«Улон но ужан-тыршон» ужан тетрадьлы малпанъёс

3—9-ТӤ ТОЛШОР

ИНМАРЛЭН КЫЛЫСЬТЫЗ УЗЫРЛЫК | СУДЬЯОС 15, 16

Духовной марӟанъёс

(Судьяос 16:1—3) Огпол Самсон Газае лыктӥз, отысь азыса-калгыса улӥсь кышномуртэ адӟиз но со доры пыриз. ² Газаын улӥсьёслы шуизы: «Самсон татчы лыктӥз». Сое котыртӥзы, кар капка дорын сое быдэс уй возьмаса потӥзы, быдэс уй ватӥськыса улӥзы, куспазы вераськизы: «Ӵук ӟардытозь витём, соку виём сое». ³ Нош Самсон уйшорозь изиз, уйшор уе со султыса кар капкаез кутӥз, янакъёсыныз, ӟырыосыныз, тунгонъёсыныз валче сое ӝутӥз но, пельпумаз поныса, Хевронэ мынон сюрес дурысь гурезь йылэ нуиз.

w05 15/3 27 б., 6 абз.

Иеговалэсь кужым басьтыса, Самсон тушмонъёссэ ворме

Самсон одӥгез сярысь гинэ малпаз — кызьы филистим калыкен нюръяськоно. Ӵапак таӵе малпанэн со Газаысь азыса-калгыса улӥсь кышномурт доры пыриз. Самсон та кышномуртэн кӧлыны уг малпа вал. Со кӧлон инты гинэ утчаз. Уйшоре Самсон та кышномурт дорысь потӥз, кар капкаосты янакъёсыныз ӵош басьтӥз но 60 иськем кеме нуиз — Хеврон вӧзысь гурезь йылэ. Самсонэн Инмар кивалтӥз, со ик солы кужым сётӥз (Судьяос 16:1—3).

Библиез лыдӟон

(Судьяос 16:18—31) Со сюлэмзэ быдэсак усьтӥз шуыса, Далида адӟиз но филистим кузёйыръёсты ӧтьыны ыстӥз, соослы шуиз: «Лыктэлэ табере, со мыным сюлэмзэ быдэсак усьтӥз». Далида доры филистим кузёйыръёс лыктӥзы, ки вылазы солы азвесь вайизы. ¹⁹ Далида ал вылаз Самсонэз умме уськытӥз, адямиез ӧтиз но Самсонлэсь сизьым йырси пунэтсэ ӵышкыны косӥз. Самсон лябӟыны кутскиз, солэн бордысьтыз кужымез кошкиз. ²⁰ Далида шуиз: «Самсон! Филистим пиос тон вылэ урдскыны лыкто». Самсон сайказ, со шуиз: «Мыно но азьло кадь ик мозмытско». Со ӧз тоды, Кузё-Инмар со дорысь палэнскиз шуыса. ²¹ Филистим пиос сое кутӥзы но синъёссэ бышказы, Газае нуизы, отысен сое кык ыргон жильыен дурылӥзы; пытсэтэ сюремъёслэн юртазы со пызь изыса улӥз. ²² Со виын ик йырысьтыз, ӵышкем бервылысьтыз, йырсиосыз будыны кутскизы. ²³ Филистим калыклэн кузёйыръёсыз асьсэлэн инмарзылы, Дагонлы, туж бадӟым курбон сётыны, шулдыръяськыны люкаськизы, соос шуизы: «Милям инмармы милесьтым тушмонмес, Самсонэз, киуламы сётӥз». ²⁴ Озьы ик калык но, сое адӟыса, инмарзэс данъяса шуизы: «Милям инмармы милесьтым тушмонмес, музъеммес тырттэм кельтӥсез, трос калыкмес виылӥсез, киуламы сётӥз». ²⁵ Сюлэмзы шулдырмем бере соос шуизы: «Татчы Самсонэз ӧте, милемыз мед серекъятоз». Пытсэт коркась Самсонэз ӧтьыса вайизы, соосты со серекъятӥз, сое юбоос вискы султытӥзы. ²⁶ Сое китӥз валтыса нуллӥсь егит пинал пилы Самсон шуиз: «Юртэз вылаз возись юбоос доры монэ ну, киыным йӧтӥськеме потэ, соос борды пыкъяськыса улыны мед быгатом». ²⁷ Коркан тросаз пиосмуртъёс, кышномуртъёс вал; филистим калыклэн вань кузёйыръёсыз отын вал, липет йылын ог куинь сюрс пиосмуртъёс, кышномуртъёс Самсонлэсь калыкез серекъятэмзэ учкыса сылӥзы. ²⁸ Соку Самсон Кузё-Инмарлы вазиськыса шуиз: «Инмаре Кузё-Инмаре! Тодад вай вал монэ, кужым сёт вал мыным пичи дырлы ке но, эй, Инмаре! Кык синъёсы понна огкутскемен филистим калыклы пунэмме берыктыны мед быгатысал». ²⁹ Коркалэн шораз сылӥсь кык юбоосты Самсон интыысьтызы вырӟытӥз, соос вылын юрт возиське вал; соос вылэ пыкиськыса, огзэ бур киыныз ӟыгыртӥз, мукетсэ — паллян киыныз. ³⁰ Соку Самсон шуиз: «Филистим калыкен ӵош мон но мед кулом!» Вань кужмыныз юбоос борды пыкиськиз но кузёйыръёс вылэ, отчы учырам калык вылэ юрт пограз. Кулыкуз сомында калык быриз — улытозяз вань виылэм муртъёсызлэсь но тросгес. ³¹ Агай-вынъёсыз, атай юртысьтыз вань калык лыктыса солэсь мугорзэ басьтӥзы но Цораен Естаол вискы атаезлэн, Манойлэн, шайгу вӧзаз ватӥзы. Со Израильын кызь ар ӵоже судья вал.

