Кенешлэн пумиськонъёсаз ог-огдылэсь мылкыддэс ӝутэ

1. Малы ми кенешлэн пумиськонъёсаз валэктонъёс сётъяськомы?

МАЛЫ ми кенешлэн пумиськонъёсаз ветлӥськомы? Нырысь ик ми Иеговаез данъяськомы (Пс. 25:12; 110:1). Со сяна, ми пумиськонъёсы ветлӥськомы, та секыт дыръёсы ог-огмылэсь мылкыдмес ӝутон понна (1 Фес. 5:11). Ваньзэ тае лэсьтыны луэ, кимес ӝутыса но валэктонъёс сётъяса.

2. Ку ми валэктонъёс сётъяны быгатӥськомы?

² Котькуд арняе милям луонлыкмы вань кенешлэн пумиськонъёсаз валэктонъёс сётъяны. Кылсярысь, шутэтскон нуналъёсы ми «Возьмаськон башняысь» статьяез эскеронэ пыриськиськомы. Нош арня куспын ортчытӥськись пумиськонын ми валэктонъёс сётъяськомы таӵе пунктъёсын: «Духовной марӟанъёс», «Кенешын Библиез дышетон» но мукет пунктъёс дыръя, кудъёсаз пумиськонэ лыктэмъёслы юанъёс сётъяло.

3. Кыӵе шуг-секытъёс куддыръя кылдо, валэктонъёс сётъяку, но кызьы милемлы юрттыны быгато кылъёс, кудъёсыз гожтэмын Еврейёслы 10:24, 25?

³ Ваньмылэн милям потэ Иеговаез данъяммы, озьы ик вын-агайёсмылэсь но сузэр-апайёсмылэсь мылкыдзэс ӝутэммы. Но валэктонъёс сётъяку, шуг-секытъёс кылдыны быгато. Оло нош, ми кышкаськомы валэктонъёс сётъяны. Яке милям валэктонъёс сётъяммы туж потэ, но милемыз сокем ӵем уг юало. Мар кароно та шуг-секытъёсын? Валэктон ми шедьтомы апостол Павеллэн кылъёсысьтыз. Куке со Еврейёслы гожтэтаз вераз, макем кулэ пумиськонъёсы ветлыны, христианъёслы со шуиз: «Огмылэсь огмы мылкыдмес лӧпкытыломе». (Лыдӟе Еврейёслы 10:24, 25.) Милемлы кимес ӝутыны капчигес луоз, ми валамы ке, осконмес возьматӥсь огшоры кылъёсмы но огъя оскисьёсмылэсь мылкыдзэс ӝутыны быгато шуыса. Нош милемыз сокем ӵем уг юало ке, милям шумпотэммы луэ, мукетъёсызлэн валэктонъёс сётъямзы луэ шуыса (1 Пётр 3:8).

4. Мае ми эскеромы та статьяын?

⁴ Та статьяын нырысь ми эскеромы, кызьы ог-огмылэсь мылкыдмес ӝутыны луэ пичи кенешын, кытын эскеронэ пыриськисьёс туж ик трос ӧвӧл. Со сяна, ми вераськомы, кызьы ог-огмылэсь мылкыдмес ӝутыны луэ бадӟым кенешын, кытын трос вын-агайёслэн но сузэр-апайёслэн валэктон сётэмзы потэ. Со сяна, ми тодомы, мар вераны луэ, валэктон сётыкумы, ог-огмылэсь мылкыдмес ӝутон понна.

ПИЧИ КЕНЕШЫН ОГ-ОГДЫЛЭСЬ МЫЛКЫДДЭС ӜУТЭ

5. Мар ми карыны быгатӥськомы, ог-огмылэсь мылкыдмес ӝутон понна, кенешлэн пумиськоназ трос адямиос ӧвӧл ке?

⁵ Пичи кенешын яке группаын валэктон сётъясьёс туж ик трос ӧвӧл. Соин ик эскеронэз нуись агайлы куддыръя возьмано луэ кинлэсь ке кизэ ӝутэмзэ. Таин сэрен малпан кылдыны быгатэ, эскерон туж каллен ортчытӥське шуыса. Нош та мылкыдэз уг ӝуты. Мар тӥ карыны быгатӥськоды? Дась луэ кидэс ӵемгес ӝутъяны. Со мукетъёсызлэсь но мылкыдзэс ӝутоз эскеронэ тросгес пыриськыны.

