Тодӥськоды-а тӥ?

Вашкала дыръя уже кутӥзы-а папирусэз, пыжъёсты лэсьтон понна?

ТРОСЭЗЛЫ тодмо: Вашкала Египетын гожъяськизы бумага вылын, кудзэ лэсьтӥзы папирус будослэсь. Озьы ик папирус вылын гожъяськизы Грециын но Римын улӥсьёсa. Но тросэз адямиос уг тодо, папирусэз пыжъёсты пуктон понна но уже кутӥзы шуыса.

Ог 2 700 ар талэсь азьло Исаия пророк гожтӥз, «Эфиопия шуръёс» котырын улӥсь адямиос посолъёссэс ыстӥзы «зарезь кузя, ву вылтӥ папир камышлэсь лэсьтэм пыжъёсын». Берлогес Иеремия пророк вераз, куке Мидиысь но Персиысь улӥсьёс Вавилонэз киултозы, соос вавилон калыклэсь папируслэсь лэсьтэм пыжъёссэс сутозы, калык карысь кошкыны медаз быгаты шуыса (Ис. 18:1, 2; Иер. 51:32, ВД).

Библия Инмарлэн святой духезлэн кивалтэмез улсын гожтэмын. Соин ик паймонэз ӧвӧл, археологъёслэн шедьтэмъёссы возьмато, пыжъёсты пуктон понна, вашкала дыръя папирусэз уже кутӥзы шуыса (2 Тим. 3:16). Мае шедьтӥзы тодосчиос?

КЫЗЬЫ ЛЭСЬТӤЗЫ ПАПИРУСЛЭСЬ ПЫЖЪЁСТЫ

Египетысь шайгуосын шедьтэмын борддор суредъёс, кудъёсаз возьматэмын, кызьы адямиос папирус бичазы но кызьы солэсь пыжъёс лэсьтылӥзы. Папируслэсь модосъёссэ вандылӥзы, соосты ӵош керттылӥзы но собере та керттэтъёсты но огазе думылӥзы. Папируслэсь модоссэ вамен вандоно ке, адӟыны луэ, со куинь сэрего шуыса. Соин ик та керттэтъёс туж юнэсь луо вал. Вашкала Египетъя одӥг справочникын гожтэмын, папируслэсь пыжъёс ог 17 метр кузьда луыны быгато вал шуыса. Соин ик отчы 10—12 пар полысъёс тупатыны луэ вал (A Companion to Ancient Egypt).

МАЛЫ, ПЫЖЪЁСТЫ ЛЭСЬТОН ПОННА, ПАПИРУСЭЗ УЖЕ КУТӤЗЫ

Туж трос папирусъёс будо Нил шурлэн нёжалаз. Соин ик сое шедьтыны секыт ик ӧй вал. Со сяна, папируслэсь пыжъёсты лэсьтыны капчи вал. Соку но, куке бадӟым пыжъёсты пулэсь лэсьтыны кутскизы, чорыгасьёс но пӧйшурасьёс азьло сямен ик уже кутӥзы, вылды, плотъёсты но пыжъёсты, кудъёсыз папируслэсь лэсьтэмын вал.

Адямиос папируслэсь пыжъёсты кема дыр ӵоже кутӥзы. Кызьы вераз Плутарх, Вашкала Грециысь гожъяськись но история удысысь тодосчи, кудӥз улӥз асьме вакытысь I—II дауръёсы, со дыре улӥсь адямиос но папируслэсь лэсьтэм пыжъёсты уже кутӥзы на.