1-ТӤ УРОК

Умой кутскон кылъёс

Ап. уж. 17:22

УЖПУМЕЗ Тунсыкъяськыты кылзӥсьёстэ, вера темазэ но возьматы, малы та тема кулэ.

МАР КАРОНО СО ПОННА

Тунсыкъяськыты. Бырйы юанэз, улонысь учырез, кыӵе ке иворез яке вера сое, мар кылзӥсьёсыдлы тунсыко потоз.

Малпа, мар сюлмаськытэ но тунсыкъяськытэ кылзӥсьёстэ, но, вераны кутскыкуд, со малпанъёсты уже кут.
Вера темазэ. Эскеры, кутскон кылъёсыд веранэдлэсь валтӥсь темазэ но ужпумзэ валаны юртто-а, уг-а шуыса.
Валэкты, малы кулэ та тема. Лыдэ басьты сое, мар зэмзэ ик кулэ кылзӥсьёсыдлы. Соос валаны кулэ, кыӵе пайда ваёз соослы верамед.

Речьтэ дасякуд, юа аслэсьтыд: «Маин пумисько кенешысьтым вын-агайёс но сузэр-апайёс?» Собере кутскон кылъёстэ соослэн югдуръёссылы тупатыны тыршы.

УЖАН-ТЫРШОНЫН

Адямилэсь маин тунсыкъяськемзэ валан понна, сак учкы. Учкы, мар со каре, вань-а солэн нылпиосыз, кыӵе солэн коркаез. Тон вакчияк вераны быгатод со сярысь, мар солы тунсыко потэ. Ми умой сяммес возьматыны быгатомы, тунсыкъяськимы ке адямиен, кылсярысь, юамы ке, кызьы солэн ужъёсыз мыно, яке ас сярысьтымы мае ке верамы ке. Куддыръя умойгес луоз Библия сярысь вераны, адями доры выльысь лыктыку гинэ. Валан понна, ку со сярысь верано, шӧдӥсь-валась лу.