Инмарлэн Кылыз кенеш сётэ: «Та дуннеез эн яратэ. Мар дунне вылын вань, сое но эн яратэ. Кин ке таизэ дуннеез яратӥз ке, солэн сюлмаз Атайлэн яратонэз уг луы... Таиз дунне ортче-быре, солэн ортчыт кужмо кулэ каронъёсыз но быро, нош Инмарлэсь эриксэ быдэсъясь пумтэм вапумъёс улэ» (1 Иоанн 2:15—17).
18. Кыӵе ужъёс тыныд луонлык сётозы, Инмарлэн паймымон выль дуннеяз улонэз оскыса возьманы?
18 Инмарлэн калыкез выль дуннеын пырак улыны али ик дышетске ини. Соос духовной тодон-валан но мукет быгатонлыкъёс басьто, кудъёсыз раез кылдытыны кулэ луозы. Ми сюлмысь куриськомы тонэ Инмарез, Кивалтӥсез кадь, бырйыны но пыриськыны адямиослэсь улонзэс утись уже, кудӥз али быдэс дунне вылын ортчытӥське. Дышеты Библиез Иеговалэн Адӟись-Ивортӥсьёсыныз но Инмар сярысь тодон-валан басьты, кудӥз, зэм ик, асьме сярысь сюлмаське, но кудӥз курадӟонъёслы пум поноз. Озьы тон ачид выль дуннелэн инъетэзлэн оглюкетэз луыны быгатод. Соку тон оскыса возьманы быгатод, Инмарлэсь ӟечлыксэ басьтод но паймымон выль дуннеын улод шуыса.
[Суред, 31-тӥ бам]
Иеговалэн Адӟись-Ивортӥсьёсыз зэмос калыккуспо вынлык кылдыто
[Суред, 32-тӥ бам]
Инмарлэн выль дуннеезлэн инъетэз али кылдытӥське.