«Улон но ужан-тыршон» ужан тетрадьлы малпанъёс
2—8-ТӤ ТОЛШОР
ИНМАРЛЭН КЫЛЫСЬТЫЗ УЗЫРЛЫК | 4 ЭКСЭЙЛЫКЪЁСЛЭН 22, 23
Духовной марӟанъёс
(4 Эксэйлыкъёслэн 23:24, 25) Кулэм муртлэсь духсэ ӧтьылӥсьёсты, син пӧртмасьёсты, терафимъёсты, сульдэръёсты, Иудей музъеме, Иерусалиме вуэм вань юрӟым макеосты Иосия быдтӥз Кузё-Инмарлэн коркасьтыз Хелкия архиерейлэсь шедьтэм книгаяз гожтэм законлэсь кылъёссэ быдэстон понна. 25 Солэсь азьвыл вань сюлмыныз, вань лулыныз, вань кужмыныз Моисей законъя, Кузё-Инмар пала берытскись, со кадь эксэй ӧй вал; со бӧрсьы но солы укшась эксэй ӧз ӝутӥськы.
w01 15/4 26 б., 3, 4 абз.
Пичи дырды секыт вал ке но, тӥ быгатӥськоды шудо луыны
Иосиялэн пичи дырыз секыт вал ке но, со Иеговалы ярамон ужъёс лэсьтӥз. Со туж умой кивалтӥсь вал. Со сярысь Библиын верамын: «Солэсь азьвыл вань сюлмыныз, вань лулыныз, вань кужмыныз Моисей законъя, Кузё-Инмар пала берытскись, со кадь эксэй ӧй вал; со бӧрсьы но солы укшась эксэй ӧз ӝутӥськы» (4 Эксэйлыкъёслэн 23:19—25).
Тӥляд но Иосиялэн кадь пичи дырды секыт вал ке, солэн улонэз тӥледыз буйгатыны быгатоз. Малы дышетэ милемыз Иосиялэн улонэз? Мар юрттӥз солы шонер сюрес бырйыны но со вылтӥ мыныны?
Библиез лыдӟон
(4 Эксэйлыкъёслэн 23:16—25) Иосия учкиз но отысь, гурезь бамалысь, шайгуосты адӟиз, шайгуосысь лыосты басьтыны ыстӥз, курбон сётон вылын сутӥз, сое саптаз. Тазьы быдэсмиз Кузё-Инмарлэн кылыз — та ужъёс сярысь Инмар адями азьвыл ик вераз вал. 17 Соку Иосия шуиз: «Кыӵе таӵе та памятник, мае мон адӟисько?» Городын улӥсьёс солы шуизы: «Та Иудеяысь вуэм Инмар адямилэн шайгуэз, Вефильысь курбон сётон вылын мар тон лэсьтӥськод, со сярысь вераз». 18 Соку со шуиз: «Ас эрказ мед улоз, солэн лыосыз борды нокин но медаз йӧтскылы». Солэсь лыоссэ, Самарияысь вуэм пророклэсь лыоссэ утизы. 19 Кузё-Инмарлэсь вожзэ поттылыса, Израиль эксэйёслэсь Самарияысь городъёсысь гурезь йылъёсы лэсьтылэм куяськон-вӧсяськон куалаоссэс но Иосия куашкатъяз, Вефильын кызьы кариз, таосыныз но озьы ик лэсьтӥз; 20 гурезь йылъёсысь вӧсясьёсты, отчы учырамъёссэ, ваньзэс вандӥз но курбон сётон интыын адями лыосты сутӥз,— ачиз соку Иерусалиме берытскиз. 21 Эксэй вань калыклы косон сётыса шуиз: «Инмардылы Кузё-Инмарлы Пасха ортчытэ, кызьы та сӥзён книгаын гожтэмын»,— 22 малы ке шуоно Израилез кивалтӥсь судьяослэн нуналъёссы дырысен, Израиль эксэйёслэн улон нуналъёсазы, Иудей эксэйёслэн улон нуналъёсазы, таӵе Пасха ортчытэмын ӧй ни вал; 23 нош Иосиялэн дас тямысэтӥ арзэ эксэйын пукон дыръяз Кузё-Инмарлы сӥзем таӵе Пасха Иерусалимын ортчытэмын вал. 24 Кулэм муртлэсь духсэ ӧтьылӥсьёсты, син пӧртмасьёсты, терафимъёсты, сульдэръёсты, Иудей музъеме, Иерусалиме вуэм вань юрӟым макеосты Иосия быдтӥз Кузё-Инмарлэн коркасьтыз Хелкия архиерейлэсь шедьтэм книгаяз гожтэм законлэсь кылъёссэ быдэстон понна. 25 Солэсь азьвыл вань сюлмыныз, вань лулыныз, вань кужмыныз Моисей законъя, Кузё-Инмар пала берытскись, со кадь эксэй ӧй вал; со бӧрсьы но солы укшась эксэй ӧз ӝутӥськы.
