«Улон но ужан-тыршон» ужан тетрадьлы малпанъёс
7—13-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАРК 7, 8
Духовной марӟанъёсты утчаськомы
(Марк 7:5—8) Собере фарисейёс но книга тодӥсьёс Солэсь юазы: «Малы Тынад дышетскисьёсыд, вашкала пересьёслэсь косэмзэс кылзӥськытэк, миськымтэ киынызы нянь сиё?» 6 Соослэн пумитазы Со шуиз: «Тӥ сярысь, чеберъяськисьёс сярысь, азьпалзэ тодытыса, Исаия пророк ӟеч вераз, солэн гожтэмын: „Кылынызы та муртъёс Монэ сӥлы каро, нош сюлмынызы Мынэсьтым кыдёкын уло. 7 Адямиослэн малпам дышетонъёссылы, курон-косонъёссылы дышетыса, Монэ юнме гинэ сӥлы каро“. 8 Уго, Инмарлэсь курон-косонъёссэ палэнтыса, тӥ адями косэмез быдэсъян борды басьтӥськиськоды, тусьтыосты, кружкаосты гылтон но трос мукет со выллем ужъёсты лэсьтӥськоды».
bw573 30 б., 1—4 абз.
Лыдӟисьёслэн юанъёссы
Малы Иисуслэн тушмонъёсыз киез миськон сярысь юан ӝутӥзы?
▪ Иисуслэн тушмонъёсыз сое но солэсь дышетскисьёссэ трос пол пыкылӥзы. Моисей законын трос курон-косонъёс вал со сярысь, кызьы Иегова азьын чылкыт кылёно учыръёсын, кудъёсыз мугорысь виянэн, гижлочерен, пудо-живот шӧй борды яке кулэм адями борды йӧттӥськемен герӟаськемын. Озьы ик, отын гожтэмын вал, кызьы чылкытатӥськоно: со понна курбон ваёно, мисьтӥськоно яке кырсь луэм адямиез чылкытатӥсь вуэн пазяно вал (Пот. 11—15 люкетъёс; Лыд. 19 люкет).
Иудей раввинъёс вань та курон-косонъёсты пыр-поч валэкто вал. Одӥг книгалэн верамезъя, котькуд мугез, кудӥныз сэрен адями кырсь луыны быгатэ вал, «пыр-поч эскеро вал: кыӵе учыръёсын со луыны быгатэ вал, кызьы но макем со мукетъёссэ саптаны быгатэ вал, кудъёсыз сосудъёс но арбериос кырсь луыны быгато вал, нош кудъёсыз уг, но кыӵе амалъёсын но ритуалъёсын чылкытатӥськыны луэ вал».
Иисуслэн тушмонъёсыз юазы солэсь: «Малы Тынад дышетскисьёсыд, вашкала пересьёслэсь косэмзэс кылзӥськытэк, миськымтэ киынызы нянь сиё?» (Марк 7:5). Огшоры мисьтӥськон сярысь вераськон уг мыны вал. Раввинъёс нимысьтыз ритуалэз быдэсто вал, кудӥзъя сиськон азьын адямилы ки вылаз ву кисьто вал. Со ик книгаын верамын: «Озьы ик, споръяськизы со сярысь, кыӵе сосудъёсысь но кыӵе вуэз кисьтоно, кин сое кисьтыны кулэ но куддорозь киез миськоно».
Кызьы Иисус учкиз адямиосын малпам та законъёс шоры? Со вераз иудей религиозной кивалтӥсьёслы: «Тӥ сярысь, чеберъяськисьёс сярысь, азьпалзэ тодытыса, Исаия пророк ӟеч вераз, солэн гожтэмын: „Кылынызы та муртъёс Монэ сӥлы каро, нош сюлмынызы Мынэсьтым кыдёкын уло. Адямиослэн малпам дышетонъёссылы, курон-косонъёссылы дышетыса, Монэ юнме гинэ сӥлы каро“. Уго, Инмарлэсь курон-косонъёссэ палэнтыса, тӥ адями косэмез быдэсъян борды басьтӥськиськоды» (Марк 7:6—8).
