«Инмарлэн каньыллыкез котькыӵе визьлэсь но вылӥын»

1, 2. Мар луиз Павелэн но Сӥлаен Филиппы карын? (Учке статья кутсконысь суредэз.)

УЙШОР. Кык миссионеръёс, Павел но Сӥла, Филиппы карын тюрьмаын пуко. Соослэн пыдъёссы сьӧлтамын, нош тыбыръёссы жугеменызы сэрен висё (Ап. уж. 16:23, 24). Макем ӝог ваньмыз воштӥськиз! Соос валаса но ӧз вуэ, кызьы соосты кутӥзы но калык люкаськон интые нуизы. Отын суд дыртыса соослы приговор ялӥз. Соослэсь дӥськутсэс кесязы но ньӧрен жугизы (Ап. уж. 16:16—22). Кыӵе шонертэм лэсьтӥзы! Павел Рим кунлэн адямиез вал, соин ик сое мукет сямен судъяно валa.

² Пеймыт азьын пытсэтын пукыкуз, Павел тодаз вае, мар луиз ортчем нуналэ. Со Филиппы карын улӥсьёс сярысь малпа. Мукет каръёсын ӵошатоно ке, кудъёсаз Павел вуылӥз ини, та карын иудейёслэн сӥнагогазы но ӧвӧл. Иудейёслы, кудъёсызлэн Инмарлы йыбыртъямзы потэ, кар сьӧрысь шур дурын люкаськоно луэ (Ап. уж. 16:13, 14). Малы соослэн сӥнагогазы ӧй вал? Оло нош, со карын иудейёс пӧлысь дас пиосмурт но ӧз шедьы — ӵапак сомында пиосмурт кулэ вал, сӥнагога усьтон понна. Филиппы карын улӥсьёс Рим кунлэн адямиосыз луэменызы данъясько вал, шӧдске (Ап. уж. 16:21). Соин ик, вылды, со карын улӥсьёс ӧз но малпалэ, та иудейёс, Павел но Сӥла, Рим кунлэн адямиосыз луо шуыса. Ми ум тодӥське малы, но тодӥськомы: соосты юнме янгыше уськытӥзы.

3. Малы паймемын вал Павел тюрьмае сюрем бераз? Кыӵе мылкыдыз вал солэн?

³ Озьы ик Павел малпаське, вылды, мар луиз берпум толэзьёсы. Со вал Пичи Азиын, Эгей зарезьлэн мукет ярдураз. Отын святой дух трос пол ӧз лэзьы сое ӟеч иворез вераны куд-ог интыосын. Шӧдӥське вал, святой дух сое мукет интые ыстэ шуыса (Ап. уж. 16:6, 7). Кытчы меда? Валэктон Павеллы сётэмын вал адӟон пыр, кудзэ со Троадаын дыръяз адӟиз. Солы верамын вал: «Македонияе лыкты». Иегова возьматӥз солы аслэсьтыз эриксэ, но Павел соку ик вазиськиз солэн ӧтёнэзлы. (Лыдӟы Апостолъёслэсь ужъёссэс 16:8—10.) Мар луиз собере? Македонияе вуэмез бере ик сое тюрьмае пуктӥзы! Малы Иегова лэзиз, Павелэз тюрьмае мед пуктозы шуыса? Кӧня солы отын пуконо луоз? Та юанъёс Павеллэн йырысьтыз уг пото вал ке но, со ӧз лэзьы, соосын сэрен солэн осконэз мед лябӟоз но шумпотонэз мед быроз шуыса. Павел но Сӥла вӧсяськыны но, Инмарез данъяса, кырӟаны кутскизы (Ап. уж. 16:25). Инмарлэн каньыллыкез буйгатӥз соосты но секыт малпанъёссэс вормыны юрттӥз.

4, 5. а) Ми но Павеллэн кадь югдуре шедьыны быгатӥськомы-а? Валэктэ. б) Кызьы Павеллэн югдуръёсыз возьмамтэ шорысь воштӥськизы?

