Марсело, Йомара но Ивер (паллянысен бурпала). Котькудӥзлэн кияз Библилэн «Выль дунне» берыктэмез испан кылын Брайль шрифтэн
Соос яратонэз уж вылын адӟизы
ЙОМАРА нылаш но солэн Марсело но Ивер вынъёсыз Гватемала шаерысь пичи гуртын уло. Нырысь Йомара Иеговалэн Адӟись-Ивортӥсьёсыныз Библиез дышетыны кутскиз, собере солэн вынъёсыз но кутскизы. Но вал одӥг шуг-секыт. Соос куиньназы ик синтэмесь вал. Озьы ик соос Брайль шрифтэн лыдӟиськыны ӧз быгатэ. Соин ик агай, кудӥз соосын Библиез дышетӥз, эскериськись абзацъёсты но Библиысь кылбуръёсты ачиз соослы лыдӟиз.
Озьы ик соослы секыт вал кенешлэн пумиськонъёсаз ветлыны. Матысь Эксэйлык юртозь 40 минут мыноно вал. Но кенеш сюлмаськиз, Йомара но солэн вынъёсыз вань пумиськонъёсы ветлыны мед быгатозы шуыса. Нош куке соослы дышетскон ужъёс сётъяны кутскизы, агайёс но сузэръёс юрттӥзы соослы сётэм ужзэс дышетыны но йыразы возьыны.
2019-тӥ арын куартолэзе кенешлэн пумиськонъёсыз соослэн гуртазы но ортчылыны кутскизы. Со дырлы соослэн гуртазы улыны лыктӥзы кузпалъёс, кудъёсыз пионеръёс луыса ужало-тыршо вал. Та кузпалъёс ас азязы ужпум пуктӥзы, Йомара, Марсело но Ивер Брайль шрифтэн лыдӟиськыны но гожъяськыны мед дышетскозы шуыса. Нош асьсэос та кузпалъёс Брайль шрифтэз уг тодо вал. Соин ик соос мынӥзы библиотекае но Брайль шрифт сярысь книгаос шедьтӥзы, мукетъёссэ но та шрифтэн лыдӟиськыны но гожъяськыны дышетон понна.
Марсело кенешлэн пумиськоназ валэктон сётэ
Кӧня ке толэзьёс ортчыса, соос куиньназы ик Брайль шрифтэн капчиен лыдӟиськыны дышизы. Солы луыса соос быгатӥзы Инмарен кусыпъёссэс юнматыныa. Али Йомара, Марсело но Ивер пионеръёс луыса ужало-тыршо, нош Марсело кенешлы юрттӥсь луыса но ужа-тырше. Соос туж ӟырдыт мылкыдын Иеговалы ужало-тыршо. Соос шоры учкыса, мукетъёсызлэн но мылкыдзы ӝутске озьы ик мылысь-кыдысь Иеговалы ужаны-тыршыны.
Йомара, Марсело но Ивер кенешлы юрттэмез понна туж тау каро. Йомара сузэр вера: «Адӟись-Ивортӥсьёсын нырысетӥзэ пумиськыкумы ик, соос милемлы зэмос яратонзэс возьматыны кутскизы». Марсело агай ватса: «Кенешын милям туж умой эшъёсмы вань, озьы ик милям вань быдэс дунне вылын вынлыкмы, кудзэ яратон огазея». Йомара но солэн вынъёсыз туж возьмало со нуналэз, куке соос адӟозы, кызьы Иегова музъемез райлы пӧрмытоз (Пс. 36:10, 11; Ис. 35:5).
a Синтэмъёслы но ляб адӟисьёслы поттэмын «Дышетскиськомы Брайль шрифтэн лыдӟиськыны» брошюра (ӟуч). Солэн ужпумез — юрттыны синтэмъёслы дышетскыны Брайль шрифтэн лыдӟиськыны но гожъяськыны.