10—16-ТӤ ТОЛШОР

ИНМАРЛЭН КЫЛЫСЬТЫЗ УЗЫРЛЫК | СУДЬЯОС 17—19

Духовной марӟанъёс

(Судьяос 19:14, 15) Кошкизы, мынон сямен, Вениамин выжылэн Гива карез доры вуыкузы, шунды пуксиз. ¹⁵ Уйзэс потыны соос Гивае кожизы. Городэ вуыса, ульчаязы пуксизы; нокин но соосты гуртаз кӧлыны ӧз чорты.

w05 15/1 27 б., 8 абз.

Судьяос книгаысь тунсыко малпанъёс

19:14, 15. Гиваын улӥсьёслы умой сямъёс уг тырмо вал, соин ик лыктэм адямиосты соос куно ӧз каре. Инмар ӧте христианъёсты мукетъёссэ куно карыны (Римъёслы 12:13).

Библиез лыдӟон

(Судьяос 17:1—13) Ефрем гурезьын улӥз Миха нимо адями. ² Со анаезлы шуиз: «Сюрс сю сӥкль азвесьтэ лушкамзы понна соосты каргамдэ мон кылӥ, нош со азвесь мон киын, мон сое басьтӥ». Соку солэн анаез шуиз: «Кузё-Инмар пиме бакель мед кароз». ³ Сюрс сю сӥкль азвесез со анаезлы берыктӥз. Анаез шуиз: «Та азвесез мон Кузё-Инмарлы сӥзисько пие понна, солэсь сульдэрзэ лэсьтыны, азвесез ӵыжатыса, йыбыртъян сульдэр лэсьтыны; тае тон кие сётӥсько». ⁴ Азвесьсэ анаезлы берыктӥз. Анаез кык сю сӥкль азвесьсэ кутӥз но азвесь ӵыжатӥсь кие сётӥз. Солэсь со сульдэр лэсьтӥз, азвесьлэсь ӵыжатэм йыбыртъян сульдэр, со Михалэн корказ сылӥз. ⁵ Михалэн вӧсяськон коркаез вал. Ефод, терафим лэсьтӥз но одӥгзэ пизэ священник луыны сӥзиз. ⁶ Со вапумъёсы Израильлэн эксэез ӧй вал; котькуд адями малпа вал, шонер уж лэсьтӥсько шуыса. ⁷ Отын улӥз Иуда выжыысь Иудеяысь Вифлеем карын вордскем пинал пи, левит. ⁸ Та адями Иудеяысь Вифлеем карысь потӥз, со малпаз озьы улыны, кызьы кылдоз; сюрес кузя мынон сямен со вуиз Ефрем гурезьысь Михалэн корка дораз. ⁹ Миха солы шуиз: «Кытысь тон потӥд?» Со шуиз: «Мон — левит, Иудеяысь Вифлеем карысь; кызьы кылдоз, озьы улыны потӥ». ¹⁰ Миха солы шуиз: «Кыль мон доры улыны, тон мыным атай но, священник но лу, арлы быдэ мон тыныд дас сӥкль азвесь тыро, улыны тырмымон дӥськут, сиён сёто». ¹¹ Левит со доры пыриз, со мылкыд кариз та адями доры кыльыны; со Михалы вордэм нылпиез радэ пыриз. ¹² Миха та пинал левитэз священнике пуктӥз, со Миха дорын улӥз. ¹³ Соку Миха шуиз: «Табере мон тодӥсько, Кузё-Инмар мыным ӟеч ужъёс лэсьтоз шуыса, уго мон дорын священникын — левит».

17—23-ТӤ ТОЛШОР

ИНМАРЛЭН КЫЛЫСЬТЫЗ УЗЫРЛЫК | СУДЬЯОС 20, 21

Духовной марӟанъёс

(Судьяос 20:16) Вань та калык пӧлын вал сизьым сю паллян киын ожмаськисьёс, ваньзы соос из зӥръянысьтызы изэз туж шонер зӥрто, йӧтытэк уг кылё вал.

w14 1/5 11 б., 4—6 абз.

Тодӥськоды-а тӥ?

Кызьы вашкала дыръёсы из зӥръянэн ожмаськизы?

Из зӥръянысьтыз изэз лэзьыса, егит Давид Голиафез погыртӥз. Из зӥръянысь изъёсты зӥръяны Давид дышетскиз, дыр, пудоосты возьмакуз (1 Эксэйлыкъёслэн 17:40—50).

Из зӥръянэз адӟыны луэ вашкала Египетысь но Ассириысь суредъёсысь. Со вал е яке гозы, кудӥзлэн шораз кулэсь яке басмалэсь из понон интыез вал. Из зӥръясь адями со интые вольыт изэз понэ вал. Со из 5—8 сантиметр быдӟа но ог 250 грамм секта вал. Из зӥръянэз йыр йылаз бергатыса, ожгарчи одӥг пумзэ лэзе вал но, из кулэ интые лобе вал.

Гудыса утчаськонъёс дыръя Израиль палан шедьтэмын вал трос зӥръян изъёс, кудъёсыныз вашкала дыръя ожмаськизы. Изэз быгатӥсь ожгарчи зӥртэ вал ке, сыӵе из секундскын ог 50 метр лобӟыны быгатэ вал. Тодосчиос уг тодо, мар кыдёкегес лобе вал: пукыӵысь лэзем ньӧл яке из зӥръянысь лэзем из. Озьы ке но из зӥръянысь лэзем изэн но трос адямиосты виыны луэ вал (Судьяос 20:16).

