Милям организациямы уждун басьтӥсь духовной кивалтӥсьёс ӧвӧл. Но, нырысетӥ даурысь христиан кенешын выллем, милям быгатӥсь тӧроосмы вань, кудъёсыз Инмарлэсь кенешсэ возьманы пуктэмын (Апостолъёслэн ужъёссы 20:28). Тӧроос — со духовно быдэ вуэм пиосмуртъёс, кудъёсыз кенешын кивалто. Библиын соослы таӵе косон сётэмын: «Инмарлэсь уллёзэ тыршыса, нокин косытэк-ёртытэк, сюлэмдэс-мылкыддэс поныса, кызьы кулэ Инмарлы, озьы чаклалэ-уте сое» (1 Пётр 5:1—3). Мар соос каро, милемлы умой мед луоз шуыса?

Соос кенешез утё. Тӧроос кивалтэт сёто но кенешез духовной кышкытлыклэсь утё. Соос валало, макем бадӟым ужез соослы Иегова оскиз, соин ик соос уг кузёясько Солэн калыкез вылын, нош милемлы умой но шудо улыны юртто (2 Коринфъёслы 1:24). Сюлмаськись пудо возьмась сямен, кудӥз уллёысьтыз котькуд ыжзэ тодэ, тӧроос кенешысьтызы котькудӥныз тодматскыны тыршо (Мадёнъёс 27:23).

Соос милемыз Инмарлэсь эриксэ быдэсъяны дышето. Котькуд арняе тӧроос кенешлэсь пумиськонъёссэ ортчыто, милесьтым осконмес юнматон понна (Апостолъёслэн ужъёссы 15:32). Инмарлы оскымон пиосмуртъёс озьы ик тодытон ужын кивалто, ужан-тыршонлэн вань удысъёсаз милемын ӵош пыриськыса но милемыз ӟеч иворез тодытыны дышетыса.

Соос котькудмылы дырзэс висъяло. Тӧроос кенешысь котькудӥзлэн духовной кулэяськонъёсыз сярысь сюлмасько. Священной Гожтэм пыр милемыз буйгатон но милемлы юрттон понна, соос быгато ми доры лыктыны яке Эксэйлык юртын милемын вераськыны (Иаков 5:14, 15).

Тросэзлэн тӧроослэн асьсэлэн семьяоссы вань, соин ик, кенешын уж нуон сяна, соослы ужано но семьязылы дырзэс висъяно на. Та мылысь-кыдысь ужась-тыршисьёсты милемлы яратыны но гажаны кулэ (1 Фессалоникаослы 5:12, 13).

• Мар каро тӧроос кенешын?

• Кызьы тӧроос котькудмылы дырзэс висъяло?

Библиын пиосмуртъёс, кудъёсыз христиан кенеш сярысь сюлмасько, кык группалы висъясько. Иеговалэн Адӟись-Ивортӥсьёсыз соосты «чакласьёс» но «кенешлы юрттӥсьёс» шуыса нимало (Филиппыослы 1:1, ВД). Ӵем дыръя котькуд кенешын сыӵе вын-агайёс одӥглэсь тросгес луо. Мар каро кенешлы юрттӥсьёс?

Соос тӧроослы юртто. Кенешлы юрттӥсьёс — со пиосмуртъёс, кудъёсыз духовноез нырысетӥ интые пукто но кудъёсызлы оскиськыны луэ. Соос сюлмасько кенешлэн ужъёсыныз герӟаськем кулэ луись юанъёс сярысь. Ӵемысь со организационной но бытовой юанъёс. Соос юрттэмен, тӧроос тросгес дырзэс висъяны быгато дышетонлы но юнматон ужлы.

Соос кулэ луись юрттэт сёто. Куд-огъёсыз кенешлы юрттӥсьёс радъясьёслэсь ужзэс нуо — соос пумитало ваньзэс, кинъёс пумиськонэ лыкто. Мукетъёсыз куара кужмоятӥсь аппаратура, литература, кенешлэн коньдонэз но тодытонлы участокъёс понна кыл куто. Озьы ик соос Эксэйлык юртэз утялтыны юртто. Тӧроос соосты курыны быгато кенешысь мӧйыосызлы юрттыны. Кенешлы юрттӥсьёс кыӵе гинэ уж медаз нуэ, соослэн дась луэмзы ушъямон (1 Тимофейлы 3:13).

