Иегова кылзэ сётэ музъемез райлы пӧрмытыны

1. Мае валэктэмез потэ вал Исаия пророклэн израиль калыклы?

ИСАИЯ пророк святой духлэн валтэмез улсын гожтӥз, Иегова Инмар шонерзэ гинэ вера шуыса. Тазьы Исаиялэн израиль калыклы валэктэмез потэ вал, Иеговалэн сётэм кылъёсызлы оскыны луэ шуыса. Сётэм кылъёссэ быдэстыса, Иегова возьматӥз, со озьы ик вань шуыса.

2. Малы ми оскыны быгатӥськомы Иеговалэн кылсётонъёсызлы но мае ми эскеромы та статьяын?

² Малы ми оскыны быгатӥськомы Иеговалэн кылсётонъёсызлы? Исаия улон нуналъёс бере ог 800 ар ортчыса, апостол Павел валэктӥз, малы Иеговалэн сётэм кылъёсызлы оскыны луэ. Со вераз, Инмар сётэм кылъёсызлэсь «уг куштӥськы» шуыса (Евр. 6:18). Ми тодӥськомы, яблокпу вылын палэзь уг буды шуыса. Ӵапак озьы ик Иегова, зэмлыклэн Инмарез, бордысь пӧяськон потыны уг быгаты. Озьыен, Инмарлэн вань верам кылъёсызлы оскыны луэ. Та статьяысь ми тодомы, кыӵе улон луоз азьланяз Иеговалэн верамезъя но малы ми оскыны быгатӥськомы, со озьы ик луоз шуыса.

МАР КАРЫНЫ КЫЛЗЭ СЁТЭ ИЕГОВА?

3. а) Кыӵе азьпалзэ ивортон туж кельше Инмарлэн вань ужась-тыршисьёсызлы? (Усьтӥськон 21:3, 4). б) Оско-а адямиос та кылсётонлы?

³ Ми эскеромы азьпалзэ ивортонэз, кудӥз туж кельше Инмарлэн вань ужась-тыршисьёсызлы. (Лыдӟе Усьтӥськонэз 21:3, 4.) Иеговалэн верамезъя, вуоз сыӵе дыр, куке «кулон уз ни луы, бӧрдон но, викышъян но, висён но уз ни луэ». Куке ми адямиослы вераськомы, кыӵе улон луоз райын, ӵем дыръя ми та кылъёсты лыдӟиськомы. Оско-а адямиос та кылъёслы? Куд-огъёсыз верало: «Со выжыкыл гинэ».

4. а) Мае азьло ик тодӥз Иегова? б) Мар кариз на Иегова, кылзэ сётэм сяна?

⁴ Иегова азьло ик тодӥз, тодытыкумы ми адямиослы Усьтӥськон книгаысь азьпалзэ ивортон сярысь вераломы шуыса. Озьы ик со азьло ик тодӥз, тросэзлы та кылъёслы оскыны секыт луоз шуыса (Ис. 42:9; 60:2; 2 Кор. 4:3, 4). Соку кызьы ми мукетъёсызлэсь но, асьмелэсь но осконмес юнматыны быгатӥськомы, Усьтӥськонын 21:3, 4 гожтэм кылъёс одно ик быдэсмозы шуыса? Иегова калыкез бакель карыны кылзэ гинэ ӧз сёты, со валэктӥз, малы ми солы оскыны быгатӥськомы. Ойдолэ эскеромы со мугъёсты.

ИЕГОВА ОСКЫТЭ, СЁТЭМ КЫЛЗЭ БЫДЭСТОЗ ШУЫСА

5. Кыӵе кылбуръёс возьмато, Иеговалэн кылсётонэзлы оскыны луэ шуыса?

⁵ Усьтӥськонын 21:5, 6 вераське, малы милям оскеммы луэ Иеговалэн кылсётонэзлы музъемез райлы пӧрмытыны. Отын гожтэмын: «Престол вылын Пукись шуиз: „Тани, Мон ваньзэ выльзэ кылдытӥсько“. Собере Со мыным шуиз: „Гожты, та кылъёс зэмесь, шонересь уго“. Мыным шуиз: „Быдэсмиз! Мон — Альфа но Омега, Кутсконэз но, Пумыз но“».

6. Кызьы Усьтӥськонын 21:5, 6 гожтэм кылъёс осконмес юнмато, Иеговалэн кылсётонэз быдэсмоз шуыса?

