Тодӥськоды-а тӥ кинэ ке но Иеговалэн Адӟись-Ивортӥсьёсыз пӧлысь? Соос тӥляд бускельёсты, ӵош ужасьёсты яке одӥг классын дышетскисьёсты луыны быгато. Яке соос, кинъёс тӥледын Библия дышето. Кинъёс меда со Иеговалэн Адӟись-Ивортӥсьёсыз но малы соос асьсэ осконзы сярысь мукетъёсыныз верасько?

Ми огшоры адямиос. Иеговалэн Адӟись-Ивортӥсьёсыз — со пӧртэм адямиос, пӧртэм культураосысь но калыкъёсысь. Куд-огез ми пӧлысь пӧртэм осконъёсын вал, нош кин ке Инмарлы уг но оскы вал. Нош Адӟись-Ивортӥсьёс луон азьын ваньмы ми туж сак Библиысь дышетонъёсты эскеримы (Апостолъёслэн ужъёссы 17:11). Ми адӟимы, со, мар отын верамын, зэмлык шуыса, но валаса ужпум кутӥмы улонмес Иегова Инмарлы сӥзьыны.

Ми дунъяськомы Библиысь тодон-валанъёсты. Мукет адямиослэн сямен ик милям асьмелэн шуг-секытъёсмы но тырмымтэосмы вань. Но ми тыршиськомы Библиысь возетъёсъя улыны, соин ик милям улонмы умойгес но шудогес луиз (Псалтирь 127:1, 2). Со одӥгез муг, малы ми мукетъёсызлы вераськомы сое, мае Библиысь тодӥмы.

Ми улӥськомы Инмарлэн эсэпъёсызъя. Со эсэпъёс Библиын гожтэмын. Соос милемлы пайда ваё, дышето мукетъёсты гажаны, пӧяськытэк улыны но ӟеч сямо луыны. Соос ярамон адями луыны юртто, семья кусыпъёсты но нравственностез юнмато. «Инмар адямиосты вылтус шоры учкыса улӥё-вылӥё уг кары», соин ик ми но ум учкиське, кыӵе калыкысь адями луэ но кыӵе солэн политика удысын учконъёсыз. Иеговалэн Адӟись-Ивортӥсьёсыз — со зэмос калыккуспо вынлык, кудаз ваньзы духовноез дунъяло. Ми огшоры адямиос ке но, огазеям калык луыса, ми аспӧртэмлыкоесь (Апостолъёслэн ужъёссы 4:13; 10:34, 35).

• Малы луоз вераны, Иеговалэн Адӟись-Ивортӥсьёсыз со огшоры адямиос шуыса?

• Кызьы Адӟись-Ивортӥсьёслэн улонзы воштӥськиз Библиысь тодон-валанъёслы луыса?

Тросэз малпало, Иеговалэн Адӟись-Ивортӥсьёсыз — со кыӵе ке выль осконлэн нимыз шуыса. Нош 2 700 ар талэсь азьлогес одӥг гинэ зэмос Инмарлэн ужась-тыршисьёсыз «адӟисьёс» шуыса нимаськизы (Исаия 43:10—12). 1931-тӥ арозь ми Библиез Эскерисьёс шуыса тодмо вал. Малы ми Иеговалэн Адӟись-Ивортӥсьёсыз ним басьтӥмы?

Со яркыт возьматэ, кин милям Инмармы. Вашкала кигожтэмъёсъя, Инмарлэн нимыз, Иегова, Библиын трос сюрс пол пумиське. Тросаз берыктэмъёсын со ним воштэмын вал титулъёслы, кылсярысь, Кузё-Инмарлы но Инмарлы. Нош зэмос Инмар Моисейлы Иегова нимын усьтӥськиз. Со валамон вераз: «Тани Мынам пумтэм вапумъёслы нимы». Но Моисей со нимез уже кутӥз (Потон 3:15; 17:15). Озьы со ассэ вань зэмос луисьтэм инмаръёслэсь висъяз. Но ми данъяськиськомы, Инмарлэсь дун-чылкыт нимзэ нуллӥськомы шуыса.