Соос умой пример возьмато. Кенешлы юрттӥсе духовно быдэ вуэм вын-агайёсты пукто. Кенешлэн пумиськонъёсаз пыриськыкузы, соос котьку но милесьтым осконмес юнматыны тыршо. Тодытон ужын валтӥсьёс луыса, соос мылысь-кыдысь ужан мылкыдзэс милемлы но пыӵато. Тӧроосын ӵош ужаны дась луэмзы кенешлы шумпотон вае но огазея кенешез (Ефесъёслы 4:16). Дыр ортчыса, кенешлы юрттӥсьёсты тӧро луыса ужан-тыршон понна ӵектыны быгато.

• Кинъёс со сыӵе кенешлы юрттӥсьёс?

• Мар каро кенешлы юрттӥсьёс, кенешын уж умой радъямын мед луоз шуыса?

Христиан Грек Гожтэмъёсын ӵем вераське Варнава но апостол Павел сярысь. Та пиосмуртъёс мынӥсь-ветлӥсь чакласьёс вал но христианъёслэн нырысетӥ кенешъёсазы ветлылӥзы. Малы соос озьы ветлӥзы? Соос духовной вын-агайёссы сярысь мылысь-кыдысь сюлмаськизы. Одӥг пол Павел Варнавалы шуиз: «Ойдо нош ик мыномы, учкомы, кызьы уло агай-вынъёсмы». Со дась вал сю иськемъёс ортчыны, огъя оскисьёссэ юнматон понна (Апостолъёслэн ужъёссы 15:36). Туннэ нуналъёсы но мынӥсь-ветлӥсь чакласьёслэн сыӵе ик мылкыдзы.

Соос лыкто, милемыз юнматон понна. Ёросэз чаклась ог 20 кенешъёс (со одӥг ёрос) пӧлысь котькудаз арлы кык пол вуылэ но отын арня ӵоже улэ. Ми быгатӥськомы тросэзлы дышетскыны та быгатӥсь вын-агайёслэсь но соослэн кышнооссылэсь. Соос кенешын котькудӥныз тодматскыны тыршо, озьы ик нылпиосын но арлыдоосын, но шумпотыса милемын ӵош коркась корка тодытон уже но библейской дышетонъёсты ортчытонэ пырисько. Ёросэз чакласьёс тӧроосын огъя оскисьёсты юнматон уже пырисько, со сяна, ваньмес юнмато, кенешын но конгрессъёсын мылкыдэз ӝутӥсь речьёс вераса (Апостолъёслэн ужъёссы 15:35).

Соос тунсыкъясько кенешысь котькудӥныз. Ёросэз чакласьёслэн ужпумзы — кенешез духовно юнматыны. Соос тӧроосын но кенешлы юрттӥсьёсын пумисько, басьтэм азинлыкъёс сярысь вераськон но вын-агайёслы визь-кенеш сётон понна. Соос пионеръёслы юртто ужан-тыршонзэс умоятыны, озьы ик кенешысь выльёсыныз тодматско но соослэн духовной азинлыкъёсынызы тунсыкъясько. Та вын-агайёс пӧлысь котькудӥз дась луэ аслэсьтыз дырзэ но кужымзэ сётыны, милемын ӵош тыршон понна (2 Коринфъёслы 8:23). Соослэн осконзы но Инмарлы оскиськымон луэмзы адӟем карымон (Еврейёслы 13:7).

• Малы ёросэз чакласьёс кенешъёсы ветло?

• Кызьы соослэн ветлэмзы тӥледлы юрттыны быгатоз?

Инкуазь шимучыр луэ ке, Иеговалэн Адӟись-Ивортӥсьёсыз соку ик отчы сюрем огъя оскисьёссылы юртто. Озьы ми, огмес огмы зэмзэ ик яратӥськомы шуыса, возьматӥськомы (Иоанн 13:34, 35; 1 Иоанн 3:17, 18). Кызьы ми юрттӥськомы?

Коньдонэн юрттӥськомы. Куке нырысетӥ даурын Иудеяын туж секыт сютэм аръёс кутскизы, Антиохиысь христианъёс огъя оскисьёссылы люкам юрттэт келязы (Апостолъёслэн ужъёссы 11:27—30). Озьы ик туннэ но, куке ми тодӥськомы, кудаз ке но шаерын милям вын-агайёсмы шуг-секытъёсын пумисько шуыса, ми интыысь кенеш пыр соослы коньдон ыстӥськомы (2 Коринфъёслы 8:13—15).