9—15-ТӤ ТОЛШОР
ИНМАРЛЭН КЫЛЫСЬТЫЗ УЗЫРЛЫК | 4 ЭКСЭЙЛЫКЪЁСЛЭН 24, 25
Духовной марӟанъёс
(4 Эксэйлыкъёслэн 24:3, 4) Манассиялэн сьӧлыкъёсыз понна, ваньмыз понна, мар со лэсьтӥз, Кузё-Инмарлэн косэмезъя Иудеяен тазьы луиз сое Солэн син азьысьтыз сэрпалтон понна; 4 янгыштэм вирез кисьтэмез понна, янгыштэм вирен Иерусалимез пачылмытэмез понна Кузё-Инмарлэн простить каремез ӧз ни поты.
w05 1/8 12 б., 2 абз.
Эксэйлыкъёслэн ньылетӥ книгаысьтызы тунсыко малпанъёс
24:3, 4. Манассия янгыштэм адямиослэсь вирзэс кисьтӥз бере, Иеговалэн Иудаез простить каремез ӧз поты. Янгыштэм вир кисьтӥське ке, Инмар сое адӟе. Иегова одно ик быдтоз соосты, кинъёс янгыштэм вирез кисьто (Псалтирь 36:9—11; 144:20).
Библиез лыдӟон
(4 Эксэйлыкъёслэн 24:1—17) Иоакимлэн кивалтон нуналъёсаз Вавилонлэн Навуходоносор эксэез урдӥськиз, Иоаким солы куинь ар ӵоже тэрытскыса улоно луиз, нош бӧрысь солэн киулысьтыз кошкиз. 2 Кузё-Инмар со вылэ халдей, сири, моав, аммон ожмаськись уллёос ыстылӥз,— Иудея вылэ, сое быдтон вылысь, кызьы вераз Кузё-Инмар Аслаз ляльчи пророкъёсыз пыр. 3 Манассиялэн сьӧлыкъёсыз понна, ваньмыз понна, мар со лэсьтӥз, Кузё-Инмарлэн косэмезъя Иудеяен тазьы луиз сое Солэн син азьысьтыз сэрпалтон понна; 4 янгыштэм вирез кисьтэмез понна, янгыштэм вирен Иерусалимез пачылмытэмез понна Кузё-Инмарлэн простить каремез ӧз ни поты. 5 Иоаким сярысь, ваньзэ мар лэсьтӥз, Иудей эксэйёслэн книгаязы гожтэмын. 6 Атайёсыз кадь ик Иоаким кулӥз, со интые эксэе Иехония пиез пуксиз. 7 Египетлэн эксэез аслаз музъемысьтыз ӧз ни пота, малы ке шуоно Египет ӧр дорысен Ефрат шур дорозь мар вал Египет эксэйлэн киулаз, ваньзэ Вавилон эксэй киултӥз. 8 Иехониялы, эксэе пуксьыкуз, дас тямыс арес вал, со куинь толэзь ӵоже Иерусалимын эксэй пуконын пукиз; анаезлэн нимыз Нехушта, со Иерусалимысь Елнафанлэн нылыз вал. 9 Кузё-Инмарлэн азяз ярантэм ужъёс лэсьтыса улӥз, ваньзэ лэсьтӥз атаез кадь ик. 10 Со виын Вавилонлэн Навуходоносор эксэезлэн ляльчиосыз Иерусалим доры вуизы, городэз котыртӥзы. 11 Ляльчиосыз городэз котыртыса возьыку, Вавилонлэн эксэез татчы вуиз. 12 Иудеялэн Иехония эксэез Вавилон эксэйлэн пумитаз потӥз — со но, анаез но, медоосыз но, кивалтӥсьёсыз но, евнухъёсыз но — тямысэтӥ арзэ эксэйын пукыкуз, Вавилон эксэй сое пленэ басьтӥз. 13 Отысь со, Кузё-Инмарлэн коркасьтыз, эксэй коркась вань дуно арбериосты поттӥз; кызьы Кузё-Инмар азьвыл ик вераз, Израильлэн Соломон эксэезлэсь Кузё-Инмарлэн храмаз лэсьтэм ваньзэ зарни сосудъёссэ тӥяз; 14 Иерусалимын вань улӥсьёсты — вань кивалтӥсьёсты, ваньзэс кышкасьтэм ожгарчиосты, дас сюрс муртэ, мукет азе улыны нуиз — вань лэсьтӥськисьёсты, кебитын ужасьёсты; та музъемысь куанер улӥсь калык сяна, нокин но ӧз ни кыльы. 15 Иехонияез Вавилонэ улыны интыяз; эксэйлэсь анайзэ но, эксэйлэсь кышнооссэ но, евнухъёссэ но, та музъемысь кужмо муртъёсты но Иерусалимысь Вавилонэ улыны нуиз. 16 Вань ожгарчиосты, сизьым сюрс муртэ, пуэн ужасьёсты но, дуриськисьёсты но — сюрс муртэ, вань кышкасьтэмъёсты, оже ветлӥсьёсты Вавилон эксэй Вавилонэ улыны нуиз. 17 Вавилон эксэй со интые Иехониялэсь агайзэ Матфанияез эксэе пуктӥз но солэсь нимзэ воштӥз — Седекия кариз.
