5-тӥ люкет
Эрико бырйыны быгатон — паймымон кузьым
1, 2. Кыӵе паймымон кузьым валтӥсь инты басьтэ асьмелэн улонамы?
МАЛЫ Инмар курадӟонъёсты ӧз быдты но, мар карыны малпа со та пумысен тодон понна, асьмелы валаны кулэ, кызьы со милемыз кылдытӥз. Асьмелы мугор но йырвиым сётэм сяна, со асьмелы тросгес лэсьтӥз. Со милемыз, малпаськыны но пӧртэм мылкыдо луыны быгатӥсь карыса, кылдытӥз.
2 Малпаськыны но пӧртэм мылкыдо луыны быгатонамы валтӥсь инты басьтэ эрико луон. Инмар асьмелы эрико бырйыны быгатон сётӥз. Зэм но, со — паймымон кузьым.
Кызьы асьмеос кылдытэмын
3–5. Малы дунъяськомы эрико луонмес?
3 Ойдолэ учкомы, кызьы эрико луонмы герӟаськемын соин, малы Инмар курадӟонъёсты уг быдты. Нырысь ик малпаськы, дунъяськод-а тон эрико бырйыны быгатондэ та выллем юанъёсын: мар карыны но вераны, мае сиыны но мар дӥсяны, кыӵе ужез быдэстыны, кытын но кызьы улыны? Яке тыныд кельшысал-а, вань улытозяд кин ке вераса улысал ке тыныд, мар вераны но мар лэсьтыны?
4 Нокинлы но ӧй кельшысал, солэсь улонзэ кин ке сокем эскерысал ке. Малы? Малы ке шуоно асьмемыз Инмар сыӵеен ӧз кылдыты. Библия вера, Инмар адямиез аслыз «укшатыса» кылдытӥз шуыса, но Инмарлэн одӥгез сямыз — эрико бырйыны быгатон (Кылдытонлэн кутсконэз 1:26; Второзаконие 7:6). Адямиосты кылдытыкуз, со соослы сыӵе ик паймымон луонлык сётӥз — эрико бырйыны быгатон кузьым. Соин милемыз лек кивалтӥсьёс зӥбыса возё ке, асьмелы секыт луэ.
5 Кызьы адӟиськомы, эрико луон мылкыд юнме уг луы, малы ке шуоно Инмар — со эриклэн Инмарез. Библия вера: «Кытын ке Кузё-Инмарлэн Духез вань, отын эрик» (2 Коринфын улӥсьёслы 3:17). Озьыен, Инмар асьмелы эрико луон сётӥз, улонмылэн оглюкетэз карыса. Со тодэ вал, кызьы ужалозы асьмелэн визьмы но мылкыдмы. Озьы ик со тодӥз, эрико луон асьмемыз шудогес кароз шуыса.
6. Кызьы Инмар кылдытӥз йырвиыммес, со ужпум кутыны мед быгатоз шуыса?
6 Эрико луонэн валче, Инмар милемлы малпаськыны, ӵошатыны, ужпумъёс кутыны но ӟечсэ уродэзлэсь висъяны быгатонлык сётӥз (Еврейёслы 5:14). Озьы, эрико луон пыкиськыны кулэ вал валаса быръён вылэ. Асьмеос кылдытэмын ӧй вал малпаськисьтэм роботъёс кадь, кудъёсыз асьсэ понна ужпум кутыны уг быгато. Озьы ик асьмеос кылдытэмын ӧй вал, мае ке малпаськытэк мед лэсьтомы шуыса, пудо-животъёс кадь. Нош паймымон йырвиыммы малпамын вал озьы, асьмеос ужпумъёс кутыны мед быгатомы шуыса.
Тужгес но умой кутскон
7, 8. Кыӵе паймымон кутскон Инмар сётӥз нырысетӥ адямиослы?
7 Адам но Ева, кудъёсыз бордысь вань адямиос потӥзы, эрико луонэн ӵош басьтӥзы ваньзэ, мар кулэ вал. Со Инмарлэсь асьме сярысь сюлмаськемзэ возьматэ. Нырысетӥ адямиос бадӟым, парклы укшась рае интыямын вал. Соослэн ваньмыз вал. Мугорзы но визьзы дун-шектэмесь вал, соин ик соос пересьмыны, висьыны яке кулыны кулэ ӧй вал — соос пырак улыны быгатысалзы. Адамлэн но Евалэн дун-шектэмесь нылпиоссы луыны кулэ вал, кудъёсызлэн озьы ик шудо, пырак кыстӥськись улонзы луысал. Адямиослэн сюлмазы кельшись ужзы луыны кулэ вал, кудӥз быдэс музъемез райлы пӧрмытысал (Кылдытонлэн кутсконэз 1:26—30; 2:15).
8 Со сярысь, мар нырысетӥ адямиослы сётэмын вал, Библия вера: «Соку Инмар адӟем, ваньмыз, мае Со кылдытэм, тани, уката умой» (Кылдытонлэн кутсконэз 1:31). Озьы ик Библия Инмар сярысь вера на: «Солэн ужъёсыз дун-шектэмесь» (Второзаконие 32:4, НМ). Зэм, Кылдытӥсь адямиослы дун-шектэм кутскон сётӥз. Солэсь умой кутскон луыны ик ӧй быгатысал. Кыӵе Инмармы сюлмаськись вылэм!
Быдэсак эрикоесь ӧвӧл
9, 10. Малы эрико луон шонер радъямын луыны кулэ?