Кулэ луись юрттэт сётӥськомы. Шуг-секытъёсын пумиськем интыосын тӧроос тыршо шедьтыны кенешысьтызы котькудзэ, солэн ваньмыз умой шуыса тодон понна. Юрттэт сётонъя комитет сиён, чылкыт юон ву но дӥськут люкылэ, нош озьы ик улон инты но эмъюрттэт сярысь сюлмаське. Тросэз Адӟись-Ивортӥсьёс, кудъёсызлэн кулэ луись быгатонлыкъёссы вань, ас коньдонэнызы но ас мылкыд каремзыя лыкто, коркаосты но Эксэйлык юртъёсты выльысь ӝутон яке выльдон понна. Огкылысь улон, кудӥз вань милям организациямы, озьы ик быгатонлыкъёс, кудъёссэ ми басьтӥськомы, артысь артэ ужаса, юртто милемлы туж ӝог вазиськыны, куке шимучыр луэ. «Асьме осконысь агай-вынъёсмылы» юрттыса, ми мукетъёсыз сярысь но ум вунэтӥське, соослэн мукет осконъёссы ке но (Галатъёслы 6:10).

Библиысь буйгатскон шедьтыны но сюлмаськонъёсты вормыны юрттӥськомы. Инкуазь шимучыръёсы сюремъёслы тужгес но кулэ буйгатскон. Сыӵе дыръёсы ми Иеговалэсь, «котькыӵе буйгатсконлэн Инмарезлэсь», кужым басьтӥськомы (2 Коринфъёслы 1:3, 4). Ми шумпотыса вераськомы адямиослы Библиысь кылсётонъёс сярысь но оскытӥськомы, Инмарлэн Эксэйлыкез ӝоген вань шугадӟонъёсты быдтоз шуыса, кудъёсыз вӧсь луон но курадӟонъёс ваё (Усьтӥськон 21:4).

• Малы Адӟись-Ивортӥсьёс инкуазь шимучыръёс дыръя ӝог юрттыны быгато?

• Библиысь кыӵе буйгатон ми сётӥськомы шугадӟонъёсын пумиськемъёслы?

Кулэмезлэсь кӧня ке азьлогес Иисус ньыль дышетскисьёсыныз вераськиз — Пётрен, Иаковен, Иоаннэн но Андреен. Иисус вераз соослы берпуметӥ нуналъёсы аслаз Эксэй луонэзлэсь тодметсэ, нош собере кулэ луись юан сётӥз: «Кин меда со кузёлэн аслаз медоосызлы ас дыраз сиён сётъяны кивалтӥсь карыса пуктэм оскиськымон, визьмо ляльчиез?» (Матфей 24:3, 45; Марк 13:3, 4). Иисус аслэсьтыз дышетскисьёссэ оскытӥз, со, «кузёзы» луыса, «ляльчиез» пуктоз шуыса, кудӥз солэн пытьытӥз мынӥсьёслы та лек дуннелэн берпуметӥ нуналъёсаз духовной сиён вис карытэк сётъялоз. Кин пыре со «ляльчи» пӧлы?

Со вӧйын зырӟем христианъёслэн пичи группазы. «Ляльчи» — со Иеговалэн Адӟись-Ивортӥсьёсызлэн Кивалтӥсь кенешсы. Со Иеговалэн вань ужась-тыршисьёсызлы духовной сиён дырыз дыръя сётэ. Та оскиськымон «ляльчитэк» ми ӧм быгатысалмы «нянь паймес ас дыраз» басьтыны (Лука 12:42).

Со Инмар коркан кивалтӥсь карыса пуктэмын (1 Тимофейлы 3:15). Иисус «ляльчилы» бадӟым уж оскиз — Иеговалэн организациезлэн музъем вылысь люкетэныз кивалтыны. Со понна со «ляльчилы» оскиз ваньбурен кузёяськыны, тодытон ужен кивалтыны но милемыз кенешъёсамы дышетыны. «Оскиськымон, визьмо ляльчи» сётъя милемлы духовной сиён публикациос пыр, озьы ик кенешъёсмылэн пумиськонъёссы но конгрессъёс пыр.

Со «ляльчи» оскиськымон — со Библиысь зэмлыкъёслы но ӟеч иворез тодытон ужлы оскымон кыле; со озьы ик визьмо, малы ке шуоно со визьмо кузёяське музъем вылысь ваньмыныз, мае солы Христос оскиз (Апостолъёслэн ужъёссы 10:42). Иегова солэсь ужзэ бакель каре, аслаз организацияз тросгес но тросгес кылзӥськись адямиосты вайыса но тырмыт духовной сиён сётъяса (Исаия 60:22; 65:13).

• Кинэ пуктӥз Иисус дышетскисьёсызлы духовной сиён сётъяны?

• Кызьы валано, со «ляльчи» оскиськымон но визьмо шуыса?

