«Улон но ужан-тыршон» ужан тетрадьлы малпанъёс
7—13-ТӤ КОНЬЫВУОН
ИНМАРЛЭН КЫЛЫСЬТЫЗ УЗЫРЛЫК | ИАКОВ 3—5
Духовной марӟанъёсты утчаськомы
(Иаков 4:7) Озьыен, Инмарлы тэрытске, нош диаволлы пумит султэ — соку со тӥ дорысь бызьыса кошкоз.
Умой-а тӥ тодӥськоды тушмондэс?
4 Апостол Пётр Шайтан Дьяволэз «бурсӥсь лев» шуыса нимаз, нош апостол Иоанн — «лобась кый» но «кый» (1 Пётр 5:8; Усьт. 12:9). Но милемлы Шайтанлэсь ортчыт трос кышкано ӧвӧл, малы ке шуоно со котьмар карыны уг быгаты. (Лыдӟе Иаковлэсь 4:7.) Иегова, Иисус но Инмарлы оскымон кылчинъёс котьку дась милемлы юрттыны. Соосын ӵош ми тушмонмылы пумит сылыны быгатӥськомы. Озьы ке но милемлы куинь кулэ луись юанъёслы валэктон шедьтоно: макем кужмо Шайтан? Кызьы Шайтан адямиосты пӧяны тырше? Но мар карыны со уг быгаты? Озьы ик ми малпаськомы, малы со милемыз дышетыны быгатэ.
(Иаков 4:11, 12) Агай-вынъёсы, огдэс огды урод кылын эн куаретэ. Кин агай-выныз сярысь урод кыл вера ке, яке агай-вынзэ судить каре ке, со Инмар законэз урод кылын веран, законэз судить карон луэ. Нош тон законэз судить кариськод ке, соку тон законэз быдэсъясь уд ни луиськы, судья луиськод. 12 Закон Сётӥсь но Суд Лэсьтӥсь — одӥг, Со утьыны но, быдтыны но быгатэ. Нош тон кин сыӵе — мукетсэ судить кариськод?
w97 15/11 20 б., 8 абз.
Оскон милесьтым мылкыдмес ӝутэ чиданы но вӧсяськыны
8 Огъя оскись сярысь урод кыл веран — со сьӧлык (Иаков 4:11, 12). Озьы ке но куд-огъёсыз вын-агайёссэс тэргало, малы ке шуоно асьсэды шонерен лыдъяло яке, мукетъёссэ ултӥяса, асьсэды вылӥе пуктэмзы потэ (Псалтирь 49:20; Мадёнъёс 3:29). Грек кыл, кудӥз «урод кыл вераны» шуыса берыктэмын, возьматэ тушмонъяськонэз но вера бадӟыматыса яке пӧяса янгыше уськытон сярысь. Со вын-агайдэ судить карем выллем луэ. Кыӵе учыре ми вын-агай сярысь урод кыл вераломы но Инмар законэз судить каромы? Фарисейёс но книга тодӥсьёс Инмарлэсь курон-косонзэ палэнтӥзы но ас курон-косонъёссыя судъязы (Марк 7:1—13). Ми судъяськомы ке вын-агаез, кудзэ Иегова уг судъя, соку судить ум кариське-а Инмар законэз? Законын тырмымтэез вань шуыса лыдъяськомы ке, со сьӧлык ӧвӧл-а? Нош вын-агаез шонертэм тэргаса, ми яратонлэсь законзэ ум быдэсъяське (Римъёслы 13:8—10).
14—20-ТӤ КОНЬЫВУОН
ИНМАРЛЭН КЫЛЫСЬТЫЗ УЗЫРЛЫК | 1 ПЁТР 1, 2
Духовной марӟанъёсты утчаськомы
(1 Пётр 1:10—12) Та утиськонэз утчазы, эскеризы-чаклазы пророкъёс. Соос азьвыл ик веразы тӥледлы дасям дэлет сярысь. 11 Эскеризы-чаклазы, кудӥз вылэ но кыӵе дырлы возьматылӥз соос пушкысь Христослэн Духез, куке Со азьвыл ик Христослэсь курадӟонъёссэ но соос бӧрсьы лыктӥсь Солэн пиштӥсь данлыкез сярысь тодытъяз. 12 Соослы усьтэмын вал: соос асьсэлы ӟечлык утчаса ӧз улэ, асьмелы ӟеч карон понна ужаса-тыршыса улӥзы. Инмысен лэзем Святой Духен тыр луыса Ӟеч Ивор вайисьёс та сярысь тӥледлы тодытӥзы. Кылчинъёслэн но та сярысь туж тодэмзы потэ.
w08 15/11 21 б., 9 абз.
Иаковлэн гожтэтысьтыз но Пётрлэн гожтэтысьтыз тунсыко малпанъёс
1:10—12. Кылчинъёслэн туж потэ вал тодэмзы зырӟем христианъёслэн кенешсы сярысь мур духовной зэмлыкъёсты — зэмлыкъёсты, кудъёсыз гожтэмын вал вашкала дыръёсы Инмарлэн пророкъёсыныз. Кылчинъёс со зэмлыкъёсты валазы, учкыса, кызьы Иегова ассэ возе выль кылдытэм христиан кенешен но дышетэ сое (Еф. 3:10). Асьмелы но, кылчинъёслэсь адӟем карыса, тыршоно ӧвӧл-а «Инмарлэсь ватӥськем мурдалаоссэ» тодыны? (1 Кор. 2:10).