Библиез лыдӟон

(Судьяос 20:1—13) Вань израиль пиос султӥзы — огкылысь, одӥг адями кадь, Дан музъемысен Вирсавияозь, Галаад музъемысь но потэмъёс огазе, Массифа каре, Кузё-Инмар азе люкаськизы. ² Люкаськизы быдэс калыклэн кивалтӥсьёсыз, вань Израиль выжыос, Инмар калыклэн кенешаз люкаськизы, ньыль сю сюрс мурт пыдын ожмаськисьёс мечъёссэс кутӥзы. ³ Вениамин пиос кылӥзы, израиль пиос Массифае лыктӥллям шуыса. Израиль пиос шуизы: «Вералэ, кызьы ортчиз та лек уж?» ⁴ Вием кышномуртлэн картэз, левит, ответ сётыса шуиз: «Ляльчи кышноеным мон Вениаминлэн Гива караз уйме ортчытыны пыри, ⁵ соку мон вылэ Гиваын улӥсьёс урдӥськизы, мыным луыса юртэз уйин котыртӥзы; малпало вал монэ виыны, ляльчи кышноме курадӟытӥзы, мыскыллязы, ӧз чида, кулӥз. ⁶ Ляльчи кышноме мон люкетэн-люкетэн вандылӥ но вань Израиль выжыос доры лэзи, уго со муртъёс Израильын юрӟым, кырсь уж лэсьтӥзы. ⁷ Тани, тӥ ваньды, израиль пиос, учке-эскере та ужез но вералэ, мар кароно». ⁸ Быдэс калык, ваньзы одӥгтэм ӝутскизы но шуизы: «Огмы но улон интыямы ум берытске, гуртамы ум мынэ. ⁹ Тани, табере мар каромы Гивалы: жеребе кутыса, со вылэ мыномы; ¹⁰ вань Израиль выжыослэсь сю мурт пӧлысь дассэ, сюрс мурт пӧлысь сюзэ, дас сюрс мурт пӧлысь сюрс муртсэс бырйыса басьтомы; калыкез сюдыны сиён-юон мед ваёзы, соос мынозы Вениамин выжылэн Гива городэзлы пумит, Израильын юрӟым-кырсь ужъёс лэсьтэмзы понна соосты вӧсь карыны». ¹¹ Вань израиль калык огкылысь, одӥг адями кадь, Гива городлы пумит мыныны люкаськизы. ¹² Израиль выжыос быдэс Вениамин выжылы вераны адямиоссэс ыстӥзы: «Кыӵе юрӟым-кырсь уж тӥ дорын лэсьтэмын! ¹³ Гиваын улӥсь юрӟым-кырсь ужъёсын ашкынэм адямиостэс ми кие сётэ, ми соосты виёмы, таӵе юрӟым ужез Израильысь выжытэм быдтомы». Нош Вениамин пиос агай-вынъёссылэсь, израиль пиослэсь верамзэс кылэм-адӟем ӧз каре.

24—30-ТӤ ТОЛШОР

ИНМАРЛЭН КЫЛЫСЬТЫЗ УЗЫРЛЫК | РУФЬ 1, 2

Духовной марӟанъёс

(Руфь 1:20, 21) Ноеминь соослы шуиз: «Эн нималэ монэ Ноеминь шуыса, нималэ монэ Мара шуыса, уго Дунне Кутӥсь Инмар мон доры туж бадӟым куректон-кайгу лэзиз; ²¹ татысь мон ваньбурен потӥ вал, нош берыктӥз монэ Кузё-Инмар буш киын; малы монэ Ноеминь шуыса ниманы кулэ, куке мыным Кузё-Инмар курадӟон сётӥз, Дунне Кутӥсь Инмар шудтэм улон лэзиз?»

w05 1/3 27 б., 1 абз.

Руфь книгаысь тунсыко малпанъёс

1:13, 21 — Зэм-а Иегова Ноеминь доры туж бадӟым куректон-кайгу лэзиз? Со озьы ӧвӧл. Ноеминь Инмарез янгыше ӧз уськыты. Со вераз, Иегова солы куректон-кайгу лэзиз шуыса, малы ке шуоно со туж куректыса улӥз. Со сяна, вашкала дыръя нуны шоры учко вал Иеговалэн бакель каремез шоры кадь. Нош кышномурт нуны вайыны уг быгаты вал ке, малпазы, Инмар сое бакель уг кары шуыса. Ноеминь нылпиостэк кылиз бере, со малпаз, Иегова со доры туж бадӟым куректон-кайгу лэзиз шуыса.

