«Улон но ужан-тыршон» ужан тетрадьлы малпанъёс

3—9-ТӤ КУАРТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | ЛЫДПУСЪЁС 27—29

Духовной марӟанъёс

(Лыдпусъёс 28:7) ыжпилы быдэ, сое курбон сётыкуд, гинлэн ньылетӥ люкетысьтыз винаез курбон-саламлы кисьты, святой интыысен курбон-саламез кисьты, со Кузё-Инмарлы сӥзем вина.

(Лыдпусъёс 28:14) Ошпиез курбон сётыкуды, курбон-саламлы ӝыны гин вина кисьтоно; такаез курбон сётыку, гинлэн куинетӥ люкетысьтыз курбон-салам вина кисьтоно, ыжпиез курбон сётыку, гинлэн ньылетӥ люкетысьтыз курбон-салам вина кисьтоно. Ар куспысь вань толэзьёсы выль толэзь потыку тылын сутӥськись курбон сётон та.

it «Приношения», «Питьевые приношения» подзаг.

Курбон-саламъёс

Винаез курбон-саламлы ваён. Винаез курбон-саламлы ваё вал тросэныз курбонъёсын, эшшо ке но, куке израиль калык Сӥзем музъеме интыяськиз (Лд 15:2, 5, 8—10). Со вал вина, кудзэ курбон сётон ӝӧк вылэ кисьтоно (Лд 28:7, 14; ӵошаты Пот 30:9; Лд 15:10). Апостол Павел Филиппыысь христианъёслы гожтӥз: «Тӥляд оскондылы ужаме-тыршеме понна курбонлы [«курбон-салам виналы», ВД] ке но пӧрми, мон шумпотӥсько, тӥледын огазьын шумпотӥсько». Ассэ курбон-салам винаен ӵошатыса, Павел возьматэ, агайёслы юрттон понна быдэсак ассэ сётыны дась шуыса (Фп 2:17). Кулон азяз со Тимофейлы гожтӥз: «Курбон [«курбон-салам вина», ВД] кадь мон луи ни, табере мынам кошкон дыры вуиз» (2Тм 4:6).

Библиез лыдӟон

(Лыдпусъёс 28:11—31) Выль толэзь потыку но, Кузё-Инмарлы сӥзьыса, тылын сутыны курбонъёс ваелэ: сюро таза пудо пӧлысь кык ошпи, одӥг така, одӥг аресъем сизьым ыжпиосты курбонлы вае, шексы чик медаз лу, ¹² ошпиез курбон сётыкуды, ефалэн куинь дасмос люкетаз чабей пызь поныса вае, сое вӧйын суралэ но салам нянь пыже; такаез курбон сётыкуды, ефалэн кык дасмос люкетаз чабей пызь поныса вае, сое вӧйын суралэ но салам нянь пыже; ¹³ ыжпиез курбон сётыкуды, ефалэн дасэтӥ люкетаз чабей пызь поныса вае, сое вӧйын суралэ но салам нянь пыже. Та тылын сутӥськись курбон ческыт зын поттэ, со Кузё-Инмарлы сӥзем курбон. ¹⁴ Ошпиез курбон сётыкуды, курбон-саламлы ӝыны гин вина кисьтоно; такаез курбон сётыку, гинлэн куинетӥ люкетысьтыз курбон-салам вина кисьтоно, ыжпиез курбон сётыку, гинлэн ньылетӥ люкетысьтыз курбон-салам вина кисьтоно. Ар куспысь вань толэзьёсы выль толэзь потыку тылын сутӥськись курбон сётон та. ¹⁵ Сьӧлыкъёс понна Кузё-Инмарлы курбон сётыны одӥг кечтака вае; тылын сутӥськись ялан сётӥськись курбонъёс вӧзы тае ватсаса сётоно на, сое курбон-салам вина кисьтонэн огдыре ортчытоно. ¹⁶ Нырысетӥ толэзьлэн дас ньылетӥ нуналаз Кузё-Инмарлэн Пасхаез. ¹⁷ Та толэзьлэн дас витетӥ нуналаз ортчись праздник; сизьым нунал ӵоже юмал нянь сиыса улыны кулэ. ¹⁸ Нырысетӥ нуналаз вӧсяськонэ люкаське; номыр но эн ужалэ; ¹⁹ Кузё-Инмарлы, тылын сутыса, курбон сётэ: сюро таза пудо пӧлысь кык ошпи, одӥг така но одӥг аресъем сизьым ыжпиосты курбон сётэ; курбон пудоды шектэм мед луоз; ²⁰ ошпиез курбон сётыку, ефалэн куинь дасмос люкетаз тырыса, чабей пызь вае, сое вӧйын суралэ но салам нянь пыже; такаез курбон сётыку, ефалэн кык дасмос люкетаз тырыса, чабей пызь вае, сое вӧйын суралэ но салам нянь пыже; ²¹ сизьым ыжпиосты курбон сётыкуды, котькуд ыжпи понна, ефалэн дасэтӥ люкетаз поныса, чабей пызь вае, сое вӧйын суралэ но салам нянь пыже; ²² сьӧлыкъёс понна, тӥледыз соослэсь сузян понна курбон сётыны кечтака вае; ²³ котькуд нуналэ ӵукналы быдэ тылын сутыса сётӥськись курбон вӧзы таосты ватсаса сётэ на. ²⁴ Тазьы ик сизьым нунал пӧлысь котькудаз курбон вае; со — нянь, со — курбон, со Кузё-Инмар азьын ческыт зын поттэ; тылын сутӥськись, ялан сётӥськись курбон вӧзы, соин ӵош курбон-салам вина кисьтыны вае. ²⁵ Сизьыметӥ нуналэ тӥ вӧсяськонэ люкаське; номыр но эн ужалэ. ²⁶ Арняослэсь праздниксэс тӥ дорын ортчытъян дыръя нырысь кисьмам емышъёслэн нуналазы Кузё-Инмарлы выль салам нянь вайыкуды, тӥ вӧсяськонэ люкаське; номыр но эн ужалэ; ²⁷ Кузё-Инмарлы ярамон ческыт зын поттон понна тылын сутыны курбон вае: сюро таза пудо пӧлысь кык ошпи, одӥг така но одӥг аресъем сизьым ыжпи, ²⁸ соосын ӵош салам нянь вае: ошпилы быдэ ефалэн куинь дасмос люкетаз вӧйын сурам чабей пызь вае; такалы быдэ — ефалэн кык дасмос люкетаз вӧйын сурам чабей пызь вае; ²⁹ сизьым ыжпиос пӧлысь котькудӥз вӧзы ефалэн дасэтӥ люкетаз вӧйын сурам чабей пызь вае. ³⁰ Тӥледыз сьӧлыкъёстылэсь сузян понна, одӥг кечтака вае. ³¹ Тылын сутыса ялан сётӥськись курбонъёс сяна, салам нянь сяна, соос вӧзы кисьтоно курбон-саламъёс вае; курбон пудоосты шектэмесь луыны кулэ“».