9 Потэ-а вал Инмарлэн, адямиос быдэсак эрикоесь мед луозы шуыса? Пукты али син азяд транспортэн тырмем карез, кудаз ӧвӧл сюрес вылтӥ ветлон катъёс, кытын котькудӥз пӧртэм ӝоглыкен но пӧртэм пала мынэ. Потысал-а тынад сыӵе сюрестӥ ветлэмед? Ӧз. Сюрес вылтӥ сыӵе радтэм ветлон трос машина шуккиськылонъёсы вуттысал.
10 Сыӵе ик югдур кылдэ Инмарлэн кузьыменыз но — эрико луонэн. Котьма ласянь эрико луысалмы ке, калыкын радлыктэм улон луысал. Луыны кулэ катъёс, кудъёсыз адямиослэсь ужъёссэс радъясалзы. Инмарлэн кылыз вера: «Возе асьтэдыз эрико адямиос кадь, но ноку но эриктэс уродзэ шонере поттон понна эн кутэлэ» (1 Петр 2:16, Иерусалимской Библия [The Jerusalem Bible]). Ваньмызлы пайда ваён понна, Инмарлэн потэ, эрико луонмы эскеремын мед луоз шуыса. Солэн потэ вал, асьмеос быдэсак эрикоесь медам луэ, нош катъёсты лыдэ басьтыса мед уломы шуыса.
Кинлэсь катъёссэ?
11. Кинлэсь катъёссэ асьмеос быдэсъяны кулэ вал?
11 Кинлэсь катъёссэ асьмеос быдэсъяны кулэ вал? Петрлэн 1-тӥ гожтэтаз 2:16 (Иерусалимской Библия) верамын на: «Тӥ нокинлэн но ляльчиосыз ӧвӧл, Инмарлэн сяна». Со зӥбет улын ляльчи луонэз уг возьматы, нош возьматэ, асьмеос кылдытэмын озьы, Инмарлэсь катъёссэ быдэсъяса, шудогес мед луомы шуыса (Матфей 22:35—40). Адямиосын малпам катъёсын ӵошатыса, солэн катъёсыз котьмалэсь умой кивалтэт сёто. «Мон Кузё-Инмар тынад Инмаред, тонэ пайдаё ужлы дышетӥсь, тонэ мыноно сюрестӥд нуись» (Исаия 48:17).
12. Кыӵе эрико бырйыны луонлык сёто Инмарлэн катъёсыз, соосыз ум тӥяське ке?
12 Со дыре ик Инмарлэн катъёсыз, соосыз ум тӥяське ке, эрико бырйыны луонлык сёто. Со улонэз тунсыко но адями семьяез синмаськымон каре. Малпаськы пӧртэм пумо сиён-юонъёс, дӥськутъёс, крезьгуръёс но быдэс дуннеысь улон интыос сярысь. Веранэз ӧвӧл, та юанъёсын, асьмеос интые, мукетъёсызлы бырйыны луонлык ум сётӥське, асьмеос бырйыны мылкыд кариськомы.
13. Кыӵе физической катъёслэсь кылзӥськыны кулэ, асьмелы пайда басьтон понна?
13 Озьыен, Инмарлэсь катъёссэ быдэсъяса, кудъёсыз адямилэн ассэ воземеныз герӟаськемын, асьмеос эшшо но шудогес луон понна кылдытэмын вал. Со Инмарлэн физической катъёсызъя улэм кадь ик луэ. Кылсярысь, музъемлэсь ас бордаз кыскон катсэ лыдэ басьтытэк, ӝужыт интыысь тэтчимы ке, сӧсырмыны яке кулыны быгатомы. Мугор пушкысьтымы катъёсты лыдэ басьтытэк, сиськемысь, ву юэмысь яке шокамысь дугдӥмы ке, куломы.
14. Кытысь ми тодӥськомы, адямиос Инмарлэсь кылзӥськытэк улыны кылдытэмын ӧй вал шуыса?
14 Зэм но, асьмеос Инмарлэн кызьы физической, озьы ик солэн нравственной но социальной катъёсызъя улыны кылдытэмын вал (Матфей 4:4). Адямиос Кылдытӥсьлэсь кылзӥськытэк улыны, но со дыре ик азинлыко луыны кылдытэмын ӧй вал. Иеремия пророк вера: «Уг быгаты мынӥсь пыдъёсызлы сюрес возьматыны. Тупаты монэ, Иегова» (Иеремия 10:23, 24, НМ). Соин ик адямиос котьма ласянь, ас кивалтэмзы улсын ӧвӧл, Инмарлэн кивалтэмез улсын улыны кылдытэмын вал.
15. Кулэ-а вал Инмарлэн катъёсыз Адам но Ева понна секытэсь луыны?
15 Нырысетӥ адямиос понна Инмарлэн катъёсызъя улон секыт луыны кулэ ӧй вал. Со азинлык вайыны кулэ вал соослы, озьы ик вань адямиослы но. Адам но Ева Инмарлэн катъёсызъя улысалзы ке, ваньмыз умой луысал. Али асьмеос яратӥсь, огазеяськем семья кадь шумпотыса паймымон райын улысалмы! Урод ужъёс, курадӟонъёс но кулон ӧз луысалзы.
[Суред, 11-тӥ бам]
Кылдытӥсь адямиослы дун-шектэм кутскон сётӥз
[Суред, 12-тӥ бам]
Потысал-а тынад транспортэн тырмем сюрестӥ мынэмед, сюрес вылтӥ ветлон катъёс ӧз луысалзы ке?