«Улон но ужан-тыршон» ужан тетрадьлы малпанъёс
2—8-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАТФЕЙ 26
Духовной марӟанъёсты утчаськомы
(Матфей 26:17) Юмал нянь сиёнлэн нырысетӥ нуналаз ик Иисус доры дышетскисьёсыз лыктыса шуизы: «Кытчы Тыныд Пасхалы ыжпиез вандыса дасяны косӥськод?»
nwtsty эскерон понна материал (Мф 26:17)
Юмал нянь сиёнлэн нырысетӥ нуналаз Юмал нянь сиён праздник сизьым нунал кыстӥське вал. Со кутске вал 15-тӥ нисанэ, Пасха бере мукет нуналаз, кудзэ 14-тӥ нисанэ пусъё вал. (Учкы sgd-U 19 ёзэт.) Нош Иисус улон дыръя Пасха та праздникен туж герӟаськемын вал, соин ик вань тямыс нуналъёсты, 14-тӥ нисанэз но, куддыръя «Юмал Нянь Сиён праздник» шуыса верало вал (Лк 22:1). Соин та кылбурын гожтэм грек веранэз, кудӥз «нырысетӥ нуналаз» шуыса берыктэмын, озьы ик «нуналлы талэсь азьло» шуыса берыктыны луэ на. (Ӵошаты Ин 1:15, 30, кытын про́тос грек кыл («нырысетӥ») со выллем учыръёсын «азьло» но «азьвыл» шуыса берыктэмын.) Грек кылын гожтэмез но иудейёслэсь та учыр шоры учкемзэс лыдэ басьтыса, малпаны луоз, дышетскисьёс Иисуслы та юанэз 13-тӥ нисанэ сётӥзы шуыса. 13-тӥ нисанэ нуназе соос Пасхаез пусъёнлы ваньзэ дасязы. Нош пусйизы сое, куке «ӝыт вуиз», 14-тӥ нисанэ ини (Мк 14:16, 17).
(Матфей 26:39) Ӧжытак палэнэ кошкиз но, музъем вылэ ымныр вылаз выдыса, вӧсяськыса шуиз: «Атае! Луоно ке, Мон вӧзтӥ мед ортчысал та чаша; но, Мыным кызьы кулэ, озьы эн кар, озьы кар, кызьы Тыныд кулэ».
nwtsty эскерон понна материал (Мф 26:39)
Мон вӧзтӥ мед ортчысал та чаша Библиын «чаша» кыл ӵем дыръя кыӵе ке адями пумысен Инмарлэсь эриксэ возьматэ. Веранэз ӧвӧл, Иисус туж куректӥз, сое Инмарез сантэмась но бугыръяськись адямиез кадь виизы ке, Инмарлэн нимыз саптамын луоз шуыса. Соин ик со вӧсяськиз, луэ ке, та «чаша» со вӧзтӥ мед ортчоз шуыса.
9—15-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАТФЕЙ 27, 28
Духовной марӟанъёсты утчаськомы
(Матфей 27:51) Со куспын ик храм пушкысь катанчи йылысеныз улӥозяз шорияк кесиськиз; музъем зурказ, изъёс пильылӥськизы.
nwtsty эскерон понна материал (Мф 27:51)
катанчи Та чебер пужыятэм катанчи храмын Святой интыез Святойлэсь но Святой интылэсь висъяз. Иудейёслэн вашкала верамъёсысьтызы адӟиське, катанчи туж секыт вал шуыса. Солэн кузьдалаез ог 18 метр вал, пасьталаез — ог 9 метр, зӧкталаез — ог 7 сантиметр. Катанчиез шорияк кесьыса, Иегова Пизэ виисьёслы вожпотэмзэ возьматӥз. Со сяна, со возьматӥз, табере инме тубыны луонлык вань шуыса (Евр 10:19, 20).
храм Татын нао́с грек кыл возьматэ храмлэн юртъёсыз пӧлысь валтӥсь юртэз, кытын Святой инты но Святойлэсь но Святой инты вал.