(Марк 7:32—35) Со доры пельтэм, могаса вераськись муртэ вайизы но, вылаз кизэ мед поноз вал шуыса, Солэсь куризы. Иисус сое калык пӧлысь палэнэ нуиз, чиньыоссэ солэн пеляз понӥз но сялӟыса кыл бордаз йӧтӥськиз, инме учкиз но лулӟиськыса солы шуиз: «Еффафа», со «усьтӥськы» шуэм луэ. Соку ик солэн пельызлэн кылонэз усьтӥськиз, кылызлэн вераськон могӟетэз быриз но, со чылкыт вераськыны кутскиз.
w00 15/2 17—18 б., 9—11 абз.
Вань-а тӥляд «Христослэн визьмыз»?
9 Адями пельтэм вал но могаса вераськиз. Иисус шӧдӥз, вылды, та адями туж сюлмаське яке возьдаське шуыса. Соку Иисус лэсьтӥз озьы, кызьы азьло уг лэсьты вал. Со адямиез калык пӧлысь палэнэ нуиз. Собере возьматӥз, мар со лэсьтыны малпа. Иисус «чиньыоссэ солэн пеляз понӥз но сялӟыса кыл бордаз йӧтӥськиз» (Марк 7:33). Собере со, Инмарлы вазиськыса кадь, инме учкиз но лулӟиз. Ас ужъёсыныз Иисус вераз кадь: «Со, мар мон тыныд али лэсьто, Инмарлэн кужыменыз лэсьтэмын луоз». Пумаз Иисус вераз: «Усьтӥськы» (Марк 7:34). Со бере адями кылыны но чылкыт вераськыны кутскиз.
10 Макем шӧдӥсь-валась вал Иисус! Со адямиослэсь шӧдонъёссэс вала вал, соин ик со адямиосты жаля вал. Милемлы, христианъёслы, та удысын Иисуслэсь адӟем кароно, «Христослэсь визьзэ» будэтыса но соя улыса. Библия ӧте милемыз: «Ваньды тӥ одӥг малпанэн, гажаса-жаляса, ог-огдэс яратыса, лякыт сямо луыса, зӥбыт-востэм визьмын улэлэ» (1 Пётр 3:8). Озьы улон понна, вераськыкумы но мар ке лэсьтыкумы, милемлы мукетъёсызлэсь шӧдонъёссэс лыдэ басьтоно.
11 Кенешын ми возьматомы, адямиослэсь шӧдонъёссэс валаськомы шуыса, куке соосты гажаломы но соослы озьы лэсьтомы, кызьы асьмелы соослэсь лэсьтэмзэс кулэ кариськомы (Матфей 7:12). Озьы ик, малпано, мар ми вераськомы но кызьы ми сое вераськомы (Колоссыослы 4:6). Эн вунэтэ, «юнме кыл тэкшерись пуртэн кадь вандэ» шуыса (Мадёнъёс 12:18). Нош семьяын? Ог-огзэс зэмзэ но яратӥсь кузпалъёс ог-огзылэсь шӧдонъёссэс валало (Ефесъёслы 5:33). Соос лек кылъёсты уг верало, ог-огзэс уг тэргало но уг пыкыло — малы ке шуоно ваньмыз таиз сюлэмез вӧсь карыны быгатэ, нош сюлэм яраос ӝог уг быро. Нылпиослэн но шӧдонъёссы вань, но яратӥсь анай-атайёс соослэсь шӧдонъёссэс лыдэ басьто. Нылпиоссэс кулэ дыръя тупатъякузы, анай-атайёс соосты гажалозы но мултэс возьытэ уз уськытэ (Колоссыослы 3:21). Адямиослы саклыкмес висъяса, ми возьматомы, милям «Христослэн визьмыз» вань шуыса.