6, 7. Мар карыны луэ, валэктон сётыку, ӧжытгес сюлмаськон понна?

⁶ Нош мар кароно, валэктон сётоно шуыса малпаса гинэ но, тӥ сюлмаськыны кутскиськоды ке? Та тросэзлы тодмо. Озьы ке но умой луысал сюлмаськонэз вормыны. Малы ке шуоно, валэктонъёс сётъяса, ми тросгес вын-агайёслэсь но сузэр-апайёслэсь мылкыдзэс ӝутыны быгатомы. Мар тӥляд каремды луэ?

⁷ Тодады вае визь-кенешъёсты, кудъёсыз гожтэмын вал «Возьмаськон башнялэн» азьвыл поттэмъёсазb. Кылсярысь, умой дасяське (Мад. 21:5). Эскероно материалэн умой тодматскиды ке, соку кидэс ӝутыны капчигес луоз. Со сяна, вакчиесь валэктонъёс сётъялэ (Мад. 15:23; 17:27). Валэктонды вакчигес луиз ке, сюлмаськоно но трос уз луы. Трос малпанъёс верам интые, тырше одӥг-кык предложение вераны. Соку вын-агайёслы но сузэр-апайёслы тӥледыз валаны капчигес луоз, дыр. Вакчи но асьтэ кылъёсыныды валэктонъёс сётъяса, тӥ возьматоды, умой дасяськиды но эскероно материалэз умой валаськоды шуыса.

8. Кызьы Иегова учке тыршеммы шоры?

⁸ Шуом, тӥ куд-ог визь-кенешъёсты уже кутӥды, озьы ке но сюлмаськонды уг быры но одӥг-кык поллэсь тросгес валэктон сётыны тӥледлы секыт. Мар соку кароно? Юн оске, Иегова тыршемдэс дунъялоз шуыса (Лука 21:1—4). Со уг куры тӥледыз быгатэмдылэсь тросгес лэсьтыны (Пс. 102:14). Малпалэ, мае тӥ карыны быгатӥськоды. Ас азяды ужпум пуктэ но Иеговалэсь юрттэт куре каньыл сюлмын улыны. Нырысь ужпум пуктыны луэ одӥг ке но вакчи валэктон сётыны.

БАДӞЫМ КЕНЕШЫН ОГ-ОГДЫЛЭСЬ МЫЛКЫДДЭС ӜУТЭ

9. Кыӵе шуг-секыт кылдыны быгатэ бадӟым кенешын?

⁹ Бадӟым кенешын мукет шуг-секыт кылдыны быгатэ. Оло нош, трос вын-агайёслэн но сузэр-апайёслэн валэктон сётэмзы потэ, соин ик тӥлесьтыд кидэс уг адӟо. Кылсярысь, Даниэ́ллаc сузэрлы туж кельше пумиськонъёсын валэктонъёс сётъяны. Тае со Инмарлы йыбыртъянэн лыдъя. Валэктонъёс сётъян шоры со учке луонлык шоры кадь, кудӥз юрттэ солы мукетъёсызлэсь мылкыдзэс ӝутыны но Библиысь зэмлыкъёслы аслэсьтыз осконзэ юнматыны. Но куке со бадӟымгес кенеше выжиз, сое шергес юаны кутскизы, нош куддыръя воксё ӧз юалэ. Сузэрмы шуэ: «Мынам кӧты туж ӝож луиз. Мыным потӥз, Иеговаез данъян понна одӥгзэ луонлыкез мон ыштӥ шуыса. Куке тон пумиськонысь пумиськонэ валэктон сётыны уд быгатӥськы, малпан кылдэ, тонэ юри уг юало шуыса».

10. Мар карыны луэ, милемыз пумиськонын мед юалозы шуыса?