(Матфей 28:7) Ӝоггес мынэлэ но дышетскисьёсызлы вералэ, Со кулэмысь улӟыса султӥз шуыса. Со тӥляд азяды Галилеяе вуоз; отысен Сое адӟоды. Тани мон тӥледлы верай».
nwtsty эскерон понна материал (Мф 28:7)
дышетскисьёсызлы вералэ, Со кулэмысь улӟыса султӥз шуыса Та кышномуртъёс ваньмызлэсь азьвыл тодӥзы, Иисус улӟытэмын шуыса. Со сяна, соослы косэмын вал тодэмзы сярысь мукет дышетскисьёслы вераны (Мф 28:2, 5, 7). Вашкала дыръя Иудеяын кышномуртъёсты судын адӟись луыса вераськыны уг лэзё вал. Озьы ке но, Иеговалэн кылчинэз кышномуртъёслы та дано но шумпотон вайись ужез оскиз.
16—22-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАРК 1, 2
Духовной марӟанъёсты утчаськомы
(Марк 1:11) Инмысен куара кылӥськиз: «Тон Мынам Яратоно Пие, Тон бордын Мынам ӟеч эрике».
nwtsty эскерон понна материал (Мк 1:11)
Инмысен куара кылӥськиз Евангелиосын гожтэм куинь учыръёс пӧлысь та нырысетӥез учыр луэ, куке Иегова адямиосын вераськиз (Мк 9:7; Ин 12:28).
Тон Мынам... Пие Иисус музъем вылэ лыктэмезлэсь азьло ик Инмарлэн Пиез вал (Ин 3:16). Музъем вылын адями кадь вордӥськем бераз Иисус Инмарлэн пиез луиз озьы ик, кызьы Адам вал (Лк 1:35; 3:38). Нош татын Инмар ӧз вера сое гинэ, Иисус солэн Пиез луэ шуыса. «Тон Мынам... Пие»,— вераса но Иисус вылэ святой дух кисьтыса, Инмар возьматӥз, вылды, Иисус солэн духовной Пиез луиз шуыса. Озьы со вылӥысен вордӥськиз, инме берытскыны оскон басьтӥз но Инмарен пуктэм Эксэй но Быдӟым Священник луыса святой духен зырӟемын вал. (Ин 3:3—6; 6:51; ӵошаты Лк 1:31—33; Евр 2:17; 5:1, 4—10; 7:1—3.)
Тон бордын Мынам ӟеч эрике Яке «Тон мыным ярамон луиськод»; «Тон монэ туж шумпоттӥськод». Сыӵе ик веран Мф 12:18 кутӥське, кытын Ис 42:1 кылъёс гожтэмын, кудъёсыз сӥзем Мессия, яке Христос, сярысь верало. Инмар, Пиезлы та кылъёсты вераса но со вылэ святой дух кисьтыса, валамон возьматӥз, Иисус — сӥзем Мессия шуыса.
(Марк 2:27, 28) Соослы Иисус вераз: «Суббота адями понна, адями суббота понна ӧвӧл; 28 соин ик Адями Пи субботалы но кузё луэ».
nwtsty эскерон понна материал (Мк 2:28)
субботалы... кузё Иисус ассэ субботалы кузё шуыса нимаз (Мф 12:8; Лк 6:5), возьматон понна, суббота нуналэ солы инмысь Атаезлэсь сётэм ужъёссэ лэсьтыны яра шуыса. (Ӵошаты Ин 5:19; 10:37, 38.) Суббота нуналэ Иисус паймымон ужъёс лэсьтылӥз, кылсярысь, висисьёсты бурмытъяз (Лк 13:10—13; Ин 5:5—9; 9:1—14). Та паймымон ужъёс пророческой образъёс луо, вылды, но возьмато, макем каньыл улозы адямиос Эксэйлыклэн кивалтэмез улсын. Улонзы суббота нуналэ шутэтскон кадь луоз (Евр 10:1).