Нырысетӥ даурын кивалтӥсь кенеш Иерусалимын вал, отчы апостолъёс но тӧроос пыро вал. Со кӧня ке вын-агайёс кулэ луись ужпумъёс куто вал, кудъёсыз вань вӧйын зырӟем христианъёсын герӟаськемын вал (Апостолъёслэн ужъёссы 15:2). Ужпум кутон азьын, соос эскеро вал, мар со сярысь Гожтэмъёсын верамын, но Инмарлэн духезлэсь кивалтэмзэ утчало вал (Апостолъёслэн ужъёссы 15:25). Туннэ но Иеговалэн Адӟись-Ивортӥсьёсыз озьы ик лэсьто.

Инмар сое аслэсьтыз эриксэ быдэстон понна уже кутэ. Вӧйын зырӟем вын-агайёс, кудъёсыз Кивалтӥсь кенешын ужало-тыршо, туж дунъяло Инмарлэсь Кылзэ, соослэн мур валанзы вань улонэн но духовноен герӟаськем юанъёсын. Котькуд арняе соос люкасько, быдэс дуннеысь вынлыклэсь кулэяськонъёссэ эскерон понна. Нырысетӥ даурын сямен ик, со вын-агайёс Библия вылэ пыкиськем кивалтэт сёто гожтэтъёсын, озьы ик мынӥсь-ветлӥсь чакласьёс но мукет ужась-тыршисьёс пыр. Соин Инмарлэн калыкез малпаськонъёсын но, ужъёсын но огкылысь улэ (Апостолъёслэн ужъёссы 16:4, 5). Кивалтӥсь кенеш сюлмаське духовной сиён дасян сярысь но кыл кутӥсь вын-агайёсты пуктон сярысь, озьы ик Эксэйлык сярысь тодытон ужез азинтыны юрттэ.

Инмарлэн духезлэн кивалтэмезъя ужа. Кивалтӥсь кенеш котьма ласянь Вылӥ Кивалтӥсьлэсь, Иеговалэсь, но кенешлэн Йырызлэсь, Иисуслэсь, кылзӥське (1 Коринфъёслы 11:3; Ефесъёслы 5:23). Со вын-агайёс Инмарлэн калыкез пӧлын асьсэды азьмынӥсьёсын уг лыдъяло. Мукетъёсыныз вӧйын зырӟем христианъёсын ӵош, «Ыжпи [Иисус] кытчы гинэ уг мыны, соос ялан Со бӧрсьы мыно» (Усьтӥськон 14:4). Кивалтӥсь кенешысь вын-агайёс туж дунъяло милесьтым соос понна вӧсяськеммес.

• Кин нырысетӥ даурын кивалтӥсь кенеш пӧлы пыре вал?

• Кызьы туннэ Кивалтӥсь кенеш Инмарлэсь кивалтэтсэ утча?

«Вефиль» вашкала еврей кылысь «Инмар корка» шуыса берыктӥське (Улон-вылон 28:17, 19, сноска). Со туж тупась ним юртъёслы, кудъёсыз пуктэмын тодытон ужез азинтыны юрттон понна. Иеговалэн Адӟись-Ивортӥсьёсызлэн сыӵе юртъёссы быдэс музъем вылын вань. Кивалтӥсь кенеш Америкаысь Вефильын, Нью-Йорк штатын, интыяськемын. Отысен пӧртэм шаеръёсысь филиалъёслэн ужъёссы радъясько. Соосты, кинъёс Вефильёсын ужало-тыршо, Вефиль семья шуыса нимало. Бадӟым огмылкыдо семьяын сямен ик, Вефильын ужасьёс ӵош уло но ужало, ӵош сисько но ӵош Библиез дышето (Псалтирь 132:1).

Паймымон семья, кудаз котькудӥз, аслыз пайда басьтыны тыршытэк, мукетъёсызлы ужа-тырше. Вефильын ужасьёс вань дырзэс но кужымзэс Инмарлэсь эриксэ быдэстонлы но Эксэйлыклэсь ужпумъёссэ азинтонлы сӥзё (Матфей 6:33). Нокин соос пӧлысь уждун уг басьты, нош котькинлы улон инты, сиён-юон но ас кулэяськонъёсызлы кӧня ке коньдон сёто. Вефильын котькудӥз кыӵе ке ёзэтэ ужаны пуктӥське. Кин ке но офисын ужа, кин ке но пӧраськон яке сиськон интыын. Кинэ ке но книга поттонние яке книга вотсан цехе ужаны пукто, нош кинэ ке но — комнатаосты утялтыны, мисьтаськыны, мае ке тупатыны но мукет кулэ луись уж быдэсъяны.

