«Улон но ужан-тыршон» ужан тетрадьлы малпанъёс
4—10-ТӤ ИНВОЖО
ИНМАРЛЭН КЫЛЫСЬТЫЗ УЗЫРЛЫК | МАРК 15, 16
Духовной марӟанъёсты утчаськомы
(Марк 15:25) Куинетӥ час вал, Сое кортӵогазы.
nwtsty эскерон понна материал (Мк 15:25)
Куинетӥ час Со вал ӵукна, 9 час котырын. Куд-огъёсыз верало, та кылбурын гожтэм уг тупа шуыса солы, мар гожтэмын Ин 19:14—16, кытын вераське, куке Пилат Иисусэз кортӵоганы сётӥз, «куатетӥ час» вал шуыса. Библия солы пыр-поч валэктон уг сёты ке но, тани куд-ог малпанъёс, кудъёссэ лыдэ басьтоно. Оглом вераса, ваньмаз Евангелиосын Иисуслэн музъем вылын улонэзлэн берпуметӥ нуналаз луэм учыръёс одӥг радлыкъя гожтэмын. Ваньзы ньыль Евангелиез гожъясьёс верало, ӵукна вуэм бере священникъёс тӧроосын люкаськизы но собере Иисусэз Понтий Пилат доры нуыны косӥзы шуыса (Мф 27:1, 2; Мк 15:1; Лк 22:66—23:1; Ин 18:28). Матфей, Марк но Лука верало, куке Иисус кортӵогамын вал ини, «куатетӥ часысен укмысэтӥ час котырозь быдэс дунне вылын пеймыт улӥз» шуыса (Мф 27:45, 46; Мк 15:33, 34; Лк 23:44). Кыӵе дыре Иисусэз казнить каризы валан понна, эшшо одӥг малпанэз лыдэ басьтоно на: сюлоен жугонэз казнить каронлэн люкетэныз лыдъяло вал. Куддыръя сюлоен сокем лек жуго вал, адями жугон дыръя ик кулэ вал. Иисусэз лек жугизы, вылды, малы ке шуоно со юбозэ казнить карон интыозь ачиз нуыны ӧз быгаты; со интые сое мукет адями нуиз (Лк 23:26; Ин 19:17). Сюлоен жугонэз казнить каронлэн кутсконэныз лыдъяно ке, соку Иисусэз кортӵогам дырозь кӧня ке дыр ортчыны кулэ вал. Та веранлэсь зэм луэмзэ возьмато Мф 27:26 но Мк 15:15, кытын сюлоен жугон сярысь но, юбо вылын кортӵоган сярысь но вераське. Пӧртэм адямиос казнить каронлэсь кутсконзэ пӧртэм сямен лыдъязы, соин ик соос пӧртэм дырез вераны быгато вал. Оло нош, соин сэрен Пилат паймиз, куке тодӥз, кортӵогам бере Иисус сокем ӝог кулӥз шуыса,— Пилат малпаз, дыр, казнить карыны алигес гинэ кутскизы шуыса (Мк 15:44). Со сяна, Библиез гожъясьёс соку вӧлмем сямъя нуналэз (уез но) ньыль люкетлы люко вал, соос пӧлысь котькудаз куинь час пыре вал. Со валэктэ, малы Библиын ӵем вераське куинетӥ, куатетӥ но укмысэтӥ час сярысь (лыдъяны кутско вал шунды ӝужанысен, 6 час котырысен) (Мф 20:1—5; Ин 4:6; Ап 2:15; 3:1; 10:3, 9, 30). Со сяна, тросэз адямиос шонер дырез тодыны уг быгато вал, соин ик соос верало вал учырлэсь кӧня дыр котырын луэмзэ (Мф 27:46; Лк 23:44; Ин 4:6; Ап 10:3, 9). Йылпумъяломы: Марк сюлоен жугонэз но казнить каронлэн люкетэныз лыдъяны быгатэ вал, нош Иоанн — кортӵоганэз гинэ. Марк но, Иоанн но шонер дырез ӧз вералэ, вылды. Марк вераз нырысетӥез куинь часъем люкет сярысь, нош Иоанн — кыкетӥез люкет сярысь. Со валэктыны быгатэ, малы соос пӧртэм дырез веразы. Берпуметӥез: Иоанн, кудӥз Евангелизэ Марк бере трос аръёс ортчыса гожтӥз, мукет дырез вераз бере, вераны луоз, со Марклэсь гожтэмзэ ӧз гожъя шуыса.