10—16-ТӤ КУАРТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | ЛЫДПУСЪЁС 30, 31

Духовной марӟанъёс

(Лыдпусъёс 30:11—13) Нылкышно картэзлэн корказ сӥзиськиз ке, марлэсь ке утиськыны-возиськыны кыл сётыса оскытӥз ке, ¹² нош картэз кылӥз но со пумысен номыр но ӧз ке вера, со ужзэ быдэстонлы ӧз ке пумитъяськы, со вань сётэм кылъёссэ быдэстыны кулэ. ¹³ Нош картэз кылӥз но соку ик соосты кулэтэм кариз ке, соку кышномуртлэн ымысьтыз потэм сӥзиськемъёс, лулызлэн марлэсь ке утиськыны-возиськыны сётэм кылъёсыз уз быдэсме: картэз соосты быдтӥз, Кузё-Инмар кышномуртлы простить кароз.

it «Иеффай», «Обет Иеффая» подзаг., 4 абз.

Иеффай

Адямиез Иеговалы сётыны, яке сӥзьыны, быгато вал, со вӧсяськон скинияын мед ужалоз-тыршоз шуыса. Анай-атайёс быгато вал нылпиоссэс сыӵе ужан-тыршонэ сётыны. Кылсярысь, Анна кылзэ сётӥз, пизэ скинияын ужан-тыршон понна сётоз шуыса. Солэн картэз, Елкана, пумит ӧй вал. Самуил пизы нонэмысь дугдэм бере Анна сое скинияе вайиз. Со сяна, Анна ошпиез курбонэ вайиз (1Эк 1:11, 22—28; 2:11). Эшшо одӥгез нылпи, кудӥз назорей луыса Инмарлы ужаны-тыршыны сӥземын вал,— со Самсон (Сд 13:2—5, 11—14; ӵошаты Лд 30:4—6, 17, кытын верамын, атай нылыз понна кыл кутэ шуыса).

Библиез лыдӟон

(Лыдпусъёс 30:2—17) Израиль пиослэн выжыоссылэн кивалтӥсьёссылы Моисей тазьы шуиз: «Тани, Кузё-Инмар кыӵе косон сётӥз: ³ кин ке Кузё-Инмар азьын сӥзиськиз яке марлэсь ке утиськыны-возиськыны лулыныз-сюлмыныз кыл сётыса оскытӥз ке, соку со сётэм кылзэ быдэстытэк кельтыны кулэ ӧвӧл ини, ма потӥз солэн кылысьтыз-ымысьтыз, ваньзэ сое со быдэстыны кулэ. ⁴ Кышномурт пинал дыръяз, атай юртаз эшшо улыкуз, Кузё-Инмар азьын сӥзиськиз ке, марлэсь ке утиськыны-возиськыны кыл сётӥз ке, ⁵ нош атаез кылӥз ке нылызлэсь сӥзиськемзэ, марлэсь ке утиськыны-возиськыны кыл сётэмзэ, нош со, атаез, та пумысен номыр но ӧз ке вера, соку ныллэн вань сӥзиськемъёсыз, кыл сётэмъёсыз быдэсмозы. ⁶ Нош атаез кылэм бераз ик нылызлэсь кыл сётэмзэ быдэстонлы пумит луиз ке, соку солы сӥзиськемъёссэ, марлэсь ке утиськыны-возиськыны кыл сётэмъёссэ быдэстыны кулэ ӧвӧл; Кузё-Инмар та нылэз простить кароз, малы ке шуоно та ужзэ быдэстыны атаез ӧз лэзьы. ⁷ Та ныл бызиз ке, нош солэн быдэстоно сӥзиськемез вань ке, яке ас ымысьтыз потэм кылын ассэ кыӵе ке ужен герӟам ке, ⁸ нош кузпалыз кылӥз но кылэм бераз ик номыр но ӧз ке вера, соку солэн сӥзиськемъёсыз, сётэм кылъёсыз быдэсмозы. ⁹ Нош картэз кылыса вылысь та ужзэ кышноезлы быдэстыны ӧз ке лэзьы, солэсь кыл сётэмзэ солэн вылысьтыз палэнтӥз ке, солэн ымысьтыз потэм кылзэ но, кудӥныз со ассэ ачиз герӟаз, кулэтэм кариз ке, Кузё-Инмар та кышномуртлы сьӧлык уз гожты. ¹⁰ Нош палкышнолэн, люкиськем кышномуртлэн кыл сётэмез, кыӵе гинэ со медаз луы, сое со быдэстыны кулэ. ¹¹ Нылкышно картэзлэн корказ сӥзиськиз ке, марлэсь ке утиськыны-возиськыны кыл сётыса оскытӥз ке, ¹² нош картэз кылӥз но со пумысен номыр но ӧз ке вера, со ужзэ быдэстонлы ӧз ке пумитъяськы, со вань сётэм кылъёссэ быдэстыны кулэ. ¹³ Нош картэз кылӥз но соку ик соосты кулэтэм кариз ке, соку кышномуртлэн ымысьтыз потэм сӥзиськемъёс, лулызлэн марлэсь ке утиськыны-возиськыны сётэм кылъёсыз уз быдэсме: картэз соосты быдтӥз, Кузё-Инмар кышномуртлы простить кароз. ¹⁴ Кышномуртлэсь котькудзэ но сӥзиськемзэ, солэсь лулзэ зӥбломытон понна котьмарлэсь но возиськыны кыл сётыса оскытэмзэ картэз быгатэ юнматыны, картэз быгатэ палэнтыны; ¹⁵ нош картэз та пумысен нуналысь нуналэ номыр но вератэк улӥз ке, соку таин со кышноезлэсь вань сӥзиськемъёссэ, марлэсь ке возиськыны вань кыл сётэмъёссэ юнматӥз, уго со кылӥз но чус улӥз та пумысен. ¹⁶ Нош картэз кылэм бераз (берлогес) соосты кулэтэм кариз ке, соку со кышномуртлэсь сьӧлыксэ вылаз басьтоз». ¹⁷ Тани Кузё-Инмарлэн Моисей пыр сӥзьыса сётэм пуктон-косонъёсыз, кудъёсыз сётэмын картэн кышно, атаен пинал дыръяз солэн юртаз улӥсь нылыз пумысен, соослэн кусыпъёссы пумысен.