Инты, кытын вань кужымзэс Эксэйлык сярысь тодытон ужез азинтонлы сӥзё. Котькуд Вефильлэн валтӥсь ужпумез — тросгес адямиосты Библиысь зэмлыкен тодматыны. Со сярысь та брошюра но вера. Сое гожтонэ Кивалтӥсь кенеш пыриськиз. Собере со электронной вариантэн быдэс дунне вылысь трос берыктӥсь группаослы ыстэмын вал, Вефильёсысь книга поттонниосын туж бадӟым ӝоглыкен машинаосын печатламын но 110 000-лэсь тросгес кенешъёсы вуттэмын. Та ужлэн котькуд вамышаз мылысь-кыдысь тыршизы Вефильын ужасьёс, озьы тужгес но кулэ луись ужез быдэстыны юрттӥзы — ӟеч иворез тодытыны (Марк 13:10).

• Кин Вефильын ужа-тырше но маин соос уло?

• Малы кулэ Вефиль?

Вефиль семьяысь вын-агайёс но сузэр-апайёс пӧртэм ёзэтъёсын ужало-тыршо, тодытон ужез одӥг яке тросгес шаеръёсын азинтыны юрттыса. Соос литератураез берыкто, журналъёсты печатлало, книгаосты вотсало, литератураен складын ужало, аудио но видео потто но мукет кулэ луись ужез быдэсъяло.

Филиаллэн комитетэзлэн чакламез улсын. Кивалтӥсь кенеш филиаллэсь ужзэ радъяны филиаллэн комитетэзлы оске, кудаз куинь яке тросгес быгатӥсь тӧроос пыро. Комитет Кивалтӥсь кенешлы ивортэ со сярысь, кызьы Эксэйлыклэн ужез мынэ со шаеръёсын, кудъёсыз сярысь филиал сюлмаське, озьы ик ивортэ кылдэм юанъёс яке шуг-секытъёс сярысь. Со юрттэ Кивалтӥсь кенешлы ужпум кутыны, кыӵе темаосты публикациосын, кенешлэн пумиськонъёсаз но конгрессъёсын эскероно. Ӵемысь филиалъёсы Кивалтӥсь кенешен ыстэм вын-агайёс ветло. Со вын-агайёс филиалъёслэн комитетъёссылы кивалтэт сёто, кудӥз юрттэ соослы ужзэс быдэстыны (Мадёнъёс 11:14). Соослы, кинъёс уло со интыын, кудӥз сярысь филиал сюлмаське, нимысьтыз пумиськон ортчытӥське, кудаз лыктэм вын-агай речь вера.

Интыысь кенешъёс сярысь сюлмаськон. Филиалын кыл кутӥсь вын-агайёс выль кенешъёс кылдытон сярысь ужпум куто. Со сяна, со вын-агайёс радъяло ужзэс пионеръёслэсь, миссионеръёслэсь но ёросэз чакласьёслэсь, кудъёсыз ужало-тыршо со интыын, кудӥз сярысь филиал сюлмаське. Соос конгрессъёсты ортчытонэз, Эксэйлык юртъёсты пуктонэз радъяло но кенешъёсы литература ыстонэз чаклало. Филиалын быдэстӥськись уж юрттэ тодытон ужез радъяны но сое огкылысь нуыны (1 Коринфъёслы 14:33, 40).

• Кызьы филиалъёслэн комитетъёссы Кивалтӥсь кенешен огъя ужало?

• Мар сярысь сюлмасько филиалъёс?

Ӟеч иворез «вань выжыослы, пӧртэм кылын вераськисьёслы, калыкъёслы, улыослы-бечеослы» тодытон понна, ми 750-лэсь тросгес кылъёсын литература поттӥськомы (Усьтӥськон 14:6). Кызьы? Быдэс дунне вылын милям гожъясьёсмы но берыктӥсьёсмы вань, ваньзы соос — Иеговалэн Адӟись-Ивортӥсьёсыз.

Нырысь текст англи кылын гожтӥське. Гожъясь ёзэт понна Кивалтӥсь кенеш кыл кутэ. Со ёзэт быдэс дунне вылысь вань гожъясьёслэсь ужзэс радъя. Гожъясьёс пӧртэм шаеръёсын уло, соин ик милям публикациосамы пӧртэм адямиослы тунсыко луись темаос эскерисько.

Текст берыктӥсьёслы ыстӥське. Тупатэм материалэз, Кивалтӥсь кенеш сое умоен лыдъям бере, электронной вариантэн быдэс музъем вылысь берыктӥсь группаослы ысто. Берыктӥсьёс текстэз берыкто, англи кылын гожтэменыз ӵошато но тупато сое. Соос тыршо шонер кылъёс бырйыны, англи кылысь текстэз ас кылынызы воштытэк веран понна (Екклесиаст 12:10).

