Вужмисьтэм визь-кенешъёс

ПУКТЭ СИН АЗЯДЫ: тӥ лыктӥды музее экскурсие. Музейтӥ ветлыкуды, тӥ адӟиськоды, тросэз арбериос туж вашкала шуыса. Соос тэшкамын, бездылэмын, нош куд-огъёсызлэн кыӵе ке но люкетэз ик уг тырмы. Но одӥгез арбери туж паймытэ. Со туж умой утиськем, солэсь пичи люкетъёссэ но пыр-поч учкыны луэ. «Таиз берлогес шедьтэмын вал-а?» — юаськоды тӥ музейын ужасьлэсь. «Ӧвӧл,— шуэ со.— Та одӥгез вашкала арбери, кудӥз одӥг пол но выльдэмын ӧй вал на». Тӥ шуиськоды: «Соку сое умой утялтыса возизы, дыр. Озьы-а?» Нош музейын ужась тӥледлы: «Ӧз. Со зор-кот улэ но шедьылӥз, пелляськись тӧл но сое ӧз быдты. Со озьы ик умой кылиз. Озьы ик лек адямиос но, кӧня сое быдтыны тыршизы, быдтыны ӧз быгатэ». Соку тӥ паймыса юаськоды: «Малэсь со лэсьтэмын?»

Библиез музейысь сыӵе вашкала арбериен ӵошатыны луоз. Зэм, асьме дырозь мукет вашкала книгаос но вуэмын. Но тросэз соос пӧлысь сузмемын. Со сяна, со, мар отын верамын котырысь дунне сярысь, пумит луэ солы, мар верало туала тодосчиос. Нош отын гожтэм эмъяськон амалъёс, тазалыклы юрттэм интые, солы изъян вайыны быгатозы. Тросэзлэн вашкала книгаослэн асьме дырозь туж пичи гинэ люкетъёсыз вуэмын.

Библия туж пӧртэм луэ мукет вашкала книгаослэсь. Сое гожъяны кутскизы ог 3500 ар талэсь азьло, но ми доры со чик воштӥськытэк вуиз. Вань со дыр ӵоже сое быдтыны тыршизы ке но — сое сутӥзы, лыдӟыны ӧз лэзе, серекъязы,— ваньзэ сое со чидаз. Тодосчиос эскеронъёс ортчытыса валало, со, мае соос тодӥзы, Библиын азьло ик гожтэмын вылэм ини шуыса. Соин ик Библиез вужмемын шуыны уз луы.

СО, МАР МИЛЕМЛЫ КУЛЭ ТУННЭ

Тӥ юалоды, дыр: «Библиысь визь-кенешъёс туала вакытэ пайда вайыны быгато-а?» Та юанлы валэктон шедьтон понна, малпаське, мар туннэ адямиослэсь улонзэс шудтэм каре? Тросэз вералозы, со ожъёс, инкуазез кырсёмытон, йыружъёс но пӧяськон шуыса. Нош табере лыдӟе улӥын сётэм Библиысь визь-кенешъёсты. Юалэ асьтэлэсь: «Улон умойгес луысал-а, адямиос та визь-кенешъёсъя улысалзы ке?»

МУКЕТЪЁСЫНЫЗ ТУПАСА УЛОН

«Тупаса улон вайисьёс шудоесь: соос Инмар пиос шуыса нимаськозы» (Матфей 5:9). «Быгатэмдыя вань адямиосын тупаса улэ» (Римъёслы 12:18).

ӞЕЧ СЯМО НО ПРОСТИТЬ КАРЫНЫ ДАСЬ ЛУОН

«Муртлы ӟеч карисьёс шудоесь: соос ӟеч каремын луозы» (Матфей 5:7). «Ог-огеныды лякытэсь, гажась-жалясесь луэ, огдылэсь огды сьӧлыкъёстэс куштэ, кызьы Инмар Христос пыр тӥлесьтыд сьӧлыкъёстэс куштӥз» (Ефесъёслы 4:32).

ПӦРТЭМ КАЛЫКЪЁСЫН ТУПАСА УЛОН

«Одӥг адями бордысь Со [Инмар] вань калыкъёсты поттӥз быдэс музъемлэн бам вылаз улон понна» (Апостолъёслэн ужъёссы 17:26). «Инмар адямиосты вылтус шоры учкыса улӥё-вылӥё уг кары. Котькуд калык пӧлысь Солэсь кышканэн, шонерлыко улӥсь муртъёс Солы кельшымонэсь-ярасесь луо» (Апостолъёслэн ужъёссы 10:34, 35).

МУЗЪЕМ СЯРЫСЬ СЮЛМАСЬКОН

«Аслэсьтыз кылдытэм адямизэ Инмар Кузё-Инмар кутӥз но сое Едем садэ улыны интыяз, сое мед утялтоз, мед утёз шуыса» (Улон-вылон 2:15). Инмар «музъемез саптасьёсты» быдтоз (Усьтӥськон 11:18).

