«Улон но ужан-тыршон» ужан тетрадьлы малпанъёс

© 2023 Watch Tower Bible and Tract Society of Pennsylvania

4—10-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | ЕСФИРЬ 1, 2

Духовной марӟанъёс

(Есфирь 2:5) Сузы шоркарын улӥз Мардохей нимо одӥг иудей воргорон, со вал Вениамин выжыысь Кислэн Семей пиезлэн Иаир пиезлэн пиез.

w22.11 31 б., 3—6 абз.

Тодӥськоды-а тӥ?

Тодосчиос шедьтӥзы горд сюйлэсь лэсьтэм табличкаез, кудаз Мардука нимо пиосмурт сярысь вераськиз. Сузы карын со кузё вал, выт бичась, вылды. Артур Унгнад, шундыӝужанпал шаеръёслэсь историзэс эскерись тодосчи, гожтӥз, со дыре, «Библиын сяна, та табличка вылын гинэ Мардохей сярысь вераськиз» шуыса.

Унгнад тодосчилэн ужез потэм бере тодосчиос валаны быгатӥзы Персиысь кӧня ке сюрс мукет гожтэмъёсты. Соос пӧлын горд сюйлэсь табличкаос, кудъёссэ шедьтӥзы Персеполь карлэн борддоръёсыз вӧзысь ваньбур возён интылэн куашкам бервылъёсысьтыз. Лыдъяло, соос Ксеркс I кивалтон дыръя гожтэмын вал шуыса. Соос элам кылын гожтэмын вал. Отын Есфирь книгаысь куд-ог нимъёс пумиськыло.

Персепольысь куд-ог табличкаос вылын Мардука ним но вань. Та пиосмурт, Ксеркс I кивалтыку, Сузыын эксэйлэн юртаз секретарь луыса ужаз. Одӥг гожтэмын вераське, со берыктӥсь вал шуыса. Та тупа солы, мар вераське Библиын Мардохей сярысь. Со Артаксеркс (Ксеркс I) эксэйлэн юртаз ужаз-тыршиз но кык яке тросгес кылъёсын вераськиз. Мардохей Сузыысь «эксэй капка дорын пуке вал» (Есф. 2:19, 21; 3:3). Та капкаос туж бадӟымесь вал. Отын эксэй юртын ужасьёс ужазы.

Туж паймоно кадь, кӧня огкадез вань Персепольын шедьтэм гожтэмъёсысь Мардукалэн но Библиысь Мардохейлэн. Соос кыксы ик одӥг дыре но одӥг интыын улӥзы но огкадь ужез быдэсъязы. Озьыен, гудыса утчаськонъёс дыръя шедьтэмъёс возьматыны быгато, Мардука но Мардохей — со одӥг адями шуыса.

Библиез лыдӟон

(Есфирь 1:13—22) Эксэйлэн туж йырыз кур луиз, вожпотон пушказ ӝуатскиз. Валляна аръёсты тодӥсь визьнодчиослы эксэй вераз,— уго эксэйлэн ужъёсыз вань законэз но правоез тодӥсьёс азьын лэсьтӥськизы,— ¹⁴ со виын солэн матысь муртъёсыз вал: Каршена, Шефар, Адмафа, Фарсис, Мерес, Марсена, Мемухан — Персияысь, Мидияысь сизьым кивалтӥсьёс, соослы, эксэй азе капчиен пырыны быгатӥсьёслы, та эксэйлыкын нырысетӥ радъёсын пукылӥсьёслы, эксэй вераз: ¹⁵ «Законъя мар кароно эксэйлэн Астинь кышноеныз Артаксеркс эксэйлэсь евнухъёс пыр верам кылзэ санэ понымтэез понна?» ¹⁶ Эксэй азьын, кивалтӥсьёс азьын Мемухан шуиз: «Эксэй азьын гинэ Астинь эксэй кышно янгыш ӧвӧл, со янгыш вань кивалтӥсьёс, вань калыкъёс азьын, Артаксеркс эксэйлэн вань улосвылъёсаз улӥсьёс азьын; ¹⁷ малы ке шуоно эксэй кышнолэн та ужез вань кышномуртъёс доры вуоз, соку соос кузпалъёссэс санэ понэмысь дугдозы но шуозы: „Артаксеркс эксэй ас кышнозэ Астинез ас азяз вуттыны косӥз, нош со ӧз мыны“. ¹⁸ Табере Персияысь, Мидияысь кивалтӥсьёслэн кышнооссы эксэй кышнолэн та ужез сярысь кылозы но эксэйлэн вань кивалтӥсьёсызлы тазьы ик вераны кутскозы; кылзӥськытэк улонъёс, ӝоже усёнъёс трос луозы. ¹⁹ Эксэйлы ярамон ке, со эксэй пуктон-косонзэ мед гожтоз но сое Персия, Мидия кунъёслэн законъёсазы мед пыртозы, азьланяз со пуктон-косон медаз ни воштӥськылы, Астинь Артаксеркс эксэйлэн азяз уз ни пота шуыса, нош солэсь эксэй кышно луон данлыксэ эксэй мукетызлы, солэсь умойгес луисезлы сётоз. ²⁰ Эксэйлэн та пуктон-косонэз потыса, солэн туж бадӟым, быдэс куназ вӧлмем бере вань кышномуртъёс асьсэлэсь картъёссэс,— узыресь-а вал соос, куанересь-а вал соос,— сӥлы карыса улыны кутскозы». ²¹ Та кылъёс эксэйлы но, кивалтӥсьёслы но яразы; Мемуханлэсь верам кылзэ санэ поныса, эксэй та ужзэ лэсьтӥз. ²² Эксэй вань улосвылъёсаз та гожтэтэз келяз, котькудӥзлэн аслаз алфавитэныз, котькуд калыклэн ас кылаз берыктыса гожтэт гожъязы, отын верамын: котькудӥз но воргорон аслаз кышноезлы, семьяезлы кузё мед луоз, та сярысь котькуд адямилы анай кылыныз ялоно.