17—23-ТӤ КУАРТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | ЛЫДПУСЪЁС 32, 33

Духовной марӟанъёс

(Лыдпусъёс 33:54) Котькудӥз выжы люкет мед басьтозы шуыса, та музъемез, пус чӧлтыса, тӥ люкылэ: трос лыдо выжылы бадӟымгес музъем сётэ, нош ӧжыт лыдо выжылы пичигес музъем сётэ; кинлы кытчы пус усёз, отчы ик люкет музъем басьтоз; атайёстылэн выжыоссыя асьтэлы люкет музъем басьтэ.

it «Граница», «Границы племен Израиля» подзаг., 3 абз.

Кунгож

Куке, пус чӧлтыса, тодӥзы, кудпалан выжылэн люкетэз луоз, выжылэсь быдӟалазэ лыдэ басьтыса, ужпум кутоно вал, кӧня музъем солы сётоно. «Котькудӥз выжы люкет мед басьтозы шуыса, та музъемез, пус чӧлтыса, тӥ люкылэ: трос лыдо выжылы бадӟымгес музъем сётэ, нош ӧжыт лыдо выжылы пичигес музъем сётэ; кинлы кытчы пус усёз, отчы ик люкет музъем басьтоз» (Лд 33:54). Кудпалан выжылэн люкетэз луоз, воштыны уг луы вал, нош музъем люкетлэсь быдӟалазэ воштыны луэ вал. Кылсярысь, куке тодмо луиз, Иудалэн музъемез укыр бадӟым шуыса, солэсь оглюкетсэ Симеонлы сётӥзы (ИсН 19:9).

Библиез лыдӟон

(Лыдпусъёс 32:28—42) Соос пумысен Моисей Елеазар священниклы, Навинлэн Иисус пиезлы, израиль калыклэн выжыосызлэн кивалтӥсьёссылы таӵе косон сётӥз, ²⁹ Моисей соослы шуиз: «Гад пиос, Рувим пиос тӥледын ӵош Иордан сьӧры потӥзы ке, ваньзы ожмаськон тӥрлыкъёсын Кузё-Инмарлэн азяз оже мынӥзы ке, азьысьтыды музъемез киултӥды ке, соку Галаад музъемез соослэн киулазы сётэ; ³⁰ нош соос тӥледын ӵош ожмаськон тӥрлыкъёсын ӧз ке мынэ, соку соос тӥледын ӵош Ханаан музъеме асьсэлы люкет басьтозы». ³¹ Соку Гад пиос, Рувим пиос ответ сётыса шуизы: «Кызьы Кузё-Инмар тынад ляльчиосыдлы вераз, озьы ик ми лэсьтомы; ³² ожмаськон тӥрлык кутыса, Кузё-Инмарлэн азяз ми Ханаан музъеме мыномы, нош люкет музъеммы Иордан шурлэн тапалаз мед луоз». ³³ Соослы, Гад пиослы, Рувим пиослы, Иосифлэн Манассия пиезлэн выжыезлэн ӝыны люкетызлы, Моисей аморрейёслэн Сӥгон эксэйзылэсь кун музъемзэ сётӥз, Васанлэн Ог эксэезлэсь кун музъемзэ городъёсынызы, котырысьтызы ёросъёсынызы валче,— музъемзылэн вань палъёсазы интыяськем городъёссэс сётӥз. ³⁴ Гад пиос выльдӥзы-тупатъязы Дивон, Атароф, Ароер, ³⁵ Атароф-Шофан, Иазер, Иогбега, ³⁶ Беф-Нимра, Беф-Гаран — юнматэм городъёсты, ыж возён интыос лэсьтӥзы. ³⁷ Рувим пиос выльдӥзы-тупатъязы Есевон, Елеале, Кириафаим, ³⁸ Нево, Ваал-Меон городъёсты — таослэн нимъёссы воштэмын — но Сӥвмаез, выльдэм-тупатъям городъёссылы выль нимъёс сётӥзы. ³⁹ Манассиялэн Махир пиезлэн пиосыз Галаадэ мынӥзы, сое киултӥзы, отын улӥсь аморрейёсты уллязы; ⁴⁰ Моисей Галаадэз Манассиялэн Махир пиезлы сётӥз, со отчы улыны интыяськиз. ⁴¹ Манассиялэн Иаир пиез мынӥз но гуртъёссэс киултӥз, соосты «Иаирлэн гуртъёсыз» шуыса нимаз. ⁴² Новах мынӥз но Кенафез киултӥз, солы тэрытскись гуртъёсты но киулаз басьтӥз, киултэм городэзлы аслэсьтыз нимзэ сётӥз: Новах.

24—30-ТӤ КУАРТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | ЛЫДПУСЪЁС 34—36

Духовной марӟанъёс

(Лыдпусъёс 35:31) Адями виемез понна судэ сюрем муртлэсь лулзэ утён понна тырем дунэз эн басьтэ, со муртэ виыны кулэ;

w91 15/2 13 б., 13 абз.

Ваньмыз понна тупась дун тырон

¹³ Дун тырон Адамлы но, Евалы но пайда уг вайы. Моисейлэн законаз таӵе возет вань: «Адями виемез понна судэ сюрем муртлэсь лулзэ утён понна тырем дунэз эн басьтэ» (Лыдпусъёс 35:31). Адам пӧямын ӧй вал. Со тодыса вылысь сьӧлыказ (1 Тимофейлы 2:14). Луоз вераны, Адам нылпиоссэ вииз шуыса, малы ке шуоно соос, солэсь сьӧлык басьтыса, кулоно луизы. Адам тырбыдэс адями вал но юри Инмарлэсь законзэ палэнтӥз бере, со сое кулонэ вуттӥз. Озьыен, дун тырон Адамез сьӧлыклэсь но кулонлэсь мозмытысал ке, Иегова азьын со шонертэм луысал. Нош Адамлэсь нылпиоссэ дун тырон кулонлэсь мозмытыны быгатэ (Римъёслы 5:16). Дун тырон Иеговалы право сётэ адямиосты сьӧлыклэн вань бервылъёсызлэсь мозмытыны. Мозмытӥсьлы «ваньмыз понна... кулонэз веръяно луиз». Со Адамлэн нылпиосызлэсь сьӧлыкъёссэ ас вылаз басьтӥз (Еврейёслы 2:9; 1 Пётр 2:24; 2 Коринфъёслы 5:21).