КӦТТЫРМОСТЭМ ЛУОНЭЗ НО АЗЫСА-КАЛГЫСА УЛОНЭЗ АДӞЕМПОТОСТЭМ КАРОН

«Утиське мылкыддэс узырлык люканлы сётонлэсь, уго адямилэн улонэз ваньбурезлэн пачылэз бордысь уг поты ук» (Лука 12:15). «Азыса-калгыса улон, пӧртэм юрӟым-кырсь ужъёс, барыш люкан сярысь тӥ пӧлын вераськон ик медаз потылы. Вӧсяськись калык сыӵе ужъёсты лэсьтыны кулэ ӧвӧл» (Ефесъёслы 5:3).

ПӦЯСЬКЫТЭК УЛОН НО УЖЕЗ ЯРАТОН

«Котьмар ласянь шонер улыны тыршиськомы» (Еврейёслы 13:18). «Кин азьвыл лушкаськыса улӥз, азьланяз медаз ни лушкаськылы. Эсьмаса, умойгес мед ужалоз» (Ефесъёслы 4:28).

МУКЕТЪЁСЫЗЛЫ ЮРТТОН

«Усем мылкыдын улӥсьёслэсь мылкыдзэс ӝутэ, начаръёслы юрттӥське. Котькытын, котьма ласянь чидасесь луэ» (1 Фессалоникаослы 5:14). «Анайтэк-атайтэк кылем нылпиослы, палкышноослы ёрмыса-ӟудыса улон дыръязы [юрттӥське]» (Иаков 1:27).

Визь-кенешъёс сётэм сяна, Библия дышетэ милемыз, кызьы со визь-кенешъёсты улонамы пыртыны. Малпалэ ай, кӧня шуг-секытъёсты сэрттыны-пертчыны луысал, адямиос та визь-кенешъёсъя улысалзы ке. Адӟиське, Библиысь визь-кенешъёс трос пайда ваё. Нош кызьы Библия туннэ ик ини тӥледлы юрттыны быгатэ?

БИБЛИЫСЬ ВИЗЬ-КЕНЕШЪЁС ТУННЭ ИК ИНИ ЮРТТЫНЫ БЫГАТО

Одӥг визьмо адями вераз: «Визьлыклэн нылпиосыз визьлыклэсь шонер луонзэ возьмато» (Матфей 11:19). Соглаш-а тӥ соин? Визь-кенешлэн пайдаез но визьмо луэмез сярысь вераны луэ собере гинэ, куке со зэмзэ ик пайда вайиз. Соин ик тӥ малпаны быгатоды: «Библия пайдаё книга ке, соку мынам улонэ умойгес луыны кулэ. Кызьы со мынэсьтым шуг-секытъёсме сэрттоз-пертчоз?» Учкомы одӥг кышномуртлэсь примерзэ.

Иринаa номыр сярысь сюлмаськытэк, шумпотыса улӥз. Но одӥг пол улонэз чутрак воштӥськиз. Со бӧрсьысь бӧрсе шуг-секытъёсын пумиськиз. Нырысь солэн нылыз кулӥз, собере картэз сое куштӥз, озьы ик коньдонэн шуг-секытъёс кылдӥзы. Ирина вера: «Мон уг тодӥськы ни вал, кин мон. Мынам нылы но, картэ но, коркае но ӧй вал. Мынам киосы ик лэзиськизы. Номыр карыны но, номыр сярысь малпаськыны но кужыме ӧй вал ни».

Ирина ас вылаз шӧдӥз, Библиысь та кылъёс зэм луо шуыса: «Улоно даурмы сизьымдон ар мында, кужмоосызлэнгес — тямыстон ар; улонмылэн ӟеч адӟонэз — секыт уж, висён-курадӟон. Нуналъёсмы ӝог ортчо-кошко» (Псалтирь 89:10).

Со секыт вакытэ Ирина Библиысь юрттэт шедьтӥз. Зэм но, тросэз адямиос ас вылазы шӧдӥзы, Библиысь визь-кенешъёс шуг-секытъёсты сэрттыны-пертчыны юртто шуыса. Библия музейысь дуно чебер арбери выллем, кудӥз сярысь статьялэн кутсконаз верамы вал. Со туж пӧртэм луэ трос мукет книгаослэсь, кудъёсыз дыр ортчемъя вужмо. Маин со пӧртэм луэ? Оло соин, мар отын гожтэмын? Зэмзэ ик-а луэ оскыны, Библиын Инмарлэн малпанъёсыз гожтэмын шуыса? (1 Фессалоникаослы 2:13).

Тӥ соглаш луоды, дыр, улонмы вакчи но шуг-секытъёсын тырмемын шуыса. Куке тӥледлы тужгес но секыт луэ, кытысь тӥ визь-кенеш но юрттэт утчаськоды?

Ойдолэ тодомы, кызьы Библия юрттыны быгатэ тӥледлы. Учкомы, кызьы со:

1. шуг-секытъёслэсь уте;

2. кылдэм шуг-секытъёсты сэрттыны-пертчыны юрттэ;

3. кужым сётэ.