11—17-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | ЕСФИРЬ 3—5

Духовной марӟанъёс

(Есфирь 4:12—16) Есфирьлэсь кылъёссэ Мардохейлы веразы. ¹³ Мардохей Есфирьлы ответ сётӥз: «Эн малпа, вань иудейёс пӧлысь тон одӥгнад эксэй юртэ быдэс кылёд шуыса. ¹⁴ Та дыре тон чус улӥд ке, соку иудейёслы утиськон, мозмытскон мукет интыысь вуоз, нош тон атаедлэн выжыеныз ӵош кулод-бырод. Кин тодэ, таӵе секыт вакытэ тупаны ик кулэ вал тынад эксэй кышно сӥё-дано ним басьтонэд?» ¹⁵ Мардохейлэн пумитаз Есфирь шуиз: ¹⁶ «Мын, Сузы карысь вань иудейёсты люка, мон понна куинь нунал ӵоже визялэ,— нуназе но, уйин но эн сиське, эн юэ, мон но медо нылъёсыным ӵош визяло, собере эксэй доры мыно, та законлы пумит ке но луэ; нош кулоно луиз ке — куло».

kr 160 б., 14 абз.

Иеговалы йыбыртъяны правомы понна нюръяськиськомы

¹⁴ Есфирь но Мардохей кадь ик, туннэ Инмарлэн калыкез нюръяське Иеговалы ярамон амалэн йыбыртъяны правоез понна (Есф. 4:13—16). Кызьы тӥ быгатоды нюръяськыны йыбыртъяны правомы понна? Вӧсяське вын-агайёсты но сузэр-апайёсты понна, кудъёссэ судъёсын шонертэм янгыше уськытӥзы. Вӧсяськонъёсты туж юртто вын-агайёслы, кудъёсыз уйылон-уллянъёсын пумисько. (Лыдӟе Иаковлэсь 5:16.) Кылэ-а Иегова сыӵе вӧсяськонъёсты? Судъёсын вормонъёсмы возьмато, кылэ шуыса (Евр. 13:18, 19).

Библиез лыдӟон

(Есфирь 3:1—12) Та учыръёс бере Артаксеркс эксэй Вугейысь Амадафлэсь Аман пизэ вылэ ӝутӥз, сӥё-дано кариз, солэсь пуконзэ ас бордысьтыз вань кивалтӥсьёслэсь вылэгес кариз; ² эксэй котырын, эксэй капка дорын бергась эксэйлэн вань ужась-тыршисьёсыз солы йыбыртъязы, Аман азе пыдесъяськыса йыбыртъязы, тазьы карыны эксэй косӥз уго. Нош Мардохей ӧз йыбырттылы, ӧз но пыдесъяськылы. ³ Эксэй дорын ужаса-тыршыса улӥсьёс, эксэй капка дорын бергасьёс, Мардохейлы шуизы: «Малы тон эксэйлэсь косонзэ ортчыса улӥськод?» ⁴ Соос нуналлы быдэ солы вераллязы, нош со соослэсь ӧз кылзӥськы, соку соос Аманлы урттылӥськизы учкон-чаклан вылысь: Мардохей верам кылыз вылын сылыны быгатоз-а, уго со «мон иудей пи» шуыса соослы вераз. ⁵ Аман адӟиз, Мардохей со азе уг пыдесъяськы, уг йыбыртты шуыса, соку Аман туж йыркуръяськыны кутскиз. ⁶ Мардохей кыӵе калык пӧлысь потэмын шуыса верамзы бере Аманлы Мардохеез одӥгназзэ быдтыны тырмыт ӧз поты; со малпаз Артаксеркслэн быдэс кунысьтыз вань иудейёсты, Мардохейлэсь калыксэ, быдтыны. ⁷ Нырысетӥ толэзе, Нисан толэзе, Артаксеркс эксэй пуконын дас кыкетӥ арзэ пукыку, Аман азьын нуналлы быдэ, толэзьлы быдэ пур — жеребе — куштылӥзы. Пус-жеребе дас кыкетӥ, Адар, толэзь вылэ усиз. ⁸ Аман Артаксеркс эксэйлы шуиз: «Тынад эксэйлыкедлэн вань улосвылъёсаз калыкъёс пушкы пазьгиськыса, сураськыса улӥсь одӥг калык вань; соослэн законъёссы вань калыкъёслэн законъёссылэсь висъясько, эксэйлэсь законъёссэ соос уг быдэсъяло; соосты эксэй озьы гинэ медаз кельты. ⁹ Эксэйлы ярамон ке, соосты быдтон сярысь косон гожтэмын мед луоз, эксэй казнае понон понна мон эксэйлэн коньдон ужъёсыныз кивалтӥсьёслэн киязы дас сюрс азвесь талант мертаса сёто». ¹⁰ Соку эксэй киысьтыз печать нюртон зундэссэ басьтӥз но сое Вугей выжыысь Амадафлэн Аман пиез кие сётӥз иудейёслы пумит пуктон-косонэз юнматон понна. ¹¹ Соку эксэй Аманлы шуиз: «Та азвесез но, калыкез но тон кие сётӥсько; соин мар каремед потэ, кар». ¹² Нырысетӥ толэзьлэн дас куинетӥ нуналаз эксэйлэн подъясьёсыз ӧтемын вал, соку Аманлэн косэмезъя, эксэйлэн кузёйыръёсызлы, котькуд улосвылэн кивалтӥсьёслы, котькуд калыклэн йырызлы,— котькуд улосвылэ, котькуд калыклы солэн кылаз берыктыса, солэн алфавитэныз гожтыса, гожтэт келямын вал: ваньмыз Артаксеркс эксэйлэн нимыныз гожтэмын, со эксэйлэн зундэсэныз нюртыса юнматэмын вал.