Библиез лыдӟон

(Руфь 1:1—17) Судьяос кивалтон аръёсы музъем вылэ сютэм ар вуиз. Соку Иудеяысь Вифлеем карысь одӥг адями аслаз кышноеныз но кык пиосыныз ӵош Моав музъеме улыны кошкиз. ² Со муртлэн нимыз вал Елимелех, кышноезлэн нимыз Ноеминь, нош кык пиосызлэн нимъёссы — Махлон но Хилеон; соос вал Иудеяысь Вифлеем карысь Ефрафа выжыысь. Соос Моав музъеме лыктӥзы но отчы улыны кылизы. ³ Ноеминьлэн кузпалыз Елимелех кулӥз, кык пиосыныз со улыны кылиз. ⁴ Моав нылъёсты соос кышно басьтӥзы, огезлэн нимыз Орфа, нош мукетызлэн — Руфь; отын соос ог дас ар пала улӥзы. ⁵ Бӧрысьгес солэн кыкез ик пиосыз, Махлон но Хилеон, кулӥзы; та кышномурт пиосыз бере, картэз бере но улыны кылиз на. ⁶ Кенъёсыныз ӵош со Моав музъемысь берен кошкиз, уго Моав шаерын со кылӥз, Инмар Аслаз калыкез доры вуылӥз но соослы нянь сётӥз шуыса. ⁷ Азьвыл улэм интыысьтыз со кошкиз, кыкез ик кенъёсыз но со сьӧры мынӥзы. Иудей музъеме берытскон дыръязы, сюрес кузя мыныкузы, ⁸ Ноеминь кык кенъёсызлы шуиз: «Мынэлэ, анайёстылэн юртазы берытске; Кузё-Инмар тӥледлы гажан-жалянзэ мед возьматоз, кызьы тӥ гажан-жаляндэс возьматӥды кулэмъёслы но, мыным но. ⁹ Кузё-Инмар тӥледлы кыкнадылы ик кузпал дорын каньылэн, кышкатэк улон инты мед сётоз!» Кыксэс ик чупаз, нош соос куараен бӧрдыны кутскизы. ¹⁰ Соос шуизы: «Ум берытске, ми тонэн ӵош тынад калыкед доры мыномы». ¹¹ Нош Ноеминь шуиз: «Берытске, нылъёсы. Малы кулэ тӥледлы мон сьӧры мыныны? Тӥледлы кузпал луон понна мынам пушкам пи нуныосы вань шат? ¹² Берытске, нылъёсы, берытске, мон уго пересь ини бызьыны; мон шуысал ке но, мынам вань али оскиськонэ, та уез кузпалэн ке но кӧлысал, собере пи нуныос вайысал ке,— ¹³ соос быдэ вуытозь, возьмаса улысалды-а? Ӝегатӥськыса, бызьытэк улыны тӥледлы яра шат? Ӧвӧл, нылъёсы, тӥ понна мон туж чигиськисько, уго Кузё-Инмарлэн киыз мон доры вӧсь карыны вуиз». ¹⁴ Соос нош ик куараен бӧрдыны кутскизы. Соку Орфа картэзлэн анаеныз люкиськиз, нош Руфь анайзы борды кылиз. ¹⁵ Ноеминь Руфьлы шуиз: «Тани, кенакед ас калыкез доры, аслаз инмаръёсыз доры берытскиз, тон но кенакед бӧрсьы ас калыкед доры берытскы». ¹⁶ Нош Руфь шуиз: «Эн ёрты монэ, дорысьтыд кошкыны косыса, гуртам бертыны косыса; кытчы тон мынод, мон но отчы ик мыно, кытын тон улод, мон но отын ик уло; тынад калыкед — мынам калыке луоз, тынад Инмаред — мынам Инмаре луоз; ¹⁷ кытчы тон кулод, мон но отчы ик мед кулом, отчы ик монэ но мед ватозы; Кузё-Инмар мыным сое но, тае но лэсьтӥз ке, эшшо но тросгес лэсьтоно луиз ке; кулон гинэ монэ тынэсьтыд мед люкоз».

31-ТӤ ТОЛШОР — 6-ТӤ ТУЛЫСПАЛ

ИНМАРЛЭН КЫЛЫСЬТЫЗ УЗЫРЛЫК | РУФЬ 3, 4

Духовной марӟанъёс

(Руфь 4:6) Ӵыжы-выжы луись пи шуиз: «Аслэсьтым люкет музъемме куашкатонтэм понна сое кышно басьтыны уг быгатӥськы; тон сое ас бордад кут, мон сое ас бордам кутыны уг быгатӥськы».

w05 1/3 29 б., 3 абз.

Руфь книгаысь тунсыко малпанъёс

4:6 — Кызьы адями аслэсьтыз люкет музъемзэ куашкатыны быгатэ вал, ӵыжы-выжыезлэсь музъемзэ басьтысал ке? Куанер адями музъем люкетсэ вузаз ке, матысь ӵыжы-выжыез, дун тырыса, сое басьтыны быгатэ вал. Дуныз герӟаськемын вал соин, кӧня ар юбилей арозь кылемын (Левит 25:25—27). Озьыен, дун тыремез бере та ӵыжы-выжылэн ваньбурез кулэсме вал. Со сяна, Руфь пи нуны вайысал ке, басьтэм музъем та пилы кыльысал.

Библиез лыдӟон

(Руфь 4:7—22) Вазен Израильын басьяськыкузы, вошъяськыкузы, ужлэсь ортчемзэ возьматон понна таӵе сям вал: одӥг мурт пыдкутчанзэ кыле но мукетызлы сётэ вал, Израильын ужъёсты тазьы юнматылӥзы. ⁸ Ӵыжы-выжы луись пи Воозлы шуиз: «Аслыд басьты». Пыдкутчанзэ кылиз. ⁹ Соку Вооз тӧроослы, вань люкаськем калыклы шуиз: «Табере тӥ адӟисьёс луиськоды, кызьы мон Ноеминьлэсь быдэссэ Елимелех киулэ шедем музъемзэ басьтӥсько, Хилеонлэсьсэ но, Махлонлэсьсэ но басьтӥсько; ¹⁰ Махлонлэсь кышнозэ моав нылэз Руфез аслым кышнолы басьтӥсько, кулэм картэзлэсь нимзэ солэн люкет музъемаз кельтон понна, солэн нимыз агай-вынъёсыз пӧлысь, улон интыезлэн капка дорысьтыз медаз ышы-быры; туннэ тӥ тае адӟисьёс луиськоды». ¹¹ Капка дорын сылӥсь вань калык, тӧроос шуизы: «Ми — адӟисьёс луиськомы; тынад коркад пырись кышномуртэз Кузё-Инмар Рахилен Лияез кадь мед кароз, соос Израиль выжыез юнматӥзы; Ефрафаысь узырлыкед мед потоз, Вифлеемын нимыд дано мед луоз; ¹² тынад выжыед Фамарьлэн Иудалы вордскытэм Фареслэн выжыез кадь мед луоз, Кузё-Инмарлэн ӟечлыкеныз та егит кышномуртлэсь тыныд кужмо выжы мед потоз». ¹³ Вооз Руфез кутӥз, со солы кышно луиз. Вооз со доры пыриз, Кузё-Инмарлэн ӟеченыз со секытэн луиз, пи нуны вайиз. ¹⁴ Кышномуртъёс Ноеминьлы шуизы: «Данлыко Кузё-Инмар, Со тонэ юрт утисьтэк ӧз кельты! Солэн нимыз Израильын дано мед луоз! ¹⁵ Со тынад шумпотон вайисед, пересьмон даурад сюдӥсед луоз, уго со нуныез тонэ яратӥсь кенэд вайиз, сизьым пиослэсь но со тон понна умойгес». ¹⁶ Та нуныез Ноеминь кияз кутӥз но гадь бордаз ӝиптыса нуллӥз, нуны утись луиз. ¹⁷ Бускель кышномуртъёс нунылы ним сётыса шуизы: «Ноеминьлэн пи нуныез вордскиз», солы Овид ним сётӥзы. Со Давидлэн атаезлэн Иессейлэн атаез луэ. ¹⁸ Тани, Фареслэн выжыез: Фареслэсь Есром вордскиз; ¹⁹ Есромлэсь Арам вордскиз; Арамлэсь Аминадав вордскиз; ²⁰ Аминадавлэсь Наассон вордскиз; Наассонлэсь Салмон вордскиз; ²¹ Салмонлэсь Вооз вордскиз; Воозлэсь Овид вордскиз; ²² Овидлэсь Иессей вордскиз; Иессейлэсь Давид вордскиз.