Библиез лыдӟон

(Лыдпусъёс 34:1—15) Кузё-Инмар Моисейлы тазьы вераз, тазьы шуиз: ² «Израиль пиослы косон сёт, тазьы шу соослы: Ханаан музъеме пыриды ке, тодэ: та тӥледлы люкетлы сётӥськись музъем, Ханаан музъемлэн гожез-межаез вань: ³ улоно музъемдылэн лымшорпал дурыз Сӥн луоё кыр дуннеын, Едом вӧзын луоз, лымшорысь музъемдылэн гожез-межаез Сылало зарезьлэн пумысеныз, шундыӝужан паласен, кутскоз, ⁴ отысен гож-межа лымшор пала, Акравим вырйыл пала кыстӥськоз, Сӥн пыр ортчыса, лымшоре, Кадес-Варни пала, лэзиськоз, отысен гож-межа Гацар-Аддар пала мыноз, Ацмон пыр ортчоз; ⁵ Ацмон дорысен гож-межа Египет ӧр пала кожоз, солэн пумыз зарезь дуре вуоз; ⁶ нош шундыпуксён палась гожды-межады быдӟым зарезь кузя ортчоз: та луоз тӥляд шундыпуксён палась гожды-межады; ⁷ нош уйпалтӥ гожды-межады тазьы ортчоз: быдӟым зарезь дурысен сое Ор гурезь доры кыске, ⁸ Ор гурезь дорысен Емаф пала кыске, гож-межалэн тужгес но кыдёкысь интыосыз Цедад палан луозы; ⁹ отысен гож-межады Цифрон пала мыноз, Гацар-Енан дорысен со йылпумъяськоз: та луоз тӥляд уйпал гожды-межады; ¹⁰ нош шундыӝужанпал гождэс-межадэс Гацар-Енан дорысен Шефам пала нуэ, ¹¹ Шефам дорысен гож-межа Аинлэн шундыӝужан палтӥз Рибла пала мыноз, отысен гож-межа азьлане мыноз но Киннерефа зарезь борды шундыӝужан палтӥз пыкиськоз; ¹² отысен гож-межа Иордан дуре мыноз но Сылало зарезь борды пыкиськоз. Та луоз тӥляд музъемдылэн котыр ласянь кыстӥськись гожез-межаез». ¹³ Моисей израиль пиослы косон сётыса шуиз: «Тани та пус чӧлтыса люкетлы люкылоно музъемды, кызьы сое Кузё-Инмар укмыс выжылы но ӝыны выжылы сётъяны косӥз; ¹⁴ уго Рувим пиослэн выжызы семьяосынызы, Гад пиослэн выжызы семьяосынызы, Манассия выжылэн ӝыны люкетыз асьсэлы люкет басьтӥзы ни. ¹⁵ Та кык выжыос, эшшо одӥг ӝыны выжы Иорданлэн шундыӝужан палаз, Иерихонлы ваче беринэ, асьсэлы люкет музъем басьтӥзы».

31-ТӤ КУАРТОЛЭЗЬ — 6-ТӤ ИНВОЖО

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 1, 2

Духовной марӟанъёс

(Кыкетӥ Закон 1:19) Хоривысен асьмеос сюрес вылэ потӥмы но та туж бадӟым, туж шимес луоё кыр дуннеетӥ мынӥмы, кудзэ тӥ адӟиды, Инмардылэн Кузё-Инмарлэн косэмезъя аморрейёслэн гурезьзы доры мыныкуды, озьы Кадес-Варние вуимы.

(Кыкетӥ Закон 2:7) уго Инмаред Кузё-Инмар киыныд ужано вань ужъёстэ бакель кариз, та быдӟым луоё кыр дуннеетӥ ветлыкуды, Со тӥледлы юрттӥськиз; тани ньыльдон ар ӵоже ини Инмаред Кузё-Инмар тӥледыз уг кельты, номырлы но ёрмыса-ӟудыса уд улӥське“».

w13 15/9 9 б., 9 абз.

Иеговалэн тодэ вайытонъёсыз оскымонэсь

⁹ Куке израиль калык Египетысь потӥз, Иегова соослы азьло ик пыр-поч ӧз валэкты, кызьы со соосты нуоз, соосты утёз но соос сярысь сюлмаськоз. Озьы ке но, «туж шимес луоё кыр дуннеетӥ» 40 ар ӵоже ветлыкузы, Инмар соослы трос пол возьматылӥз, соос солы оскыны быгато шуыса. Израиль калыкез кышкыт дуннеетӥ нуназе пилем юбо нуиз, нош уйин — тыл юбо. Озьы Иегова возьматӥз, соосты уг кельты шуыса (К. Зак. 1:19; Пот. 40:36—38). Со сяна, Инмар соослэн кулэяськонъёссы сярысь сюлмаськиз. «Номырлы но соос ӟудыса ӧз улэ, дӥськутсы ӧз пӧсьтылы, пыдъёссы ӧз тӧрналэ» (Неем. 9:19—21).

Библиез лыдӟон

(Кыкетӥ Закон 1:1—18) Тани Иордан шур сьӧрысь луоё кыр дуннеысен, Суфлы ваче беринысь ӵошкыт интыысен, Фаран, Тофел, Лаван, Асироф но Дизагав каръёс вискысен, израиль калыклы Моисей таӵе кылъёсын вазиськиз. ² Хоривысен, Сеир гурезь дорысен Кадес-Варние мынӥсь сюрес кузя лыктоно ке, татчыозь дас одӥг нунал мынонэз. ³ Ньыльдонэтӥ арлэн дас одӥгетӥ толэзяз, толэзьлэн нырысетӥ нуналаз Моисей израиль пиослы Кузё-Инмарлэсь со пыр сётэм курон-косонъёссэ ваньзэ вераз. ⁴ Есевонын улӥсь аморрей калыклэсь Сӥгон эксэйзэ вием бере, Едреяын, Аштерофын улӥсь Васанлэсь Ог эксэйзэ вием бере ⁵ Иордан тупалась Моав музъемысен Моисей та законэз валэктыны кутскиз, со шуиз: ⁶ «Инмармы Кузё-Инмар Хоривысен асьмелы тазьы вераз, тазьы шуиз: „Тырмоз тӥледлы та гурезьын улыны! ⁷ Султэ, сюрес вылэ потэ но аморрейёслэн гурезязы мынэ, соослэн вань бускель калыкъёссы доры мынэ — ӵошкытэсь интыосы, гурезьёсы, улыго интыосы, лымшор люкетэ, зарезьлэн дуръёсаз, Ханаан музъеме, Ливан котыре, быдӟым шур дорозь ик — Ефрат шур дорозь — мынэ; ⁸ тани та музъемез Мон тӥледлы сётӥсько, мынэлэ, Кузё-Инмарлэсь тӥляд атайёстылы Авраамлы, Исааклы, Иаковлы, соослэн выжыоссылы кыл сётыса сӥзем музъемзэ люкетлы басьтэ“. ⁹ Со виын мон тӥледлы шуи: „Одӥгнам кивалтыса, тӥледыз нуллыны мынам кужыме уз тырмы; ¹⁰ Инмарды Кузё-Инмар тӥледыз йылэтӥз но, тани, таре тӥ туж трос луиды ни, инмысь кизилиос мында луиды ни; ¹¹ атайёстылэн Инмарзы Кузё-Инмар тӥледыз али сярысь сюрс пол тросгес мед кароз, бакель мед кароз, кызьы Со тӥледлы вераз! ¹² Кызьы нош мон огнам тӥлесьтыд секытлыкъёстэс, ныпъетъёстэс, тупатэк улонъёстэс нуллом? ¹³ Вань выжыосысьтыды быръе визьмо, нодо, улонэз адӟем муртъёсты, соосты мон тӥледлы кивалтӥсе пукто“. ¹⁴ Тӥ, ответ сётыса, мыным шуиды: „Ӟеч уж лэсьтыны тон косӥськод“. ¹⁵ Тӥляд выжыосысьтыды мон кузёйыръёсты, визьмо, улонэз адӟем воргоронъёсты басьтӥ, соосты тӥледлы кивалтӥсь кари — сюрс муртэн, сю муртэн, витьтон муртэн, дас муртэн кивалтӥсь кари, вань выжыостылы эскерись-чакласьёсты пуктӥ. ¹⁶ Со виын мон судьяостылы таӵе косон сётыса шуи: „Агай-вынъёстэс санэ понэ, агайзэ выныныз, озьы ик тӥ пӧлы улыны лыктэмъёсты но шонер судить каре; ¹⁷ судын ымныр шоры эн учке, покчизэ но, вылӥзэ но кылзӥськыны быгатэ: адями ымнырлэсь эн кышкалэ, уго суд — со Инмарлэн ужез; нош тӥледлы сэрттыны-пертчыны секыт ужез мон доры вае, мон сое учко-эскеро. ¹⁸ Со виын мон котьмар пумысен но, мар тӥ лэсьтыны кулэ, тӥледлы косонъёс сётӥ.