18—24-ТӤ КУАРУСЁН

ИНМАРЛЭН КЫЛЫСЬТЫЗ УЗЫРЛЫК | ЕСФИРЬ 6—8

Духовной марӟанъёс

(Есфирь 8:17) Вань улосвылъёсын, вань городъёсын, вань интыосын, кытчы гинэ эксэйлэсь косонзэ, пуктон-косонзэ ӧз вуттэ, котькытын но иудейёс шумпотыса, шулдыръяськыса праздник каризы, юондыр лэсьтылӥзы. Та кунысь калыкъёс пӧлысь тросэз иудей кариськизы, уго со виын иудейёслэсь кышкан кылдыны кутскиз.

w06 1/3 11 б., 3 абз.

Есфирь книгаысь тунсыко малпанъёс

8:17 — Кызьы валано, «та кунысь калыкъёс пӧлысь тросэз иудей кариськизы» шуыса? Тросэз персъёс валазы, эксэйлэн косонэз Инмарлэсь иудейёсты бакель каремзэ возьматэ шуыса. Соин ик соос иудей осконэ выжизы, луоз. Та выллем малпан Захариялэн книгаяз пумиське. Отын верамын: «Вань кылъёсын вераськись калыкъёс пӧлысь дас мурт басьтӥськоз, иудей пилэн дӥсянэзлэн сӧзы бордаз кутӥськозы но шуозы: „Ми тон сьӧры мыномы, уго кылӥмы, Инмар тӥ пӧлын улэ шуыса“» (Захария 8:23).

Библиез лыдӟон

(Есфирь 8:9—17) Соку, куинетӥ толэзе — Сӥван толэзе — кызь куинетӥ нуналаз, эксэйлэсь подъясьёссэ ӧтьыса вайизы; иудейёслы, кузёйыръёслы, улосвылъёсын кивалтӥсьёслы — Индиысен кутскыса Эфиопияозь — сю кызь сизьым улосвылэ, котькудаз улосвылэ аслаз алфавитэныз, котькуд калыклэн ас кылаз берыктыса гожтэт гожъязы. Иудейёслы но асьсэ пусъёсын, асьсэ кылын гожтэмын вал озьы, кызьы косӥз Мардохей. ¹⁰ Гожтэтсэ со Артаксеркс эксэйлэн нимыныз гожтӥз, эксэй зундэсэн нюртыса юнматӥз, валъёс вылэ, верблюдъёс, эксэй мулъёс вылэ пуктылыса, гожтэт нуисьёсты келязы, ¹¹ гожтӥз: «Вань городъёсын улӥсь еврейёсты огазе люкаськыны но асьсэлэсь улонзэс утьыны эксэй луонлык сётэ; кин соосын тушмонъяськыса улэ, со калыклэсь вань улосвылъёсысь кужмо адямиоссэ, кышнооссэс нылпиосынызы ӵош виылыны, юртъеръёссэс турканы-тарканы луонлык сётэ, ¹² одӥг нунал куспын Артаксеркс эксэйлэн вань улосвылъёсаз, дас кыкетӥ — Адар — толэзьлэн дас куинетӥ нуналаз». ¹³ Та пуктон-косонлэсь копиязэ, законэз кадь, котькудаз улосвылэ сётоно, вань калыкъёслы ялоно, со нуналлы иудейёс тушмонъёссылы пунэмзэ берыктыны дась мед луозы. ¹⁴ Шаплы ворттӥсь эксэй валъёсын гожтэт нуисьёс дыртыса, ворттыса мынӥзы, эксэйлэсь косонзэ нуизы. Сузыын, шоркарын, ялэмын вал та пуктон-косон. ¹⁵ Мардохей эксэй дорысь чагыр, тӧдьы эксэй дӥськут дӥсяса, бадӟым зарни венец изьы изьыяса, виссонлэсь, нап-горд басмалэсь мантия дӥсяса потӥз. Соку Сузы кар шумпотӥз, шулдыръяськиз. ¹⁶ Иудейёслэн со виын югыт-чылкыт, шумпотыса, шулдыръяськыса, сӥ-дан пӧлын улон дырзы вал. ¹⁷ Вань улосвылъёсын, вань городъёсын, вань интыосын, кытчы гинэ эксэйлэсь косонзэ, пуктон-косонзэ ӧз вуттэ, котькытын но иудейёс шумпотыса, шулдыръяськыса праздник каризы, юондыр лэсьтылӥзы. Та кунысь калыкъёс пӧлысь тросэз иудей кариськизы, уго со виын иудейёслэсь кышкан кылдыны кутскиз.

25-ТӤ КУАРУСЁН — 1-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ЕСФИРЬ 9, 10

Духовной марӟанъёс

(Есфирь 9:15, 16) Сузы карын улӥсь иудейёс огазе люкаськизы Адар толэзьлэн дас ньылетӥ нуналаз но, Сузыын соос куинь сю муртэ виизы, нош турканы-тарканы кизэс ӧз ӝутэ. ¹⁶ Эксэйлэн мукет улосвылъёсаз но улӥсь иудейёс огазе люкаськылӥзы асьсэлэсь улонзэс утён понна, тушмонъёссылэсь кышкатэк улыны мед быгатозы шуыса, тушмонъёссы пӧлысь сизьымдон вить сюрс муртэз виизы, нош турканы-тарканы кизэс ӧз ӝутэ.

w06 1/3 11 б., 4 абз.

Есфирь книгаысь тунсыко малпанъёс

9:10, 15, 16 — Малы еврейёс тушмонъёссылэсь ваньбурзэс ӧз таркалэ, эксэйлэн косонэз сое лэзиз ке но? Со возьматӥз, соослэн ваньбур люканы ужпумзы ӧй вал шуыса, соослэн улонзэс гинэ утемзы потэ вал.

