Малы священник черкысьтыз кошкиз

Вералэ пичи дырды сярысь.

Мон вордӥськи 1943-тӥ арын Италиын. Семьямы пичи гинэ гуртын улӥз. Атае музъем бордын выриз но тӥрен ужаз. Анае но атае католикъёс вал, милемыз но, нылпиоссэс, озьы дышетӥзы.

Малы тӥляд священник луэмды потӥз?

Пичи дыръям мон туж яратӥсько вал кылзыны священникъёслэсь верамзэс. Мыным туж кельшо вал соослэн жингырес куараоссы. Мон синмаськыса учкисько вал со шоры, мар соос каро черкын. Соин мынам священник луэме потӥз. Куке мыным 13 арес вал, анае сётӥз монэ школа-интернатэ. Отын дасяло вал пичи пиосты, бератаз соос священниклы дышетскыны мед быгатозы шуыса.

Дышетӥды-а тӥ отын Библиез?

Ӧм, шуыны луоз. Куке мыным 15 арес вал, одӥг дышетӥсь сётӥз мыным Евангелиосты. Отын верамын Иисус Христослэн улонэз но ужан-тыршонэз сярысь. Мон соосты трос пол лыдӟи. 18 арес дыръям мон кошки Риме. Отын куинь университетъёсын дышетски, кудъёсыныз католической черклэн йырыз кивалтэ вал. Отын мон дышетӥ богословиез, историез, философиез, психологиез, нош озьы ик латин но грек кылъёсты. Ми Библиысь кылбуръёсты дышетӥськомы вал но арня нуналъёсы Библиез лыдӟемзэс кылзӥськомы вал ке но, Библиез ми ӧм дышетэ, шуыны луоз.

Дышетӥды-а тӥ, ректор луыса ужакуды?

Мон тросгес кивалтон ужен выри. Озьы ик мон ортчытъяй занятиос, кудъёсыз сӥземын вал Кыкетӥ Ватикан соборен кутэм законъёслы.

Малы тӥляд юанды кылдӥз, религиды зэм-а, ӧвӧл-а шуыса?

Монэ тани мар сюлмаськытӥз. Нырысетӥез — черк политикае пыриське. Кыкетӥез — священникъёслэн но черке ветлӥсьёслэн азыса-калгыса улэмзы шоры со синзэ ворса. Но куинетӥез — католической черклэн куд-ог дышетонъёсыз мыным шонертэмесь кадь пото вал. Кылсярысь, кызьы яратӥсь Инмар адямиосты кулэмзы бере ялан курадӟытыса возёз? Яке куроз-а со милемыз, ибырвесез киямы кутыса, одӥг вӧсяськонэз ик трос пол вераны?a

Мар тӥ карыны малпады?

Мон бӧрдыса Инмарлы вӧсяськи, со мыным сюрес мед возьматоз шуыса. Озьы ик мон басьтӥ католической «Иерусалимской Библиез», кудӥз сокугес гинэ итальян кылын поттэмын вал, но сое лыдӟыны кутски. Одӥг арнянуналэ ӵукна, богослужение бере дӥсьме ошылыкум, семинарие кык пиосмуртъёс лыктӥзы. Соос веразы, соос Иеговалэн Адӟись-Ивортӥсьёсыз шуыса. Часлэсь кемагес ми Библия сярысь вераськимы. Соос веразы мыным, мар верамын Библиын со сярысь, кызьы зэмос религиез тодмано.

Маиз кельшиз тӥледлы со адямиослэн?

Мыным туж кельшиз, соос юн осконэн верало но католической Библиысь кылбуръёсты ӝог шедьто шуыса. Берлогес мон доры ветлыны кутскиз мукетыз Адӟись-Ивортӥсь — Ма́рио. Котькуд кӧснуналэ, котькыӵе куазь мед луоз, со 9 часлы ӵукна мон доры семинарие вуэ вал ини.

Кызьы мукет священникъёс учкизы Библиез дышетэмды шоры?

Мон ӵектӥ соослы но милемын ӵош Библиез дышетыны, но одӥгзы но кулэ ӧз каре. Нош мыным туж кельше вал Библиез дышетыны. Мон валэктонъёс шедьтӥ юанъёсылы, кудъёсыз кемалась монэ сюлмаськыто вал ини, кылсярысь, малы Инмар лек ужъёсты но курадӟонъёсты уг быдты.

Вылӥгес санэн священникъёс ӧз тырше-а тӥледыз Библиез дышетэмысь дугдытыны?

1975-тӥ арын мон трос пол Риме ветлӥ, аслэсьтым учконъёсме валэктон понна. Вылӥгес санэн священникъёс тыршизы мыным пумит вераны, но одӥгзы но, асьсэлэсь малпанзэс юнматон понна, Библиез ӧз усьтэ. Соин 1976-тӥ арын 9-тӥ толшоре мон Риме гожтэт гожтӥ. Гожтэтын мон верай, асме католикен уг лыдъяськы ни шуыса. Кык нунал ортчыса, мон семинариысь кошки но, поездэ пуксьыса, нырысетӥзэ Иеговалэн Адӟись-Ивортӥсьёсызлэн пумиськоназы мынӥ. Со конгресс вылэм, кудаз Иеговалэн Адӟись-Ивортӥсьёсызлэн кӧня ке кенешъёссы люкаськемын вал. Отын ваньмыз пӧртэм вал солэсь, малы мон дышемын вал. Котькуд Адӟись-Ивортӥсьлэн вал аслаз Библиез. Пӧртэм темаосъя речьёсты кылзыкузы, котькудӥз аслэсьтыз Библизэ усьяз.

Кызьы учкиз семьяды сыӵе воштӥськонъёс шоры?

Семьяысьтым тросэз мыным туж люкетӥзы. Но мон тодӥ, выны, кудӥз улэ Италилэн уйпалаз, Ломбардиын, Иеговалэн Адӟись-Ивортӥсьёсыныз Библиез дышетэ шуыса. Мон мынӥ со доры. Отысь Адӟись-Ивортӥсьёс юрттӥзы мыным улон инты но уж шедьтыны. Берлогес, со арын ик, мон пылатӥськи но Иеговалэн Адӟись-Ивортӥсез луи.

Жаляськоды-а тӥ, католической черкысь кошкиды шуыса?

Пичи но уг! Али мон шӧдӥсько, Инмарлы зэмзэ ик матэ кариськи шуыса. Азьвыл мон Инмар сярысь адямиослэн но черклэн дышетэмысьтызы гинэ тодӥсько вал, нош али тодӥсько, мар вера Библия Инмар сярысь. Табере мынам осконэ юн но мон мукет адямиосты но чылкыт сюлмын дышетыны быгатӥсько.