16—22-ТӤ ТОЛШОР
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 1—3
Духовной марӟанъёс
(1 Паралипоменон 3:1—3) Давидлэн Хевронын вордскем пиосыз: нырысез пиез Амнон вордскемын Изреель ныллэсь, Ахиноамалэсь; кыкетӥез — Далуия, вордскемын Кармил ныллэсь, Авигеялэсь, 2 куинетӥез — Авессалом, вордскемын Гессур эксэйлэн, Фалмайлэн, Мааха нылызлэсь; ньылетӥез — Адония, Аггифалэн пиез; 3 витетӥез — Сафатия, вордскемын Авиталалэсь; куатетӥез — Ифреам, вордскемын Эглалэсь, солэн кышноезлэсь,—
it «Родословная», «Имена женщин» подзаг., 1, 2 абз.
Ӵыжы-выжы луон сярысь гожъямъёс
Кышномуртъёслэн нимъёссы. Ӵыжы-выжы луон сярысь гожъямъёсы кышномуртъёслэсь нимъёссэс гожто вал соку гинэ, куке со понна кыӵе ке кулэ луись муг вал. Улон-вылонын 11:29, 30 Саралэн (Сарралэн) нимыз гожтэмын, малы ке шуоно со пыр сӥзем Кидыс-Выжы потыны кулэ вал. Озьы ик отын гожтэмын Милкалэн нимыз. Со вал Ревеккалэн, Исааклэн кышноезлэн, песянаез. Озьы ми тодӥськомы, Ревекка Авраам выжыысь вал шуыса — Исааклы мукет калыкысь кышно басьтыны уг яра вал ук (Ул 22:20—23; 24:2—4). Улон-вылонын 25:1 гожтэмын Авраамлэн выль кышноезлэн нимыз — Хеттура. Озьы ми тодӥськомы, Сарра кулэм бере Авраам выльысь кышнояськиз но солэн эшшо нылпиосыз вордӥськизы на шуыса (Рм 4:19; Ул 24:67; 25:20). Со сяна ми тодӥськомы на, кызьы герӟаськемын мадиан калык но Аравияысь выжыос Израилен.
Озьы ик гожтэмын Иаковлэн Лия но Рахиль кышноосызлэн нимъёссы но ляльчи кышноосызлэн нимъёссы (Ул 35:21—26). Солы луыса ми тодӥськомы, кыӵе вал кусыпъёсыз Инмарлэн та кышномуртъёслэн пиосынызы. Та муген ик ӵыжы-выжы луон сярысь гожъямъёсын гожтэмын мукет кышномуртъёслэн но нимъёссы. Эшшо кышномуртъёслэн нимъёссы гожтӥсько на вал, куке соос люкет басьтӥсьёс луо вал (Лд 26:33). Нош Фамарьлэн, Рахавалэн но Руфьлэн гожтэм нимъёссы — со нимысьтыз учыр. Котькудӥз та кышномуртъёс пӧлысь лэсьтӥз мае ке но сыӵезэ, мар понна соослы дан сётэмын вал Мессиялы, Иисус Христослы, песянай луыны (Ул, 38 люкет; Рф 1:3—5; 4:13—15; Мф 1:1—5). Мукет кышномуртъёслэн нимъёссы гожтэмын на, кылсярысь, 1 Паралипоменонын 2:35, 48, 49; 3:1—3, 5.
Библиез лыдӟон
(1 Паралипоменон 1:43—54) Израиль калыклэн эксэйёсыз потэмлэсь азьвыл Едом музъемлэн эксэй пуконаз пукизы таӵе эксэйёс: Веорлэн Бела пиез, солэн городэзлэн нимыз Дингава. 44 Бела кулӥз но, со интые эксэе пуксиз Восорысь Зерахлэн пиез Иовав. 45 Иовав кулӥз но, со интые эксэе пуксиз Феман пиослэн музъемысьтызы Хушам. 46 Хушам кулӥз но, со интые Бедадлэн Гадад пиез эксэе пуксиз, со Моав бусыын мадиан калыкез погыртӥз; солэн городэзлэн нимыз Авиф. 47 Гадад кулӥз но, со интые эксэе пуксиз Масрекаысь Самла. 48 Самла кулӥз но, со интые эксэе пуксиз шур дуре интыяськем Реховоф городысь Саул. 49 Саул кулӥз но, со интые эксэе пуксиз Ахборлэн Баал-Ханан пиез. 50 Баал-Ханан кулӥз но, со интые эксэе пуксиз Гадар; солэн городэзлэн нимыз Пау; кышноезлэн нимыз Мегетавеель, со Мезагавлэн Матреда нылызлэн нылыз. 51 Гадар кулӥз.Едомлэн тӧроосыз-азьветлӥсьёсыз вал: Фимна тӧро, Алва тӧро, Иетеф тӧро, 52 Оливема тӧро, Эла тӧро, Пинон тӧро, 53 Кеназ тӧро, Феман тӧро, Мивцар тӧро, 54 Магдиил тӧро, Ирам тӧро. Тани соос идумей калыклэн тӧроосыз-азьветлӥсьёсыз.