Библиез лыдӟон

(Есфирь 9:1—14) Дас кыкетӥ — Адар — толэзьлэн дас куинетӥ нуналаз эксэйлэн косонэзлэн, пуктон-косонэзлэн быдэсмон дырыз вуиз. Со нуналэ иудейёслэн тушмонъёссы малпало вал соосты киулазы кутыса возьыны, нош пӧрмиз чылкак мукет сямен — асьсэос, иудейёс, тушмонъёсынызы кивалтыса улыны кутскизы. ² Артаксеркс эксэйлэн вань улосвылъёсысьтыз иудейёс городъёсазы люкаськизы соослы урод уж лэсьтыны малпасьёсты быдтыны; соослэн азязы сылыны нокин но ӧз быгаты, уго вань калыкъёс соослэсь кышканы-куалекъяны кутскизы. ³ Улосвылъёсысь вань покчи эксэйёс, кузёйыръёс, улосвылъёсын кивалтӥсьёс, эксэй ужъёсты быдэсъясьёс иудейёслы дурбасьтӥзы, Мардохейлэсь соос куалекъяны кутскизы уго. ⁴ Эксэй юртын Мардохей туж бадӟым адями луиз, солэн данлыкез вань улосвылъёсы вӧлмиз, та адями, Мардохей, вылэ но вылэ ӝутскиз. ⁵ Иудейёс вань тушмонъёссэс тышказы, мечен коразы, виылӥзы, быдтылӥзы, асьсэ тодэмен, мар каремзы потӥз, тушмонъёссылы озьы каризы. ⁶ Сузы шоркарын иудейёс вить сю муртэ виизы-быдтӥзы; ⁷ Паршандафаез но, Далфонэз но, Асфафаез но, ⁸ Порафаез но, Адальяез но, Аридафаез но, ⁹ Пармашфаез но, Арисаез но, Аридаез но, Ваиезафаез, ¹⁰ иудейёслэсь тушмонзылэсь, Амадафлэн Аман пиезлэсь дас пиоссэ виизы, нош турканы-тарканы кизэс ӧз ӝутэ. ¹¹ Со нуналэ ик эксэйлы ивор вуттӥзы, кӧня адями виемын вал Сузы шоркарын. ¹² Эксэй Есфирьлы, эксэй кышнолы, шуиз: «Сузы шоркарын иудейёс вить сю адямиез, Аманлэсь дас пиоссэ виизы; нош эксэйлэн мукет улосвылъёсаз мар соос лэсьтӥзы? Кыӵе мылкыд каронэд вань на? — со быдэстэмын луоз. Кыӵе куронэд вань на тынад? Со быдэстэмын луоз». ¹³ Соку Есфирь шуиз: «Эксэйлы ярамон ке, Сузы карысь иудейёслы эрик мед сётысалзы туннэ кадь ик, ӵуказе но сыӵе ик уж лэсьтыны, Аманлэсь дас пиоссэ писпуэ мед ошысалзы». ¹⁴ Эксэй тае быдэстыны косӥз; та ужез быдэстыны Сузы карын пуктон-косон сётэмын вал, Аманлэсь дас пиоссэ ошизы.

2—8-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОВ 1—3

Духовной марӟанъёс

(Иов 1:10) Тон сое котыр ласянь ӧд кенера-а, солэсь корказэ но ваньзэ, маиз солэн вань, ӧд кенера-а? Солэн киыныз лэсьтэм ужъёсты Тон бакель карид но, солэн пудо уллёосыз быдэс музъем вылэ вӧлдӥсько;

w21.04 11 б., 9 абз.

Малы дышето милемыз Иисуслэн берпуметӥ кылъёсыз?

⁹ Мар вераз Иисус? Самой кулон азяз ик Иисус кеськиз: «Инмаре! Инмаре! Малы Тон Монэ кельтӥд?» (Матф. 27:46). Библия уг валэкты, малы Иисус та кылъёсты вераз, но ойдолэ малпаськомы куд-ог мугъёс сярысь. Нырысетӥез, та кылъёсты вераса, Иисус быдэстӥз азьпалзэ ивортонэз, кудӥз гожтэмын Псалтирьын 21:2. Кыкетӥез, та кылъёс возьматӥзы, Иегова аслэсьтыз Пизэ кышкытлыклэсь ӧз утьы шуыса (Иов 1:10). Иисус валаз, малы Иегова сое тушмонъёсыз кие сётӥз: Иисус Инмарлы оскымон кыльыны кулэ вал туж бадӟым шуг-секытъёсын но, сыӵе шуг-секытъёсын, кудъёсыныз одӥг адями но ӧз пумиськылы. Куинетӥез, та кылъёс возьматӥзы, Иисус ӧз лэсьты нокыӵе ужез, кудӥз понна солы кулоно вал.

