Инмар Авраамез но солэсь семьязэ бакель каре

ИЕГОВА тодэ вал, Со, кин солы ваньмызлэсь дуно, курадӟонъёсты но кулонэз чидано луоз шуыса. Сыӵе малпанэ вуттэ Улон-вылонын 3:15 гожтэм азьпалзэ ивортон. Быгатӥз-а Инмар адямиослы возьматыны, макем бадӟым курбон луоз со понна Пиезлэн кулонэз? Библия сое улонысь яркыт учыр пыр возьматэ. Инмар Авраамез яратоно Исаак пизэ курбонэ вайыны куриз.

Авраамлэн юн осконэз вал. Тодӥськоды на-а, Инмар солы кыл сётӥз, азьло ик верам Мозмытӥсь, яке Кидыс-Выжы, Исаак бордысь потоз шуыса? Авраам оскиз, кулэ луиз ке, Инмар Исаакез улӟытыны быгатоз шуыса. Соин ик со, Инмарлэсь кылзӥськыса, аслэсьтыз пизэ курбонэ сётыны соглаш луиз. Нош Иеговалэн кылчинэз дырыз дыръя сое дугдытӥз. Оскымон патриархлэн тужгес но дунозэ курбонэ сётыны дась луэмез понна, Инмар выльысь солы аслэсьтыз кылсётонзэ вераз.

Берлогес Исааклэн кык пиосыз вордӥськизы — Исав но Иаков. Иаков духовноез дуноен лыдъяз, нош Исав — ӧз. Соин ик Инмар Иаковез бакель кариз. Со Иаковлэсь нимзэ воштӥз, сое Израиль шуыса нимаз, но солэн дас кык пиосыз бордысь израиль калыклэн выжыосыз потӥзы. Нош кызьы та семья бордысь быдӟым калык потӥз?

Иаковлэн пиосыз пичи вынзылы Иосифлы вожъяськизы. Соос сое ляльчие вузазы но, со Египетэ нуэмын вал. Иосиф трос куректонъёс адӟиз ке но, Инмар та оскымон но кышкасьтэм егит пиез бакель кариз. Сое фараон синйылтӥз но солы тросэныз кивалтыны оскиз. Ӵапак со дыре, сютэм улон вуэмен, Иаков пиоссэ Египетэ сиён басьтыны ыстӥз. Но луиз озьы, ю вузанэн Иосиф кивалтӥз! Агай-вынъёсызлэсь ӧпкелемзэс адӟыса, Иосиф бӧрдыса соослы кин луэмзэ вераз. Со соосты простить кариз но сюлмаськиз, быдэс семьязы Египетэ улыны мед лыктоз шуыса. Иосифлэн ӵыжы-выжыосыз тужгес но умой музъем вылэ улыны интыяськизы, кытын соос лыдын йылыны но азинскись калык луыны быгатӥзы. Иосиф валаз, Инмар, аслэсьтыз кылъёссэ быдэстон понна, югдуръёсын кивалтӥз шуыса.

Мӧйымем Иаков берпуметӥ аръёссэ аслаз бадӟым семьяеныз Египетын ортчытӥз. Кулон азяз со азьпалзэ ивортыса вераз, сӥзем Кидыс-Выжы, яке Мозмытӥсь, солэн Иуда пиез бордысь потоз но кужмо Кивалтӥсь луоз шуыса. Аръёс ортчыса, Иосиф кулон азяз вераз, Инмар Иаковлэсь семьязэ Египетысь поттоз шуыса.

Пыкиськемын: Улон-вылон, 20—50-тӥ люкетъёс; Еврейёслы 11:17—22.