Компьютеръёс ӝоггес ужаны юртто. Компьютер гожъясьёсты но, берыктӥсьёсты но воштыны уг быгаты. Но со ужез ӝоггес карыны юрттэ пӧртэм программаослы, электронной кыллюкамъёслы но энциклопедиослы луыса. Иеговалэн Адӟись-Ивортӥсьёсыз малпазы «Трос кылъёсын электронной издательской системаез» (MEPS). Со юрттэ текстэз трос пӧртэм кылъёсын бичаны, сое суредъёсын огазеяны но печатлан понна дасяны.

Малы ми сомында кужым понӥськомы, библейской литератураез берыктыны со кылъёсы но, кудъёсыныз кӧня ке сюрс адями гинэ вераське? Малы ке шуоно Иеговалэн «вань адямиосты утиськытэмез, зэмлыкез тодытэмез потэ» (1 Тимофейлы 2:3, 4).

• Кызьы гожто милесьтым литературамес?

• Малы ми публикациосмес сомында кылъёсы берыктӥськомы?

Котькуд ар милям организацимы дунтэк поттэ но вӧлмытэ трос миллион Библиосты но мукет публикациосты. Ми пуктӥськомы но тупатӥськомы Эксэйлык юртъёсты но филиалъёсты; юрттӥськомы коньдонэн сюрсъёсызлы Вефильын ужасьёслы но миссионеръёслы; юрттӥськомы инкуазь шимучыре сюремъёслы. Тӥляд юанды кылдэ, луоз: «Кытысь ваньмызлы коньдон поттӥське?»

Ми кенеше дасэтӥ люкет яке кыӵе ке мукет тыриськон ум тыриське, коньдон ум бичаське. Тодытон ужез нуон понна, трос коньдон кошке ке но, коньдонэн юрттӥсьёсты ми ум утчаське. 1879-тӥ арын гудырикошкон толэзе поттэм «Возьмаськон башняын» верамын вал, ми оскиськомы, Иегова милемлы юрттоз шуыса, но ми «ноку ум но сюлворе, ум но куре адямиослэсь юрттэтсэс»,— но ми сётэм кылмес быдэстӥмы! (Матфей 10:8).

Милям ужмы ас мылкыд каремъя сётэм коньдонэн возиське. Трос адямиос Библиез тодытон ужрадмы понна тау каро, коньдон сётыса. Асьсэос Адӟись-Ивортӥсьёс но шумпотыса сёто дырзэс, кужымзэс, коньдонзэс но мукетсэ, Инмарлэсь эриксэ быдэс дунне вылын быдэстон понна (1 Паралипоменон 29:9). Эксэйлык юртъёсын но конгрессъёсты ортчытон юртъёсын ящикъёс вань, кудъёсаз мылкыд карисьёс коньдон поныны быгато. Троссэ сёто соос, кинъёс узыр уг уло. Соос тупало палкышнолы, кудзэ Иисус ушъяз, со, куанер вал ке но, коньдонзэ мылысь-кыдысь жалятэк понӥз шуыса (Лука 21:1—4). Озьы, котькудӥз ялан кӧня ке коньдонзэ кельтыны быгатэ, «сюлмыз косэмъя» сётон понна (1 Коринфъёслы 16:2; 2 Коринфъёслы 9:7).

Ми оскиськомы: кылзӥськись адямиос азьланяз но Иеговаез данъялозы ваньмыныз, марзы соослэн вань, Эксэйлыклэсь ужзэ нуыны юрттыса (Мадёнъёс 3:9).

• Маин милям организацимы мукет осконъёслэсь пӧртэм луэ?

• Кызьы уже кутӥське ас мылкыд каремъя сётэм коньдон?

Милям юртъёсмы Эксэйлык юртъёс шуыса нимасько, малы ке шуоно Инмарлэн Эксэйлыкез — со Библилэн валтӥсь дышетонэз но валтӥсь темаез иворлэн, кудзэ вераз Христос (Лука 8:1).

Зэмос йыбырттон понна интыос. Эксэйлык юртъёсын тодытон уж радъяське (Матфей 24:14). Со юртъёс быдӟалазыя но вылтуссыя пӧртэмесь луо, но укыргес син шоры йӧтымонэсь ӧвӧл. Ӵем дыръя одӥг юртын одӥглэсь тросгес кенешъёс пумиськонъёссэс ортчыто. Кенешъёс будэмен, берпуметӥ аръёсы ми пуктӥмы дасо сюрсъёс выль Эксэйлык юртъёсты. Кызьы ми быгатӥмы? (Матфей 19:26).

Пуктӥсько со коньдонэн, кудзэ кенешъёс келяло сыӵе юртъёс пуктон понна. Коньдон филиалэ лэзиське, кенешъёс со коньдонэз Эксэйлык юртъёсты пуктон яке тупатон понна басьтыны мед быгатозы шуыса.