Библиез лыдӟон

(Иов 3:1—26) Та бере Иов ымзэ усьтӥз но аслэсьтыз вордӥськем нуналзэ каргаз. ² Иов вераны кутскиз, со шуиз: ³ «Мынам вордскем нуналы мед быроз, уй но, кудаз шуэмын: „Адями луыны кидыс шедиз!“ ⁴ Со нунал пеймытлы мед пӧрмытскоз; вылысен Инмар сое медаз утча, со йылын югыт медаз пишты! ⁵ Сое пеймытлык, кулон вужер мед шобыртоз, пилем сое мед котыртоз, ӵушкась пӧсьлэсь кадь солэсь мед кышкалозы! ⁶ Со уез пеймыт мед вормоз, арлэн нуналъёсыз пӧлын со медаз лыдъяськы, толэзьёслэн лыдзы пӧлы медаз пыры! ⁷ Э! Со уй — калыктэм мед луоз, со пушкы шулдыръяськон медаз пыры! ⁸ Левиафан кыез сайкатыны быгатӥсьёс, нуналэз каргасьёс сое мед каргалозы! ⁹ Югдонэзлэн кизилиосыз мед кысозы: мед возьмалоз югытэз, но со уг лыкты, со медаз но адӟы ӵук ӟардонлэсь синлысъёссэ, ¹⁰ мынам анаелэсь пушкысьтыз ӧсъёссэ ворсамтэ понназ, мынам син азьысьтым куректон-кайгуэз ватымтэ понназ! ¹¹ Пушкысь потыкум, малы мон ӧй кулы, пушкысь потэм берам но малы ӧй кулы? ¹² Пыдесъёс малы монэ кабыл басьтӥзы? Малы ноныосты мыным нононо вал? ¹³ Табере мон кылльысал, кулон уммен кӧлысал, изьысал, мыным каньыл луысал. ¹⁴ Асьсэлы кыр дуннее юртъёссэс пуктылӥсь эксэйёсын но, музъем вылысь визь-кенеш сётъясьёсын но ¹⁵ яке зарнизы ванё, асьсэлэсь коркаоссэс азвесен тырмытъясь кивалтӥсьёсын но, ¹⁶ яке усем-куштӥськем, ватэм нуны кадь, югытэз адӟымтэ вож нуныос кадь мон ӧй улысал. ¹⁷ Отын законлы пумит улӥсьёс кышкатъямысь дугдо, кужымзы-кынарзы быремъёс отын шутэтско. ¹⁸ Отын жильыетын пукисьёс майбыр, эзыласа уло, чакласькисьлэсь кесяськем куаразэ но уг кыло. ¹⁹ Пичи но, бадӟым но отын огкадесь, ляльчи но аслаз кузёезлэсь эрике потэмын. ²⁰ Курадӟисьлы малы югыт сётэмын, лулынызы ӝоже усемъёслы — улон, ²¹ соос кулонэз витё, но со ӧвӧл, узырлыко ватэгез сярысь, эсьмаса, кулонэз соос утчасалзы, ²² паймытозязы шумпотысалзы, шайпул шедьтӥм шуыса, туж паймысалзы. ²³ Малы югыт сётэмын сюресэз ворсаськем адямилы, кудзэ Инмар пеймытэн котыртӥз? ²⁴ Няньме куртчылыса лулӟылӥсько, вулэн кисьтӥськемез кадь ялан ӝуштыса улӥсько, ²⁵ уго туж шимес маке, кудӥзлэсь шимаса-кышкаса мон улӥ, со ик мон вылэ вуиз; марлэсь курдаса улӥ, со ик мон доры вуиз. ²⁶ Ӧвӧл мыным тупаса улон, ӧвӧл каньылэн улон, ӧвӧл шумпотон: куректон-кайгу мон доры вуиз».

9—15-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОВ 4, 5

Духовной марӟанъёс

(Иов 4:4) кылыныд усисез ӝутылӥд, куасалляськись пыдесъёсты юнматылӥд.

w03 15/5 22 б., 5, 6 абз.

Юнэсь луэ но пырак улон басьтон понна нюръяське

Ми туж дунъяськомы милесьтым яратӥсь вынлыкмес (1 Пётр 2:17, ВД). Милемыз туж юнматэ, ми Иеговалэн организацияз пыриськомы шуыса. Ми но вын-агайёсмес но сузэр-апайёсмес юнматыны быгатӥськомы.

Малпаське Иов сярысь. Елифаз но, кудӥз Иовез юнме шорысь пыкылӥз, со сярысь вераз: «Кылыныд усисез ӝутылӥд, куасалляськись пыдесъёсты юнматылӥд» (Иов 4:4). Кызьы ми Иовлэсь адӟем карыны быгатӥськомы? Котькудмы вын-агайёсмылы но сузэр-апайёсмылы юрттыны быгатӥськомы Инмарлы оскымон кыльыны. Ойдолэ уломы Исаиялэн кылъёсызъя: «Лябӟем киостэс кужмоятэ, куалекъясь пыдесъёстэс юнматэ» (Исаия 35:3). Кылсярысь, быгатоды-а тӥ асьтэлы ужпум пуктыны котькуд пумиськонын одӥгзэ-кыксэ агаез яке сузэрез юнматыны но буйгатыны? (Еврейёслы 10:24, 25). Ми соосты Иеговалы ужамзы-тыршемзы понна сюлмысь ушъямы ке, со соослы юрттоз юнэсь луыны но пырак улонэз басьтыны.