¹⁰ Тӥ куке но асьтэды Даниэлла сямен шӧдӥды-а? Шӧдӥды ке, сыӵе дыре номыр карем но номыр верам уг поты ни, вылды. Но азьланяз но тырше валэктон сётыны. Мар тӥ карыны быгатӥськоды? Кылсярысь, котькуд пумиськонлы кӧня ке валэктонъёс дасялэ. Тӥледыз эскеронлэн кутсконаз ӧз юалэ ке, тӥ быгатоды берлогес валэктон сётыны. «Возьмаськон башняез» эскеронлы дасяськыкуды, малпаське, кызьы котькуд абзац статьялэн темаеныз герӟаськемын. Соку тӥ трос умой валэктонъёс дасяны быгатоды. Со сяна, дасялэ валэктонъёс сыӵе абзацъёслы, кудъёсаз мур зэмлыкъёс эскерисько (1 Кор. 2:10). Сыӵе абзацъёсты валэктыны секытгес бере, валэктонъёс сётыны мылкыд карисьёс ӧжытгес луозы, вылды. Нош мар кароно, куке тӥ та визь-кенешъёсты уже кутӥды, но тӥледыз кӧня ке пумиськонъёс ӵоже ини уг юало? Соку вуоно пумиськон азьын эскеронэз ортчытӥсь агайлы вералэ, кыӵе юанлы валэктон сётэмды потэ.

11. Мар карыны мылкыдмес ӝуто кылъёс, кудъёсыз гожтэмын Филиппыослы 2:4?

¹¹ Лыдӟе Филиппыослы 2:4. Святой духлэн валтэмез улсын апостол Павел христианъёслэсь мылкыдзэс ӝутӥз мукетъёсыз сярысь сюлмаськыны. Кызьы ми Павеллэсь кылъёссэ кенешлэн пумиськонъёсаз уже кутыны быгатӥськомы? Со понна тодамы возёно, мукетъёсызлэн но эскеронэ пыриськемзы потэ шуыса.

12. Кызьы ми кенешлэн пумиськонъёсаз мукетъёсызлэсь мылкыдзэс ӝутыны быгатӥськомы? (Озьы ик учке суредэз.)

¹² Учке та шоры тазьы. Эшъёсыныды пумиськыкуды, тӥ гинэ вераськоды-а, эшъёстылы пал кыл вераны но сётытэк? Уд, тӥ асьтэды тазьы уд возе! Тӥляд потэ, эшъёсты но мед вераськозы шуыса. Ӵапак озьы ик милям потэ, кенешлэн пумиськонъёсаз но тросгес вын-агайёсмы но сузэр-апайёсмы валэктонъёс сётыны мед быгатозы шуыса. Одӥгез тужгес но умой амал, кызьы мукетъёсызлэсь мылкыдзэс ӝутыны луэ,— соослы луонлык сётоно осконзэс возьматыны (1 Кор. 10:24). Ойдолэ учкомы, мар ми карыны быгатӥськомы.

13. Мар карыны луэ, тросгес вын-агайёс но сузэр-апайёс пумиськонын эскеронэ пыриськыны мед быгатозы шуыса?

¹³ Тросгес вын-агайёс но сузэр-апайёс пумиськонын эскеронэ пыриськыны мед быгатозы шуыса, вакчиесь валэктонъёс сётъялэ. Та пумысен тӧроос но мукет быгатӥсь ивортӥсьёс адӟем карон возьматыны быгато. Вакчиесь валэктонъёс сётыкуды но, трос малпанъёсты вераны эн тырше. Абзацысь вань малпанъёсты верады ке, мукетъёсыз номыр ватсаны уз быгатэ ни. Кылсярысь, та абзацын кык визь-кенеш гожтэмын: вакчиесь валэктонъёс сётъяно но трос малпанъёс верано ӧвӧл. Та абзацлы нырысь ик тонэ юазы ке, умой луоз та малпанъёс пӧлысь одӥгзэ гинэ вераны.

14. Мае лыдэ басьтоно, валан понна, макем ӵем кимес ӝутъяно? (Озьы ик учке суредэз.)

¹⁴ Валан понна, макем ӵем кимес ӝутъяно, тани мар сярысь малпаське. Ми кимес укыр трос ӝутъямы ке, эскеронэз ортчытӥсь агайлэн малпанэз кылдоз, со милемыз гинэ ялан юаны кулэ шуыса. Нош мукетъёсызлэн кизэс ӝутъямзы уз поты ни (Екк. 3:7).

15. а) Кызьы асьмеды возёно, милемыз ӧз юалэ ке? б) Кызьы эскеронэз ортчытӥсь агай ваньмызлы саклыксэ висъяны быгатэ? (Учке «Мае лыдэ басьтоно эскеронэз ортчытӥсь агайлы» рамкаез.)