(1 Пётр 2:25) Тӥ уго, возьмаськисьтэк кыльыса, йыромем ыжъёс кадесь вал, нош табере лулдэс Возьмась, Чаклась доры берытскиды.
it «Надзиратель», «Верховный надзиратель» подзаг.
Чаклась
Вылӥ чаклась. Апостол Пётр, куке «йыромем ыжъёс» сярысь вера, Исаиялэн 53:6 гожтэм кылъёсты вера, луоз (1Пт 2:25). Собере Пётр гожтэ: «Нош табере лулдэс Возьмась, Чаклась доры берытскиды». Татын Иегова Инмар сярысь вераськон мынэ, шӧдске, малы ке шуоно соосты, кинъёслы гожъяз Пётр, «йыромем», Иисус Христос дорысь палэнскем муртъёс шуыса ниманы уг луы; уго со пыр соос Иегова Инмар доры, аслаз калыкезлэн Быдӟым Возьмасез доры, ваемын вал (Пс 22:1; 79:2; Иер 23:3; Иез 34:12). Озьы ик Иеговаез чаклась шуыса ниманы луоз, малы ке шуоно со чакла (Пс 16:3). Иеговалэн чакламез (грек кыл эпископе́) куддыръя судъянэ но вуттыны быгатэ вал. Кылсярысь, озьы судъямын вал а. в. I даурын Иерусалим, кудӥз «Инмарлэсь... [со] доры лыктон [грек кыл эпископе́с] дырзэ» ӧз тоды (Лк 19:44). Озьы ик Иеговалэн чакламез бакель карон но вайыны быгатэ, кызьы со луоз соосын, кинъёс Инмарез данъялозы «Солэн лыктон [грек кыл эпископе́с] нуналаз» (1Пт 2:12).
21—27-ТӤ КОНЬЫВУОН
ИНМАРЛЭН КЫЛЫСЬТЫЗ УЗЫРЛЫК | 1 ПЁТР 3—5
Духовной марӟанъёсты утчаськомы
(1 Пётр 3:19, 20) Со духеныз лэзиськыса пытсэтэ ворсам духъёслы тодытӥз,— 20 соослы, кудъёсыз куке но соосты возьмась Инмарлэн кема чиданэзлы тэрытскисьтэмесь вал. Ной улон нуналъёсы, ковчег пыж лэсьтон вакытэ, тямыс лул гинэ ву пыр утиськыны быгатӥзы.
w13 15/6 23 б.
Лыдӟисьёслэн юанъёссы
Библиын верамын, Иисус «пытсэтэ ворсам духъёслы тодытӥз» шуыса (1 Пётр 3:19). Мае со возьматэ?
▪ Апостол Пётр верамъя, со духъёс Ной улон нуналъёсы «Инмарлэн кема чиданэзлы тэрытскисьтэмесь вал» (1 Пётр 3:20). Валамон, Пётр вераз духовной кылдытэмъёс сярысь, кудъёсыз Шайтанлэн пумит ӝутсконаз пыриськизы. Иуда вера кылчинъёс сярысь, «кудъёсыз Инмарлэсь соослы сётэм вылӥлыко луонзэс утьыны ӧз быгатэ, асьсэлэсь улон интызэс куштыса кошкизы». Озьы ик со вера, Инмар «соосты пырак вапумъёс ӵоже пеймыт азьын туж бадӟым нуналлэн судэз дыръялы жильыетын думылыса возе» шуыса (Иуда 6).
Маин духовной кылдытэмъёс Ной улон нуналъёсы тэрытскисьтэм луэмзэс возьматӥзы? Ву тудӟон вуэмлэсь азьло со лек духъёс адямиос кадь кариськизы,— та учырын со Инмарлэн малпанэзлы пумит вал (Ул.-выл. 6:2, 4). Со сяна, кышномуртъёсын кӧласа, соос лэсьтӥзы сое, мар карыны соос кылдытэмын ӧй вал. Инмар кылчинъёсты ӧз кылдыты, соос кышномуртъёсын мед кӧлалозы шуыса (Ул.-выл. 5:2). Со лек, кылзӥськисьтэм кылчинъёс Инмарен пуктэм дыре быдтэмын луозы. Нош али, кызьы вера Иуда, соос «пеймыт азьын» уло, яке духовной тюрьмаын.