7—13-ТӤ ТУЛЫСПАЛ

ИНМАРЛЭН КЫЛЫСЬТЫЗ УЗЫРЛЫК | 1 ЭКСЭЙЛЫКЪЁСЛЭН 1, 2

Духовной марӟанъёс

(1 Эксэйлыкъёслэн 2:10) Кузё-Инмар Соин ченгешисьёсты ӵушыса куштоз; инмысен соос вылэ гудыртоз. Кузё-Инмар быдэс дуннеез судить кароз, Аслаз эксэезлы юнлык сётоз, вӧйын зырӟыса пуктэмезлэсь кужымзэ вылэ ӝутоз».

w05 15/3 21 б., 5 абз.

Эксэйлыкъёслэн нырысетӥ книгаысьтызы тунсыко малпанъёс

2:10 — Малы Анна вераз, Иегова «Аслаз эксэезлы юнлык сётоз» шуыса, израиль калыклэн эксэез ӧй вал на ке но? Моисейлэн законаз азьло ик верамын вал, израиль калыклэн адямиос пӧлысь эксэез луоз шуыса (Кыкетӥ Закон 17:14—18). Иаков но кулон азяз вераз: «Иуда бордысь эксэй боды уз басьтӥськы» (Улон-вылон 49:10). Со сяна, Сарра сярысь Иегова вераз: «Со бордысь... калыкъёслэн эксэйёссы потозы» (Улон-вылон 17:16). Озьыен, Анна вуоно эксэй сярысь вӧсяськиз.

Библиез лыдӟон

(1 Эксэйлыкъёслэн 1:1—18) Ефрем гурезьысь Рамафаим-Цофимын улӥз адями, солэн нимыз Елкана, со вал Цуфлэн Тоху пиезлэн Илий пиезлэн Иерохам пиезлэн пиез — Ефрафа карын вордскем мурт. ² Солэн кык кышноез вал: огезлэн нимыз Анна, мукетызлэн — Феннана. Феннаналэн нылпиосыз вал, нош Анналэн — ӧй вал. ³ Кулэ нуналъёсы та адями Саваоф Кузё-Инмарлы йыбыртъяны, курбон сётъяны ас городысьтыз Сӥлом каре ветлылӥз. Отын вал Илий кык пиосыныз ӵош — Офниен но Финеесэн, соос Кузё-Инмарлэн священникъёсыз вал. ⁴ Елкана курбон сётон дыръяз Феннана кышноезлы, вань пиосызлы, нылъёсызлы люкет сётылӥз. ⁵ Нош Анналы со нимысьтыз люкет сётылӥз, уго Аннаез со юнгес яратэ вал, Кузё-Инмар солы нылпи вайыны быгатонлык ӧз сёты. ⁶ Феннана Аннаез туж ӝоже уськытылӥз, Анна ӝожъяськыны мед кутскоз шуыса, Кузё-Инмар солы нуны вайыны луонлык ӧз сёты шуыса. ⁷ Тазьы луэ вал арлы быдэ Кузё-Инмарлэн корказ ветлон дыръя: Феннана Аннаез ӝоже уськытылӥз, соин ик бӧрдэ, уг но сиськы вал. ⁸ Соку солэн кузпалыз, Елкана, шуылӥз: «Анна! Малы тон бӧрдӥськод, малы уд сиськиськы? Мар пумысен тынад сюлмыд куректэ? Тон понна мон дас пиослэсь умойгес ӧвӧл шат?» ⁹ Сӥломын сиемзы, юэмзы бере Анна султӥз. Со вакытэ Илий священник Кузё-Инмарлэн храмаз пырон дорысь пукон вылын пуке вал. ¹⁰ Лулыныз-сюлмыныз ӝожомыса, Анна Кузё-Инмар азьын вӧсяськиз, туж бӧрдӥз; ¹¹ соку со тазьы кыл сётӥз: «Саваоф Кузё-Инмаре! Ляльчиедлэн ӝожомыса улэмез шоры учкид ке, монэ тодад вайид ке, Ас ляльчидэ ӧд ке вунэты, ляльчи кышномуртэдлы пи нуны сётӥд ке, соку мон сое вань улон даурез ӵожелы Кузё-Инмарлы сёто; йырси бордаз качы но уз йӧтӥськы». ¹² Кузё-Инмар азьын кема вӧсяськыса улон дыръяз Илий солэн ым шораз учкыса улӥз. ¹³ Анна сюлмыныз куриськиз, ымзэ ӧжыт гинэ выретӥз, солэн куараез ӧз кылӥськы, соин ик Илий малпаз, та кышномурт кудӟемын, дыр, шуыса. ¹⁴ Соку Илий солы шуиз: «Кудӟем куеныд кема-а татын улод на? Мын сазьтӥськы». ¹⁵ Анна ответ сётыса шуиз: «Ӧвӧл, кузёе, мон кудӟемын ӧвӧл, вина но, сур но мон ӧй юы, мон лулыным-сюлмыным куректыса улӥсь кышномурт; Кузё-Инмар азьын лулме-сюлэмме усьтӥсько. ¹⁶ Монэ, ляльчидэ, окты-калты кышномурт шуыса эн лыдъя, туж бадӟым куректонэ, ӝожен-курен улонэ сярысь татын мон вераса улӥ». ¹⁷ Илий солы ответ сётыса шуиз: «Каньылэн мын, Израильлэн Инмарез курондэ быдэстоз, мар тон Солэсь курид». ¹⁸ Анна шуиз: «Тон ляльчидэ гажаса-жаляса возь!» Собере со отысь кошкиз; сиськиз, азьло кадь ымнырыз ӝож тусъем ӧй ни вал.