Со возьматэ, мар ми кариськомы. Вашкала дауръёсы Инмарлэн туж трос ужась-тыршисьёсыз, Авель бордысен кутскыса, Иеговалы осконзы сярысь мукетъёсызлы ивортӥзы. Дауръёс ӵоже Ной, Авраам, Сарра, Моисей, Давид но Инмарлы оскымон мукет пиосмуртъёс но кышномуртъёс «пилем мында адӟисьёс-ивортӥсьёс» пӧлы пыризы (Еврейёслы 11:4—12:1). Кызьы судын адӟись янгыш луисьтэм пала пыре, озьы ик ми но мукетъёсызлы Инмармы сярысь зэмлыкез кышкатэк вераськомы.

Ми Иисуслэсь адӟем кариськомы. Библия сое «оскиськымон, зэмос тодытӥсь», яке адӟись-ивортӥсь, шуыса нима (Усьтӥськон 3:14). Со Инмарлэсь нимзэ адямиослы усьтӥз но Атаез сярысь зэмлыкез ивортыны музъем вылэ лыктӥз (Иоанн 17:26; 18:37). Соин ик Христослэн пытьытӥз мынӥсьёс Иеговалэсь нимзэ нуллыны но сое мукетъёсызлы усьтыны кулэ. Ӵапак сое ик тыршо лэсьтыны Иеговалэн Адӟись-Ивортӥсьёсыз.

• Малы Библиез Эскерисьёс асьсэлы Иеговалэн Адӟись-Ивортӥсьёсыз ним басьтӥзы?

• Кыӵе дырысен Иеговалэн музъем вылын адӟись-ивортӥсьёсыз вань?

• Кинэ Иеговалэн тужгес но быдӟым Адӟись-Ивортӥсез шуыса ниманы луоз?

Библиын азьло ик верамын вал, Христос кулэм бере нырысетӥ христианъёс пӧлын пӧяськись пророкъёс луозы шуыса, кудъёсыз Библиысь зэмлыкез мыдлань валэктозы (Апостолъёслэн ужъёссы 20:29, 30). Озьы ик луиз. Со адямиос Иисуслэсь дышетонъёссэ языческой дышетонъёсын суразы. Озьы пӧяськись христиан оскон кылдӥз (2 Тимофейлы 4:3, 4). Кызьы меда тодоно, шонер-а ми валаськомы сое, малы зэмзэ ик дышетэ Библия?

Иегова зэмлыкез мед усьтоз шуыса, дыр вуиз. Инмар азьло ик вераз, берпуметӥ нуналъёсы адямиослэн «тодонзы будоз» шуыса (Даниил 12:4). 1870-тӥ арын зэмлыкез утчасьёслэн пичи группазы валаз, черкысь тросэз дышетонъёс Библиысь басьтэмын ӧвӧл шуыса. Соин ик соос Инмарлэсь Кылзэ азьло кылдэм малпанъёстэк эскерыны кутскизы, тодон понна, кудъёсыз дышетонъёс Библиысь, нош кудъёсыз ӧвӧл. Иегова соослэсь тыршемзэс бакель кариз но соослы духовной валан сётӥз.

Чылкыт сюлэмо адямиос Библиез сак эскеризы. Тыршись Библиез Эскерисьёс, кудъёсыз асьмелэсь азьвыл улӥзы, Библиез сыӵе амалэн эскеризы, кудзэ ми туннэ нуналозь кутӥськомы. Соос Библиез темаосъя эскеризы. Валаны секыт люкет пумиське ке, соос Библиысь мукет кылбуръёсты утчазы, кудъёсыз сое валэктыны быгатысалзы. Кыӵе ке йылпумъянэ вуо ке, кудӥз быдэс Священной Гожтэмен соглаш луэ, соос гожто вал сое. Озьы, Библилы ассэ валэктыны лэзьыса, соос выльысь усьтӥзы Инмарлэн нимыз сярысь, Эксэйлык сярысь, адямиос но музъем пумысен Инмарлэн малпанэз сярысь, кулэмъёс но улӟытон сярысь зэмлыкъёсты. Библиез эскерыса, соос пӧяськись дышетонъёслэсь но шонертэм ужъёслэсь мозмытскизы (Иоанн 8:31, 32).