(Марк 16:8) Шайгуысь потыса, бызьыса кошкизы. Соос туж кышкатскизы, туж куалектӥзы, нокинлы но, номыр но ӧз вералэ. Кышказы уго.
nwtsty эскерон понна материал (Мк 16:8)
Кышказы уго Тужгес но вашкала кигожтэмъёсъя, Марклэсь ӟеч ивор 8-тӥ кылбурысь кылъёсын йылпумъяське. Куд-огъёсыз лыдъяло, озьы гожтэм тыпак быре но солэн азьланьтонэз луыны кулэ шуыса. Но лыдэ басьтоно ке, Марк вакчияк гожъя шуыса, озьы малпаны муг ӧвӧл, кадь. Со сяна, Иероним но Евсевий, IV даурысь тодосчиос, лыдъязы, нырысь ик кигожтэм «кышказы уго» кылъёсын йылпумъяське вал шуыса.
Куд-ог грек кигожтэмъёсын но берыктэмъёсын 8-тӥ кылбур бере кузь яке вакчи йылпумъян вань. Кузь йылпумъян (кудаз 12 кылбур пыре) вань Александрия кодексын, Ефремлэн кодексаз но Безалэн кодексаз (Кембридж кодексын). Лыдъяло, соос а. э. V даурын гожтэмын вал шуыса. Озьы ик, со вань латин Вульгатаын, сири кьюртоновской кигожтэмын но сири Пешиттаын. Кузь йылпумъян ӧвӧл азьлогес гожтэм грек кигожтэмъёсын, кудъёсыз IV даурын гожтэмын вал,— Сӥнай кодексын но Ватикан кодексын. Озьы ик, со ӧвӧл IV—V дауръёсысь Сӥнай-сири кигожтэмын но копт кыллэн саид диалектэныз гожтэм Марклэсь ӟеч иворен кигожтэмын (V даур). Армян но грузин кылъёсын гожтэм Марклэсь ӟеч иворен тужгес но вашкала кигожтэмъёс но 8-тӥ кылбурен йылпумъясько.
Куд-ог берлогес гожтэм грек кигожтэмъёсын но берыктэмъёсын вакчи йылпумъян вань (кудаз кык предложение гинэ пыре). Эксэй кодексын (лыдъяло, со а. э. VIII даурын гожтэмын вал шуыса) кык йылпумъян гожтэмын: нырысь вакчиез, собере кузез. Котькудӥз йылпумъян азьын пусъемын, со куд-ог гожъямъёсын вань шуыса, нош верамын ӧвӧл, йылпумъянъёс пӧлысь кудӥз ке но зэм луэ шуыса.
11—17-ТӤ ИНВОЖО
ИНМАРЛЭН КЫЛЫСЬТЫЗ УЗЫРЛЫК | ЛУКА 1
Духовной марӟанъёсты утчаськомы
(Лука 1:69) Аслаз ляльчиезлэн, Давидлэн, выжыысьтыз милемлы утиськонлэсь сюрзэ ӝутӥз.
nwtsty эскерон понна материал (Лк 1:69)
утиськонлэсь сюрзэ Яке «кужмо мозмытӥсез». Библиын пудо-животъёслэн сюръёссы ӵем дыръя возьмато кужымез, киултонэз но вормонэз. Кылсярысь, Библиез гожъяку, «сюр» кылэз та кылбуръёсын кутӥзы: 1Эк 2:1; Пс 74:5, 6, 11; 148:14. Сюръёс возьмато кивалтӥсьёсты но кивалтӥсь выжыосты, шонерлыкооссэ но, шонерлыктэмъёссэ но. Соослэн киултэмъёссы но вормонъёссы ӵошатӥсько соин, кызьы пудо-живот сюръёсыныз кинэ ке лека (КЗк 33:17; Дн 7:24; 8:2—10, 20—24). Та кылбурын «утиськонлэн сюрез» кылъёс возьмато Мессияез, кужмо мозмытӥсез, кудӥзлэн утьыны кужымез вань.
