Вал-а тӥляд дыръёсты, куке тӥляд Библиез лыдӟемды потӥз, но та выллем малпанъёс тӥлесьтыд мылкыддэс быдтӥзы? Тросэз малпало, Библиез лыдӟыны туж секыт шуыса. Нош тӥ тодысалды ке, Библия улондэс воштыны, тӥледыз шудогес карыны быгатэ шуыса но Библия тунсыко книга шуыса, лыдӟысалды-а тӥ сое? Потэ-а тодэмды, мар сётыны быгатэ тӥледлы Библия?

Тани мар верало куд-ог адямиос, кудъёсыз валазы, Библиез лыдӟон пайда вае шуыса.

Езекиль, 20 ареслэсь бадӟымгес егит пи, вера: «Азьвыл мон солань-талань ветлӥсь водитель кадь вал. Нош Библия юрттӥз мыным валаны, малы мон улӥсько но кыӵе сюрес мыным быръёно. Библия котькуд нуналлы пайдаё визь-кенешъёс сётэ».

Фрида нимо егит ныл вера: «Мон туж ӝог пурӟисько вал. Библия дышетӥз монэ асме киям возьыны. Табере мынам трос эшъёсы».

Нош тани мар вера 50 ареслэсь мӧйыгес кышномурт Евника: «Библия юрттӥз мыным воштӥськыны но урод сямъёслэсь куштӥськыны».

Библия юрттӥз та адямиослы но мукет трос миллион адямиослы зэмзэ ик шудо луыны. Со юрттоз тӥледлы но (Исаия 48:17, 18). Библия юрттоз тӥледлы: 1) дышетскыны шонер ужпумъёс кутыны, 2) умой эшъёс шедьтыны, 3) шуг-секытъёсты вормыны но 4) самой валтӥсез, Инмар сярысь зэмлыкез тодыны. Библиын гожтэм визь-кенешъёс — со Инмарлэн визь-кенешъёсыз, соин ик тӥ ноку но уд жалялэ, соослэсь кылзӥськиды шуыса. Инмар ноку но урод визь-кенешъёс уг сёты.

Кышкано ӧвӧл — кутсконо. Мар тӥледлы юрттоз кутскыны Библиез лыдӟыны? Кызьы Библия лыдӟонэз тунсыкогес кароно?

Мар Библия лыдӟонэз тунсыко но пайдаё кароз? Тани вить визь-кенешъёс.

Тупась инты быръе. Шедьтэ шыпыт инты. Отын югыт мед луоз но чылкыт омыр мед пыроз. Со юрттоз вань саклыктэс висъяны лыдӟиськонлы.

Умой мылкыдын лыдӟе. Библия — инмысь Атаймылэн гожтэтэз бере, сое лыдӟоно сыӵе ик мылкыдын, кыӵе мылкыдын кылзэ нылпи яратӥсь атайзэ. Тӥ малпаськоды ке, Библия тунсыко ӧвӧл но сое валаны секыт шуыса, сыӵе малпанъёстэс палэнтэ, соку Инмар быгатоз тӥледыз малы ке дышетыны (Псалтирь 24:4).

Лыдӟонды азьын вӧсяське. Библиын Инмарлэн малпанъёсыз гожтэмын бере, сое валан понна, Инмарлэн юрттэтэз кулэ. Инмар одно ик «Солэсь курисьёслы Святой Духез сётоз» (Лука 11:13). Святой дух юрттоз тӥледлы валаны Инмарлэсь малпанъёссэ. Нош дыр ортчемъя со юрттоз валаны «Инмарлэсь ватӥськем мурдалаоссэ но» (1 Коринфъёслы 2:10).

Малпаськыса лыдӟе. Эн тырше трос лыдӟыны. Малпаське лыдӟемды вылын. Кылсярысь, тани мар сярысь малпаськыны луоз: «Кыӵе сямъёсыз вань со адямилэн, кудӥз сярысь мон али лыдӟи? Малы мон солэсь дышетскыны быгатӥсько?»

Ужпумъёс пуктэ. Библиез лыдӟемды юнме дыр быдтэм кадь медаз поты шуыса, утчалэ Библиысь сое, мар улондэс умойгес кароз. Тани кыӵе ужпумъёс пуктыны луоз: Инмар сярысь тросгес тодыны, сямъёстэс воштыны, умой карт яке умой кышно луыны. Собере быръе Библиысь кылбуръёсты, кудъёсыз юрттозы тӥледлы пуктэм ужпумъёстэс быдэстыныa.

Та вить визь-кенешъёс юрттозы тӥледлы кутскыны Библиез лыдӟыны. Нош мар кароно, Библиез лыдӟон эшшо но тунсыкогес мед луоз шуыса? Со сярысь вераськон мыноз мукетаз статьяын.

Библия лыдӟонэз тӥ тунсыко карыны быгатӥськоды. Тани куд-ог визь-кенешъёс.

Быръе шонер но валамон берыктэмез. Книгаын трос валантэм но вужмем кылъёс ке, сыӵе книгаез лыдӟем уг поты. Соин ик быръе Библилэсь сыӵе берыктэмзэ, кудзэ капчи лыдӟыны но кудӥз сюлме ик пыре. Но со шонер берыктэм мед луоз, отын номыриз воштэмын медаз луa.

Туала технологиосты кутэ. Асьме вакытэ, печатлам Библия сяна, электрон форматэн Библия вань на. Сое лыдӟыны луэ онлайн яке скачать карыса компьютере, планшетэ яке телефонэ. Куд-ог электрон форматэн Библиосын вань функциос, кудъёсыз лэзё быръем темая мукет кылбуръёсты учкыны яке учкыны кылбуръёсты мукет берыктэмъёсысь но ӵошатыны соосты. Тӥ лыдӟиськыны уд ке яратӥське, нош яратӥськоды кылзыны, быгатӥськоды Библиез аудиоформатэн скачать карыны. Тросэз адямиос Библиез кылзо, кытчы ке мыныкузы яке дорысь ужъёссэс лэсьтыкузы. Нош тӥ мае быръёды?