23—29-ТӤ ТОЛШОР
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 4—6
Духовной марӟанъёс
(1 Паралипоменон 5:10) Саул эксэй луон вакытэ Рувим выжы Агарьлэн выжыысьтыз потэм калыкен ожмаськыса улӥзы, соосты виылӥзы но соослэн балаганъёсазы, Галаадлэн быдэс шундыӝужанпал люкетаз, улыны кутскизы.
w05 1/10 9 б., 7 абз.
Нырысетӥ Паралипоменон книгаысь тунсыко малпанъёс
5:10, 18—22. Саул эксэй кивалтон вакытэ Иорданлэн шундыӝужанпалаз улӥсь выжыос агарянъёсты пазьгизы, агарянъёс лыдын соослэсь кык поллы тросгес вал ке но. Та выжыос агарянъёсты вормизы, малы ке шуоно ожгарчиоссы быдэсак Иеговалы оскиськизы но солэсь юрттэтсэ куризы. Ойдолэ асьмеос но духовной ожмаськонын быдэсак Иеговалы оскиськомы, малы ке шуоно милям но тушмонъёсмы туж трос (Ефесъёслы 6:10—17).
Библиез лыдӟон
(1 Паралипоменон 6:61—81) Та выжыысь семьяослы, Каафлэн мукет пиосызлы, пус чӧлтыса, Манассия выжылэн ӝыны люкетысьтыз дас городъёс сётэмын. 62 Гирсонлэн пиосызлэн выжыоссылы Иссахар выжылэсь, Асир выжылэсь, Неффалим выжылэсь, Манассия выжылэсь Васанысь городъёссэ — ваньзэ-ӧвӧлзэ дас куинь город сётэмын. 63 Мерарилэн пиосызлэн выжыоссылы дас кык городъёс сётэмын; соос Рувим выжылэсь, Гад выжылэсь, Завулон выжылэсь, пус чӧлтыса, басьтэмын вал. 64 Тазьы Израиль пиос левитъёслы городъёсты но соос котырысь музъемъёсты сётылӥзы. 65 Соос, пус чӧлтыса, Иуда пиослэн выжызылэсь, Симеон пиослэн выжызылэсь, Вениамин пиослэн выжызылэсь вылӥ верам городъёссэс сётӥзы. 66 Нош Кааф пиослэн куд-ог выжыоссылы Ефрем выжыысь городъёс сётэмын вал. 67 Соослы ватӥськон-пегӟон городъёсты сётӥзы: Ефрем гурезьысь Сӥхемез но солэн котырысьтыз музъемез, Гезерез но со котырысь музъемез, 68 Иокмеамез но со котырысь музъемез, Беф-Оронэз но со котырысь музъемез, 69 Аиалонэз но со котырысь музъемез, Гаф-Риммонэз но со котырысь музъемез, 70 Манассия выжылэн ӝыны люкетысьтыз — Анерез но со котырысь музъемез, Билеамез но со котырысь музъемез сётӥзы. Та Каафлэн мукет пиосызлэн выжызылы сётэмын. 71 Гирсонлэн пиосызлы Манассиялэн ӝыны выжыезлэн люкетызлэсь Васанысь Голанэз но со котырысь музъемез, Аштарофез но со котырысь музъемез сётӥзы. 72 Иссахар выжылэсь — Кедесэз но со котырысь музъемез, Даврафез но со котырысь музъемез, 73 Рамофез но со котырысь музъемез, Анемез но со котырысь музъемез; 74 Асир выжылэсь — Машалэз но со котырысь музъемез, Авдонэз но со котырысь музъемез, 75 Хукокез но со котырысь музъемез, Реховез но со котырысь музъемез; 76 Неффалим выжылэсь Галилеяысь Кедесэз но со котырысь музъемез, Хаммонэз но со котырысь музъемез, Кириафаимез но со котырысь музъемез сётӥзы. 77 Нош Мерарилэн мукет пиосызлы Завулон выжылэсь Риммон но со котырысь музъем, Фавор но со котырысь музъем сётэмын. 78 Иорданлэн тупалаз, Иерихонлэн ваче бериназ, Иорданлэн шундыӝужан палаз, Рувим выжылэсь луоё кыр дуннеысь Восорез но со котырысь музъемез сётӥзы, Иаацаез но со котырысь музъемез, 79 Кедемофез но со котырысь музъемез, Мефаафез но со котырысь музъемез сётӥзы; 80 Гад выжылэсь Галаадысь Рамофез но со котырысь музъемез, Маханаимез но со котырысь музъемез, 81 Есевонэз но со котырысь музъемез, Иазерез но со котырысь музъемез сётӥзы.