¹⁵ Куке пумиськонын трос вын-агайёслэн но сузэр-апайёслэн валэктон сётэмзы потэ, кидэс ӝутыкуды, тӥледыз котьку ик уз юалэ, дыр. Оло нош, пумиськон куспын тӥледыз одӥг пол но юаны уз вуэ. Таин сэрен мылкыд куашканы быгатэ, но эн малпалэ, тӥледыз юри уг юало шуыса (Екк. 7:9).

16. Кызьы ми валэктон сётӥсьёслэсь мылкыдзэ ӝутыны быгатӥськомы?

¹⁶ Мар тӥляд каремды луэ, кидэс ӝутыкуды, тӥледыз уз юалэ ке? Сак кылзэ соосты, кинъёс валэктон сёто. Пумиськон бере соосты ушъялэ. Валэктонъёс сямен ик, ушъян кылъёс вын-агайёслэсь но сузэр-апайёслэсь мылкыдзэс ӝутыны быгато (Мад. 10:21). Ушъян кылъёсты вераса но, ми ог-огмес юнматыны быгатӥськомы.

КЫЗЬЫ ЭШШО ОГ-ОГМЫЛЭСЬ МЫЛКЫДМЕС ӜУТЫНЫ ЛУЭ

17. а) Кызьы анай-атайёс нылпиоссылы юрттыны быгато валэктонъёс дасяны? б) Кыӵе ньыль вамышъёс юрттозы валэктон дасяны? (Учке сноскаез.)

¹⁷ Кызьы эшшо пумиськонъёсын ми ог-огмылэсь мылкыдмес ӝутыны быгатӥськомы? Тӥляд нылпиосты вань ке, арлыдзэс лыдэ басьтыса, юрттэ соослы валэктонъёс дасяны (Матф. 21:16). Куддыръя пумиськонын мур юанъёс эскерисько. Кылсярысь, вераське кузпалъёслэн шуг-секытъёссы сярысь яке вылӥ эсэпъёс сярысь. Но ӵем дыръя статьяын луо одӥг-кык абзацъёс, кудъёсызлы нылпиос но валэктон сётыны быгато. Со сяна, нылпиостылы валаны юрттэ, малы, кизэс ӝутыкузы, соосты котьку ик уз юалэ. Куке нылпиосты тае валалозы, соку, соосты ӧз юалэ ке, соослэн мылкыдзы уз куашка (1 Тим. 6:18)d.

18. Мар кароно, валэктон сётыкумы, асьмелы укыр трос саклык медам висъялэ шуыса? (Мадёнъёс 27:2).

¹⁸ Ваньмы ми быгатӥськомы сётыны мылкыдэз ӝутӥсь валэктонъёс, кудъёсыз Иеговаез данъялозы но огъя оскисьёсмес юнматозы (Мад. 25:11). Куддыръя ми быгатӥськомы асьмелэсь учырмес вераны. Но ачид сярысь укыр трос верано ӧвӧл (лыдӟе Мадёнъёсты 27:2; 2 Кор. 10:18). Умой луоз саклыкмес висъяны Иеговалы, солэн Кылызлы но калыкезлы (Усьт. 4:11). Но номыр умойтэмез ӧвӧл, куке, юанлы валэктон сётон понна, шӧдонъёсмы сярысь верано. Кылсярысь, ӵапак сыӵе юан луоз та статьяысь вуоно абзацлы.

19. а) Кыӵе пайда ваёз, пумиськонъёсын мукетъёсыз сярысь сюлмаськимы ке? (Римъёслы 1:11, 12). б) Малы тӥледлы кельше кенешлэн пумиськонъёсаз валэктонъёс сётъяны?

¹⁹ Валэктонъёс сётъян пумысен чурыт курон-косонъёс ӧвӧл ке но, ваньмылы тыршоно, валэктонъёс сётъяса, ог-огмылэсь мылкыдмес ӝутыны. Кызьы сое кароно? Куддыръя умой луоз валэктонъёс ӵемгес сётъяны. Нош куддыръя шумпотоно солы, кӧня валэктонъёс ми сётыны быгатӥмы. Озьы ик шумпотоно солы, мукетъёсыз эскеронэ пыриськыны быгатӥзы шуыса. Пумиськонъёсын ми мукетъёсыз сярысь сюлмаськимы ке, соку «осконэнымы огмес огмы юнматыны» быгатомы. (Лыдӟе Римъёслы 1:11, 12.)