Лыдӟисьёслэн юанъёссы

«Тынад нимыд дано мед луоз» статьяын, кудӥз печатламын вал 2020-тӥ арын инвожо понна поттэм «Возьмаськон башняын», эскериськизы юанъёс, кудъёсыз герӟаськемын Иеговалэсь нимзэ чылкытатонэн но кивалтыны правоеныз. Отын вераськиз, табере тае ми мукет сямен валаськомы шуыса. Кызьы?

Со статьяысь ми тодӥмы: вань одӥг гинэ тужгес но кулэ луись юан, кудӥз герӟаськемын вань кылчинъёсын но адямиосын,— со Иеговалэсь быдӟым нимзэ чылкытатон. Та юан пӧлы пыро эшшо кык юанъёс: зэм-а Иеговалэн кивалтэтэз самой умой но адямиос Инмарлы оскымон луозы-а?

Малы ми али пусйиськомы, Иеговалэн нимызлэсь но сое чылкытатонлэсь номыр кулэгес ӧвӧл ни шуыса? Ойдолэ эскеромы куинь мугъёсты.

Нырысетӥез, Едем садын Шайтан Иеговалэсь ӟеч нимзэ саптаз. Кескич юан сётыса, та лек кылчинлэн возьматэмез потэ вал, Иегова Адамлэсь но Евалэсь мае ке умойзэ ватэ но соос азьын укыр чурытэсь курон-косонъёс пуктэ шуыса. Собере Шайтан, Иеговалэн вераменыз ӵошатыса, чылкак мукет кылъёсты вераз. Озьы солэн возьматэмез потэ вал, Инмар пӧяське шуыса. Озьы Шайтан Иеговалэсь нимзэ сантэмаз но Дьявол луиз, мар «кыл нуллӥсь» шуэм луэ (Иоанн 8:44). Солэн пӧяськемезлы оскыса, Ева Инмарлэсь кылзӥськемысь дугдӥз но солэн кивалтэтэзлы пумит султӥз (Ул.-выл. 3:1—6). Али но Шайтан Инмарлэсь нимзэ сапта, Иегова сярысь шонертэмзэ вераса. Адями та пӧяськонлы оскиз ке, Иеговалэсь уз кылзӥськы, вылды. Тӥни малы Инмарлэн ужась-тыршисьёсыз Иеговалэсь святой нимзэ сантэманэз самой шонерлыктэм ужен лыдъяло. Инмарлэсь нимзэ сантэман — валтӥсез муг, малы дунне шуг-секытъёсын но курадӟонъёсын тырмемын.

Кыкетӥез, вань кылдытэмъёсызлы пайда ваён понна, Иегова ӟеч нимзэ утёз, сое вань янгыше уськытонъёслэсь чылкытатыса. Иегова понна со самой валтӥсез. Тӥни малы со шуиз: «Мынам быдӟым нимы дун-сьӧлыктэм луэ шуыса возьмато» (Иез. 36:23). Иисус но туж валамон возьматӥз, мар сярысь нырысь ик вӧсяськыны кулэ Иеговалэн оскымон ужась-тыршисьёсыз. Иисус шуиз: «Тынад нимыд дано мед луоз» (Матф. 6:9). Библия трос пол возьматэ, макем кулэ Иеговалэсь нимзэ данъяны. Тани куд-ог гинэ учыръёс. «Кузё-Инмарез, Солэсь нимзэ данъялэ» (1 Пар. 16:29; Пс. 95:8). «Солэсь нимзэ данъяса кырӟалэ» (Пс. 65:2). «Пумтэм вапумъёс ӵоже Тынэсьтыд нимдэ данъяло» (Пс. 85:12). Одӥгез учыр Иерусалимысь храмын луиз. Соку ачиз Иегова инмысен вераськиз. Отын Иисус куриз: «Атае! Аслэсьтыд нимдэ данъя». Иегова солы шуиз: «Данъяй ни, но эшшо но данъяло на» (Иоанн 12:28)a.