14—20-ТӤ ТУЛЫСПАЛ

ИНМАРЛЭН КЫЛЫСЬТЫЗ УЗЫРЛЫК | 1 ЭКСЭЙЛЫКЪЁСЛЭН 3—5

Духовной марӟанъёс

(1 Эксэйлыкъёслэн 3:3) Инмарлэн лампадаез ӧз на кысы вал,— Кузё-Инмарлэн храмаз Самуил выдыса кыллён дыръя отын Инмарлэн ковчегез сылӥз,

w05 15/3 21 б., 6 абз.

Эксэйлыкъёслэн нырысетӥ книгаысьтызы тунсыко малпанъёс

3:3 — Зэм-а Самуил Святойлэсь но святой интыын кӧлаз? Ӧз, ӧз кӧла. Самуил левит вал ке но, со вал Каафлэн пиосыз пӧлысь, кудъёсыз священникъёс ӧй вал (1 Паралипоменон 6:33—38). Соин ик Святойлэсь но святой интые пыраны но «святой арбериос шоры учкыса улыны» со уг быгаты вал (Лыдпусъёс 4:17—20). Самуил скиниялэн азбараз гинэ пыраны быгатӥз. Отын ик со кӧланы кулэ вал. Илий но отын ик кӧлаз, вылды. «Отын Инмарлэн ковчегез сылӥз» кылъёс возьмато, дыр, интыез, кытын скиния сылӥз.

Библиез лыдӟон

(1 Эксэйлыкъёслэн 3:1—18) Егит пи Самуил Илий бордын Кузё-Инмарлы ужаз-тыршиз; со виын Кузё-Инмар дорысь потӥсь кылэз шер луэ вал кылыны, адӟонъёс но ӵем ӧз луылэ. ² Илийлэн синъёсыз лябӟыны кутскизы, со адӟемысь дугдӥз; со вакытэ со ас интыяз выдыса кылле вал, ³ Инмарлэн лампадаез ӧз на кысы вал,— Кузё-Инмарлэн храмаз Самуил выдыса кыллён дыръя отын Инмарлэн ковчегез сылӥз, ⁴ Кузё-Инмар Самуиллы вазиськиз. Нош Самуил шуиз: «Мон татын!» ⁵ Илий доры со бызьыса лыктӥз но шуиз: «Тани, мон татын! Тон монэ ӧтид-а?» Илий шуиз: «Мон тонэ ӧй ӧтьы; мын берен, изьыны выд». Со кошкиз, изьыны выдӥз. ⁶ Мукетъят Кузё-Инмар нош ик Самуиллы вазиськиз: «Самуил, Самуил!» Со султӥз но кыкетӥ ползэ ини Илий доры лыктыса шуиз: «Тани, мон татын! Тон монэ ӧтид-а?» Нош соиз шуиз: «Мон тонэ ӧй ӧтьы, пие; мын, бертыса изьыны выд». ⁷ Самуил соку уг на тодма вал Кузё-Инмарлэсь куаразэ, та дырозь Кузё-Инмарлэн верам кылыз со доры ӧз на вуылы на вал. ⁸ Кузё-Инмар куинетӥ ползэ Самуиллы вазиськиз. Со султӥз но Илий доры лыктыса шуиз: «Тани, мон татын! Тон монэ ӧтид-а?» Соку Илий валаз, егит пиез Кузё-Инмар ӧте шуыса. ⁹ Соку Илий Самуиллы шуиз: «Мын, берт, изьыны выд, нош Ӧтись тыныд вазиськиз ке, тон шу: „Вера, Кузё-Инмаре, ляльчиед Тонэ кылзэ“». Самуил кошкиз, со аслаз интыяз выдӥз. ¹⁰ Кузё-Инмар лыктӥз но, азьвыл радъёсаз кадь ик, султыса солы вазиськиз: «Самуил, Самуил!» Соку Самуил шуиз: «Вера, ляльчиед Тонэ кылзэ». ¹¹ Кузё-Инмар Самуиллы шуиз: «Тани, Мон Израильын сыӵе уж лэсьто, кин со сярысь кылоз, со муртлэн кыкез ик пельыз жонгетоз. ¹² Со нуналэ, Илийлы но семьяезлы мар лэсьто шуи, ваньзэ быдэсто; Мон кутско, Мон ик йылпумъяло. ¹³ Мон солы ялӥ: пумтэм вапумъёс ӵожелы выжыдэ вӧсь каро, уго тон пиосыдлэсь йӧнтэм ужъёсын выремзэс тодӥд ке но, соосты ӧд алы. ¹⁴ Со понна ик Илийлэн семьяезлы кыл сётыса верасько: дауръёс ӵоже но Илий юртлэн сьӧлыкъёсыз курбон сётыса но, саламъёс вайыса но уз ӵушиське». ¹⁵ Самуил ӵукнаозь изиз, собере Кузё-Инмарлэн коркаезлэсь ӧсъёссэ усьяз; аслэсьтыз адӟемзэ Илийлы вераны Самуил кышказ. ¹⁶ Илий Самуилэз дораз ӧтьыса шуиз: «Пие, Самуил!» — «Мон кылзӥсько!» — соиз шуиз. ¹⁷ Илий шуиз: «Мар тыныд верамын вал? Мынэсьтым сое эн ваты; сое но сое тыныд Инмар лэсьтоз, эшшо троссэгес лэсьтоз, тыныд верам пӧлысь марзэ ке созэ мынэсьтым ватӥд ке». ¹⁸ Самуил солы ваньзэ вераз, номырзэ но ӧз ваты. Соку Илий шуиз: «Со — Кузё-Инмар; мар Солы кулэ, сое ик мед лэсьтоз».