⁶ Та кылбуръёс осконмес юнмато, Иеговалэн кылсётонэз одно ик быдэсмоз шуыса. Тани мар соос сярысь вераське одӥгаз книгаямы: «Иегова кылзэ сётэ оскымон адямиоссэ бакель карыны но аслаз кылъёсыз улын гожтӥське кадь»b. Усьтӥськон 21:3, 4 — со Иеговалэн кылсётонэз, нош Усьтӥськон 21:5, 6 — солэн гожтӥськемез кадь. Со возьматэ, Иеговалэн кылъёсыз одно ик быдэсмозы шуыса. Ойдолэ пыр-почгес эскеромы 5-тӥ но 6-тӥ кылбуръёсты.

7. Кин сярысь вераське 5-тӥ кылбурлэн кутсконаз но малы со осконмес юнматэ?

⁷ Тани кызьы кутске 5-тӥ кылбур: «Престол вылын Пукись шуиз» (Усьт. 21:5а). Усьтӥськон книгаын куинь пол гинэ гожтэмын, кызьы ачиз Иегова адямиослы вазиське. Та соос пӧлысь одӥгез. Озьыен, та кылъёсты кылчин яке улӟытэм Иисус уг вера, нош ачиз Иегова вера. Нош со «верам кылзэ котьку но быдэсъясь Инмар» (Тит. 1:2). Кызьы ми адӟимы, 5-тӥ кылбурлэн кутсконэз милемыз оскытэ, Усьтӥськонын 21:5, 6 гожтэм кылъёслы быдэсак оскыны луэ шуыса.

«ТАНИ, МОН ВАНЬЗЭ ВЫЛЬЗЭ КЫЛДЫТӤСЬКО!»

8. Кызьы Иегова возьматэ, солэн кылсётонэз быдэсмоз шуыса? (Исаия 46:10).

⁸ Табере пыр-почгес эскеромы «Тани, Мон ваньзэ выльзэ кылдытӥсько!» верамез (Усьт. 21:5). Нырысь ик Библиысь та интыын гожтэмын вал кыл, кудзэ берыктыны луэ «учкы» яке «кылзы» шуыса. Та кыл Усьтӥськон книгаын трос пол пумиськылэ. Одӥг справочникын гожтэмъя, та кылэз кутыса, кылзӥсьёслэсь саклыксэс висъяло вал солы, мар собере гожтэмын. Нош мар отын гожтэмын? Иегова вера: «Мон кылдытӥсько». Со уг вера, «Мон кылдыто» шуыса. Инмар вера вуоно воштӥськонъёс сярысь быдэсмем воштӥськонъёс сярысь кадь. Озьыен, Иеговалэн малпанэз но уг кылды, солэн кылсётонэз уз быдэсмы шуыса. (Лыдӟе Исаиялэсь 46:10.)

9. а) Кызьы Иегова ваньзэ выльзэ кылдытоз? б) Мар луоз туала «инмен» но «музъемен»?

⁹ Ойдолэ эшшо огпол саклыкмес висъяломы «Тани, Мон ваньзэ выльзэ кылдытӥсько!» верамлы. Кызьы Иегова ваньзэ выльзэ кылдытоз? Мае ке но со вылезлы воштоз, нош мае ке но тупатоз. Мае Иегова воштоз? Усьтӥськонын 21:1 гожтэмын: «Азьвылэз ин но, азьвылэз музъем но ортчизы-кошкизы». «Азьвылэз ин» возьматэ дунне вылысь кивалтэтъёсты, кудъёсыз Шайтанлэн но периослэн киулазы возисько (Матф. 4:8, 9; 1 Иоанн 5:19). Нош Библиысь «музъем» кыл музъем вылын улӥсь адямиосты возьматыны быгатэ (1 Пар. 16:31; Пс. 95:1). Озьыен, «азьвылэз музъем» — со асьме нуналъёсы улӥсь лек адямиос. Иегова туала «инмез» но «музъемез» тупатъяса уз улы. Со соосты быдтоз. Соос воштэмын луозы «выль инлы но выль музъемлы» — выль кивалтэтлы но выль адямиослы.

10. Мае Иегова тупатоз?

¹⁰ Но Иегова ваньзэ уз быдты — мае ке но со тупатоз, выльдоз (Усьт. 21:5). Иегова музъемез райлы пӧрмытоз но адямиосты тырбыдэс кароз. Исаия пророк азьло ик вераз, музъеммы нош ик чебер Едем сад кадь луоз шуыса. Ми пӧлысь котькудӥз шӧдоз, кызьы со бурме но солы кужым пыре. Чутъёс, синтэмъёс но пельтэмъёс бурмозы. Кулэмъёс но улӟозы! (Ис. 25:8; 35:1—7).

«ТА КЫЛЪЁС ЗЭМЕСЬ, ШОНЕРЕСЬ». «БЫДЭСМИЗ!»