7—13-ТӤ ИНВОЖО

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 3, 4

Духовной марӟанъёс

(Кыкетӥ Закон 4:9) Но одно ик чакласькы, туж тыршыса лулдэ уть, ас синмыныд адӟем ужъёсты эн вунэты, вань улон дауред ӵоже соос сюлмысьтыд медаз потэ. Соос сярысь аслад пиосыдлы, пиосыдлэн пиосызлы вера-тодыты,—

w04 15/9 25 б., 6 абз.

Кыкетӥ Закон книгаысь тунсыко малпанъёс

4:9. Израиль калыклэн шудо улонэз герӟаськемын вал соин, тодазы возёзы-а соос ас синмынызы адӟем ужъёсты. Милемлы но туж кулэ Инмарлэн паймымон ужъёсызлы саклыкмес висъяны, солэсь Кылзэ пыр-поч эскерыса.

Библиез лыдӟон

(Кыкетӥ Закон 3:1—13) Отысь берытскыса, асьмеос Васан пала мынӥмы, Едрея дорысен асьмемын Васанлэн Ог эксэез аслаз вань калыкеныз ӵош ожмаськыны кутскиз. ² Соку Кузё-Инмар мыным шуиз: «Эн кышка солэсь, сое Мон тынад киулад сёто — вань калыксэ но, быдэс музъемзэ но, солы озьы карод, кызьы карид Есевонын улӥсь аморрейёслэн Сӥгон эксэйзылы». ³ Инмармы Кузё-Инмар Васанлэсь Ог эксэйзэ, солэсь вань калыксэ киуламы сётӥз; ми сое погыртӥмы,— одӥг мурт но улэп ӧз кыльы; ⁴ со виын солэсь вань городъёссэ киуламы басьтӥмы, одӥгез но городзы, киуламы сюрытэк, ӧз кыльы: куатьтон городэз, быдэс Аргов улосвылэз, Васанлэн Ог эксэезлэсь быдэс музъемзэ киултӥмы; ⁵ вань та городъёс ӝужытэсь борддоръёсын, ӟезьыосын котыртэмын, тунгонъёсын пытсамын вал, трос гинэ юнматымтэ городъёссэ но киултӥмы; ⁶ Есевонлэн Сӥгон эксэезлэсь кадь ик солэсь но вань городъёссэ быдтӥмы, отын улӥсь пиосмуртъёсты, кышномуртъёсты, нылпиосынызы ӵош, быдтӥмы; ⁷ нош вань пудоез, городъёсысь киултэм ваньбурез асьмелы каримы. ⁸ Со виын та музъемез киултӥмы, кык аморрей эксэйёслэсь музъемзэс — Иордан тапалась, Арнон ӧр дорысен кутскыса Ермон гурезёзь кыстӥськись музъемез — киуламы басьтӥмы,— ⁹ сӥдон калык Ермонэз Сӥрион шуэ, нош аморрейёс сое Сенир шуыса нимало,— ¹⁰ ӵошкыт интыысь вань городъёсты, быдэс Галаадэз, Салхаен Едрея дорозь кыстӥськись быдэс Васанэз, Васанлэн Ог эксэезлэн музъемысьтыз городъёсты киултӥмы; ¹¹ рефаимъёс пӧлысь Ог гинэ, Васанлэн эксэез, улэп кылиз на. Тани, солэн кӧлан интыез, корт валес, со али но аммон пиос киын Равваын возиське на: солэн кузьдалаез укмыс гырпум кузьда, нош пасьталаез пиосмуртлэн ньыль гырпумез кузьда. ¹² Со виын киултэм музъеммы Арнон ӧр вӧзысь Ароер бордысен кутскиз, отчы ик пыризы Галаадлэн гурезё шаерысьтыз ӝыны люкетэз, отысь городъёс, та люкетэз Рувим но Гад выжыослы мон сётӥ; ¹³ Галаадлэсь кылем люкетсэ, быдэс Васанэз — Ог эксэйлэсь музъемзэ — быдэс Аргов улосвылэз, Васанэн ӵош, Манассия выжылэн ӝыны люкетызлы мон сётӥ. Со шаер рефаимъёслэн музъемзы шуыса нимаське.

14—20-ТӤ ИНВОЖО

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 5, 6

Духовной марӟанъёс

(Кыкетӥ Закон 5:21) Муртлэсь кышнозэ аслыд кулэ эн кары; муртлэсь корказэ но, солэсь бусызэ но, солэсь ляльчизэ но, солэсь ляльчи кышномуртсэ но, солэсь ошсэ но, солэсь ишаксэ но — маиз вань, солэсь номырзэ но аслыд кулэ эн кары“.

w19.02 22 б., 11 абз.