(Лука 1:76) Тон, нуны, Вылысь Инмарлэн пророкез шуыса нимаськод, тон уго Кузё-Инмарлэн азьтӥз мынод Солы сюрес дасяны
nwtsty эскерон понна материал (Лк 1:76)
тон уго Кузё-Инмарлэн азьтӥз мынод Иоанн Пылатӥсь «Кузё-Инмарлэн азьтӥз» мынӥз шуыны луоз, малы ке шуоно со Иисуслэн азьтӥз мынӥз, кудӥз Атаеныз ыстэмын вал но солэн нимыныз лыктӥз (Ин 5:43; 8:29).
18—24-ТӤ ИНВОЖО
ИНМАРЛЭН КЫЛЫСЬТЫЗ УЗЫРЛЫК | ЛУКА 2, 3
Духовной марӟанъёсты утчаськомы
(Лука 2:14, ВД) Дан вылӥысь Инмарлы но тупаса улон музъем вылысь адямиослы, кудъёсызлы со ӟеч мылкыдзэ возьматэ
nwtsty эскерон понна материалъёс (Лк 2:14)
тупаса улон музъем вылысь адямиослы, кудъёсызлы со ӟеч мылкыдзэ возьматэ Куд-ог кигожтэмъёсъя та кылъёсты «музъем вылын тупаса улон, адямиослы ӟеч эрик» шуыса берыктыны луэ. Соин ик Библилэн куд-ог берыктэмъёсаз озьы гожтэмын. Нош «Выль дуннелэн берыктэмаз» та кылбур тужгес но вашкала но оскымон кигожтэмъёсъя берыктэмын. Кылчинъёслэн кылъёссы уг возьмато, Инмар ӟеч мылкыдзэ вань адямиослы возьматэ шуыса, кыӵе гинэ соослэн мылкыдзы медаз луы но кызьы гинэ соос асьсэды медаз возе. Кылчинъёс та кылъёсты верало соослы гинэ, кинъёс Инмарлы сюлмысьтызы оско но солэн Пиез сьӧры мыно.
адямиослы, кудъёсызлы со ӟеч мылкыдзэ возьматэ Эудоки́а грек кылэз, кудӥз татын «ӟеч мылкыдзэ возьматэ» шуыса берыктэмын, «мылкыд», «ярамон луон», «ӟеч эрик» шуыса берыктыны луэ. Кылчинъёслэн кылъёссы уг возьмато, Инмар ӟеч мылкыдзэ вань адямиослы возьматэ шуыса. Кылчинъёс та кылъёсты верало соослы гинэ, кинъёс Инмарлы сюлмысьтызы оско но солэн Пиез сьӧры мыно. Куд-ог учыръёсын эудоки́а кыл адямиослы ярамон луонэз но соослэсь ӟеч мылкыдзэс возьматэ ке но (Фп 1:15), ӵемгес со возьматэ Инмарлы ярамон луонэз но солэсь ӟеч мылкыдзэ (Мф 11:26; Лк 10:21; Еф 1:5, 9; Фп 2:13; 2Фс 1:11). Септуагинтаын 50-тӥ Псаломын 20-тӥ кылбурын та кыл кутӥське, куке Инмарлэн ӟеч эрикез сярысь вераськон мынэ.
(Лука 3:23) Тодытыны кутскыкуз, Иисуслы ог куамын арес котырын вал. Малпало вал, Со Иосифлэн пиез шуыса, нош таиз Илийлэн,
bp170 9 б., 1—3 абз.
Тодӥськоды-а тӥ?
Кин вал Иосифлэн атаез?
Иисус Христос Иосифлэн, Назаретысь тӥрен ужасьлэн, вордос пиез вал. Нош кинлэн пиез вал Иосиф? Матфейлэсь ӟеч иворын гожтэмын, Иосиф Иаковлэн пиез вал шуыса, нош Лука Иосифез Илийлэн пиез шуэ. Вань-а татын тупамтэез? (Лука 3:23; Матфей 1:16).