⁴ Тӥляд но вал, дыр, сыӵе учыръёсты, куке тӥ малпаськоды вал озьы лэсьтӥськоды шуыса, кызьы Инмарлэн духез вера. Нош берлогес тӥ шуг-секытъёсын пумиськиды яке улонады бадӟым воштӥськонъёс лэсьтоно луиз (Екк. 9:11). Луэмез сярысь малпаськыса, тӥляд юанды кылдэ, дыр: «Малы Иегова лэзиз, озьы мед луоз шуыса?» Улонады сыӵе учыръёс вал ке, мар юрттоз тӥледлы азьланяз но юн луыны но Иеговалы оскиськыны? Та юанлы валэктон шедьтон понна, ойдолэ тодамы ваёмы, мар луиз Павелэн но Сӥлаен.

⁵ Павел но Сӥла, Инмарез данъяса, кырӟаку, возьмамтэ шорысь паймымон ужъёс луизы. Нырысь туж кужмо музъем зурказ. Тюрьмалэн ӧсъёсыз усьтӥськизы но, пытсэтын пукисьёслэн ваньзылэн сьӧлтэтъёссы усьылӥзы. Пытсэт возьмась ассэ быдтыны малпа вал ини, но Павел сое дугдытӥз. Собере пытсэт возьмась ачиз но, солэн быдэс семьяез но пылатӥськизы. Мукет нуналаз кивалтӥсьёс медооссэс ыстӥзы Павелэз но Сӥлаез мозмытыны. Соосты шыпытэн карысь потыны куризы. Нош Павел но Сӥла Рим кунлэн адямиосыз луо шуыса тодэмзы бере кивалтӥсьёс валазы, туж бадӟым янгыш лэсьтӥзы шуыса. Соку соос асьсэос лыктӥзы соосты мозмытыны. Но Павел но Сӥла веразы, кошкон азязы соослэн Лидияен адӟиськемзы потэ шуыса, кудӥз алигес пылатӥськиз. Лидия доры лыктыса, соос озьы ик вын-агайёслэсь но мылкыдзэс ӝутӥзы (Ап. уж. 16:26—40). Макем ӝог ваньмыз воштӥськиз!

«КОТЬКЫӴЕ ВИЗЬЛЭСЬ НО ВЫЛӤЫН»

6. Мае ми али эскеромы?

⁶ Малы дышетэ милемыз Павелэн луэм учыр? Иегова быгатэ лэсьтыны сое, мае ми чик ум возьмаське. Соин ик, шуг-секытъёсын пумиськыса, милемлы ортчыт трос сюлмаськоно ӧвӧл. Павел но со сярысь туж умой тодэ вал. Со адӟиське отысь, мар со гожтӥз Филиппы карысь вын-агайёслы шуг-секытъёс но Инмарлэн каньыллыкез сярысь. Ойдолэ нырысь эскеромы солэсь кылъёссэ, кудъёсыз гожтэмын Филиппыослы 4:6, 7 (лыдӟы). Собере эскеромы Библиысь мукет учыръёсты но, кудъёсысьтыз адӟиське, Иегова лэсьтыны быгатэ шуыса сое, мае ми чик ум возьмаське. Озьы ик, вераськомы со сярысь, кызьы «Инмарлэн каньыллыкез» милемлы юрттыны быгатэ юн луыны но котьку Иегова вылэ оскиськыны.

7. Малы дышетэмез потэ вал Павеллэн Филиппы карысь вын-агайёсты? Малы со милемыз дышетэ?

⁷ Павеллэсь гожтэтсэ лыдӟемзы бере Филиппы карысь вын-агайёс тодазы вайизы сое, мар луиз Павелэн соослэн каразы — соку нокин но уг малпа вал, югдур озьы воштӥськоз шуыса. Малы дышетэмез потэ вал соосты Павеллэн? Солэн потэ вал, вын-агайёс медаз сюлмаське шуыса. Соослы вӧсяськоно вал, «Инмарлэсь каньыллыксэ» басьтон понна. Чаклалэ: со каньыллык «котькыӵе визьлэсь но вылӥын» шуыса верамын. Кызьы сое валано? Павел вераз, ми малпаны но ум быгатӥське шуыса, макем умой «Инмарлэн каньыллыкез». Куддыръя милемлы кыӵе ке учырын номыр карыны уз луы ни кадь потэ, но Иегова озьы уг малпа. Со быгатэ лэсьтыны сое, мае ми чик ум возьмаське. (Лыдӟы 2 Пётрлэсь 2:9.)