30-ТӤ ТОЛШОР — 5-ТӤ ТУЛЫСПАЛ
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 7—9
Духовной марӟанъёс
(1 Паралипоменон 9:33) Нош кырӟасьёс, левит выжыысь йыръёс, храмлэн комнатаосаз ужанлэсь мозмытэмын вал, малы ке шуоно соос уй но, нунал но асьсэлэн ужано уженызы вырыны кулэ вал.
w10 15/12 21 б., 6 абз.
Кырӟалэ Иеговалы!
6 Иегова пророкъёс пыр косӥз аслэсьтыз ужась-тыршисьёссэ солы ушъян-данъян кырӟанъёс кырӟаны. Кырӟасьёс мозмытэмын вал левитъёслы сётэм ужъёслэсь, соослэн тырмыт дырзы мед луоз шуыса кырӟанъёс гожтыны но дасяськыны соосты кырӟаны (1 Пар. 9:33).
Библиез лыдӟон
(1 Паралипоменон 7:1—13) Иссахарлэн пиосыз: Фола, Фуа, Иашув но Шимрон, ньыль кузя. 2 Фолалэн пиосыз: Уззий, Рефаия, Иериил, Иахмай, Ивсам, Самуил, Фолалэн выжыысьтыз йыръёс, ас выжыысьтызы кужмоесь ожмаськисьёс; Давид улон нуналъёсы соослэн лыдзы кызь кык сюрс куать сю вал. 3 Уззийлэн пиез: Израхия; Израхиялэн пиосыз: Михаил, Овадия, Иоиль но Ишшия, вить кузя. Ваньзы соос кивалтӥсь йыръёс. 4 Соослэн выжыосазы, ёзъёсазы ожмаськыны куамын куать сюрс ожгарчиоссы дасесь вал; уго соослэн трос кышнооссы, пиоссы вал. 5 Нош соослэн агай-вынъёссы, Иссахарлэн вань выжыосаз, кужмоесь ожмаськисьёс тямыстон сизьым сюрс вал, выжыез гожъян книгае пыртэмъёс. 6 Вениаминлэн пиосыз: Бела, Бехер но Иедиаил, куинь кузя. 7 Белалэн пиосыз: Ецбон, Уззий, Уззиил, Иеримоф но Ири, вить кузя, выжыослэн йыръёссы, кужмоесь ожмаськисьёс. Выжы-кумыез гожъян книгае соос гожтэмын кызь кык сюрс куамын ньыль мурт. 8 Бехерлэн пиосыз: Земира, Иоаш, Елиезер, Елиоенай, Омри, Иремоф, Авия, Анафоф но Алемеф: ваньзы таос Бехерлэн пиосыз луо. 9 Выжы-кумыез гожъян книгаосы выжыослэн йыръёссыя, кужмоесь ожмаськисьёс гожтэмын кызь сюрс кык сю мурт. 10 Иедиаиллэн пиез: Билган, Билганлэн пиосыз: Иеус, Вениамин, Егуд, Хенаана, Зефан, Фарсис но Ахишахар. 11 Иедиаиллэн вань пиосыз асьсэ выжыен кивалтӥсь йыръёс, кужмоесь ожмаськисьёс вал; дас сизьым сюрс кык сю мурт вал солэн ожмаськонэ потӥсьёсыз. 12 Ирлэн пиосыз Шупим но Хупим; Хушим, Ахерлэн пиез; 13 Неффалимлэн пиосыз: Иахцеил, Гуни, Иецер но Шиллем — Валлалэн пиезлэн пиосыз.
6—12-ТӤ ТУЛЫСПАЛ
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 10—12
Духовной марӟанъёс
(1 Паралипоменон 12:8) Гад пиос пӧлысь Давид доры, луоё кырысь юнматэм каре, выжизы кышкасьтэм, ожмаськыны быгатӥсь муртъёс, шибодыен, щитэн ожмаськисьёс; ымныръёссы левлэн ымнырызлы укша, соос гурезьын улӥсь кыркечъёс кадь шаплыесь.
w05 1/10 10 б., 4 абз.
Нырысетӥ Паралипоменон книгаысь тунсыко малпанъёс
12:8 — Кызьы валано, Гад пиос пӧлысь ожмаськисьёслэн «ымныръёссы левлэн ымнырызлы» укшало вал шуыса? Кыр дуннеын та кышкасьтэм ожгарчиос Давидэн ӵош вал. Тушмонъёссэс кышкатон понна, соос кузь йырсиен ветлӥзы. Кузь йырсиенызы соос левъёслы укшало вал.