Библиез дышетон тӥрлыкъёсты уже кутэ. Соос юрттозы тӥледлы Библия лыдӟондэс тунсыкогес карыны. Кылсярысь, мутусъёс юрттозы тӥледлы шедьтыны интыез, кудӥз сярысь тӥ Библиысь лыдӟиськоды, но умойгес син азяды пуктыны луэм учырез. Нош та выллем журналысь статьяос яке jw.org. сайтысь «Библиысь дышетонъёс» люкетысь статьяос юрттозы умойгес валаны Библиысь кылбуръёсты.

Пӧртэм амалэн лыдӟе. Библиез кутсконысеныз пумозяз лыдӟыны тӥледлы секыт потэ ке, кутске лыдӟыны со люкетысен, кудӥз тӥледлы тужгес но кельше. Тӥляд тросгес тодэмды потэ ке Библиысь кыӵе ке адями сярысь, быръе со люкетъёсты гинэ, кудъёсаз вераське со адями сярысь. Таӵе амал сярысь верамын «Тодматске Библиен, отысь адямиос сярысь лыдӟыса» рамкаын. Оло нош, тӥляд Библиез лыдӟемды потоз темаосъя яке луэм учыръёслэн радлыксыя. Быръе со амалэз, кудӥз тӥледлы кельше.

Библия — аспӧртэмлыко книга. Отын Кылдытӥсьмылэн визь-кенешъёсыз гожтэмын (2 Тимофейлы 3:16). Библия тӥлесьтыд улондэс воштыны быгатэ. Отын верамын: «Инмарлэн кылыз улэп, со ӝоглыко» (Еврейёслы 4:12). Библия котькуд нуналлы визь-кенешъёс сётэ но тодматэ Инмарен но солэн кылсётонъёсыныз (1 Тимофейлы 4:8; Иаков 4:8).

Котькуд нуналлы визь-кенешъёс. Библия пӧртэм удысъёсын пайдаё луэ. Тани куд-ог удысъёс, кудъёсаз со милемлы пайдаё визь-кенешъёс сётэ.

• Мукетъёсыныз кусыпъёс (Ефесъёслы 4:31, 32; 5:22, 25, 28, 33).

• Тазалык (Псалтирь 36:8; Мадёнъёс 17:22).

• Умоез но уродэз шоры учкон (1 Коринфъёслы 6:9, 10).

• Ваньбур (Мадёнъёс 10:4; 28:19; Ефесъёслы 4:28)a.

Азиысь егит кузпалъёслы Библия юрттӥз кусыпъёссэс юнматыны. Соос кемалась кузпалъяськемын ӧй вал на бере, соослы капчи ӧй вал ог-огзылы дышыны. Но соос улоназы пыртӥзы сое, мае Библиысь лыдӟизы. Кыӵе емышъёс со вайиз? Висент вера: «Куспамы кыӵе ке валамтэос кылдо вал ке, Библия юрттӥз милемлы соосты яратыса сэрттыны-пертчыны. Библиысь визь-кенешъёс семьямес шудо каризы». Нош кышноез Аналу ватса: «Милемлы туж юрттӥзы Библиысь пиосмуртъёслэн но кышномуртъёслэн примеръёссы. Али милям кусыпъёсмы юнэсь но милям огкадь ужпумъёсмы».

Инмар сярысь тодон-валан. Библия юрттӥз Висентлы мукет удысын но. Со вера: «Библиез лыдӟыса, мон Инмарлы матэ кариськи». Висентлэн кылъёсысьтыз адӟиське, Библия Иегова Инмарен тодматскыны юрттэ шуыса. Библиез лыдӟыса, тӥ трос визь-кенешъёс шедьтоды но Инмарлэн эшез луоды. Отысь тӥ тододы, Инмар туж умой улон сӥзе шуыса. Со вера, азьланяз ми пумтэм вапумъёс ӵоже шумпотыса уломы шуыса (1 Тимофейлы 6:19). Та сярысь тӥ нокыӵе мукет книгаысь уд тодэ ни!

Библиез котькуд нунал лыдӟиды ке, отысь пайдаё визь-кенешъёс шедьтоды но Инмар сярысь тодон-валан басьтоды. Лыдӟыкуды тӥляд трос юанъёсты кылдозы, дыр. Мар соку кароно? Умой пример возьматӥз Эфиопияысь евнух, кудӥз ог 2 000 ар талэсь азьло улӥз. Священной Гожтэмъёсты лыдӟыкуз, солы тросэз валантэм вал. Куке солэсь юазы, вала-а со, мае лыдӟе, со вераз: «Нокин но ӧз дышеты бере, кызьы валалом?» Куке христиан мурт Филипп, кудӥз Священной Гожтэмъёсты умой тодэ вал, аслэсьтыз юрттэтсэ ӵектӥз, Эфиопияысь евнух пумит ӧз луы (Апостолъёслэн ужъёссы 8:30, 31, 34). Тӥляд но Библиез умойгес тодэмды потэ ке, гожтэ курондэс jw.org сайтэ. Озьы ик тӥ быгатӥськоды мыныны Эксэйлык юртэ яке вазиськыны тӥ палан улӥсь Иеговалэн Адӟись-Ивортӥсьёсызлы. Кутске туннэ ик ини Библиез лыдӟыны. Со юрттоз тӥледлы умой улон сюрес бырйыны.