Матфей гожтэ: «Иаковлэсь... Иосиф вордӥськиз». Грек кыл, кудӥз татын кутӥське, валамон возьматэ, Иаков Иосифлэн атаез вал шуыса. Матфей Иосифлэсь ӵыжы-выжыоссэ гожтӥз, Давид эксэй дорысен кутскыса. Со возьматэ Иисуслэн, Иосифлэн вордос пиезлэн, эксэй луыны законъя правоез вань шуыса.
Мукет ласянь, Лука гожтэ, Иосиф Илийлэн пиез вал шуыса. «Пи» кылэз «эмеспи» шуыса валаны луэ. Озьы та кыл кутӥське Лукалэсь 3:27, кытын верамын, Салафииль, кудӥзлэн атаез вал Иехония, Нирийлэн пиез вал шуыса (1 Паралипоменон 3:17; Матфей 1:12). Салафииль Нирийлэсь нылзэ кышно басьтӥз, вылды, но озьы солэн эмеспиез луиз. Озьы ик Иосиф но, Илийлэсь Мария нылзэ кышно басьтыса, Илийлэн «пиез» луиз. Озьыен, Лука гожтэ Иисуслэсь ӵыжы-выжыоссэ «адями лулмугорын», Мария анаез ласянь (Римъёслы 1:3). Кызьы адӟиське, Иисус Христослэн ӵыжы-выжыосыз Библиын кык пӧртэм ласянь гожтэмын. Солы луыса ми Иисус сярысь тросгес тодыны быгатӥськомы.
25-ТӤ ИНВОЖО — 1-ТӤ ПӦСЬТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | ЛУКА 4, 5
Духовной марӟанъёсты утчаськомы
(Лука 4:17) Солы Исаия пророклэсь книгазэ сётӥзы. Иисус книгаез усьтӥз но тазьы гожтэм интызэ шедьтӥз:
nwtsty эскерон понна материал (Лк 4:17)
Исаия пророклэсь книгазэ Яке «Исаия пророклэсь бинялтэм книгазэ». Исаиялэн бинялтэм книгаез, кудзэ Кулэм зарезьлэн кигожтэмъёсыз пӧлысь шедьтӥзы, 17 куспазы герӟам пергамент листъёслэсь лэсьтэмын вал. Бинялтэм книга 7,3 метр кузьда вал, но отын 54 колонка гожтэмез вал. Назарет сӥнагогаысь бинялтэм книга со кузьда ик вал, дыр. Нырысетӥ даурын Священной Гожтэмъёс люкетъёслы но кылбуръёслы люкемын ӧй вал на, соин ик, кулэ луись люкетэз шедьтон понна, Иисуслы тыршоно вал. Иисус «интызэ шедьтӥз» бере, со Инмарлэсь Кылзэ туж умой тодӥз.
(Лука 4:25) Зэмзэ тӥледлы верасько: Израильын трос вал Илия дыръя палкышноос, куке куинь ар но куать толэзь ӵоже ин ворсаськыса улӥз; соин сэрен быдэс музъем вылын секыт сютэм ар луиз.
nwtsty эскерон понна материал (Лк 4:25)
куинь ар но куать толэзь ӵоже 3Эк 18:1 гожтэмъя, зороз шуыса, Илия «куинетӥ араз» ялӥз. Куд-огъёсыз лыдъяло, Иисуслэн кылъёсыз Эксэйлыкъёслэн 3-тӥ книгаысьтызы гожтэмлы уг тупало шуыса. Но Еврей Гожтэмъёсын уг вераськы, зорытэк куинь арлэсь ӧжытгес улӥз шуыса. «Куинетӥ араз» кылъёс возьмато, вылды, дырез, кудӥз кутскиз, куке Илия Ахавлы нырысетӥзэ вераз, зорытэк улоз шуыса (3Эк 17:1). Куке Илия сое вераз, зорытэк улӥз ини, дыр (ӵем дыръя зорытэк ог куать толэзь улӥз, нош сояз аре трослы кемагес кӧс вал, вылды). Со сяна, куке Илия нош ик Ахав доры лыктӥз («куинетӥ араз»), зорытэк улэмысь ӧз дугды на. Кармил гурезь вылын луэм паймымон учыр бере гинэ зориз (3Эк 18:18—45). Озьыен, Иисуслэн кылъёсыз но Иаков вынызлэн кылъёсыз (Иак 5:17) тупало солы, мар 3Эк 18:1 гожтэмын.