8, 9. а) Павел Филиппы карын шуг-секытъёсын пумиськиз ке но, кыӵе умой емышъёс со вайиз? б) Малы вераны луоз, Филиппы карысь вын-агайёс Павеллэсь кылъёссэ санэ понӥзы шуыса?

⁸ Филиппы карысь вын-агайёс асьсэлэсь осконзэс юнматыны быгато вал, малпаськыса со сярысь, мар луиз Павелэн луэм учыр бере, берпум дас аръёс ӵоже. Соос соглаш вал Павеллэн кылъёсыныз. Иегова лэзиз ке но, соослы пумит шонертэм уж лэсьтэмын мед луоз шуыса, ваньмыз со ӟеч иворез утьыны но сое вӧлмытыны юрттӥз (Флп. 1:7). Филиппы карысь кивалтӥсьёс табере умой-умой малпаськысалзы, выль кылдэм христиан кенешлы пумит мае ке лэсьтон азьын. Солы луыса, вылды, кызьы ассэ возиз Павел, соин ӵош ветлӥсь Лука быгатӥз кыльыны Филиппы каре Павел но Сӥла отысь кошкем бере. Отын со быгатӥз выль христианъёсты юнматыны.

⁹ Филиппы карысь вын-агайёс, Павеллэсь гожтэтсэ лыдӟыкузы, валало вал, та гожтэтэз кыӵе ке тодӥсьтэм-валасьтэм адями ӧз гожты шуыса. Павел ас вылаз шӧдӥз, мар со сыӵе бадӟым шуг-секытъёс. Озьы ке но, со «Инмарлэсь каньыллыксэ» ӧз ышты. Вераны кулэ, Филиппы карын улӥсьёслы гожтэтсэ Павел гожъяз Римын, дораз жильыетын пукыкуз. Соку но «Инмарлэн каньыллыкез» со бордын вал (Флп. 1:12—14; 4:7, 11, 22).

«НОМЫР ПОННА НО ЭН СЮЛМАСЬКЕ»

10, 11. Мар кароно милемлы, мар ке пумысен ортчыт сюлмаськиськомы ке, но мае ми Иеговалэсь возьманы быгатӥськомы?

¹⁰ Мар юрттоз милемлы номыр понна но сюлмаськытэк улыны но «Инмарлэсь каньыллыксэ» шӧдыны? Павеллэн Филиппы карын улӥсьёслы гожтэтысьтыз адӟиське, сюлмаськонъёсты вормыны милемлы вӧсяськон юрттэ шуыса. Соин ик, милемыз сюлмаськонъёс зӥбо ке, милемлы соос сярысь Инмарлы вӧсяськыса верано. (Лыдӟы 1 Пётрлэсь 5:6, 7.) Вералэ сюлмаськонъёстэс Иеговалы но оске, со тӥ сярысь сюлмаськоз шуыса. Солы «тау карыса» вӧсяське но тодады вае, мар со тӥ понна кариз ини. Ми тодамы возимы ке, Инмар «мае куриськомы яке мар сярысь малпаськом-сюлмаськиськом, бадӟымлэсь но бадӟымгес ӟечлык сётыны быгатэ» шуыса, милям солы осконмы будоз (Еф. 3:20).