Яратон но шонерлык вашкала Израильын

¹¹ Йылпумъянъёс. Иегова уг учкы адямилэн вылтусыз шоры. Со учке солэн сюлмыз шоры, мар адямилэн пушказ (1 Экс. 16:7). Инмар адӟе ваньзэ: малпанъёсмес, шӧдонъёсмес но ужъёсмес. Иегова сюлмысьтымы умойзэ адӟыны тырше но умойгес луыны мылкыдмес ӝутэ. Со сяна, Инмарлэн потэ, ми шонертэм малпанъёсты адӟыны мед быгатомы но соослы урод ужъёс лэсьтыны мылкыдмес ӝутыны медам лэзе шуыса (2 Пар. 16:9; Матф. 5:27—30).

Библиез лыдӟон

(Кыкетӥ Закон 5:1—21) Моисей вань израиль калыкез люказ но соослы шуиз: «Израиль, туннэ верано пуктон-косонъёсты, законъёсты пеляд пон, дышетэ соосты, тырше соосты быдэсъяны. ² Асьмелэн Инмармы Кузё-Инмар Хоривысен асьмемын сӥзён-косон пыр кусып кылдытӥз, ³ со сӥзён-косонэз Кузё-Инмар атайёсмылы ӧз, асьмелы, али улӥсьёслы, сётӥз. ⁴ Гурезь йылысен, тыл пӧлысен, ваче син учкыса, тӥледлы Кузё-Инмар вераз, ⁵ нош мон со виын Кузё-Инмарен тӥ вискын сылӥ Кузё-Инмарлэсь кылзэ тӥледлы веран понна, уго тӥ, тыллэсь кышкаса, гурезь йылэ ӧд тубе. Соку Со шуиз: ⁶ „Мон — Кузё-Инмар, тынад Инмаред, Египет музъемысь, ляльчиын улон коркась, тонэ Поттӥсь; ⁷ Мынам азям тынад мукет инмаръёсыд медаз луэ. ⁸ Аслыд сульдэр-идол эн лэсьты, мар вань вылӥын — инмын, мар вань улӥын — музъем вылын, мар вань музъемлэн улӥяз — вуын, соослэсь туссэс-суредзэс аслыд эн лэсьты, ⁹ соослы эн йыбыртъя, соослы ужаса-тыршыса эн улы, уго Мон тынад Инмаред Кузё-Инмар, кылэз юн юась Инмар, атайёслэн янгышъёссы-сьӧлыкъёссы понна соослэсь нылпиоссэс, Монэ адӟонтэм карисьёсты, куинетӥ, ньылетӥ ёзозь-выжыозь вӧсь карисько, ¹⁰ Монэ яратӥсьёслы, Мынэсьтым курон-косонъёсме быдэсъясьёслы сюрс выжыозь Аслэсьтым гажан-жалянме возьматӥсько. ¹¹ Инмаредлэсь Кузё-Инмарлэсь нимзэ юнме эн вера, уго Кузё-Инмар Солэсь нимзэ юнме верась муртэ вӧсь карытэк уз кельты. ¹² Суббота нуналэз уть, дун-чылкыт ул со нуналэ, кызьы тонэ улыны косӥз Инмаред Кузё-Инмар; ¹³ куать нунал ужа, соку вань ужъёстэ лэсьты, ¹⁴ нош сизьыметӥзэ — суббота нуналэз — Инмаредлы Кузё-Инмарлы сӥзь: номыр но эн ужа тон ачид но, пиед но, нылыд но, ляльчиед но, ляльчи кышномуртэд но, ошед но, ишакед но, нокудӥз пудоед но, тон дорын улӥсь сьӧрлось лыктэм мурт но; ляльчи пиед но, ляльчи кышномуртэд но, тон кадь ик мед шутэтскозы; ¹⁵ тодад возь: Египет музъемын тон ляльчи адями вал, нош Инмаред Кузё-Инмар Аслаз кужмо киыныз, юн суйбыгытэныз тонэ отысь поттӥз, со понна ик тынад Инмаред Кузё-Инмар тонэ суббота нуналэз утьыны, сое дун-чылкыт ортчытыны косӥз. ¹⁶ Атайдэ но, анайдэ но сӥлы кар, кызьы тонэ косӥз Инмаред Кузё-Инмар,— кема мед улод, музъем вылын тыныд умой мед луоз; та музъемез тыныд Инмаред Кузё-Инмар сётэ. ¹⁷ Эн виы. ¹⁸ Азон-калгон сьӧлыке эн пыры. ¹⁹ Эн лушкаськы. ²⁰ Мукет мурт вылэ ӧвӧлзэ вань карыса эн вера. ²¹ Муртлэсь кышнозэ аслыд кулэ эн кары; муртлэсь корказэ но, солэсь бусызэ но, солэсь ляльчизэ но, солэсь ляльчи кышномуртсэ но, солэсь ошсэ но, солэсь ишаксэ но — маиз вань, солэсь номырзэ но аслыд кулэ эн кары“.

21—27-ТӤ ИНВОЖО

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 7, 8

Духовной марӟанъёс

(Кыкетӥ Закон 8:3) Со тонэ зӥбыт-востэм карылӥз, сютэм возьыса утчаз, маннаен тонэ сюдӥз, со маннаез тон но, атайёсыд но ӧд тодылэ,— Со озьы кариз, тон мед тодод: адями нянен гинэ уг улы, Кузё-Инмарлэн ымысьтыз потӥсь котькудӥныз кылыныз со улэ;

w04 1/2 13 б., 4 абз.

Иегова нуналлы быдэ кулэяськонъёсмы сярысь сюлмаське

⁴ Котькуд нуналлы улымон нянь сярысь вӧсяськеммы милемлы тодамы вайытэ духовной сиён сярысь. Со но милемлы котькуд нунал кулэ. Кема дыр ӵоже визям бераз Иисуслэн кӧтыз сюмаз ке но, со Шайтанлэсь та изъёс нянь мед луозы шуыса ӵектэмзэ палэнтӥз. Иисус вераз: «Гожтэмын: „Нянен гинэ уз улы адями, Инмарлэн ымысьтыз потэм котькудӥныз кылыныз улоз со“» (Матфей 4:4). Татын Иисус Моисейлэсь кылъёссэ тодаз вайиз, кудӥз израиль калыклы вераз: «Со [Иегова] тонэ зӥбыт-востэм карылӥз, сютэм возьыса утчаз, маннаен тонэ сюдӥз, со маннаез тон но, атайёсыд но ӧд тодылэ,— Со озьы кариз, тон мед тодод: адями нянен гинэ уг улы, Кузё-Инмарлэн ымысьтыз потӥсь котькудӥныз кылыныз со улэ» (Кыкетӥ Закон 8:3). Маннаез сётыса, Иегова, израиль калыкез сюдэм сяна, соосты дышетӥз на. Кылсярысь, соослы «нуналлы быдэ кӧтэз тырон понна кӧня кулэ» бичано вал. Нош куке соос тросгес бичазы, кылемез зынмыны кутскиз но со пӧлы нумыръёс потӥзы (Потон 16:4, 20). Нош куатетӥ нуналэ соослы кык поллы тросгес бичано луиз, суббота нуналлы но мед тырмоз шуыса. Но соку манна ӧз сӧриськы (Потон 16:5, 23, 24). Озьыен, манналы луыса калык вала вал, соос Инмарлэсь кылзӥськыны кулэ шуыса но соос нянен гинэ уг уло, нош «Кузё-Инмарлэн ымысьтыз потӥсь котькудӥныз кылыныз» уло шуыса.