Библиез лыдӟон

(Иов 5:1—27) «Ӧтьыса вазиськы, тыныд ответ сётӥсь вань ке. Святойёс пӧлысь кудзылы тон вазиськод? ² Озьы, шузиез йыркуръяськон вие, валасьтэмез керӟегъяськон быдтэ. ³ Адӟи мон шузилэсь выжы лэземзэ но соку ик солэсь выжызэ каргай. ⁴ Солэн нылпиосыз шудбуро улонэз уз адӟе, соосты капка азьын жугозы, дурбасьтӥсьсы но уз луы. ⁵ Солэсь арано юзэ сютэм мурт сиёз, бышкись турын пӧлысь сое басьтоз, ньылонзы пашмем муртъёс солэсь ваньбурзэ ньылозы. ⁶ Озьы, сюй-тузон пӧлысь кайгу уг поты, музъемысь шугадӟон уг буды; ⁷ нош адями ёрмыса-курадӟыса улонлы вордӥське, тылгизьы кадь вылӥе ӝутӥськон понна со вордӥське. ⁸ Нош мон Инмарлы вазиськысал, аслэсьтым ужме Инмар кие сётысал. ⁹ Инмар бадӟымесь, эскерыны луонтэмесь, лыдъянтэм трос паймымон ужъёс лэсьтэ, ¹⁰ музъемлэн бам вылаз зор сётэ, бусыос вылэ вуос лэзе; ¹¹ ултӥямъёсты вылӥе пуктылэ, куректӥсьёс-бӧрдӥсьёс утиськон понна вылӥе ӝутӥсько. ¹² Кескичъёслэсь урод малпанъёссэс Со куашкатэ но, соослэн киоссы кутскем ужзэс йылпумъяны уг ни быгато. ¹³ Визьлыко муртъёсты асьсэлэн кескичлыкенызы ик Со кутэ но, кескичъёслэн кенешсы юнме луэ: ¹⁴ нуназе соос пеймытэз пумитало, нуназе шорын, уйин кадь, кырмиськыса ветло. ¹⁵ Со куанерез мечлэсь уте, соослэн ымзылэсь, кужмолэн киызлэсь уте. ¹⁶ Но шудтэм муртлы оскиськон вань, ӧрекчаськон аслэсьтыз ымзэ пытса. ¹⁷ Шудо адями, кудзэ Инмар визьма, соин ик Дунне Кутӥсьлэсь вӧсь каронзэ кулэтэм эн кары, ¹⁸ уго Со яраё каре но Ачиз ик соосты бине; Со вӧсь каре но, Солэн ик киосыз эмъяло. ¹⁹ Куать шугадӟонысь-ёрмонысь тонэ уте, сизьыметӥяз но уродлык тон борды уз кутскы. ²⁰ Сютэм арын тонэ кулонлэсь мозмытоз, ожын — мечлэсь утёз. ²¹ Кыллэн сюлоезлэсь астэ ватод, лыктӥсь уродъёслэсь уд кышка — соос матэ вуизы ке. ²² Куашканэз-таркаськонэз, сютэм кылёнэз серем карод, музъем выл пӧйшуръёслэсь но уд кышка, ²³ уго бусыысь изъёсын тон кусып возиськод, бусыысь пӧйшуръёс но тонэн тупаса уло. ²⁴ Тынад тылысэд кышкантэм интыын сылэ шуыса тодод, аслэсьтыд коркадэ чакласа улод но уд сьӧлыка. ²⁵ Адӟод, тынад кидысэд туж трос шуыса, выжыосыд но музъем вылысь турын кадь. ²⁶ Ас дыраз чабей культоослэн пуктӥськемзы кадь, пересьмыса шайгуэ пырод. ²⁷ Тани, мае ми тодыны быгатӥмы; озьы ик со вань но; тае кылзы но аслыд синйылты».

16—22-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОВ 6, 7

Духовной марӟанъёс

(Иов 6:29) Выльысен учке: вань-а ӧрекчаськонэз? Учке-эскере: мон палан зэмлык.

w20.04 16 б., 10 абз.

Учке вын-агайёс но сузэр-апайёс шоры, Иегова кадь

¹⁰ Ми Иеговалэсь адӟем кариськомы, адямиосты валаны тыршыса. Со понна вын-агайёсын но сузэр-апайёсын умойгес тодматске. Вераське соосын кенешлэн пумиськонъёсыз кутскемлэсь азьло но йылпумъяськемзы бере, соосын ӵош тодытэ но быгатэмдыя соосты куное ӧтьылэ. Соку тӥ ваньзэ мукет сямен адӟоды. Кылсярысь, сузэр, кудӥныз, ми малпамъя, эшъяськыны секыт, зэмзэ вераса, возьдаськись; агай, кудӥзлэн коньдонэз трос, солы гинэ саклыксэ уг висъя, нош шырыт сямо луыны тырше; нылпиосын анай, кудӥз ӵем дыръя пумиськонъёсы дырыз дыръя уг вуы, семьяяз шуг-секытъёсын пумиськылэ (Матф. 7:1). Зэм но, ми адямиослэн ужъёсынызы укыр трос тунсыкъяськыны кулэ ӧвӧл (1 Тим. 5:13). Озьы ке но умой луысал тросгес тодыны вын-агайёсмы но сузэр-апайёсмы сярысь но соослэн улонзы сярысь.

Библиез лыдӟон

(Иов 6:1—21) Иов ответ сётыса шуиз: ² «Э, мынам зар бӧрдэмъёсы шонер мертамын луысалзы ке, соосын валче курадӟонэ вес вылэ понэмын луысал ке! ³ Со зарезьысь луолэсь, зэм ик, секытгес луысал! Соин ик мынам кылъёсы сюлме веськасьтэмесь. ⁴ Уго Дунне Кутӥсьлэн ньӧлъёсыз мон пушкы пыремын; соослэн ядзы лулпушме сюпсе; Инмарлэн сётэм шимес ужъёсыз мон вылэ урдскизы. ⁵ Турыно возь вылын кыр ишак вузэ-а, суралтэм дураз ош бурсэ-а? ⁶ Шӧгез сылалтэк сиё-а, курегпузлэн тӧдьыяз шӧмыз вань-а? ⁷ Мар борды мынам лулылэн йӧтӥськемез уг поты вал, со луиз мынам юрӟым сиёнэ. ⁸ Э, куке мынам мылкыд каронэ быдэсмысал ке, оскиськонме но Инмар санэ понысал ке! ⁹ Э, монэ пыргытыны Инмар ӟеч эриксэ сётысал ке, Аслэсьтыз кизэ вӧлъяса, монэ погыртысал ке! ¹⁰ Та мыным эшшо шумпотон луысал, аслам жалясьтэм висёнам мон юнматскысал, уго мон Святойлэн веранъёсызлэсь ӧй куштӥськы. ¹¹ Оскиськыса улон понна кытын на мынам кужыме? Улонэлэн йылыз-пумыз таӵе бере, малы сое кузёмытоно на? ¹² Изъёслэн юнлыксы кадь-а мынам юнлыке? Ыргон-а мынам лулмугоры? ¹³ Мон бордын вань-а мыным юрттэт, вань-а мыным кыӵе ке юрттэт-пыкиськон? ¹⁴ Курадӟисез-куректӥсез ас эшез жаляны кулэ — Дунне Кутӥсьлэсь кышканзэ со ӧз ке ышты. ¹⁵ Но мынам агай-вынъёсы оскыны луонтэмесь, визыл кошкись ву кадесь, ӝог бызись шур вуос кадесь, ¹⁶ йӧос шунаку пожаськем ву кадесь, лымы шунаку бугыръяськыса бызись ву кадесь. ¹⁷ Пӧсь куазь вуэ ке, шуръёс пичиёмо, нош ӟырдыт пӧсь ке луэ, ышо-быро. ¹⁸ Ас ӧрзэс вошто, луоё кыре пыро но ышо-быро; ¹⁹ Фемае мынӥсь караванъёс соос шоры учко, Савее мынӥсь сюресчиос соос вылэ оскисько, ²⁰ нош оскиськонзы юнме луэ, отчы вуо но ӝоже усьыса ӵыжекто. ²¹ Озьы ик тӥ но табере нокин-номыр кадесь ӧвӧл ини: кышкытэз адӟыса курдатскиды.