Пӧртэм адямиос ас мылкыд каремзыя уждунтэк ужало. Трос шаеръёсын кылдытэмын Эксэйлык юртъёсты пуктӥсь группаос. Со группаосы пыро вын-агайёс но сузэр-апайёс, кудъёсыз ялан Эксэйлык юртъёсты пуктон бордын ужало-тыршо, но соослы юрттӥсь вын-агайёс но сузэр-апайёс. Соос ас шаеразы кенешысь кенеше ветло, кыдёкысь улосъёсы но, Эксэйлык юртъёсты пуктыны юрттыса. Мукет шаеръёсын котькуд улосэ Эксэйлык юртъёсты пуктон но тупатон ужен кивалтыны пукто быгатӥсь Адӟись-Ивортӥсьёсты. Пуктӥськон бордын мукет интыосысь быгатӥсь пуктӥськисьёс но ужало ке но, троссэ ужез быдэсто интыысь кенешлэн ёзчиосыз. Эксэйлык юртъёсты пуктон — зэмзэ ик паймымон уж но, со быдэсме Иеговалэн духезлы но Солэн ужась-тыршисьёсызлэн мылысь-кыдысь ужамзылы луыса (Псалтирь 126:1; Колоссыослы 3:23).

• Малы милям юртъёсмы Эксэйлык юртъёс шуыса нимасько?

• Малы луыса ми быгатӥськомы Эксэйлык юртъёсты пуктыны быдэс музъем вылын?

Милям Эксэйлык юртъёсмы Иеговалы сӥземын, соин ик соосты утялтонэз ми бадӟым данэн лыдъяськомы. Эксэйлык юртэз утялтон — со священной ужан-тыршонмылэн кулэ луись люкетэз. Отчы пыриськыны быгато ваньмыз мылкыд карисьёс.

Кенеш бере Эксэйлык юртмес чылкытатыны кылиськомы. Котькуд пумиськон бере пичияк чылкытатон уж ортче. Одӥг пол арняяз Эксэйлык юртмес пыр-почгес сузяськомы. Тӧроос яке кенешлы юрттӥсьёс пӧлысь одӥгез уж сётъя, чылкытатон уж ортчытон понна сётэм валэктонъёсты уже кутыса. Ӵем дыръя вын-агайёс но сузэр-апайёс выж ӵужо но мисько, тузон ӵушыло, пуконъёсты радъяло, туалетъёсты мисько, пияла ӧсъёсты но синучконъёсты ӵушыло, жаг поттыло но азбарез утялто. Араз одӥг пол ке но Эксэйлык юртэз рос-прос утялто. Куд-ог ужез нылпиослы сётыса, ми дышетӥськомы соосты пумиськонъёсты ортчытон интыез гажаны (Екклесиаст 4:17).

Тупатъяны юрттӥськомы. Котькуд ар Эксэйлык юртэз котыр ласянь эскеро. Дырыз дыръя юртэз эскерон-тупатъян юрттэ сое умой возьыны (2 Паралипоменон 24:13; 34:10). Солы луыса мултэс коньдон уг быдтӥськы. Чылкыт Эксэйлык юрт, кудаз ваньмыз умой ужа,— со Инмармылы йыбырттон понна ярамон инты. Юртэз эскерон-тупатъянэ пыриськыса, ми возьматӥськомы, Иеговаез яратӥськомы шуыса, но гажаськомы интыез, кудӥз солэсь нимзэ нуллэ (Псалтирь 121:1). Со сяна, чылкыт, чебер Эксэйлык юрт шоры учкыса, адямиос Инмарез данъяло (2 Коринфъёслы 6:3).

• Малы туж кулэ Эксэйлык юртэз умой возьыны?

• Кызьы ми Эксэйлык юртэз чылкыт возиськомы?

Потэ-а тӥляд кыӵе ке темаез эскеремды, Библиез умойгес валан понна? Оло, тӥледыз Библиысь кыӵе ке кылбур тунсыкъяськытэ? Яке тӥляд тросгес тодэмды потэ Библиысь кыӵе ке адями, кар яке арбери сярысь? Оло нош, тӥледлы Библиысь визь-кенеш кулэ, шуг-секыттэс вормон понна? Соку пыралэ Эксэйлык юртысь библиотекае.

Со — эскеронын кулэ луись юрттэт. Тӥляд вордскем кылыныды Иеговалэн Адӟись-Ивортӥсьёсызлэн вань публикациоссы ӧвӧл, дыр. Но соос Эксэйлык юртысь библиотекаын вань, вылды. Библиотекае ялан выль публикациосты ваё. Милесьтым публикациосмес сяна, отысь луоз шедьтыны Библилэсь пӧртэм берыктэмъёссэ, кыллюкамъёсты но энциклопедиосты. Библиотека ваньмыз понна усьтэмын кенешлэн пумиськонъёсыз азьын но, соос йылпумъяськем бере но.