¹¹ Кызьы куке но Павелэз но Сӥлаез паймытӥз, озьы ик милемыз но паймытыны быгатоз со, мар кароз Иегова ми понна. Со кыӵе ке паймымон уж ӧз луы ке но, со луоз ӵапак со, мар милемлы кулэ (1 Кор. 10:13). Но со уг возьматы, милемлы тэк пуконо но возьмано шуыса, ку Иегова милемлы юрттоз яке шуг-секытмес сэрттоз-пертчоз. Милемлы вӧсяськеммыя лэсьтоно (Рим. 12:11). Озьы ми возьматомы, вӧсяськонъёсмы сюлмысьтымы пото шуыса. Соку Иегова но тыршеммес бакель карыны быгатоз. Озьы ке но, валаны кулэ, Иегова милемлы котьку ик уз сёты шуыса ӵапак сое, мае ми куриськомы. Нош со милемыз паймытыны быгатоз, лэсьтыса сое, мае ми чик ум возьмаське. Ойдолэ эскеромы Библиысь учыръёсты, кудъёсыз осконмес юнматозы, Иегова возьмамтэ амалэн милемлы юрттыны быгатэ шуыса.

УЧЫРЪЁС, КУКЕ ИЕГОВА ЮРТТЫЛӤЗ

12. а) Мар кариз Езекия, куке Ассириялэн Сеннахирим эксэез Иерусалим вылэ урдскиз? б) Малы милемыз дышетыны быгатэ со, мар кариз Иегова та учырын?

¹² Библиын трос учыръёс гожтэмын, куке Иегова возьмамтэ амалэн юрттылӥз. Кылсярысь, Езекия эксэй кивалтыку, Ассириялэн Сеннахирим эксэез Иудеялэн вань юнматэм каръёсыз вылэ урдскиз но соосты киултӥз, Иерусалим гинэ кылиз (4 Экс. 18:1—3, 13). Собере Сеннахирим Иерусалим вылэ но урдскиз. Мар кариз Езекия эксэй? Со Иеговалы вӧсяськиз но Исаия пророклы, юрттэт курыса, вазиськиз (4 Экс. 19:5, 15—20). Со сяна, Езекия визьмо лэсьтӥз, куке Сеннахиримлы тыриськыны тыршиз, со кар дорысь мед кошкоз шуыса (4 Экс. 18:14, 15). Озьы ик, Езекия карез дасяз, сое кема котыртыса возизы ке (2 Пар. 32:2—4). Маин со ваньмыз йылпумъяськиз? Иегова кылчинэз ыстӥз, кудӥз одӥг уй куспын Сеннахиримлэсь 185 000 ожгарчиоссэ быдтӥз. Езекия гинэ но ӧз малпа, озьы луоз шуыса! (4 Экс. 19:35).

13. а) Малы милемыз дышетыны быгатэ Иосифлэн учырез? б) Кызьы малпамтэ шорысь Сарралэн шуг-секытэз сэрттэмын-пертчемын вал?

¹³ Нош тани мар луиз Иосифен, Иаковлэн пиеныз, егит дыръяз. Египетын пытсэтын пукыкуз, малпаны быгатэ вал-а со, фараон бере кыкетӥ адями луоз шуыса но со пыр Иегова солэсь семьязэ сютэм кулонлэсь утёз шуыса? (Ул.-выл. 40:15; 41:39—43; 50:20). Иосиф ӧз ик малпа, Иегова озьы лэсьтоз шуыса. Тодамы ваёмы озьы ик Сарраез но, Иосифлэн атаезлэсь песянайзэ. Пересьмем бераз малпаз-а со, Иеговалэн бакель каременыз, пи нуны вайыны быгатоз шуыса? Макем бадӟым шумпотон вайиз Сарралы Исааклэн вордӥськемез! (Ул.-выл. 21:1—3, 6, 7).

14. Кыӵе милям осконмы вань Иегова пумысен?