23—29-ТӤ КОНЬЫВУОН

ИНМАРЛЭН КЫЛЫСЬТЫЗ УЗЫРЛЫК | ИОВ 8—10

Духовной марӟанъёс

(Иов 9:32) Уго Со адями ӧвӧл, мон кадь,— Солы ответ сётыны но Соин ӵош судэ мыныны мед быгатом шуыса!

w10 15/10 6 б., 19, 20 абз.

«Кузё-Инмарлэсь визьзэ валаны-тодыны кин быгатэ?»

¹⁹ Мае ми тодӥмы Иеговалэн визез сярысь? Иеговалэсь визьзэ валан понна, милемлы Инмарлэсь Кылзэ эскерыны кулэ. Тодамы возёно, Иеговалэн малпанъёсыз милям малпанъёсмылэсь трослы вылӥынгес шуыса. Соин ик ми сое судъяны ум быгатӥське. Иов вераз: «[Инмар] адями ӧвӧл, мон кадь,— Солы ответ сётыны но Соин ӵош судэ мыныны мед быгатом шуыса» (Иов 9:32). Куке ми Иеговалэсь визьзэ валаны кутскиськомы, Иов сямен вераны быгатӥськомы: «Тани, та Солэн ужъёсызлэн пичи гинэ люкетъёсыз; но макем ӧжыт ми Со сярысь кылӥмы! Нош Солэн быдӟымлыкезлэсь гудыризэ кин валаны быгатоз?» (Иов 26:14).

²⁰ Мар кароно, куке, Библиез лыдӟыкумы, валантэм интыез шедьтӥськомы? Та юанэз мургес эскерыса, ми валэктон ӧм ке шедьтэ, луоз вераны, озьы милям Иеговалы осконмы эскериське шуыса. Озьы ик ми возьматыны быгатомы, макем умой ми Инмарлэсь сямъёссэ тодӥськомы но валаськомы, солэн сямъёсыз вань ужъёсысьтыз адӟисько шуыса. Ойдолэ тодамы возёмы: ми Иеговалэсь ужъёссэ пумозяз валаны ум быгатӥське (Еккл. 11:5). Соку ми апостол Павел сямен вераломы: «Э, Инмарлэн тодонэзлэн, визьлыкезлэн пыдэстэм узырлыкез! Валаны луонтэмесь Солэн судъёсыз, эскерыны луонтэмесь Солэн сюресъёсыз! Кузё-Инмарлэсь визьзэ тодыны кин быгатӥз ни? Яке кин Солэн визь-кенеш сётъясез вал? Яке кин Солы, пунэмез берыктэмын мед луоз шуыса, азьвыл ик мар ке но сётӥз? Уго ваньмыз Со бордысь, Со пыр, Со понна. Солы пумтэм вапумъёсы дан! Аминь» (Рим. 11:33—36).

Библиез лыдӟон

(Иов 9:20—35) Асме шонере поттыны кутски ке, мынам аслам кылы-ымы ик монэ янгыше уськытоз; мон янгыштэм-шектэм ке но, Со монэ янгышо-шеко шуыса ялоз. ²¹ Янгыштэм-шектэм мон; мар луоз лулылы — тодэме уг поты, аслэсьтым улонме синазькыль карисько. ²² Ваньмыз огкадь; соин ик мон верай уго, янгыштэм-шектэмез но, янгышо муртэз но Со быдтэ шуыса. ²³ Тазэ Со сюлоен син куспын погыртэ ке, нош янгыштэм-шектэмъёслэсь курадӟонзэс серекъя. ²⁴ Сьӧлыклэсь кышкасьтэмъёс кие музъем сётэмын; солэн судьяосызлэсь ымнырзэ Со ӵокса. Со ке ӧвӧл, нош кин бен? ²⁵ Мынам улоно нуналъёсы ивор нуллыса ворттылӥсьлэсь ӝоггес ортчо, ӟечлыкез уг адӟо, ²⁶ капчи пыжъёс кадь чальтчо, сиён доры лобись ӧрӟи кадь дырто. ²⁷ Шуоно ке мыным: „Аслэсьтым ӝожъяськонме мон вунэто, мӧзмыт тусбуйме вошто, сэзь-сэзь карисько“, ²⁸ вань курадӟонъёсыным сэрен куалекъясько, тодӥсько уго, Тон монэ янгыштэм-шектэм шуыса уд ялы. ²⁹ Мон янгышо ке, соку нош малы юнме курадӟисько? ³⁰ Лымы вуэн мон мисьтӥськысал ке но, киосме дун-чылкыт карысал ке но, ³¹ нош Тон соку но монэ дэрие куштод, соку мынам дӥськутэ мынэсьтым юрдоз. ³² Уго Со адями ӧвӧл, мон кадь,— Солы ответ сётыны но Соин ӵош судэ мыныны мед быгатом шуыса! ³³ Кыкнамы вылэ но кизэ мед понысал — асьмелэн куспамы сыӵе сылӥсьмы ӧвӧл. ³⁴ Аслэсьтыз корт бодызэ мон бордысь Со мед палэнтысал, Солэн кышкатонэз монэ медаз дэймыты вал, ³⁵ соку мон верало но Солэсь уг кышка, уго мон ас поннам ачим сыӵе ӧвӧл».

