57-ТӤ УРОК
Мар кароно, тӥ бадӟым сьӧлык лэсьтӥды ке?
Ми Иеговаез яратӥськомы но сое ӝоже уськытэммы уг поты. Озьы ке но куддыръя ми янгышъёс лэсьтӥськомы. Янгышъёс пӧртэмесь луо: пичи янгышъёс яке бадӟым сьӧлыкъёс (1 Коринфъёслы 6:9, 10). Тӥ бадӟым сьӧлык лэсьтӥды ке, тодады возе: Иегова тӥледыз яратэмысь ӧз дугды. Со котьку дась тӥледыз простить карыны но юрттыны тӥледлы.
1. Мар кароно, Иегова простить мед кароз шуыса?
Иеговаез яратӥсь адями бадӟым сьӧлык лэсьтӥз шуыса вала ке, берло со туж жаля со сярысь. Сыӵе адямиез буйгатозы кылъёс, кудъёссэ Иегова вераз аслаз калыкезлы: «Сьӧлыкъёсын нап-горд ке но луиды, тӥледыз лымы кадь тӧдьы каро» (Исаия 1:18). Ми сюлмысь ӧпкелиськомы ке, Иегова милемыз простить каре. Мар милесьтым ӧпкелеммес возьматоз? Ми жалямы ке, сьӧлык лэсьтӥмы шуыса, сьӧлыкамысь дугдӥмы ке но туж куримы ке Иеговаез милемыз простить карыны, озьы возьматомы, ӧпкелиськомы шуыса. Ӧпкелем сяна, милемлы кулэ на воштӥськыны. Милемлы воштоно малпанъёсмес но сямъёсмес, кудъёсыз милемыз сьӧлыке вуттӥзы, но лэсьтоно ваньзэ, Иеговалэсь кылзӥськыса улон понна. (Лыдӟе Исаиялэсь 55:6, 7.)
2. Кызьы Иегова тӧроос пыр юрттэ?
Бадӟым сьӧлык лэсьтэм адямиез Иегова косэ кенешысьтыз тӧроос доры мыныны но соослы юрттэт курыса вазиськыны. (Лыдӟе Иаковлэсь 5:14, 15.) Тӧроос туж ярато Иеговаез но солэсь ыжъёссэ. Со пиосмуртъёс юри дышетэмын юрттыны милемлы Иеговаен кусыпъёсмес тупатыны (Галатъёслы 6:1).
Кызьы тӧроос юртто? Кык яке куинь тӧроос сьӧлыкам мурт доры лыкто но Библияя валэкто, малы солэн лэсьтэм ужез сьӧлыкен лыдъяське. Собере соос сьӧлыкам муртлы Библиысь визь-кенешъёс сёто но оскыто сое, солэн воштӥськемез одно ик луоз шуыса. Нош бадӟым сьӧлык лэсьтэм мурт уг ӧпкельы ке, сыӵе адямиез тӧроос кенешлэсь палэнто. Озьы соос кенешысь агайёсты но сузэръёсты утьыны тыршо.
МУРГЕС ЭСКЕРЕ
Ойдолэ тросгес тодомы, кызьы Иегова бадӟым сьӧлык лэсьтэм муртъёслы юрттэ. Соку ми Иеговалэсь юрттэмзэ эшшо но тросгес дунъяломы.
3. Сьӧлыкъёсмы сярысь ватытэк веран бурмыны юрттэ
Котькыӵе сьӧлык Иеговаен кусыпъёсмес сӧре. Соин ик сьӧлыкаммы бере нырысь ик сьӧлыкмес Иеговалы верано. Лыдӟе Псалтирез 31:1—5 но та юанлы валэктон сётэ:
Малы, сьӧлыкмес ватэм интые, умойгес луоз со сярысь Иеговалы вераны?
Сьӧлыкмы сярысь, Иеговалы сяна, тӧроослы но верамы ке, милемлы капчигес луоз. Учке ВИДЕОРОЛИКЕЗ но юанлы валэктон сётэ.
Кызьы тӧроос юрттӥзы агайлы Иегова доры берытскыны?