11. Мар карыны Иегова куриз Иоаннэз но малы?

¹¹ Мае эшшо вераз на Иегова, ми солы оскыны мед быгатомы шуыса? Инмар Иоаннлы шуиз: «Гожты, та кылъёс зэмесь, шонересь уго» (Усьт. 21:5). Инмар «гожты» шуыса гинэ ӧз вера, озьы ик со вераз, малы сое гожтыны кулэ: «Та кылъёс зэмесь, шонересь уго». Ми туж шумпотӥськомы, Иоанн Инмарлэсь кылзӥськиз шуыса. Малы ке шуоно али ми лыдӟыны быгатӥськомы Иеговалэн музъемез райлы пӧрмытыны кылсётонэз сярысь но малпаськыны быгатӥськомы вуоно бакель каронъёс сярысь.

12. Малы Иегова вераз: «Быдэсмиз!»?

¹² Мар Инмар вераз собере? «Быдэсмиз!» (Усьт. 21:6). Музъем вылын рай ӧвӧл на ке но, Иегова со сярысь вера, со али ик вань кадь ини. Инмар озьы вераны быгатэ, малы ке шуоно нокин но номыр уг быгаты солы люкетыны аслэсьтыз малпанзэ быдэстыны. Собере Иегова эшшо мае ке вера, мар милемыз оскытэ, солэн кылсётонэз одно ик быдэсмоз шуыса.

«МОН — АЛЬФА НО ОМЕГА»

13. Малы Иегова вераз: «Мон — Альфа но Омега»?

¹³ Кызьы ми тодӥмы ини, Усьтӥськон книгаын куинь пол гожтэмын, кызьы ачиз Иегова адямиослы вазиське (Усьт. 1:8; 21:5, 6; 22:13). Котькуд учырын Иегова шуэ: «Мон — Альфа но Омега». Альфа — грек алфавитысь нырысетӥез буква, нош омега — берпуметӥез. «Альфа но Омега» шуыса, Иегова возьматэ, со кутскем ужзэ котьку но пумозяз вуттэ шуыса.

14. а) Валэктэ, ку Иегова «Альфа» шуиз, нош ку со «Омега» шуоз. б) Кызьы Улон-вылонын 2:1—3 гожтэм кылъёс Иеговалэн кылсётонэзлы осконмес юнмато?

¹⁴ Адамез но Еваез кылдытыкуз, Иегова адямиос но музъем пумысен аслаз малпанэз сярысь вераз. Со сярысь Библиын тазьы гожтэмын: «Инмар соосты бакель карыса шуиз: „Йылэ, трос луэ, музъемез тырмытэ, сое киулады кутэ“» (Ул.-выл. 1:28). Вераны луоз, соку Иегова «Альфа» шуиз. Нош куке Адамлэн но Евалэн тырбыдэс кылзӥськись нылпиоссы музъемез тырмытозы но сое райлы пӧрмытозы, вераны луоз, Иегова «Омега» шуоз. Инмез но музъемез кылдытэмез бере ик Инмар возьматӥз, солэн малпанэз одно ик быдэсмоз шуыса. Со сярысь гожтэмын Улон-вылонын 2:1—3 (лыдӟе). Отын вераське, Иегова сизьыметӥ нуналэз дун-чылкыт кариз шуыса. Озьы Инмар возьматӥз, сизьыметӥ нуналлэн пумаз солэн малпанэз быдэсмоз шуыса.

15. Малы малпаны луэ вал, Шайтанэн сэрен Инмарлэн малпанэз уз быдэсмы шуыса?

¹⁵ Куке Адам но Ева Инмарлы пумит ӝутскизы, соос сьӧлыкоесь луизы. Сьӧлык но кулон нылпиоссылы но выжиз (Рим. 5:12). Возьматэ вал-а та, Иеговалэн адямиос но музъем пумысен малпанэз ноку уз быдэсмы ни но тырбыдэс, кылзӥськись адямиос музъемез ноку уз тырмытэ ни шуыса? Зэм-а Шайтанэн сэрен Инмар аслэсьтыз малпанзэ быдэстыны уз быгаты? Шайтан малпаз, вылды, Инмар Адамез но Еваез быдтоз но соос интые мукет тырбыдэс адямиосты кылдытоз шуыса. Но Иегова озьы лэсьтысал ке, Шайтан верасал, Инмар пӧяське шуыса. Малы? Малы ке шуоно, Улон-вылонын 1:28 гожтэмъя, Иегова вераз, Адамлэн но Евалэн нылпиоссы музъемез тырмытозы шуыса.