Ку но кызьы Иисус «пытсэтэ ворсам духъёслы тодытӥз»? Пётр вера, Иисус духъёслы тодытӥз шуыса, куке со «духеныз улӟытэмын вал» (1 Пётр 3:18, 19). Висъялэ озьы ик саклыктэс, Пётр вера, Иисус «тодытӥз» шуыса. Пётр ортчем дырын вера. Со возьматэ, Иисус «тодытӥз» шуыса, куке Пётр аслэсьтыз нырысетӥ гожтэтсэ ӧз гожты на вал. Улӟемез бере кӧня ке дыр ортчыса, Иисус лек духъёслы ялӥз, вылды, соос асьсэлэн ужъёссы понна одно ик кыл кутозы шуыса. Сыӵе тодытон возьматэ вал, соослэн нокыӵе но осконзы ӧвӧл ни шуыса. Со вал судъян сярысь тодытон (Иона 1:1, 2). Иисус кулытозяз оскымон кылӥз но осконзэ возьматӥз, нош собере сое Инмар улӟытӥз (ваньмыз со возьматӥз, Шайтанлэн соин кузёяськыны кужымез ӧй вал шуыса). Соин ик Иисуслэн правоез вал сыӵе янгыше уськытӥсь приговор ялыны (Иоанн 14:30; 16:8—11).
Вуонояз Иисус Шайтанэз но, пумит ӝутскем кылчинъёсты но думылоз но пыдэстэм дуннее сэрпалтоз (Лука 8:30, 31; Усьт. 20:1—3). Со дырозь кылзӥськисьтэм духъёс духовной пеймыт азьын улозы, нош собере одно ик пыраклы быдтэмын луозы (Усьт. 20:7—10).
(1 Пётр 4:6) Уго соин ик, кинъёс али кулэмын ни, соослы но Ӟеч Ивор тодытэмын вал, адями кадь мугорын судэ пырыса, духен Инмар бордын мед улозы шуыса.
w08 15/11 21 б., 7 абз.
Иаковлэн гожтэтысьтыз но Пётрлэн гожтэтысьтыз тунсыко малпанъёс
4:6 — Кинъёс вал соос, «кинъёс али кулэмын ни», кудъёсызлы «Ӟеч Ивор тодытэмын вал»? Вераськон мынэ соос сярысь, кинъёс асьсэлэн йыружъёсынызы, сьӧлыкъёсынызы сэрен кулэмын вал, яке ӟеч иворез кылэмзылэсь азьло духовноез ласянь кулэмын вал (Еф. 2:1). Нош ӟеч иворлы оскемзы бере соос духовноез ласянь улӟизы.
28-ТӤ КОНЬЫВУОН — 3-ТӤ ШУРКЫНМОН
ИНМАРЛЭН КЫЛЫСЬТЫЗ УЗЫРЛЫК | 2 ПЁТР 1—3
Духовной марӟанъёсты утчаськомы
(2 Пётр 1:19) Азьпалзэ тодытыса веран но асьмелы возиськон понна юн пыкъет луэ. Тӥ умой лэсьтӥськоды: нунал ӟардыны кутскытозь, сюлмады ӵук кизили ӝужатозь, пеймыт азьын пиштӥсь югыт сётӥсь лампада дорын кадь со бордын возиськыса.
w08 15/11 22 б., 2 абз.
Иаковлэн гожтэтысьтыз но Пётрлэн гожтэтысьтыз тунсыко малпанъёс
1:19 — Кин со «ӵук кизили», ку со кизили ӝужаны кулэ но кызьы ми валаны быгатомы, со ӝужаз ини шуыса? «Ӵук кизили» — со Иисус Христос, кудӥз эксэй карыса пуктэмын (Усьт. 22:16). 1914-тӥ арын Иисус Мессия Эксэй луиз но, вань кылдытэмъёс вылэ «ӝужаса», выль нуналлэсь кутскемзэ ивортӥз. Иисуслэн воштӥськемез сярысь адӟон возьматӥз, макем бадӟым дан но кужым сётэмын Христослы. Озьы ик со возьматӥз, Инмарлэн азьпалзэ ивортыса верам кылъёсыз зэм луо шуыса. Со кылъёсты санэ понӥськомы ке, соос милесьтым сюлэммес югдыто но солы луыса ми валаськомы, Ӵук кизили ӝужаз ини шуыса.
(2 Пётр 1:12—15) Та сярысь мон тӥледлы ялан тодады вайытыса уло, тӥ со сярысь тодӥськоды, зэмос зэмлыкын но тӥ юнматэмын ке но. 13 Та мугорылэн корказ улытозям, тодэ вайытыса тӥледыз ӝутканэз шонер шуыса лыдъясько. 14 Та коркаме ӝоген кельто ни шуыса тодӥсько, уго асьмелэн Кузё-Инмармы Иисус Христос мыным сое усьтӥз. 15 Мон тыршо, кулэм берам но тӥ та сярысь ялан тодады мед ваёды шуыса.
w08 15/11 22 б., 6 абз.
Иаковлэн гожтэтысьтыз но Пётрлэн гожтэтысьтыз тунсыко малпанъёс
1:12—15. Азьланяз но «зэмос зэмлыкын... юнматэмын» мед луомы шуыса, милемлы ялан тодэ вайытонъёс кулэ, кылсярысь, сыӵеосыз, кудъёссэ ми кылӥськомы кенешлэн пумиськонъёсаз, ас поннамы Библиез дышетыса но сое лыдӟыса.