Библиез лыдӟон
(1 Паралипоменон 11:26—47) Кужмоесь ожгарчиос пӧлын вал: Иоавлэн братэз Асаил, Вифлеемысь Додолэн Елханан пиез; 27 Гарод карысь Шамма; Пелон карысь Херец; 28 Фекоя карысь Иккешлэн Ира пиез; Анафоф карысь Евиезер; 29 Хуша карысь Сӥвхай; Ахохи выжыысь Илай; 30 Нетофаф карысь Магарай; Нетофаф карысь Вааналэн Хелед пиез; 31 Вениамин выжылэн Гива карысьтыз Рибайлэн Иттай пиез; Пирафон карысь Ванея; 32 Нагале-Гаашысь Хурай; Араваысь Авиел; 33 Бахарум карысь Азмавеф; Шаалбон карысь Елияхба, 34 Гизон карысь Гашемлэн пиосыз: Гарар карысь Ионафан, Шагелэн пиез; 35 Гарар карысь Сахарлэн Ахиам пиез; Уралэн Елифал пиез; 36 Махераысь Хефер; Пелон карысь Ахиа; 37 Кармел карысь Хецрой; Езбайлэн Наарай пиез; 38 Нафанлэн братэз Иоиль; Гагрийлэн Мивхар пиез; 39 Аммон карысь Целек; Бероф карысь Нахарай, Саруялэн Иоав пиезлэн ожмаськон тӥрлык нуллӥсез; 40 Ифри карысь Ира; Ифри карысь Гареб; 41 хеттей пи Урия; Ахлайлэн Завад пиез; 42 Шизалэн Адина пиез, Рувим выжыын вордскем мурт, Рувим выжылэн йырыз, солэн куамын ожгарчиез вал; 43 Маахалэн Ханан пиез; Мифон карысь Иосафат; 44 Аштероф карысь Уззия; Шама Иеиел, Ароер карысь Хофамлэн пиосыз; 45 Шимрийлэн Иедиаел пиез, солэн братэз Фиц карысь Иоха; 46 Махавимысь Елиел; Иеравияен Иошавия Елнаамлэн пиосыз; Моавысь Ифма; 47 Елиел, Овед но Мецоваяысь Иасиел.
13—19-ТӤ ТУЛЫСПАЛ
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 13—16
Духовной марӟанъёс
(1 Паралипоменон 16:36) Дано мед луоз Кузё-Инмар, Израильлэн Инмарез, вапумъёсысь вапумъёсы!» Вань калык шуиз: «Аминь! Аллилуия!»
Кызьы Инмарлы вӧсяськоно?
15 Малы вӧсяськем бере «аминь» шуо? «Аминь» кыл «шонер» яке «озьы мед луоз» шуэмез возьматэ. Вӧсяськеммы бере «аминь» шуиськомы ке, озьы ми возьматӥськомы, верам кылъёсмы зэм луо но сюлмысьтымы потэмын шуыса (Псалтирь 40:14). Кинлэн ке шара вӧсяськемез бере «аминь» шуэммы возьматэ, ми вӧсяськись адямилэн кылъёсыныз соглаш луиськомы шуыса. «Аминь» шуыны яра ас поннад но, шара но (1 Паралипоменон 16:36; 1 Коринфъёслы 14:16).
Библиез лыдӟон
(1 Паралипоменон 13:1—14) Давид сюрс ожгарчиосын кивалтӥсьёсын, сю ожгарчиосын кивалтӥсьёсын, вань азьвалтӥсьёсын кенешиз, 2 израиль калыклэн кенешаз вань люкаськемъёслы Давид шуиз: «Тӥледлы ярамон ке, Инмармылэн Кузё-Инмарлэн эрикез та ужлы луиз ке, мукет агай-вынъёсмы доры но, котькытчы, быдэс Израиль музъем вылэ ивор ыстомы, соосын валче священникъёс, левитъёс доры, городъёсы но, гуртъёсы но — ваньзы асьме доры мед люкаськозы. 3 Инмармылэсь ковчегзэ асьме доры ваёмы, малы ке шуоно Саул улон нуналъёсы та сярысь ум сюлмаське». 4 Быдэс кенеш тазьы шуиз: «Озьы мед луоз»,— малы ке шуоно та уж вань калыклы шонерлыко потӥз. 5 Тазьы Давид вань израиль калыкез люказ — Египетысь Шихор дорысен Емафе пырон дорозь, Кириаф-Иаримысь Инмарлэсь ковчегзэ нуон понна. 6 Давид вань израиль калыкен ӵош Иудеяе интыяськем Ваал каре, Кириаф-Иариме, мынӥзы отысь херувимъёс вылын пукись Инмарлэн Кузё-Инмарлэн нимызлы сӥзем ковчегзэ ваён понна. 7 Инмарлэсь ковчегзэ выль уробо вылын Аминадавлэн коркасьтыз нуизы; Озаен Ахио уробоез валтыса нуизы. 8 Давид но, вань израиль калык но Инмар азьын вань кужмысьтызы кырӟаса, цитраосын, псалтирьёсын, тимпанъёсын, кимвалъёсын, пеллян гумыосын шудӥзы. 9 Хидонлэн итым дораз вуэм бере ковчегез кутыса возьыны Оза кизэ мычиз, уго ошъёс сое мыкыртӥзы. 10 Нош Кузё-Инмар Озалы вожзэ поттӥз, ковчег пала кизэ мычемез понна погыртӥз сое; со соку ик Инмар азьын кулӥз. 11 Кузё-Инмар Озаез погыртӥз шуыса, Давид ӝоже усиз. Со интыез „Озалэн погранэз“ шуыса нимазы; туннэ нуналозь но со озьы нимаське. 12 Со нуналэ Давид Инмарлэсь туж кышказ, со шуиз: «Кызьы мон Инмарлэсь ковчегзэ ас дорам пыртом?» 13 Соку Давид ковчегез ас дораз, Давидлэн городаз, ӧз нуы, Геф карысь Аведдар доры нуытӥз. 14 Инмарлэн ковчегез Аведдар дорын, солэн корказ куинь толэзь ӵоже улӥз, Кузё-Инмар Аведдарез, ваньзэ, маиз солэн вань, бакель кариз.