Куинетӥез, Иеговалэн ӟеч нимыныз юн герӟаськемын эрикезлэн быдэсмонэз. Ойдолэ малпаськомы: мар луоз, куке Христослэн сюрс ар ӵоже кивалтонэз йылпумъяськоз но адямиос берпуметӥзэ эскеремын луозы? Кызьы соку вань кылчинъёс но адямиос Иеговалэн нимыз шоры учкозы? Валэктонъёс шедьтон понна, тодамы ваёмы кык юанъёсты, кудъёсыз пыро тужгес но кулэ луись юан пӧлы. Тани со юанъёс: адямиос Иеговалы оскымон луозы-а но зэм-а Иеговалэн кивалтэтэз самой умой? Эскеромы соосты пыр-почгес. Кулэ луоз-а адямиослы возьматыны Инмарлы оскымон луэмзэс? Кулэ уз луы. Соос тырбыдэсэсь луозы, озьы ик берпуметӥез эскерон ортчемын луоз ини. Азьпалан соосты пырак улон возьмалоз. Кулэ луоз-а возьматыны, Иеговалэн кивалтэтэз самой умой шуыса? Кулэ уз луы. Соку инмын но музъем вылын вань кылдытэмъёс огкылысь улозы но шумпотыса Инмарлэсь кылзӥськозы. Нош мар вераны луоз Иеговалэн нимыз сярысь?

Со дырлы Иеговалэн нимыз быдэсак данъямын но сантэманлэсь чылкытатэмын луоз. Но со азьло сямен ик инмысь но музъем вылысь Инмарлэн оскымон ужась-тыршисьёсызлэн улоназы валтӥсь инты басьтоз. Малы? Малы ке шуоно соос адӟозы, кызьы Иегова азьло сямен ик паймымон ужъёс лэсьтэ. Иисус аслэсьтыз кивалтэтсэ Иеговалы сётоз бере, «Инмар ваньмызлы Кузё... луоз» (1 Кор. 15:28). Собере музъем вылысь адямиослэн «Инмар нылпиослэн кадь ик данлыко эриксы» луоз (Рим. 8:21). Иегова аслэсьтыз эриксэ быдэстоз — вань кылчинъёсты но адямиосты одӥг бадӟым, огкылысь улӥсь семьяе огазеялоз (Еф. 1:10).

Ваньмыз та югдуръёс бере мае шӧдоз Иеговалэн семьяез? Ваньмылэн милям ӟырдыт мылкыдмы луоз азьланяз но Иеговалэсь паймымон нимзэ данъяны. Псаломъёсты гожъясь Давид святой духлэн валтэмез улсын шуиз: «Дано мед луоз Инмар Кузё-Инмар... Солэн данэзлэн нимыз пумтэм вапумъёс ӵоже бакельлыко» (Пс. 71:18, 19). Пырак дауръёс ӵоже Иегова милемыз паймытэмысь уз дугды. Соин ик милям туж трос мугъёсмы луозы сое но солэсь ужъёссэ данъяны.

Иеговалэн нимыз возьматэ, кыӵе со Инмар. Куке ми малпаськиськомы Инмарлэн нимыз сярысь, солэн яратонэз тодамы лыктэ, вылды (1 Иоанн 4:8). Ми котьку тодамы возёмы Иеговалэсь бадӟым яратонзэ. Со сое возьматӥз, куке милемыз кылдытӥз, мозмытӥсь курбон сётӥз но возьматӥз, солэн кивалтэтэз самой умой шуыса. Со сяна, ми азьланяз но ас выламы шӧдомы солэсь ӟырдыт яратонзэ. Ми шумпотомы пырак дауръёс ӵоже инмысь Атаймылы матэ кариськыны но солэсь паймымон нимзэ данъяны (Пс. 72:28).