Тӧроослы сьӧлыкмы сярысь веракумы, милемлы соослы ваньзэ верано, номыре ватоно ӧвӧл. Соос юри пуктэмын милемлы юрттон понна. Лыдӟе Иаковлэсь 5:16 но та юанлы валэктон сётэ:
Малы тӧроослы капчигес луоз милемлы юрттыны, ми соослэсь номыре ӧм ватэ ке?
Усьтэ сьӧлыктэс Иеговалы, вералэ ваньзэ тӧроослы но юрттэт куре
4. Иегова сьӧлыкамъёслы гажам-жалямзэ возьматэ
Бадӟым сьӧлык лэсьтэм муртлэн Иеговалэн куронъёсызъя улэмез уг поты ни ке, сое кенешлэсь палэнто. Сыӵе муртэн агайёс но сузэръёс кусып уг возё ни. Лыдӟе 1 Коринфъёслы 5:6, 11 но та юанлы валэктон сётэ:
Пичи гинэ шӧм быдэс шумес нянез чырсатэ. Кызьы та пример возьматэ, одӥг гинэ ӧпкелисьтэм муртлэн мылкыдыз быдэс кенешлы пыӵаны быгатэ шуыса?
Иегова сьӧлыкамъёслы гажам-жалямзэ возьматэ. Солэсь адӟем карыса, тӧроос юрттыны тыршо соослы, кинъёс кенешлэсь палэнтэмын вал. Кенешлэсь палэнын улон юрттӥз тросэзлы валаны, макем бадӟым сьӧлык соос лэсьтӥзы. Соин соос выльысь кенеше берытскизы (Псалтирь 140:5).
Кызьы Иеговалэн сьӧлыкамъёс шоры учкемез возьматэ, со гажась-жалясь, ваньзэ шонер но яратыса лэсьтэ шуыса?
5. Ми ӧпкелиськомы ке, Иегова простить каре
Иисус мадён вераз, кудӥз возьматэ, мае шӧдэ Иегова, куке адями ӧпкеле. Лыдӟе Лукалэсь 15:1—7 но та юанлы валэктон сётэ:
Мар вера та мадён Иегова сярысь?
Лыдӟе Иезекиильлэсь 33:11 но та юанлы валэктон сётэ:
Кызьы валано, адями зэмзэ ик ӧпкеле-а, уг-а?
Иегова — ӟеч ыж возьмась. Со туж сюлмаське аслаз ыжъёсыз сярысь
КИН КЕ НО ВЕРАНЫ БЫГАТОЗ: «Мон кышкасько, сьӧлыкъёсме тӧроослы верай ке, соос монэ кенешлэсь палэнтозы».
Мар тӥ верасалды тазьы малпась адямилы?
ТОДЭ ВАЁН
Ми бадӟым сьӧлык лэсьтӥмы ке, собере сюлмысь ӧпкелимы но сьӧлыкамысь дугдӥмы ке, Иегова милемыз простить кароз.
Мае тон тодӥд?
Малы умойгес луоз, сьӧлыкмы сярысь Иеговалы верамы ке?
Мар кароно, Иегова простить мед кароз шуыса?
Малы тӧроослы юрттэт курыса вазиськоно, ми бадӟым сьӧлык лэсьтӥмы ке?
ТРОСГЕС ТОДЭ
Учке но тодэ, кызьы одӥг пиосмурт ас вылаз шӧдӥз Иеговалэсь гажась-жалясь луэмзэ, кудӥз сярысь вераське Исаиялэн 1:18.
Кызьы тӧроос юрттыны тыршо бадӟым сьӧлык лэсьтэм муртъёслы?
Тодэ, кызьы кенеш ӧпкелисьтэм муртъёслы яратэмзэ но гажам-жалямзэ возьматэ.
Лыдӟе одӥг пиосмурт сярысь «Мон малпай Иегова доры берытскыны» статьяез но тодэ, мар юрттӥз солы кенеше берытскыны.
«Библия улонэз воштэ» («Возьмаськон башня», 2012-тӥ ар, 1-тӥ оштолэзь)