20—26-ТӤ ТУЛЫСПАЛ
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 17—19
Духовной марӟанъёс
(1 Паралипоменон 17:16—18) Давид эксэй лыктӥз но Кузё-Инмарлэн азяз султыса шуиз: «Инмаре Кузё-Инмаре, кин мон сыӵе, мар со мынам выжые, сокем монэ вылэ ӝутӥд? 17 Инмаре, Тынад син азяд со но пичи потӥз на; Аслад ляльчиедлэн выжыезлэсь азьпалзэ но ивортӥд, мон шоры быдӟым мурт шоры кадь учкиськод, Инмаре Кузё-Инмаре! 18 Ляльчидэ вылӥ карон понна Тон азьын Давид мар ватсаны быгатоз на? Тон ляльчидэ тодӥськод!
w20.02 12 б., рамка
Ми туж яратӥськомы Иеговаез, милесьтым Атаймес
Адӟе-а монэ Иегова?
Вал-а тӥляд куке но таӵе юанды: «Музъем вылын трос миллиард адямиос уло, соку малы Иегова мыным саклыксэ висъяны кулэ?» Трос адямиослэн сыӵе ик юанзы кылдылӥз. Давид эксэй гожтӥз: «Кузё-Инмаре! Адями мар со, кудзэ Тон тодӥськод? Яке адями пи, кудӥз сярысь Тон сюлмаськиськод?» (Пс. 143:3). Давид оскиз, Иегова сое умой тодэ шуыса (1 Пар. 17:16—18). Аслаз Кылыз пыр но организациез пыр Иегова оскытэ тӥледыз, сое яратэмдэс адӟе шуыса. Эскере Инмарлэн Кылысьтыз куд-ог малпанъёсты, кудъёсыз юрттозы тӥледлы оскыны, Иеговалы тӥ дуно потӥськоды шуыса:
• Иегова вордӥськемдылэсь азьло ик тӥледыз тодӥз (Пс. 138:16).
• Иегова малпанъёстэс но шӧдонъёстэс тодэ (1 Пар. 28:9).
• Иегова котькуд вӧсяськондэс ачиз кылзэ (Пс. 64:3).
• Иеговаез тӥляд ужъёсты шумпотто яке ӝоже уськыто (Мад. 27:11).
• Иегова тӥледыз ас дораз ачиз ӧтиз (Иоанн 6:44).
• Иегова тӥледыз сокем умой тодэ, тӥ кулӥды ке но, со тӥледыз улӟытыны быгатоз. Со сётоз тӥледлы выль мугор но визь, кудъёсыз луозы сыӵеесь ик, кудъёсыз тӥляд али вань. Тӥляд луозы сыӵеесь ик тодэ ваёнъёсты но быгатонлыкъёсты (Иоанн 11:21—26, 39—44; Ап. уж. 24:15).
Библиез лыдӟон
(1 Паралипоменон 18:1—17) Та бере Давид филистим калыкез вормиз, соосты зӥбломытӥз но филистим калыклэн киулысьтыз Гефез но солы тэрытскись городъёсты киултӥз. 2 Со озьы ик моав калыкез вормиз — моав калык Давидлы ляльчи луиз, солы выт тырыса улӥз. 3 Ефрат шур дуре интыяськем эксэйлыксэ юнматыны мыныкуз, Адраазарез, Сувалэсь эксэйзэ, Давид Емафысен погыртӥз. 4 Давид солэсь сюрс ожмаськон уробооссэ, вал вылын мынӥсь сизьым сюрс ожгарчиоссэ, пыдын ожмаськись кызь сюрс ожгарчиоссэ киултӥз, вань ожмаськон уробоосты Давид сузмытӥз, соос пӧлысь сюзэ гинэ кельтӥз. 5 Дамаскысь сири ожгарчиос Адраазарлы, Сувалэн эксэезлы юрттӥськыны лыктэмзы вал, но Давид кызь кык сюрс сири ожгарчиосты погыртӥз. 6 Дамаск Сирияе Давид возьмаськись ожгарчиоссэ пуктӥз, сири калык Давидлы ляльчи луиз, солы выт тырыса улӥзы. Кузё-Инмар Давидлы котькытысен но юрттӥз, кытчы гинэ со ӧз ветлылы. 7 Адраазарлэн ляльчиосызлэсь зарни щитъёссэс Давид октӥз но Иерусалиме вайиз. 8 Нош Тивхавысь но Кунысь, Адраазарлэн городъёсысьтыз, Давид трос ыргон басьтӥз. Солэсь Соломон ыргон зарезь, ыргон юбоос но ыргон сосудъёс лэсьтӥз. 9 Имафлэн эксэез Фой кылӥз, Давид Адраазарлэсь, Сувалэн эксэезлэсь, вань ожгарчиоссэ погыртӥз шуыса. 