1879-тӥ арын Библиез Эскерисьёс валазы, вань адямиослы зэмлыкез усьтыны дыр вуиз шуыса. Соос поттыны кутскизы журналэз, кудӥз али но поттӥське на. Со журнал «Возьмаськон башня Иеговалэн Эксэйлыкез сярысь ивортэ» шуыса нимаське. Туннэ ми адямиослы Библиысь зэмлыкъёсты 750-лэсь тросгес кылъёсын вераськомы 240 шаеръёсын но интыосын. Ноку но азьвыл зэмос тодон тазьы ӧз буды на!

• Мар луиз Библиысь зэмлыкен Христос кулэм бере?

• Малы луыса Инмарлэн Кылысьтыз зэмлыкез выльысь усьтыны луиз?

Трос аръёс Иеговалэн Адӟись-Ивортӥсьёсыз уже кутӥзы, печатлазы но вӧлмытӥзы Библилэсь пӧртэм берыктэмъёссэ. Но дыр ортчыса, ми валамы, кулэ выль берыктэм, кудӥз умойгес юрттысал адямиослы зэмлыкез тодыны, малы ке шуоно сыӵе Инмарлэн эрикез (1 Тимофейлы 2:3, 4). Озьы, 1950-тӥ арын ини «Выль дуннелэн берыктэмезлэн» нырысетӥ люкетэз туала англи кылын потӥз. Туннэ та шонер но валамон берыктэмез лыдӟыны быгато 130-лэсь тросгес кылъёсын, озьы ик ӟуч кылын но.

Кулэ Библия, кудзэ капчи валаны. Котькуд кыл дыр ортчемъя воштӥське, соин ик берыктэмъёсты, кудъёсаз пумисько валантэм но вужмем кылъёс, выльдоно луэ. Со сяна, асьме нуналъёсы шедьтэмын вал оригиналлы туж матын луись вашкала кигожтэмъёс. Соос юрттӥзы умойгес валаны Библиысь текстъёсты, кудъёсыз вашкала еврей, арамей но вашкала грек кылъёсын гожтэмын вал.

Кулэ берыктэм, кудаз Инмарлэн кылъёсыз шонер гожтэмын. Библиез берыктӥсьёслы уг яра эрико берыктыны — соослы Инмарен верам кылъёсты шонер, воштытэк берыктоно. Но, жаляса верано, тросысьтыз Священной Гожтэмез берыктэмъёсысь куштэмын вал Инмарлэн нимыз, Иегова.

Кулэ Библия, кудӥз Авторзэ данъя (2 Эксэйлыкъёслэн 23:2). «Выль дуннелэн берыктэмаз» Иеговалэн нимыз гожтэмын отын, кытын со вашкала библейской кигожтэмъёсын пумиськиз. Нош со пумиськиз ог 7 000 пол. Кигожтэмъёс пӧлысь одӥгезлэн люкетэз возьматэмын улӥын. Озьыен, трос аръёс ӵоже пыр-поч эскерем бере выль берыктэм потӥз, кудӥз Инмарлэсь малпанъёссэ валамон но шонер вера. Таӵе Библиез лыдӟыса, сюлэм ик каньыл луэ. «Выль дуннелэн берыктэмез» тӥляд кылыныды вань-а, ӧвӧл-а, мылкыддэс ӝутэммы потэ Иеговалэсь Кылзэ котькуд нунал лыдӟыны (Иисус Навин 1:8; Псалтирь 1:2, 3).

• Малы Иеговалэн Адӟись-Ивортӥсьёсыз Библилэсь выль берыктэмзэ поттыны ужпум кутӥзы?

• Кыӵе сям будэтыны кулэ ваньмызлы, кинлэн Инмарлэсь эриксэ тодэмез потэ?