Библиез лыдӟон

(Кыкетӥ Закон 7:1—16) Инмаред Кузё-Инмар тонэ али киултыны мыноно музъемад пыртӥз ке, трос лыдо калыкъёсты — хеттейёсты, гергесейёсты, аморрейёсты, хананейёсты, ферезейёсты, евейёсты, иевусейёсты,— тынэсьтыд трос лыдогес, кужмогес сизьым калыкъёсты, тынад азьысьтыд улляз ке, ² Инмаред Кузё-Инмар соосты тынад киулад сётоз, тон соосты погыртод, соку соосты быдты, соосын кусып эн кылдыты, эн жаля соосты; ³ соосын ӵыжы-выжы кусыпъёс эн кылдыты: нылдэ солэн пиезлы кышнолы эн сёты, солэсь нылзэ пиедлы кышно эн басьты; ⁴ уго соос мукет инмаръёслы йыбыртъян понна тынэсьтыд пиостэ Мон бордысь палэнтозы, соку Кузё-Инмарлэн вожпотонэз тӥ вылэ ӝуатскоз но, Со тонэ ӝог быдтоз. ⁵ Тӥ соослы тазьы каре: курбон сётылон интыоссэс куашкатэ, йыбыртъян юбооссэс пыргытъялэ, вӧсяськон сурдъёссэс коралэ, сульдэръёссэс-идолъёссэс тылын сутэ; ⁶ уго тон Инмаред Кузё-Инмар азьын святой калык: тонэ Инмаред Кузё-Инмар, музъем вылын улӥсь вань калыкъёс пӧлысь тон Солэн калыкез мед луод шуыса, бырйиз. ⁷ Вань калыкъёслэсь тӥ трос лыдо луиськоды шуыса, тӥледыз Кузё-Инмар ӧз бырйы,— тӥ вань калыкъёслэсь ӧжыт лыдо калык луиськоды ук,— ⁸ но Кузё-Инмар тӥледыз яратэ бере, атайёстылы сётэм кылзэ быдэстон понна Кузё-Инмар кужмо киыныз тӥледыз ляльчиын улон юртысь поттӥз, Египет эксэйлэн, фараонлэн, киулысьтыз мозмытӥз. ⁹ Озьыен, тод: тынад Инмаред Кузё-Инмар — Со Инмар, зэм, оскиськымон Инмар, Сое яратӥсьёсын, Солэсь курон-косонъёссэ быдэсъясьёсын сӥзён-косон пыр кылдытэм кусыпсэ Со сюрс ёзъёс-выжыос вордскытозь уте, соосты гажамысь-жалямысь уг дугды. ¹⁰ Нош кинъёс Сое адӟемпотостэм каро, соосты ваньзэс вӧсь кароз, быдтоз; Сое синазькыль карисьёслы ӝегатскытэк пунэмзэ берыктоз. ¹¹ Озьыен, курон-косонъёсты, пуктон-косонъёсты, законъёсты, кудъёссэ мон туннэ тыныд верасько, быдэсъя-уть. ¹² Та законъёсты кабыл басьтӥд ке, утид, быдэсъяд ке, соку Инмаред Кузё-Инмар но тонэн сӥзён-косон пыр кылдытэм кусыпсэ утёз, Аслэсьтыз гажан-жалянзэ тыныд возьматоз, кызьы Со атайёсыдлы кыл сётыса вераз, ¹³ тонэ яратоз, тонэ бакель кароз, выжыдэ трос лыдо кароз, пушкысьтыд потэм емыштэ бакель кароз, музъемедлэсь емышсэ но, ю-няньдэ но, винадэ но, вӧйдэ но, сюро таза пудоедлэсь кунянъёссэ но, ыж уллёосыдлэсь ыжпиоссэс но — атайёсыд азьын тыныд сётыны сӥзем музъем вылысь ваньзэ, маиз вань, ваньзэ бакель кароз. ¹⁴ Вань калыкъёс пӧлысь тон тросгес бакель каремын луод; кидыстэм пиосмуртэд но, нылпи вайисьтэм кышномуртэд но тынад пӧлад уз луы, пудоосты но кунян, ыжпи, кечпи вайисьтэмесь уз луэ; ¹⁵ Кузё-Инмаред вань висён-курадӟонъёслэсь тонэ мозмытоз, Египетысен адӟем нокыӵе но урод-лек висёнъёсты тон вылэ уз лэзьы, соосты лэзёз вань тушмонъёсыд вылэ; ¹⁶ Инмардылэсь Кузё-Инмарлэсь тӥляд киулады сётоно вань калыкъёсты тӥ быдтоды: тӥ соосты жаляны кулэ ӧвӧл; соослэн инмаръёссылы тон йыбыртъяса улыны кулэ ӧвӧл, уго соос тон понна канжаськон луозы.

28-ТӤ ИНВОЖО — 4-ТӤ ПӦСЬТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | КЫКЕТӤ ЗАКОН 9, 10

Духовной марӟанъёс

(Кыкетӥ Закон 9:1—3) Израиль, кылзы: тон али Иордан тупала выжиськод тынэсьтыд кужмоесьсэгес, трос лыдоесьсэгес калыкъёсты киултыны, бадӟымесь, инмозь ӝутскись борддоръёсын юнматэм городъёсты киултыны, ² трос лыдо, ӝужыт, таза мугоро енак калыклэсь музъемзэ киултыны, соос сярысь тон тодӥськод, кылэмед вань тазьы веранэз: «Енак пиослы пумитъяськыны кин быгатоз?» ³ Нош али тон тод: тынад Инмаред Кузё-Инмар тынад азьпалтӥд ньылӥсь-сутӥсь тыл кадь мынэ, Со соосты виылоз, тынад азяд погыръялоз но, тон соосты уллялод, ӝог быдтод, кызьы тыныд азьвыл ик вераз Кузё-Инмар.

it «Енакимы», 1 абз.