14—20-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАРК 9, 10
Духовной марӟанъёсты утчаськомы
(Марк 10:6—9) Дуннеез кылдытонлэн кутсконаз ик Инмар пиосмуртэн кышномуртэз кылдытӥз. 7 Соин ик пиосмурт аслэсьтыз атайзэ, анайзэ кельтоз но 8 аслаз кышноез борды лякиськоз, кыкназы одӥг лулмугор луозы; табере соос кык ӧвӧл, одӥг лулмугор ини. 9 Озьыен, мае Инмар огазеяз, сое адями медаз люкы».
w08 15/2 30 б., 8 абз.
Марклэсь ӟеч иворысь тунсыко малпанъёс
10:6—9. Инмарлэн потэ, кузпалъёс огазьын мед улозы шуыса. Шуг-секытъёс кылдыку, кузпалъёслы люкиськоно ӧвӧл, нош Библиысь визь-кенешъёсты уже кутыны но семьязэс юнматыны тыршоно (Матф. 19:4—6).
(Марк 10:17, 18) Сюрес вылэ потыку, Со доры кыӵе ке но мурт бызьыса лыктӥз но, Солэн азяз пыдесъяськыса, Солэсь юаз: «Ӟеч Дышетӥсь! Быронтэм улонэз басьтон понна мон мар карыны кулэ?» 18 Иисус солы шуиз: «Малы тон Монэ „ӟеч“ шуиськод? Одӥг Инмар сяна, нокин но ӟеч ӧвӧл.
nwtsty эскерон понна материалъёс (Мк 10:17, 18)
Ӟеч Дышетӥсь Пиосмурт та кылъёсты титул интые вераз, вылды. Солэн Иисуслы пыриськемез потэ вал, дыр, малы ке шуоно соку озьы религиозной кивалтӥсьёслы вазисько вал. Иисус пумит ӧй вал, солы «Дышетӥсь» но «Кузё» мед вазиськозы шуыса, малы ке шуоно Иисус со ик вал (Ин 13:13). Озьы ке но, со возьматъяз, Атаез гинэ данэз басьтыны ярась шуыса.
Одӥг Инмар сяна, нокин но ӟеч ӧвӧл Та кылъёсын Иисус возьматӥз, Иегова гинэ котьмар ласянь ӟеч луэ шуыса но солэн гинэ правоез вань ужпум кутыны, мар ӟечез, нош мар уродэз луэ. Ӟечез но уродэз тодон писпу вылысь емышсэ сиыса, Адам но Ева сыӵе ужпум асьсэос кутыны малпазы. Нош Иисус зӥбыт-востэм луыса лыдъяз, нравственность ласянь эсэпъёс солэн Атаез гинэ сётыны быгатэ шуыса. Инмар валэктӥз, мае со ӟечен, нош мае уродэн лыдъя, аслаз Кылаз законъёс но возетъёс сётыса (Мк 10:19).
21—27-ТӤ КУАРТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | МАРК 11, 12
Духовной марӟанъёсты утчаськомы
(Марк 11:17) Соосыз дышетыса вераз: «Гожтэмын ӧвӧл-а — „Мынам коркае вань калыкъёс понна вӧсяськон корка шуыса нимаськоз“? Нош тӥ сое лушкаськисьёслы люкаськон интылы пӧрмытӥды».
nwtsty эскерон понна материал (Мк 11:17)
вань калыкъёс понна вӧсяськон корка Евангелиез куинь гожъясьёс пӧлысь, кудъёсыз Ис 56:7 веранэз гожъязы, Марк гинэ «вань калыкъёс понна» кылъёсты гожтэ (Мф 21:13; Лк 19:46). Иерусалимысь храмын Израиль калык но мукет калыкъёсысь адямиос Иеговалы ӵош йыбыртъяны но вӧсяськыны быгато вал (3Эк 8:41—43). Иисус тэргаз еврейёсты, кудъёсыз храмын вуз каризы но сое лушкаськисьёслы люкаськон интылы пӧрмытӥзы. Со вуз карисьёс люкето вал еврей луисьтэм адямиослы Инмарен матысь кусыпъёс тупатыны, малы ке шуоно соослэн мылкыдзы куашканы быгатэ вал Иеговалы солэн вӧсяськон корказ йыбыртъяны.