23—29-ТӤ ОШТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАРК 3, 4
Духовной марӟанъёсты утчаськомы
(Марк 3:29) нош кин Святой Дух вылэ урод кыл вераз ке, со муртлэн сьӧлыкъёсыз ноку но уз куштӥське, со пумтэм дауръёслы судэ сюроз».
nwtsty эскерон понна материал (Мк 3:29)
Святой Дух вылэ урод кыл вераз Святой дух Инмар бордысь потэ, соин ик, адями тодыса вылысь святой духлы пумит мынэ ке яке сое палэнтэ ке, со Инмарез сантэма. Мф 12:24, 28 но Мк 3:22 кылбуръёсысь адӟиське, религиозной кивалтӥсьёс валазы, Иисус паймымон ужъёсты Инмарлэн духеныз лэсьтэ шуыса. Озьы ке но, соос веразы, Иисус сое Шайтанлэн кужыменыз лэсьтэ шуыса.
со пумтэм дауръёслы судэ сюроз Татын вераськон мынэ, вылды, тодыса вылысь лэсьтэм сьӧлык сярысь, кудзэ куштыны уг луы. Сыӵе сьӧлыклэсь нокыӵе курбон мозмытыны уг быгаты. (Учкы та кылбурысь «Святой Дух вылэ урод кыл вераз» веранлы эскерон понна материалэз.)
(Марк 4:26—29) Иисус шуиз: «Инмар Эксэйлык адямилэн музъеме куштэм кидысэзлы укша. 27 Изе но, султэ но, уйин но, нуназе но, кызьы уда, кызьы ӝужа кидыс — со уг тоды. 28 Уго музъем ачиз нырысь вож узьым поттэ, собере — шеп, шепе тыраз ю люка. 29 Емышез кисьма ке, соку ик сюрло келя, уго аран дыр вуиз».
bw553 12—13 б., 6—8 абз.
Валаськоды-а тӥ Гожтэмъёсты?
6 Малы милемыз дышетыны быгатэ та мадён? Нырысетӥез, милемлы валано, ми соослэсь, кинъёс Библиез дышето, осконзэс будэтыны ум быгатӥське шуыса. Зӥбыт-востэм сяммы вань ке, ми дышетскисез пылатӥськыны кужмысь ум косэ. Адямилы юрттон понна, ми лэсьтӥськомы ваньзэ, мае быгатӥськомы, озьы ке но ми валаськомы, Инмарлы сӥзиськыны ужпум адями ачиз кутэ шуыса. Сыӵе ужпум со кутыны кулэ, вань сюлмысьтыз Иеговаез яратыса. Мукет сямен Иегова соглаш ӧвӧл (Пс. 50:14; 53:8; 109:3).
7 Кыкетӥез, та мадён дышетэ милемыз, кутсконысеныз ик тыршеммылэсь емышъёссэ ум ке адӟиське, ӝоже усёно ӧвӧл шуыса. Чидаса возьманы кулэ (Иак. 5:7, 8). Соин ик, куке ми трос тыршимы, но кидыс емыш ӧз вайы, со уг возьматы, ми мар ке но шонертэм лэсьтӥмы шуыса. Иегова зэмлыклэсь кидыссэ будэтэ зӥбыт-востэм адямилэн сюлмаз гинэ, кудӥз воштӥськыны дась (Матф. 13:23). Милемлы малпано ӧвӧл, Иегова милесьтым ужам-тыршеммес соя гинэ дунъя шуыса, будэ-а осконэз солэн, кинэ ми дышетӥськомы. Библиез дышетӥсь адями Инмарлы ӧз ке но сӥзиськы, Иегова милесьтым мылысь-кыдысь тыршеммес дунъя. (Лыдӟы Лукалэсь 10:17—20; 1 Коринфъёслы 3:8.)