16. Малы Шайтан малпаны быгатэ вал, Иегова кутскем ужзэ быдэстыны уз быгаты шуыса?

¹⁶ Со сяна, Шайтан тазьы малпаны быгатэ вал: Иегова Адамлы но Евалы нылпиос вордыны лэзиз ке но, соос тырбыдэсэсь ноку уз луэ (Екк. 7:20; Рим. 3:23). Озьы луысал ке, Шайтан Иеговаез янгыше уськытысал, со кутскем ужзэ пумозяз вуттыны уг быгаты шуыса. Малы? Малы ке шуоно соку рай музъемез тырбыдэс, кылзӥськись адямиос ноку ӧй тырмытысалзы.

17. Мар кариз Иегова, малпанзэ быдэстон понна, но маин ваньмыз йылпумъяськоз? (Озьы ик учке суредэз.)

¹⁷ Шайтан ӧз но малпа, мар Иегова карыны быгатэ (Пс. 91:6). Инмар лэзиз Адамлы но Евалы нылпиосты вордыны. Соин ик Шайтан ӧз быгаты Инмарез янгыше уськытыны, со пӧяське шуыса. Со сяна, Инмар сюлмаськиз, «кидыс выжы» мед потоз шуыса, кудӥз адямиос понна аслэсьтыз улонзэ сётоз но Адамлэсь но Евалэсь кылзӥськись нылпиоссэс утёз (Ул.-выл. 3:15; 22:18). Соин ик Шайтан ӧз быгаты Иеговаез янгыше уськытыны, со кутскем ужзэ пумозяз вуттыны уг быгаты шуыса. Шайтан ӧз но малпа, Иегова, аслэсьтыз малпанзэ быдэстон понна, сыӵе амал шедьтоз шуыса. Малы? Малы ке шуоно ваньзэ тае лэсьтыны Иеговалэсь мылкыдзэ ӝутӥз яратон (Матф. 20:28; Иоанн 3:16). Нош Шайтанлэн сыӵе яратонэз ӧвӧл. Со ассэ гинэ яратэ. Кыӵе пайда ваёз Иисуслэн адямиос понна кулэмез? Христослэн сюрс ар ӵоже кивалтонэзлэн пумаз рай музъем вылын Адамлэн но Евалэн тырбыдэс но кылзӥськись нылпиоссы улозы. Ваньмыз луоз озьы, кызьы Инмар нырысь ик малпаз вал. Вераны луоз, соку Иегова «Омега» шуоз.

КЫЗЬЫ ОСКОНМЕС ЮНМАТОНО, ИЕГОВА КЫЛСЁТОНЗЭ БЫДЭСТОЗ ШУЫСА

18. Малы милям оскеммы луэ, музъем райлы пӧрмоз шуыса? (Озьы ик учке «Малы оскыны луэ Иеговалэн кылсётонэзлы» рамкаез.)

¹⁸ Та статьяын ми эскеримы, малы милям оскеммы луэ, музъем райлы пӧрмоз шуыса. Нырысетӥез, ачиз Иегова кылзэ сётэ, озьы луоз шуыса. Усьтӥськон книгаын гожтэмын: «Престол вылын Пукись шуиз: „Тани, Мон ваньзэ выльзэ кылдытӥсько“». Кылсётонзэ быдэстон понна, Инмарлэн визьлыкез но, кужымез но, мылкыдыз но вань. Кыкетӥез, Иегова тодэ, верам кылъёсыз одно ик быдэсмозы шуыса. Соин ик со вераз: «Та кылъёс зэмесь, шонересь» но «Быдэсмиз!» Куинетӥез, Иегова кутскем ужзэ котьку но пумозяз вуттэ. Соин ик со ассэ «Альфа но Омега» шуыса нима. Иегова возьматоз, Шайтан пӧяське шуыса. Озьы ик валамон луоз, Инмарлэн малпанэзлы быдэсмыны Шайтан люкетыны уг быгаты шуыса.

19. Мар карыны луэ, адямилы секыт ке оскыны, Инмар музъемез райлы пӧрмытоз шуыса?

¹⁹ Эн вунэтэ: мукетъёсызлы Инмарлэн кылсётонъёсыз сярысь вераса, тӥляд асьтэлэн Иеговалы осконды юнма. Нош мар карыны луоз, куке тӥ адямилы Усьтӥськонэз 21:4 лыдӟиды, нош со вера, «та выжыкыл гинэ» шуыса? Быгатоды-а тӥ солы лыдӟыны но валэктыны Усьтӥськонэз 21:5, 6? Возьматэ, кызьы Иегова кылзэ сётэ верам кылъёссэ быдэстыны (Ис. 45:19).