Енак калык

Та калыкысь адямиос туж ӝужытэсь вал. Соос улӥзы Ханаан музъемысь гурезё интыосын но зарезь дурысь куд-ог интыосын, эшшо ик шаерлэн лымшор палаз. Огдыре Хевронын улӥзы куинь дано енаким пиос — Ахиман, Сесай но Фалмай (Лд 13:23). Отын 12 учкыны-чакланы ветлэм израиль пиос енаким пиосты нырысьсэ адӟизы. Собере дасэз соос пӧлысь кышкаса веразы, енак пиос ӝужыт мугоро выжыысь потэмын шуыса, со выжыысь, кудӥз Ву тудӟон азьын улӥз. Со сяна, соос веразы, енак пиосын ӵошатыса, еврейёс «саранчаос кадесь» адӟисько шуыса (Лд 13:29—34; КЗк 1:28). Енак пиос туж ӝужыт мугоро вал бере, куддыръя соосын ӵошатылӥзы емимъёсты но рефаимъёсты, кудъёсыз озьы ик туж ӝужытэсь адямиос вал. Соослэн бадӟым кужымзы вал, соин ик адямиос сыӵе лэчыт веран малпазы: «Енак пиослы пумитъяськыны кин быгатоз?» (КЗк 2:10, 11, 20, 21; 9:1—3).

Библиез лыдӟон

(Кыкетӥ Закон 10:1—22) Со виын Кузё-Инмар мыным шуиз: «Нырысьёсызлы укшась кык изпулъёс аслыд вӧл но Мон доры гурезь йылэ туб, аслыд пу ковчег лэсьты; ² азьвылаз тынад пыргытэм изпулъёсыд вылын мар гожтэмын вал, со кылъёсты ик таосыз вылэ но Мон гожто; соосты ковчег пушкы пон». ³ Сӥттимпулэсь мон ковчег лэсьтӥ, азьвылъёсызлы укшасесь кык изпулъёс вӧлӥ но гурезь йылэ тубыны вырӟи; та кык изпулъёс мынам киям вал. ⁴ Со изпулъёс вылэ азьвыл мар гожтэмын вал, со кылъёсты ик Со гожтӥз: Кузё-Инмар тӥледлы люкаськон нуналэ, гурезь йылысен, тыл пушкысен со дас курон-косонъёсты вераз, изпулъёсты Кузё-Инмар мыным сётӥз. ⁵ Соку мон берытски но гурезь улэ васьки, со изпулъёсты аслам лэсьтэм ковчег пушкам понӥ, кызьы Кузё-Инмар монэ соосты возьыны косӥз. ⁶ Соку израиль пиос Беероф-Бене-Яаканысь Мозере кошкизы; отысен Аарон кулӥз, отчы сое ватӥзы, со интые священник луиз солэн Елеазар пиез. ⁷ Отысен Гудгодэ, Гудгодысен — Иотвафае, ошмесо-вуо музъеме, кошкизы. ⁸ Со виын Кузё-Инмар Левийлэсь выжызэ Кузё-Инмарлэсь сӥзён-косонэн ковчегзэ нуллыны висъяз, Кузё-Инмар азьын сылыны, Солы ужаны-тыршыны висъяз, Солэн нимыныз бакель карыны лэзиз, та нуналозь но тазьы лэсьтӥське. ⁹ Соин ик левитлэн агай-вынъёсыз пӧлын люкетэз, люкет музъемез ӧвӧл: Ачиз Кузё-Инмар солэн люкетэз луэ, кызьы Инмаред Кузё-Инмар солы вераз вал. ¹⁰ Азьвыл кадь ик гурезь йылын мон ньыльдон нунал но ньыльдон уй улӥ; та радаз но Кузё-Инмар мынэсьтым куронме санэ понӥз, Кузё-Инмарлэн тонэ быдтэмез ӧз ни поты; ¹¹ соку Кузё-Инмар мыным шуиз: «Султы но калыклэн азьпалтӥз мын, соос мед мынозы но Мынэсьтым атайёссылы сётыны сӥзем музъемез мед киултозы». ¹² Озьыен, Израиль, Инмаред Кузё-Инмар мар тынэсьтыд куре? Тае гинэ куре: Инмаредлэсь Кузё-Инмарлэсь кышканэн мед улод, Солэн вань сюресъёсыз кузя мед ветлод, Сое мед яратод, вань лулыныд, вань сюлмыныд Инмаредлы Кузё-Инмарлы ужаса-тыршыса мед улод, ¹³ Кузё-Инмарлэсь курон-косонъёссэ быдэсъяса мед улод, Солэсь пуктон-косонъёссэ быдэсъяса мед улод, кудъёссэ мон туннэ тыныд верасько. Озьы улӥд ке, тыныд умой луоз. ¹⁴ Тани, Инмаредлэн Кузё-Инмарлэн киулаз ин но инъёслэн инъёссы, музъем но мар со вылын вань, ¹⁵ но Кузё-Инмар тӥлесьтыд атайёстэс гинэ кабыл басьтӥз, соосты яратӥз, соос бере тӥледыз, соослэсь кидыссэс, вань калыкъёс пӧлысь Аслыз бырйиз, кызьы тон али адӟиськод. ¹⁶ Озьыен, сюлэмдылэсь вогъяськон сямзэ уретыса куштэ, азьланяз чурыт сюлэмоесь эн ни луэ, ¹⁷ уго тӥляд Инмарды Кузё-Инмар — со инмаръёслэн Инмарзы, кузёослэн Кузё-Атайзы, быдӟым, кужмо, кышкыт Инмар, Со ымныр шоры уг учкы, кузьымъёс уг окты, ¹⁸ Со анайтэм-атайтэм нылпиослы, палкышноослы дурбасьтэ, сьӧрлось лыктэм муртэ яратэ, солы нянь, дӥськут сётэ. ¹⁹ Тӥ но сьӧрлось лыктэм муртъёсты яратэ, уго тӥ но Египет музъемын сьӧрлось лыктэм муртъёс вал. ²⁰ Инмаредлэсь Кузё-Инмарлэсь курда, Солы гинэ ужаса-тыршыса ул, Со борды лулыныд-сюлмыныд лякиськы, Солэн нимыныз кыл сёт: ²¹ Со тынад ушъяськонэд, Со тынад Инмаред, тон ас синмыныд адӟид, макем быдӟымесь но кышкытэсь ужъёс со тон понна лэсьтӥз. ²² Тынад атайёсыд сизьымдон ӵошен Египетэ лыктӥзы, нош та дырлы Инмаред Кузё-Инмар тонэ йылэтӥз, инмысь кизилиос мында луид.