30-ТӤ КОНЬЫВУОН — 5-ТӤ ШУРКЫНМОН

ИНМАРЛЭН КЫЛЫСЬТЫЗ УЗЫРЛЫК | ИОВ 11, 12

Духовной марӟанъёс

(Иов 12:11) Пель-а кылъёсты уг кылы, кыл-а сиёнлэсь шӧмзэ уг шӧды?

w08 1/8 11 б., 6 абз.

Кызьы вераськоно быдэ вуымтэ пиналъёсын

▪ «Валасько-а мон, мар верамез потэ нылпиелэн?» Библиын верамын: «Пель-а кылъёсты уг кылы [«уг вала», ВД], кыл-а сиёнлэсь шӧмзэ уг шӧды?» (Иов 12:11). Туж кулэ валаны, мар верамез потэ пидылэн яке нылдылэн. Кылсярысь, пиды вера: «Тон котьку но монэн пичи муртэн кадь вераськиськод!» яке «Тон ноку но монэ уд кылзӥськы!» Трос саклыктэс эн висъялэ «котьку но» но «ноку но» кылъёслы. Пидылэн чылкак мукетсэ верамез потэ, дыр. Кылсярысь, «Тон котьку но монэн пичи муртэн кадь вераськиськод!» кылъёс возьматыны быгато «Мыным потэ, тон мыным уд оскиськы шуыса», нош «Тон ноку но монэ уд кылзӥськы!» кылъёс возьматыны быгато «Тон ӧд вала, мар мынам вераме потэ вал». Тырше валаны, мар зэмзэ ик верамез потэ нылпидылэн.

Библиез лыдӟон

(Иов 12:1—25) Иов ответ сётыса шуиз: ² «Зэм ик, тӥ гинэ калык, тӥледын валче кулоз визьлык! ³ Мынам но тӥляд кадь ик сюлмы вань; мон тӥлесьтыд улынгес ӧвӧл; сое кин уг тоды? ⁴ Мон аслам эше азьын серекъян-веранлы пӧрми, мон — Инмарлы вазиськылӥсь, Со мыным ответ сётылӥз, мон, шонер улӥсь, дун-шектэм адями, серекъян-веранлы пӧрми. ⁵ Пыдынызы канжаськисьёслы дасям факелэз каньыллыкын пукись сыӵе синазькыль каре. ⁶ Адями таласьёслэн улон интыоссы каньыл азьын сыло, Инмарлэсь вожзэ поттӥсьёс но кышкантэм интыын сыло, сульдэръёссэс Инмар интыын ки йылазы нулло. ⁷ Но зэм ик: пудолэсь юа, со тонэ дышетоз, ин тылобурдолэсь юа, со тыныд ивортоз; ⁸ яке музъемен вераськы, со тыныд визь-нод сётоз, зарезь чорыгъёс но тыныд вералозы. ⁹ Тае Кузё-Инмарлэн киыз кылдытӥз шуыса, кин ваньзэ тае уз тоды? ¹⁰ Солэн кияз вань улэп макеослэн лулзы возиське, котькуд адями лулмугорлэн но духез Со киын возиське. ¹¹ Пель-а кылъёсты уг кылы, кыл-а сиёнлэсь шӧмзэ уг шӧды? ¹² Пересь визьнодчиос бордын визьлык улэ, кема улӥсьёс бордын визь-нод возиське. ¹³ Со дорын бадӟым визьлык но кужым; кенеш, визь-нод сётон но Со киын. ¹⁴ Мае Со куашкатоз, со уз пуктӥськы; кинэ Со пытсалоз, со уз мозмытскы. ¹⁵ Вуосты дугдытӥз ке, ваньмыз куасьмоз; вуосты лэзиз ке, музъемез гылтоз. ¹⁶ Со киын туж бадӟым кужым, бадӟым визьлык, Солэн киулаз йыромись но, йыромонэ пыртӥсь но. ¹⁷ Кенеш сётӥсьёсты малпамтэ уже вуттэ, судить карисьёсты номыр валасьтэм каре. ¹⁸ Эксэйёсты Со думеттэк кельтэ, кусъёссэс еэн думылэ; ¹⁹ кивалтӥсьёсты сӥтэк-сантэк кельтэ, кышкасьтэмъёсты погыръя; ²⁰ трос вераськисьёсты кылтэм каре, пересь визьнодчиосты визьтэк кельтэ; ²¹ тодмо-дано адямиосты возьытлыкен шобыртэ, туж бадӟым кужымоослэсь кынарзэс лябӟытэ; ²² пеймытлык пӧлысь мурдалаез усьтэ но кулонлэсь вужерзэ югытэ поттэ; ²³ калыкъёсты йылэтэ но, соосты быдтылэ но; калыкъёсты пазьгылэ но, соосты огазе люка но; ²⁴ музъем вылысь калыклэн йыръёсызлэсь визьзэс тала но кыр дуннеетӥ йыромыса, сюрестэм азьёстӥ соосты ветлыны кельтэ: ²⁵ тылтэк-югыттэк пеймыт азьтӥ киынызы кырмиськылыса ветло, кудӟем муртъёс выллем азьлань-берлань ветло».