21—27-ТӤ ТУЛЫСПАЛ

ИНМАРЛЭН КЫЛЫСЬТЫЗ УЗЫРЛЫК | 1 ЭКСЭЙЛЫКЪЁСЛЭН 6—8

Духовной марӟанъёс

(1 Эксэйлыкъёслэн 7:3) Вань израиль калыклы Самуил таӵе кылъёс вераз: «Вань сюлмыныды Кузё-Инмар пала берытскиськоды ке, соку асьтэ пӧлысь мурт калыкъёслэсь инмаръёссэс, астартаосты палэнтэ, сюлэмдэс Кузё-Инмарлы усьтэ, одӥг Солы гинэ ужаса-тыршыса улэ, соку Со тӥледыз филистим калыклэн киулысьтыз мозмытоз».

w02 1/4 12 б., 13 абз.

Малы пылатӥськоно?

¹³ Пылатӥськемезлэсь азьло но Иеговалэн Адӟись-Ивортӥсез луэмезлэсь азьло адями Инмар пала берытскыны кулэ. Со, кин Иисус Христос сьӧры мыныны малпаз, ас мылкыд каремезъя таӵе вамыш лэсьтэ. Сыӵе адями урод ужъёссэ кельтэ но Инмарлы ярамон ужъёс лэсьтыны кутске. Куке Священной Гожтэмын вераське Инмар пала берытскон сярысь, кутӥсько еврей но грек глаголъёс, кудъёсыз «берытсконэз» яке «малэсь берытскыса мукет пала мынэмез» возьмато. Вераськон мынэ, урод ужъёсты кельтыса, Инмар пала берытскон сярысь (3 Эксэйлыкъёслэн 8:33, 34). Инмар пала берытскон понна, сьӧлыкъёслэсь куштӥськоно но ӧпкелёно (Апостолъёслэн ужъёссы 26:20). Зэмос луисьтэм религиысь потоно, Инмарлэн курон-косонъёсызъя улоно но солы гинэ ужано-тыршоно (Кыкетӥ Закон 30:2, 8—10; 1 Эксэйлыкъёслэн 7:3). Инмар пала берытскыса, адямилэн сямъёсыз но ужпумъёсыз воштӥсько (Иезекииль 18:31). Урод сямъёссэ кельтыса, адями Инмарлы ярамон сямъёс будэтэ (Апостолъёслэн ужъёссы 3:19; Ефесъёслы 4:20—24; Колоссыослы 3:5—14).