Со — дунъяны луонтэм юрттэт соослы, кинъёс «Улон но ужан-тыршон» пумиськонын дышетско. Сётэм ужлы дасяськыны тӥледлы юрттоз Эксэйлык юртысь библиотека. Со понна кыл кутэ «Улон но ужан-тыршон» пумиськонэн кивалтӥсь. Со чакла, отчы выль публикациос ватсамын мед луозы но соослэн вылтуссы умой мед луоз шуыса. «Улон но ужан-тыршон» пумиськонэн кивалтӥсь яке со, кин тӥледлы Библиез дышетыны юрттэ, возьматыны быгатоз, кызьы тӥледлы кулэ луись ивортодэт шедьтоно. Кулэ ӧвӧл библиотекаысь книгаосты Эксэйлык юртысь поттыны яке гожъяськыны соос вылын. Книгаосты жаляно.

Кызьы верамын Библиын, «Инмар сярысь тодонэз» шедьтон понна, «дуно ваньбурез кадь сое шедьтыны» тыршоно (Мадёнъёс 2:1—5). Эксэйлык юртысь библиотека юрттоз тӥледлы со тодон-валанъёсты утчаны кутскыны.

• Мае шедьтыны луоз Эксэйлык юртлэн библиотекаысьтыз?

• Кин тӥледлы возьматыны быгатоз, кызьы библиотекаысь кулэ луись ивортодэт шедьтоно?

Иисус вераз аслаз дышетскисьёсызлы: «Озьы ик тӥляд но югытты адямиос азьын мед пиштоз, тӥлесьтыд ӟеч ужъёстэс мед адӟозы но Инмысь Атайдэс мед данъялозы» (Матфей 5:16). Туннэ зэмлыклэн югытэз озьы ик туала техника удысысь азинсконъёслы луыса пиштэ, кылсярысь, Интернетлы луыса. Милям интернет-ресурсамы Иеговалэн Адӟись-Ивортӥсьёсызлэн осконзы но ужзы сярысь нимлыко ивортодэт сётӥське. Мар отысь шедьтыны луоз?

Ӵем сётъяськись юанъёслы Библиысь валэктонъёс. Тӥ шедьтыны быгатоды валэктонъёс кулэ луись юанъёслы, кудъёсыз адямиосты тунсыкъяськыто. Кылсярысь, «Бырозы-а куке но курадӟонъёс?» но «Кулэм адямиос выльысь улозы-а?» буклетъёс 600-лэсь тросгес кылъёсын электрон форматъёсын вань. Озьы ик, интернет-ресурсысьтымы тӥ шедьтыны быгатоды Библиез дышетон пособиосты, брошюраосты но 130-лэсь тросгес кылъёсын «Выль дуннелэсь берыктэмзэ». Троссэ та публикациос пӧлысь луэ лыдӟыны но кылзыны онлайн, нош озьы ик скачать карыны MP3, PDF яке EPUB форматэн. Со сяна, тӥ тунсыкъяськись адямилы мае ке солэн вордскем кылыныз печатланы быгатӥськоды! Тросэз жестовой кылъёсын видеопубликациос вань. Луоз скачать карыны Библиез чеберлыко лыдӟонэз, библейской постановкаосты но шутэтскон понна чебер гуръёсты.

Иеговалэн Адӟись-Ивортӥсьёсыз сярысь зэмлыко ивортодэт. Интернет-ресурсын интыямын выль иворъёс но видеороликъёс милям ужмы сярысь пӧртэм шаеръёсын, нош озьы ик ивор со сярысь, кызьы ми шимучыръёсы сюремъёслы юрттӥськомы. Со сяна, отысь вуоно конгрессъёс сярысь тодыны но пӧртэм шаеръёсысь филиалъёсмылэсь адресъёссэс шедьтыны луоз.

Туала техника удысысь азинсконъёслы луыса, зэмлыклэн югытэз тужгес но кыдёкысь шаеръёсы но вуэ. Вань ярмуосысь, озьы ик Антарктидаысь но, адямиослэн луонлыксы кылдӥз Библиысь дышетонъёсын тодматскыны. Ми вӧсяськиськомы, быдэс дунне вылын «Кузё-Инмарлэн Ӟеч Иворез... ӝог мед вӧлмоз» шуыса, Инмарез данъян понна (2 Фессалоникаослы 3:1).

• Кызьы интернет-ресурсмы юрттэ адямиослы Библиысь зэмлыкез тодыны?

• Мар тӥляд тодэмды потэ интернет-ресурсысьтымы?