(Марк 11:27, 28) Нош ик Иерусалиме лыктӥзы. Храм пушкытӥ ветлыкуз, Со доры архиерейёс, книга тодӥсьёс, тӧроос лыктӥзы 28 но Солы шуизы: «Кыӵе кужымен Тон тае лэсьтӥськод? Тае лэсьтыны кин Тыныд кужым сётӥз?»
jy 244 б., 7 абз.
Иисус оскон пумысен дышетэ, смоквапуэн луэм учырез валэктыса
Ӝоген Иисус дышетскисьёсыныз Иерусалиме пыре. Азьло кадь ик, Иисус храме мынэ но калыкез дышетыны кутске. Валтӥсь священникъёс но калыклэн тӧроосыз солэсь юало: «Кыӵе кужымен Тон тае лэсьтӥськод? Тае лэсьтыны кин Тыныд кужым сётӥз?» (Марк 11:28). Соослэн юанзы герӟаськемын соин, вылды, мар Иисус толло нуналаз коньдонэз вошъяськыса улӥсьёслы лэсьтӥз.
28-ТӤ КУАРТОЛЭЗЬ — 3-ТӤ ИНВОЖО
ИНМАРЛЭН КЫЛЫСЬТЫЗ УЗЫРЛЫК | МАРК 13, 14
Духовной марӟанъёсты утчаськомы
(Марк 14:51, 52) Одӥг пинал пи, гольык мугорзэ шобретэн бинялтыса, Со сьӧрын ветлӥз; солдатъёс сое кутӥзы. 52 Нош со шобретсэ киязы кельтыса, гольык куен соослэсь пегӟиз.
w08 15/2 30 б., 6 абз.
Марклэсь ӟеч иворысь тунсыко малпанъёс
14:51, 52 — Кин со егит адями вал, кудӥз «гольык куен... пегӟиз»? Та учыр сярысь Марк гинэ вера, соин валаны луэ, со ачиз сярысь вера шуыса.
(Марк 14:60—62) Соку архиерей, шоразы султыса, Иисуслэсь юаз: «Тон номыр но уд-а вераськы? Маин соос Тонэ янгыше уськыто?» 61 Нош Со шып улӥз, нокыӵе но ответ ӧз сёты. Архиерей нош ик Солэсь юаз: «Тон-а со Христос, Данъянолэн Пиез?» 62 Иисус шуиз: «Мон; тӥ адӟоды, Кужымлэн бурпалаз пуксьыса, ин пилемъёс вылын лыктӥсь Адями Пиез».
jy 287 б., 5 абз.
Иисусэз Анна доры нуо, собере — Каиафа доры
Каиафа тодэ: кин ке но ассэ Инмарлэн Пиез шуиз ке, иудейёслэн вожзы потоз. Азьвыл, куке Иисус Инмарез Атаеныз нима вал, иудейёслэн сое виемзы потэ вал. Соос верало вал, Иисус ассэ «Инмарен огкадь» каре шуыса (Иоанн 5:17, 18; 10:31—39). Калыклэн мылкыдыз сярысь тодыса, Каиафа Иисуслы кескич юан сётэ: «Улэп Инмарен мон Тонэ курисько, вера милемлы, Тон-а Христос, Инмар Пи?» (Матфей 26:63). Иисус зэмзэ но ассэ Инмарлэн Пиез шуэ вал (Иоанн 3:18; 5:25; 11:4). Со сое али ӧз вера ке, ваньмыз малпалозы, со Инмарлэн Пиез но Христос ӧвӧл шуыса. Соин ик Иисус вера: «Мон; тӥ адӟоды, Кужымлэн бурпалаз пуксьыса, ин пилемъёс вылын лыктӥсь Адями Пиез» (Марк 14:62).