10 Соку со аслэсьтыз Иорам пизэ Давид эксэй доры ӟечкыланы, тау карыны ыстӥз Адраазарен ожмаськем но сое погыртэмез понна, уго Фой Адраазарен ожмаськыса улӥз,— со сьӧры зарни, азвесь, ыргон сосудъёс келяз. 11 Соосты Давид эксэй, вань калыкъёслэсь — идумей, моав, аммон, филистим, амалик калыкъёслэсь — басьтэм азвесен, зарниен огазе карыса, Кузё-Инмарлы сӥзиз. 12 Саруялэн Авесса пиез Сылало нёжалэ дас тямыс сюрс идумей пиосты погыртӥз; 13 Идумей музъеме возьмаськыны ожгарчиоссэ пуктӥз, вань идумей калык Давидлы ляльчи луиз. Давид кытчы гинэ ӧз мыны, Кузё-Инмар котькытын но солы юрттӥськиз. 14 Быдэс Израилен Давид кивалтыса улӥз, аслаз вань калыкезлы со шонер суд лэсьтылӥз. 15 Саруялэн Иоав пиез ожгарчиосын кивалтӥз, Ахилудлэн Иосафат пиез эксэйлэсь ужъёссэ гожъясь луиз. 16 Ахитувлэн Садок пиез, Авиафарлэн Авимелех пиез священникъёс луизы, нош Суса — гожъяськись, 17 Иодайлэн Ванея пиез хелефейёслы но фелефейёслы кивалтӥсь йыр луиз, нош Давидлэн пиосыз эксэй бордын нырысь радысь адямиос луизы.
27-ТӤ ТУЛЫСПАЛ — 5-ТӤ ЮЖТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | 1 ПАРАЛИПОМЕНОН 20—22
Духовной марӟанъёс
(1 Паралипоменон 21:15) Инмар Кылчинэз Иерусалимез быдтыны ыстӥз. Со виылыны кутскем бере Кузё-Инмар татысь курадӟонэз адӟыса жаляз, Со виылӥсь Кылчинлы шуиз: «Тырмоз! Табере кидэ улэ лэзь». Кузё-Инмарлэн Кылчинэз со виын иевусей пилэн, Орналэн, итымезлэн вылӥяз сылӥз.
w05 1/10 11 б., 6 абз.
Нырысетӥ Паралипоменон книгаысь тунсыко малпанъёс
21:13—15. Иегова кылчинэз косӥз калыкез виылэмысь дугдыны, малы ке шуоно Инмарлы туж секыт адӟыны калыкезлэсь курадӟемзэ. Зэм но, «Солэн туж бадӟым гажан-жалянэз».
Библиез лыдӟон
(1 Паралипоменон 20:1—8) Ар ортчыса, эксэйёс оже потон вакытэ, Иоав ожгарчиоссэ поттӥз но аммон калыклэсь музъемзэ тарканы кутскиз, лыктыса Равва карез котыртӥз. Нош Давид Иерусалимын улӥз. Иоав Равваез киултэм бераз сое куашкатӥз. 2 Давид соослэн эксэйзылэсь венец изьызэ йырысьтыз басьтӥз; отын талант секта зарниез вал, со бордын дуно изъёсыз вал; сое Давидлэн йыр вылаз понӥзы. Городысь туж трос ваньбур поттӥз. 3 Нош отчы кылем калыкез поттыса, пилаен вандыса, корт дыбечен тышкаса, бадӟым пуртэн кораса виылӥз. Аммон калыклэн вань городъёсызлы Давид тазьы кариз, собере Давид вань калыкен ӵош Иерусалиме берытскиз. 4 Та бере филистим калыкен Газерын ожмаськон кутскиз. Соку Хуша пи Совохай Рефаим выжыысь одӥгзэ, Сафез, вииз. Собере соос чус кариськизы. 5 Собере нош ик филистим калыкен ож берытскиз. Соку Иаирлэн Елханам пиез Геф карысь Голиафлэсь Лахмий братсэ вииз, кинлэн шибодыезлэн ныдыз куиськон станокысь есо зӧкта вал, 6 Гефын эшшо жугиськон потӥз на. Отын одӥг ӝужыт адями вал, солэн кияз но, пыдаз но быдэн куать чиньыез — ваньмыз кызь ньыль чиньы. Со но рефаимъёслэн выжыысьтызы потэмын. 7 Со Израиль сярысь урод кылъёс вераса улӥз, нош Давидлэн Шима пиезлэн Ионафан пиез сое вииз. 8 Таос Гефын рефаимъёслэсь вордскемъёс вал, соос Давидлэн киулаз, солэн медоосызлэн киулазы погразы.