Библиез лыдӟон

(1 Эксэйлыкъёслэн 7:1—14) Кириаф-Иаримын улӥсьёс лыктӥзы но Кузё-Инмарлэсь ковчегзэ басьтӥзы, сое вырйылысь Аминадавлэн юртаз вайизы, нош солэсь Елеазар пизэ Кузё-Инмарлэсь ковчегзэ утисе пуктӥзы. ² Ковчегез Кириаф-Иариме интыям бере трос дыр ортчиз, ог кызь аръёс. Вань израиль калык Кузё-Инмар пала берытскиз. ³ Вань израиль калыклы Самуил таӵе кылъёс вераз: «Вань сюлмыныды Кузё-Инмар пала берытскиськоды ке, соку асьтэ пӧлысь мурт калыкъёслэсь инмаръёссэс, астартаосты палэнтэ, сюлэмдэс Кузё-Инмарлы усьтэ, одӥг Солы гинэ ужаса-тыршыса улэ, соку Со тӥледыз филистим калыклэн киулысьтыз мозмытоз». ⁴ Соку израиль пиос асьсэ пӧлысь ваалъёсты, астартаосты палэнтӥзы но одӥг Кузё-Инмарлы ужаса-тыршыса улыны кутскизы. ⁵ Самуил шуиз: «Вань израиль калыкез Массифае люкалэ, соку мон тӥ понна Кузё-Инмарлы вӧсясько». ⁶ Массифае люкаськизы, ву омыръязы, Кузё-Инмар азе киськазы, со нуналэ визяса улӥзы но тазьы шуизы: «Кузё-Инмар азьын ми сьӧлыкамы». Самуил израиль пиослэсь ужъёссэс Массифаын тупатъяз-радъяз. ⁷ Филистим калык израиль пиос Массифае люкаськиллям шуыса кылэм бераз филистим калыклэн кивалтӥсьёсыз Израиль вылэ урдскизы. Та сярысь кылэмзы бере израиль пиос филистим калыклэсь кышкатскизы. ⁸ Израиль пиос Самуиллы шуизы: «Инмармылы Кузё-Инмарлы ми понна вӧсяськемысь эн дугды, Со милемыз мед утёз филистим калыклэн киулаз сюронлэсь». ⁹ Соку Самуил нонӥсь ыжпиез кутӥз но Кузё-Инмарлы тылын сутӥськись курбон сётӥз; Израиль понна Самуил вӧсяськыса Кузё-Инмарлэсь куриз но, Кузё-Инмар солэсь куриськемзэ кабыл басьтӥз. ¹⁰ Тылын сутӥськись курбонзэ Самуил сётыку, филистим калык Израилен ожмаськыны лыктӥз. Но со нуналэ филистим калыклэн йыр йылаз Кузё-Инмар кужмо гудыртӥз но соосты туж кышкатӥз, Израиль азьын соос погыртэмын вал. ¹¹ Израиль пиос, Массифаысь потыса, филистим калык бӧрсьы уйиськыса мынӥзы, соосты погыртӥзы, Вефхорлэн матаз вуизы. ¹² Самуил одӥг изэз кияз кутӥз но Массифаен Сен вискы пуктӥз, сое Авен-Езер шуыса нимаз. Со шуиз: «Та дорозь Кузё-Инмар асьмелы юрттӥз». ¹³ Тазьы филистим калык чусомытэмын вал, та бере Израиль улос вылэ ӧз ни чуртнаськылэ; Самуил улон нуналъёсы Кузё-Инмарлэн киыз филистим калыкез зӥбыса возиз. ¹⁴ Аккаронысен Гефозь филистим калыклэн Израильлэсь талам городъёсыз Израильлы берыктэмын вал, филистим калыклэн киулысьтыз та улосъёсты Израиль мозмытӥз. Израиль калык аморрейёсын тупаса улӥз.

28-ТӤ ТУЛЫСПАЛ — 6-ТӤ ЮЖТОЛЭЗЬ

ИНМАРЛЭН КЫЛЫСЬТЫЗ УЗЫРЛЫК | 1 ЭКСЭЙЛЫКЪЁСЛЭН 9—11

Духовной марӟанъёс

(1 Эксэйлыкъёслэн 9:9) Вазен израиль калык пӧлысь кин ке Инмарлэсь куриськыны мынон азяз тазьы шуоз вал: «Азьпалзэ адӟись доры мыном». Уго али кинэ „пророк“ шуо, вазен сое „азьпалэз адӟись“ шуозы вал.

w05 15/3 22 б., 8 абз.

Эксэйлыкъёслэн нырысетӥ книгаысьтызы тунсыко малпанъёс

9:9 — Мае возьмато таӵе кылъёс: «Али кинэ „пророк“ шуо, вазен сое „азьпалэз адӟись“ шуозы вал»? Самуил улыкуз но Израильын эксэйёс кивалтыкузы, пророкъёслэн ужзы эшшо но кулэгес луиз, вылды. «Азьпалзэ адӟисез» берлогес «пророк» шуыса ниманы кутскизы. Самуил Израильын нырысетӥ пророк вал (Апостолъёслэн ужъёссы 3:24).

Библиез лыдӟон

(1 Эксэйлыкъёслэн 9:1—10) Вениамин выжыын кыӵе ке но адями вал, солэн нимыз Кис, нимо-дано адями, Афийлэн Бехораф пиезлэн, солэн Церон пиезлэн Авиил пиезлэн пиез вал со. ² Солэн чебер, егит Саул нимо пиез вал; израиль пиос пӧлын солэсь чеберез ӧй вал; быдэс йырлы со ас калыкезлэсь ӝужытгес вал. ³ Кислэн, Сауллэн атаезлэн, ишакъёсыз ышизы. Соку Кис Саул пиезлы шуиз: «Одӥгзэ медоез бордад кут но мын, ишакъёсты утча». ⁴ Ефрем гурезез ортчиз, Шалиша музъемез пыр потӥз, но ишакъёссэс ӧз шедьтэ; Шаалим музъемез ортчизы, отын но соос ӧвӧл; Вениамин музъемез пырпотӥз, но отысь но ӧз шедьтэ. ⁵ Цуф музъеме вуэмзы бере Саул ӵош ветлӥсь медоезлы шуиз: «Ойдо, бертом, ишакъёсын сэрен атае асьме понна сюлмаськоно медаз луы». ⁶ Нош медо солы шуиз: «Тани та городын Инмарлэн адямиез вань, гажано мурт; мар гинэ со уг вера, ваньмыз быдэсме. Ойдо со доры ветлом, оло нош вералоз, кудтӥз сюрестӥ асьмелы мыноно». ⁷ Саул медоезлы шуиз: «Тани асьмеос со доры мынӥмы ке, мар солы нуомы? Ныпъетамы няньмы ӧвӧл ини, кузьыммы но ӧвӧл Инмар адямилы сётыны. Мармы вань асьмелэн?» ⁸ Нош ик медо Сауллы ответ сётыса шуиз: «Мынам киям азвесь сӥкльлэн ньылетӥ люкетэз вань; сое мон Инмар адямилы сёто но, со асьмелы сюрес возьматоз». ⁹ Вазен израиль калык пӧлысь кин ке Инмарлэсь куриськыны мынон азяз тазьы шуоз вал: «Азьпалзэ адӟись доры мыном». Уго али кинэ „пророк“ шуо, вазен сое „азьпалэз адӟись“ шуозы вал. ¹⁰ Соку Саул медоезлы шуиз: «Умой тон вераськод; ойдо мыном». Инмар адямилэн улон городаз мынӥзы.