¹⁴ Ми ум возьмаське, Иегова, выль дунне вуэмлэсь азьло ик, паймымон амалэн милесьтым шуг-секытъёсмес быдтоз шуыса. Озьы ик ми ум возьмаське милесьтым улонмес паймымон амалэн воштэмзэ но. Но ми тодӥськомы, азьло дыръёсы Иегова ужась-тыршисьёсызлы паймымон амалэн юрттылӥз шуыса. Иегова ӧз воштӥськы. (Лыдӟы Исаиялэсь 43:10—13.) Сое тодон милесьтым осконмес юнматэ. Ми оскиськомы, солэсь эриксэ быдэстон понна, со милемлы кулэ луись кужым сётыны быгатэ шуыса (2 Кор. 4:7—9). Малы дышето милемыз Езекиялэн, Иосифлэн но Сарралэн учыръёссы? Ми Иеговалы оскымонэсь кылиськомы ке, Иегова юрттоз милемлы вормыны сое, мар вормыны луонтэм кадь потэ.

15. Мар юрттоз милемлы «Инмарлэсь каньыллыксэ» ас выламы шӧдыны? Валэктэ.

¹⁵ Мар юрттоз милемлы, трос шуг-секытъёсын пумиськыкумы, «Инмарлэсь каньыллыксэ» ас выламы шӧдыны? Иегова Инмаренымы матысь кусыпъёс. Иисус ми понна кулэмен гинэ, ми Инмарен эшъяськыны быгатӥськомы. Дун сётон — со Атаймылэн эшшо одӥгез паймымон кузьымез. Дун сётонлы луыса, Иегова милесьтым сьӧлыкъёсмес куштэ. Со сяна, дун сётонлы луыса, ми быгатӥськомы Инмарлэн син азяз чылкытэсь луыны, каньыл сюлмын улыны но со доры матэ кариськыны (Иоанн 14:6; Иак. 4:8; 1 Пётр 3:21).

«ТӤЛЕСЬТЫД СЮЛЭМДЭС НО, МАЛПАНЪЁСТЭС НО... УТЬЫСА ВОЗЁЗ»

16. Мар луэ, куке ми «Инмарлэсь каньыллыксэ» ас выламы шӧдӥськомы? Вералэ пример.

¹⁶ Мар луэ, куке ми ас выламы шӧдӥськомы Инмарлэсь каньыллыксэ, кудӥз котькыӵе визьлэсь но вылӥын? Филиппыослы 4:7 верамын: «Со тӥлесьтыд сюлэмдэс но, малпанъёстэс но Иисус Христос бордын утьыса возёз». Грек кылэз, кудӥз «утьыса возёз» шуыса берыктэмын, уже куто вал, куке вераськон мынэ вал юнматэм каръёсты возьмась ожгарчиос сярысь. Одӥгез сыӵе кар — Филиппы. Уйин со карын улӥсьёс номырлэсь но кышкатэк кӧлыны быгато вал, малы ке шуоно тодо вал, соосты умой утё шуыса. Озьы ик ми но, куке «Инмарлэсь каньыллыксэ» ас выламы шӧдӥськомы, милемлы каньыл луэ — сюлмамы но, малпанъёсамы но. Ми тодӥськомы, Иегова милемыз яратэ но солэн потэ, ми зэмзэ ик шудоесь мед луомы шуыса (1 Пётр 5:10). Ми сое тодӥськомы ке, со юрттэ милемлы ортчыт сюлмаськытэк яке кайгырытэк улыны.

17. Мар юрттоз милемлы азьланяз осконэн учкыны?

¹⁷ Ӝоген бадӟым куректон луоз, кыӵеез дуннелэн кутсконысеныз туннэ нуналозь ӧй на вал (Матф. 24:21, 22). Ми ум быгатӥське вераны, мар со ваёз котькудмылы. Озьы ке но, милемлы со понна трос сюлмаськоно ӧвӧл. Ми ваньзэ ум тодӥське ке но, мар кароз Иегова, ми тодӥськомы асьмелэсь Инмармес. Библиысь учыръёс возьмато: мар гинэ медаз луы, Иегова аслэсьтыз малпанзэ котьку быдэстэ, куддыръя возьмамтэ амалэн но. Котькуд учырын, куке ми сое ас выламы шӧдӥськомы, ми выль паласен адӟыны быгатӥськомы, кызьы «Инмарлэн каньыллыкез котькыӵе визьлэсь но вылӥын» луэ.