8 Куинетӥез, ми котьку ик ум адӟиське, кызьы адями воштӥське. Кылсярысь, одӥг миссионер кузпалъёсын Библиез дышетӥз. Одӥг пол соос веразы, соослэн пылатӥськымтэ ивортӥсьёс луэмзы потэ шуыса. Со тодазы вайытӥз, со понна соослы тамак кысконлэсь куштӥськоно шуыса. Миссионер туж паймиз, куке кузпалъёс веразы, соос кӧня ке толэзь ӵоже ини тамак уг кыско шуыса. Малы соос та урод сямзылэсь куштӥськизы? Соос валазы, Иегова чеберъяськисьёсты адӟемпотостэм каре но тамак кыскемзэс адӟе шуыса. Сюлэмзы соослэсь мылкыдзэс ӝутӥз бырйыны: яке соос миссионер азьын но кыскозы, яке чик уз кыске. Соослэн сюлмазы Иеговаез яратонзы будӥз но, со соослы шонер ужпум кутыны юрттӥз. Кузпалъёслэн осконзы будӥз, миссионер сое валатэк кылиз ке но.
30-ТӤ ОШТОЛЭЗЬ — 6-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАРК 5, 6
Духовной марӟанъёсты утчаськомы
(Марк 5:19, 20) Нош Иисус сое ӧз лэзьы, Со шуиз: «Гуртад берт асладъёс доры но вера Кузё-Инмар тонэн мар кариз, кызьы Со тонэ жаляз». 20 Со мурт, Дас каро музъеме мыныса, Иисуслэсь соин ма каремзэ тодытыса ветлӥз. Ваньзы талы паймизы.
nwtsty эскерон понна материал (Мк 5:19)
вера Мукет учыръёсын Иисус уг лэзьы вал адямиослы вераны солэн паймымон ужъёсыз сярысь (Мк 1:44; 3:12; 7:36), нош таяз учыре со пиосмуртэз косӥз соин луэм учыр сярысь ӵыжы-выжыосызлы вераны. Оло нош, Иисус озьы кариз, малы ке шуоно сое та интыысь кошкыны косӥзы но со ачиз отын улӥсь адямиослы ӟеч иворез вераны ӧй быгатысал. Озьы ик, пиосмуртлэн верамез парсь уллёлэн быронэз сярысь урод вераськонъёсты дугдытыны быгатысал.
(Марк 6:11) Кин ке тӥледыз пырыны ӧз ке лэзьы, тӥледыз ӧз ке кылзӥськы, соос дорысь потыкуды, соослэсь янгышъёссэс шарае поттон понна пыдысьтыды сюйзэ курткыса кельтэ. Зэм ик тӥледлы верасько: суд нуналэ, Содомен Гоморралы сярысь но, та городлы секытгес луоз».
nwtsty эскерон понна материал (Мк 6:11)
пыдысьтыды сюйзэ курткыса кельтэ Тазьы дышетскисьёс возьматъязы, соос Инмар азьын та адямиос понна кыл уг куто но соосты Инмарлы судъяны кельто шуыса. Со выллем веран Мф 10:14 но Лк 9:5 пумиське. Марклэсь но Лукалэсь Евангелиосын та косонлы «янгышъёссэс шарае поттон понна» кылъёс ватсамын на. Павел но Варнава та косонъя Писидияысь Антиохияын лэсьтӥзы (Ап 13:51). Со выллем ик Павел Коринфын лэсьтӥз, куке, дӥськутсэ курткыса, шуиз: «Тӥляд вирды асьтэлэн йыр вылады, мон янгыш ӧвӧл» (Ап 18:6). Сюйзэ курткыса кельтон сям Иисуслэн дышетскисьёсызлы тодмо вал, дыр. Оскись иудейёс, кудъёсызлы еврей луисьтэм адямиослэн музъемзы вылтӥ ветлоно вал, израиль музъеме нырысетӥ вамыш лэсьтон азязы пыдкутчанысьтызы сюйзэ куртко вал, малы ке шуоно соос малпазы, та сюй соосты Инмар азьын кырсь карыны быгатэ шуыса. Нош Иисуслэсь косонзэ мукет сямен валано вал, луоз.